Leksion 5

Anto So Gagala na Dios ed Dalin?

Akin a pinalsa nen Jehova so dalin? (1, 2)

Akin a say dalin so aliwan paraiso natan? (3)

Anto so nagawa ed marelmeng a totoo? (4)

Diad arapen, anto so gawaen nen Jesus ed saray mansasakit? ed saray maedad la? ed inaatey? (5, 6)

Pian minabang ed arapen iran bendisyon, anto so nakaukolan mon gawaen? (7)

1. Pinalsa nen Jehova iyan dalin ta pian saray totoo so makapanggayagan manbilay ed satan ed ando lan ando. Pinalsa to so dalin pian panayaman na matunong, maliket a totoo. (Salmo 115:16; Isaias 45:18) Say dalin so agbalot naderal; satan so manbayag ed ando lan ando.​—Salmo 104:5; Eclesiastes 1:4.

2. Sakbay a pinalsa na Dios so too, amili na melag a parti na dalin tan ginawa To itan a marakdakep a paraiso. Tinawag to itan a harden na Eden. Dia to impasen so inmunan laki tan bii, si Adan tan Eva. Ginagala na Dios a sikara so nawalaan na ananak tan panoen da so interon dalin. Kalkalna et agawa ra komon so interon dalin a sakey a paraiso.​—Genesis 1:28; 2:8, 15.

3. Si Adan tan Eva so nankasalanan diad sigagagalan impamuyak ed ganggan na Dios. Kanian pinapaway ira nen Jehova ed harden na Eden. Abalang so paraiso. (Genesis 3:1-6, 23) Balet ta agnilingwanan nen Jehova so ­gagala to ed sayan dalin. Isisipan ton pagmaliwen to itan a paraiso, a panayaman na totoo ed ando lan ando. Panon ton gawaen iya?​—Salmo 37:29.

4. Sakbay a magmaliw a paraiso iyan dalin, nepeg a naekal ni marelmeng a totoo. (Salmo 37:38) Saya so ­nagawa diad Armagedon, a bakal na Dios pian panganggaen so karelmengan. Insan, nipangaw si Satanas ed loob na 1,000 taon. Kabaliksan na saya ya anggapo iray ­marelmeng a natilak a maneral ed dalin. Saray totoo na Dios lambengat so makaliktar.​—Apocalipsis 16:14, 16; 20:1-3.

5. Insan si Jesu-Kristo so man-uley bilang Ari ed interon dalin ed loob na 1,000 taon. (Apocalipsis 20:6) Kalkalna ton ekalen so kasalanan manlapud kanonotan tan laman tayo. Sikatayo so magmaliw ya ayadyarin totoo a singa si Adan tan Eva sakbay a sikaray nankasalanan. Insan anggapo lay sakit, itatatken, tan ipapatey. Saray mansasakit a totoo so onabig, tan saray maedad lan totoo so onugaw lamet.​—Job 33:25; Isaias 33:24; Apocalipsis 21:3, 4.

6. Legan na Sanlibon Taon ya Uley nen Jesus, saray matoor a totoo so mankimey pian pagmaliwen so interon dalin a paraiso. (Lucas 23:43) Ontan met, minilyon ya inaatey so napaoli ed atooan a bilay ed dalin. (Gawa 24:15) No gawaen da so kakaukolanen na Dios ed sikara, sikaray mantultuloy a manbilay ed dalin ed ando lan ando. No andi, sikaray naderal ed ando lan ando.​—Juan 5:28, 29; Apocalipsis 20:11-15.

7. Diad ontan et say orihinal a gagala na Dios ed dalin so ontalona. Labay mo ta so minabang ed sarayan arapen a bendisyon? No ontan, nakaukolan mo so mantultuloy a manaral nipaakar ed si Jehova tan ontulok ed saray kakaukolanen to. Say iyaatendi ed saray miting ed lokal iran Kingdom Hall na Tastasi nen Jehova so ontulong ed sika a manggawa na ontan.​—Isaias 11:9; Hebreos 10:24, 25.

[Litrato ed pahina 10]

Abalang a paraiso

[Saray litrato ed pahina 11]

Kayari na Armagedon, say dalin so pagmaliwen a paraiso