Leksion 6
Anto So Panarian na Dios?
Iner so kawalaan na Panarian na Dios? (1)
Siopa so Ari to? (2)
Kasin mibiang so arum diad pananguley a kaibay Ari? No ontan, pigara? (3)
Anto so mangipapanengneng a sikatayo so manbibilay ed kaunoran iran agew? (4)
Anto so gawaen na Panarian na Dios parad katooan ed arapen? (5-7)
1. Sanen wadiad dalin si Jesus, imbangat to ed saray patumbok to ya ipikasi so Panarian na Dios. Say panarian so sakey a gobierno ya idadauloan na sakey ya ari. Say Panarian na Dios so sakey ya espisyal a gobierno. Satan so niletneg ed tawen tan man-uley ed sayan dalin. Satan so mamasanto, odino manggawan masanto, ed ngaran na Dios. Satan so manumpal ed linawa na Dios ed dalin a singa agawa ed tawen.—Mateo 6:9, 10.
2. Insipan na Dios a si Jesus so magmaliw ya Ari ed Panarian To. (Lucas 1:30-33) Sanen wadiad dalin si Jesus, pinaneknekan to a sikatoy magmaliw a mapangasi, maptek, tan ayadyarin Manuley. Sanen pinmawil ed tawen, sikato so agnitrono a tampol bilang Ari ed Panarian na Dios. (Hebreos 10:12, 13) Nen 1914, inikdan nen Jehova si Jesus na autoridad ya insipan To ed sikato. Nanlapulad saman, si Jesus so manuuley la diad tawen bilang tinuro nen Jehova ya Ari.—Daniel 7:13, 14.
3. Amili met si Jehova na pigaran matoor a lalaki tan bibii manlapud dalin ya onla ed tawen. Sikaray miuley ed si Jesus bilang arari, uko-ukom, tan saserdote na katooan. (Lucas 22:28-30; Apocalipsis 5:9, 10) Tinawag nen Jesus irayan kaiban manuley ed Panarian to a “melag a pulok.” Manbilang ira na 144,000.—Lucas 12:32; Apocalipsis 14:1-3.
4. Diad bektan impagmaliw nen Jesus ya Ari, imbantak to si Satanas tan saray marelmeng ya anghel to manlapud tawen tan naplag diad kabangibang na dalin. Satan no akin a saray bengatla so nagmaliw ya ontanlan mauges ed dalin nanlapulad 1914. (Apocalipsis 12:9, 12) Saray bakal, eras, salot, idaraak na kaugsan—amin na saraya so kabiangan na sakey a “tanda” a mangipapanengneng a si Jesus so manuuley tan sayan sistema so wala lad kaunoran iran agew to.—Mateo 24:3, 7, 8, 12; Lucas 21:10, 11; 2 Timoteo 3:1-5.
5. Agla mabayag et ukomen nen Jesus iray totoo, ya ibiig tora a singa panangibiig na pastol ed saray karnero manlapud saray kanding. “Saray karnero” et saraman so paneknekan day inkasikara ed satan bilang matoor iran uuleyan to. Awaten da so andi-anggaan a bilay ed dalin. “Saray kanding” et saraman so mangipulisay ed satan ed Panarian na Dios. (Mateo 25:31-34, 46) Diad asingger ya arapen, deralen nen Jesus so amin a kinmanding. (2 Tesalonica 1:6-9) No labay mo so magmaliw a sakey ed “saray karnero” nen Jesus, nepeg mon talinengen so mensahe na Panarian tan onkiwas a mitunosan ed naaaralan mo.—Mateo 24:14.
6. Natan et say dalin so naapag-apag ed dakel a bansa. Kada sakey so walaan na dili ton gobierno. Sarayan nasyon so mabetbet a manlalabanan. Balet say Panarian na Dios so manalat ed amin a gobierno na too. Satan so manuley bilang say alenleneg a gobierno ed interon dalin. (Daniel 2:44) Insan anggapo la’d satan so bakal, krimen, tan karawalan. Amin a totoo so saniiban manbilay ed kareenan tan pankakasakey.—Miqueas 4:3, 4.
7. Legan na Sanlibon Taon ya Uley nen Jesus, saray matoor a totoo so magmaliw ya ayadyari, tan say interon dalin so magmaliw a sakey a paraiso. Diad sampot na sanlibon taon, asumpal la’d satan nen Jesus so amin a bengatlan pagagawa na Dios ed sikato. Insan ipalima ton ipawil so Panarian ed Ama to. (1 Corinto 15:24) Akin ya agmo ibaga ed kakaarom tan inad-arom so gawaen na Panarian na Dios?
[Litrato ed pahina 13]
Diad silong na uley nen Jesus, anggapo lay gulaan odino panangiduma-duma