Leksion 9

Saray Ariripen na Dios so Nepeg a Malinis

Akin a nepeg tayo so magmaliw a malinis ed amin a paraan? (1)

Anto so kabaliksan na pagmaliw a malinis ed espiritual? (2) malinis ed moral? (3) malinis ed mental? (4) malinis ed pisikal? (5)

Antoran nengneng na agmalinis a panagsalita so nepeg tayon paliisan? (6)

1. Si Jehova a Dios so malinis tan masanto. Iilaloan toray managdayew to a mansiansian malinis​—ed espiritual, moral, mental, tan ed pisikal a paraan. (1 Pedro 1:16) Satan so mankakaukolan na peteg a sagpot pian makapansiansian malinis ed imaton na Dios. Manbibilay itayo ed agmalinis a mundo. Walaan itayo met na pipupuligesgesan sumpad dili tayon tendensya a manggawa na mauges. Balet ta nepeg ya agtayo onsuko.

2. Espiritual a Kalinisan: No labay tayo so manlingkor ed si Jehova, ag-itayo makapantultuloy a mamenben ed dinanman a bangat odino kustombre na palson relihyon. Nepeg tayo so ompaway ed palson relihyon tan agsusuportaan itan ed antokaman a paraan. (2 Corinto 6:14-18; Apocalipsis 18:4) Bektaman a naaralan tayo so katuaan nipaakar ed Dios, nepeg tayo so manalwar ed pakabalang lapud ibabangat a katilaan na totoo.​—2 Juan 10, 11.

3. Moral a Kalinisan: Labay nen Jehova a saray managdayew to so onkiwas bilang tuan Kristianos ed amin a panaon. (1 Pedro 2:12) Nanenengneng toray amin a bengatlan gagawaen tayo, anggan diad maamot. (Hebreos 4:13) Nepeg tayon paliisan so seksual ya imoralidad tan arum ya agmalinis ya agagamil na sayan mundo.​—1 Corinto 6:9-11.

4. Mental a Kalinisan: No panoen tayo iray kanonotan tayo na malinis, puron kaisipan, say kondukta tayo so magmaliw met a malinis. (Filipos 4:8) Balet no nonoten tayo iray agmalinis a bengatla, satan so manresulta ed marelmeng iran gawa. (Mateo 15:18-20) Nepeg tayon paliisan iray porma na panliliket a nayarin maneral ed kanonotan tayo. Nayarian tayon panoen so kanonotan tayo na malinis iran kaisipan diad panaral ed Salita na Dios.

5. Pisikal a Kalinisan: Lapud irerepresenta ra so Dios, nepeg a pansiansiaen na Kristianos a malinis so lamalaman da tan panagkawes da. Kaukolan tayon urasan so kalimaan tayo kayari pangusar na kasilyas, tan kaukolan itayon manuras sakbay a mangan odino mamenben na tagano. No andian kayo na suston bantakan, saray dutak na kasilyas so nepeg ya ikotkot. (Deuteronomio 23:12, 13) Say pansiansian malinis ed pisikal so ontulong ed maabig a bunigas. Say ayaman na Kristiano so nepeg a masimpit tan malinis ed loob tan ed paway. Kaukolan a satan so panuliranan ed komunidad.

6. Malinis ed Panagsalita: Saray ariripen na Dios so nepeg a lawas mansalita na katuaan. Saray matila so agmakaloob ed Panarian na Dios. (Efeso 4:25; Apocalipsis 21:8) Agmanguusar na mauges a lenguahe iray Kristiano. Ag-ira ontatalineng odino mangibabaga na marutak iran lurey odino agmalinis iran istorya. Lapud malinis a panagsalita ra, sikaray nibibiig a duma diad pantratrabahoan odino diad eskuelaan tan ed kakaabay.​—Efeso 4:29, 31; 5:3.

[Saray litrato ed pahina 18, 19]

Saray ariripen na Dios so nepeg a magmaliw a malinis ed amin a pamaakaran