Leksion 8
Bilay na Pamilya a Mamaliket ed Dios
Anto so posisyon na asawan laki ed pamilya? (1)
Panoy nepeg a pantrato na asawan laki ed asawa to? (2)
Antoray responsabilidad na ama? (3)
Anto so betang na asawan bii ed pamilya? (4)
Anto so kakaukolanen na Dios ed atateng tan ed ananak? (5)
Antoy panmoria na Biblia ed pisisian tan diborsyo?(6, 7)1
1. Ibabaga na Biblia a say asawan laki so ulo na pamilya to. (1 Corinto 11:3) Say asawan laki so nepeg a walaan labat na saksakey ya asawa. Nepeg a sikaray kasal unong ed ley.—1 Timoteo 3:2; Tito 3:1.
2. Nepeg ya aroen na asawan laki so asawa to a singa ed panangaro to ed inkasikaton dili. Nepeg ton tratoen a singa ed impantrato nen Jesus ed saray papatumbok to. (Efeso 5:25, 28, 29) Nakaukolan ya agton balot sakitan so asawa to odino maltratoen diad antokaman a paraan. Imbes, nepeg ton panengnengan na galang tan respeto.—Colosas 3:19; 1 Pedro 3:7.
3. Say ama so nepeg a mankimey ya impasya pian naasikaso toy pamilya to. Nepeg toy mangitarya na tagano, kawesen, tan ayaman parad asawa tan ilalak to. Say ama so nepeg met a mangitarya parad espiritual a pankaukolan na pamilya to. (1 Timoteo 5:8) Sikatoy mangidadaulo diad panulong ed pamilya to a manaral nipaakar ed Dios tan saray gagala To.—Deuteronomio 6:4-9; Efeso 6:4.
4. Say asawan bii so nepeg a magmaliw a maong a katulongan na asawa to. (Genesis 2:18) Nepeg ton asistian so asawa to ed panbangat tan panangipasal ed ananak da. (Uliran 1:8) Kakaukolanen nen Jehova so asawan bii a mangasikaso ed pamilya to diad simamaaron paraan. (Uliran 31:10, 15, 26, 27; Tito 2:4, 5) Nepeg toy walaan na aralem a respeto parad masiken to.—Efeso 5:22, 23, 33.
5. Kakaukolanen na Dios so ananak ya ontulok ed atateng da. (Efeso 6:1-3) Iilaloan toray atateng a bilinen tan korehien so ananak da. Nakaukolan a mangusar iray atateng na panaon a kaibay ananak da tan iyaral so Biblia ed sikara, ya aasikasoen so espiritual tan emosyonal iran pankaukolan da. (Deuteronomio 11:18, 19; Uliran 22:6, 15) Ag-balot disiplinaen na atateng so ananak da diad maruksa tan masebeg a paraan.—Colosas 3:21.
6. Sano say sanasawa so walaan na saray problema nipaakar ed pakapanpetekan, nepeg dan panggunaetan ya iyaplika so konseho na Biblia. Papasesegen itayo na Biblia a mangipanengneng na aro tan magmaliw a manamerdona. (Colosas 3:12-14) Ag-ipapaseseg na Salita na Dios so pansian bilang paraan ed panolbar na ankelag iran problema. Balet nayarin pilien na asawan bii a taynanan toy asawa to no (1) sikato so nampaawet ya agmanlegpet ed pamilya to, (2) sikato so marawal a tuloy a say bunigas tan bilay na akulaw to so walad kapeligroan, odino (3) say pirmin isusumpa to so agmamapaposibli ed sikato a mandayew ed si Jehova.—1 Corinto 7:12, 13.
7. Saray sanasawa so nepeg a manmatoor ed sakey tan sakey. Say pikakalugoran so kasalanan sumpad Dios tan sumpad asawa na sakey. (Hebreos 13:4) Say pirerelasyonan ed sekso ed labas na panangasawa so mogmon Makasulatan a basiyan parad diborsyo a mangiyaabuloy ed pangasawa lamet. (Mateo 19:6-9; Roma 7:2, 3) Kagula nen Jehova so totoon mandiborsyo ya anggapoy Makasulatan a sengegan tan mangasawa na sananey.—Malaquias 2:14-16.
[Saray litrato ed pahina 16, 17]
Iilaloan na Dios iray atateng a mamilin ed ananak da tan mangorehi ed sikara
[Litrato ed pahina 17]
Say sakey a maaron ama so mangitatarya ed pamilya to ed materyal tan espiritual a paraan