Parte 8

Say Gagala Na Dios So Mamapaarap ed Kasumpalan

1, 2. Panon a manggagawa so Dios na probisyon a mangekal ed panirap?

SAY panuley na rebelyoson totoo tan dedemonyo so mangimemedmer ed atooan a pamilya ed dakel laran siglo. Ingen, ag-impulisay na Dios iray panirap tayo. Imbes, legan na amin iran siglo, sikato so manggagawa na probisyon pian ibulos so katooan manlapud panamanlong na karelmengan tan kairapan.

² Diad panaon na rebelyon ed Eden, ginapo­wan na Dios ya iparungtal so gagala to a manibukel na sakey a gobierno a manggawa ed sayan ­dalin a sakey a paraison ayaman parad totoo. (Genesis 3:15) Saginonor, bilang hepen sangiyan na Dios, ginawa nen Jesus iyan onsasabin gobierno na Dios a tema na bangat to. Inkuanto ya atan so mogmon ilalo na katooan.​—Daniel 2:44; Mateo 6:9, 10; 12:21.

3. Anto so impanawag nen Jesus ed onsasabin gobierno ed dalin, tan akin?

³ Tinawag nen Jesus itan ya onsasabin gobierno na Dios a “say panarian na katawenan,” lapud atan so manuley ed tawen. (Mateo 4:17) Tinawag to met itan a “say panarian na Dios,” ta say Dios so Autor na atan. (Lucas 17:20) Diad loob na saray siglo pinuyanan na Dios iray managsulat to ya isulat iray propesiya nipaakar ed saraman so manibukel na atan a gobierno tan no anto so nagawaan na atan.

Say Balon Ari na Dalin

4, 5. Panon ya impanengneng na Dios a si Jesus so inabobonan ton Ari?

⁴ Ngalngalin duaran libon taon ed apalabas, si Jesus so anumpal ed dakel iran propesiyan nipaakar ed samay magmaliw ya Ari ed Panarian na Dios. Pinaneknekan to so pagmaliw a pili na Dios a Manuley na atan a mangatatawen a gobierno na katooan. Tan kayari na impatey to, pinaoli na Dios si Jesus ed bilay diad tawen bilang sakey a makapanyari, ya ag-ompatey ya espiritun pinalsa. Walara so dakel a tastasi ed inkioli to.​—Gawa 4:10; 9:1-9; Roma 1:1-4; 1 Corinto 15:3-8.

⁵ Kanian si Jesus so “yinmurong ed nikawanan a lima na Dios.” (Hebreos 10:12) Diman ya inalagar to so panaon sano sikato so ikdan na Dios na pakayarin onkiwas a bilang Ari na mangatatawen a Panarian na Dios. Sinumpal na saya so propesiya ed Salmo 110:1, ditan et ibabaga na Dios ed sikato: “Onyurong ka ed nikawanan a limak anggad ipasen koray kakabusol mo bilang gagatinan na salim.”

6. Panon ya impanengneng nen Jesus a sikato so kualipikadon magmaliw ya Ari ed Panarian na Dios?

⁶ Legan a wadia ed dalin, impanengneng nen Jesus a sikato so kualipikado ed ontan a posisyon. Anggaman ed panamasegsegang, pinili ton pansiansiaen so katooran to ed Dios. Diad impanggawa na ontan, impanengneng ton si Satanas so nantila sanen ibabaga ton anggapo so toon magmaliw a matoor ed Dios ed leksab na subok. Si Jesus, ya ayadyarin too, say ‘komaduan Adan,’ so angipanengneng a say Dios so ag-alingo ed impamalsa na ayadyarin totoo.​—1 Corinto 15:22, 45; Mateo 4:1-11.

7, 8. Antoran maabig a bengatla so ginawa nen Jesus legan a walad dalin, tan anto so indemostra to?

⁷ Siopan manuley so akapanggawa na maabig a singa say ginawa nen Jesus ed pigaran taon na ministeryo to? Diad tulong na masanton espiritu na Dios, tinambal nen Jesus so mansasakit, say lupoy, say bulag, say telek, tan say umel. Pinaoli to ni ingen so inatey! Indemostra to ed melag a kalaknab so gawaen to parad katooan ed sankagloboan a kalaknab sano sikato so onsabi ed pakayari na Panarian.​—Mateo 15:30, 31; Lucas 7:11-16.

⁸ Ontanlan kaabig so ginawa nen Jesus legan a wadia ed dalin ya inkuan nen babangatan ton Juan: “Diad tua, wala niray amayamay a bengatlan ginawa nen Jesus a no isulat ya amin a sansakeyen isipen kon anggan say mundo ed inkasikato et agto nayarian a kargaen iray lukot a nisulat.”​—Juan 21:25.a

9. Akin a saray matuan-impanpuson totoo so dinmagup ed si Jesus?

⁹ Si Jesus so mapangasi tan maabagey, a walaan na baleg a tuloy a panangaro ed totoo. Tinulongan toray duka tan nalalames, balet anggapoy ­panangiduma to ed saraman so mayaman tan walad posisyon. Saray matuan-impanpuson ­totoo so kinmiwas ed maaron imbitasyon nen Jesus sanen inkuanto: “Ondago kayo ed siak, amin yon nasasagpotan tan nabebelatan et ikdan ta kayo na pampainawa. Ala yo so pakok ed sikayo tan manaral kayo ed siak, ta mauyamo ak tan mapaabeba ak ed puso, et naromog yo so inawa ed saray kamarerwa yo. Ta say pakok mainomay tan anlemew so awit ko.” (Mateo 11:28-30) Saray matakot-ed-Dios a totoo so dinmagup ed sikato tan nanilalo ed uley to.​—Juan 12:19.

Saray Kaiban Manuley

10, 11. Sioparay kaiba nen Jesus diad panguley ed dalin?

¹⁰ Unong a say gobierno na too et walaan na saray kaiban administrador, ontan met ed mangatatawen a Panarian na Dios. Walaray arum a nilikud ed si Jesus a miulop diad panguley ed dalin, ta insipan nen Jesus ed maapit iran kaulop to a sikara so miuley ed sikato bilang arari ed katooan.​—Juan 14:2, 3; Apocalipsis 5:10; 20:6.

¹¹ Kanian, kaiba nen Jesus, so sakey a limitadon bilang na totoon napaoli met ed mangatatawen a bilay. Tugyopen da so Panarian na Dios a mangitarok na maandon bendisyon parad katooan. (2 Corinto 4:14; Apocalipsis 14:1-3) Kanian angga ed saray panaon tayo, ya inletneg nen Jehova so pundasyon parad sakey a panuley a mangitarok na andi-anggaan iran bendisyon ed atooan a pamilya.

Mangangga so Independentin Uley

12, 13. Anto so akaparaan la natan a gawaen na Panarian na Dios?

¹² Diad sayan siglo direktan akibabali so Dios ed saray kurang na dalin. Unong a singbaten na Parte 9 na sayan brosyur, ipanengneng na propesiya na Biblia a say Panarian na Dios ed leksab nen Kristo so niletneg nen 1914 tan natan et akaparaan lan maneral ed interon sistema nen Satanas. Atan a Panarian so akaparaan lan “manuley ed pegley na saray kakabusol [nen Kristo].”​—Salmo 110:2.

¹³ Nipaakar ed saya say propesiya ed Daniel 2:44 kuanto: “Dia ed saray agew naani na saratan ya arari [a wala natan] say Dios na tawen so mamaalagey naani na sakey a panarian [ed tawen] ya agbalot naderal, nisay say pananguley to et niiter ed sananey a baley [aglan balot naabuloyan so uley na too]. Atan [a Panarian na Dios] et buyaken to naani tan panganggaen to naani so saraya ya amin a panarian, tan sikato so mansiansia lawas.”​—Revised Standard Version.

14. Antoray arum a gungguna ya onsabi bilang resulta na anggaan na uley na too?

¹⁴ Diad kaekal na amin a panuley ya independenti ed Dios, say uley na Panarian na Dios ed dalin so magmaliw a sigpot. Tan lapud say Panarian so manuuley ed tawen, agbalot itan naderal na katooan. Say mananguley a pakayari so nipasen ed pasen to ed gapo, salanti ed tawen, diad Dios. Tan lapud say uley na Dios so mamanlong ed amin a dalin, anggapo la naani so siopaman a napalikdo diad panamegley na palson relihyon odino agmakapnek iran pilosopiya na too tan politikal iran teorya. Anggapo ed saratan a bengatla so niyabuloy a niwala.​—Mateo 7:15-23; Apocalipsis, kapitulo 17 ya anggad 19.

[Saray paimano ed leksab]

[Litrato ed pahina 18]

Legan a walad dalin si Jesus so anambal ed mansasakit tan amaoli ed inatey pian ipanengneng so gawaen to ed balon mundo

[Litrato ed pahina 19]

Say mangatatawen a Panarian na Dios so maneral na amin iran nengneng na uley ya independenti ed sikato