Leksion 10
Agagamil a Kagula na Dios
Antoy liknaan mo nipaakar ed saray bengatlan ibabaga na Dios a mauges? (1)
Antoran klase na seksual a kondukta so mauges? (2)
Panon so nepeg a panmoria na Kristiano ed panagtila? (3) panagsugal? (3) panagtakew? (3) karawalan? (4) espiritismo? (5) panagbuanges? (6)
Panon a makalukpos so sakey a too manlapud mauges ya agagamil? (7)
1. Saray ariripen na Dios so mangaaro ed maong. Balet nepeg da met ya aralen a gulaen so mauges. (Salmo 97:10) Kabaliksan na satan so ipaliis ed pigaran agagamil a kagula na Dios. Antoray pigara ed saratan ya agagamil?
2. Pilalawanan: Say sekso sakbay na kasal, pikakalugoran, pirelasyonan ed ayayep, insesto, tan homoseksualidad et amin so seryoson kasalanan sumpad Dios. (Levitico 18:6; Roma 1:26, 27; 1 Corinto 6:9, 10) No say duara so agkasal balet ta manaamong, sikaray nepeg a mansian odino legal a manpakasal.—Hebreos 13:4.
3. Panagtila, Panagsugal, Panagtakew: Agmakapantila si Jehova a Dios. (Tito 1:2) Saray totoo a malabay na panangabobon to so nepeg ya ompaliis ed panagtila. (Uliran 6:16-19; Colosas 3:9, 10) Kada nengneng na panagsugal so alaokan na agum. Kanian saray Kristiano so agmibibiang ed antokaman a klase na pagsugal, a singa say loterya, lumbay kabayo, tan bingo. (Efeso 5:3-5) Tan agmantatakew iray Kristiano. Sikaray agmansasaliw na amta ran tinakew a kayarian odino mangalay bengabengatla ya anggapoy permiso.—Exodo 20:15; Efeso 4:28.
4. Petang na Sanok, Karawalan: Say agnakontrol a sanok so nayarin mansumpal ed saray gawan karawalan. (Genesis 4:5-8) Say marawal a too so agmagmaliw a kaaro na Dios. (Salmo 11:5; Uliran 22:24, 25) Mauges so ibales odino pangipawil na kaugsan parad mauges iran bengatla a nayarin gawaen na arum ed sikatayo.—Uliran 24:29; Roma 12:17-21.
5. Mahiko Iran Gawa tan Espiritismo: Arum a totoo so ompapanon ed pakayari na saray espiritu pian salien a tambaley sakisakit. Pataneman na arum iray kabusol da pian mansakit ira odino ipapatey nira ingen. Say pakapanyari a walad benegan na sarayan agagamil et si Satanas. Kanian saray Kristiano so agnepeg a mibiang ed dinanman ed saratan. (Deuteronomio 18:9-13) Say pansiansian maapit ed si Jehova so sankaabigan a proteksyon manlapud tanem a nayarin idapo ed sikatayo na arum.—Uliran 18:10.
6. Panagbuanges: Aliwan mauges so iyinum na daiset ya alak, beer, odino arum a de-alkohol ya iinumen. (Salmo 104:15; 1 Timoteo 5:23) Balet say alablabas a panag-inum tan panagbuanges so mauges ed imaton na Dios. (1 Corinto 5:11-13; 1 Timoteo 3:8) Say paninum na alablabas so makaderal na bunigas mo tan mamuyak ed pamilyam. Satan so pansengegan met na isukon tampol ed saray tukso.—Uliran 23:20, 21, 29-35.
7. Saray totoon mangaagamil na ontan iran bengatlan ibabaga na Dios a mauges so “agmakatawir ed panarian na Dios.” (Galacia 5:19-21) No talagan inarom so Dios tan labay mon paliketen, sika so makalukpos ed sarayan agagamil. (1 Juan 5:3) Aralen so panggula ed no anto so ibabaga na Dios a mauges. (Roma 12:9) Milimog ed totoo a walaan na maridios iran ugali. (Uliran 13:20) Saray matatken a Kristianon kaulop so napaneknekan a magmaliw a lapuan na tulong. (Santiago 5:14) Nagkalalo ed amin, onsaral ed tulong na Dios diad panamegley na pikakasi.—Filipos 4:6, 7, 13.
[Saray litrato ed pahina 20, 21]
Kagula na Dios so panagbuanges, panagtakew, panagsugal, tan saray gawan karawalan