LEKSION 14

Papaliisan na Kakaaro na Dios so Mauges

Tutuksoen nen Satanas iray totoo a manggawa na mauges iran bengatla. Nakaukolan a gulaen met na sakey a too a malabay a magmaliw a kaaro na Dios so kagula nen Jehova. (Salmo 97:10) Niraya so pigaran bengatla a paliisan na saray kaaro na Dios:

Saray aglabay nen Jehova kaiba lay seksual ya imoralidad, panagbuanges, aborsyon, panagtakew, agnakontrol a pasnok, tan panagsugal

Kasalanan ed Sekso. “Agka manlawan.” (Exodo 20:14) Say pisekso antis na kasal et mauges met.—1 Corinto 6:18.

Panagbuanges. “Saray managbuanges . . . agda natawir so panariay Dios.”—1 Corinto 6:10.

Panagpatey, Aborsion. “Agka mamatey.”—Exodo 20:13.

Panagtakew. “Agka mantakew.”—Exodo 20:15.

Panagtila. Kagula nen Jehova so “matila a dila.”—Uliran 6:17.

Karawalan tan Agnakontrol a Sanok. “[Siopaman] a labalabay to so karamsakan gulaen nen [Jehova].” (Salmo 11:5) “Saray gawa na laman [laktipen toy] . . . sanok.”—Galacia 5:19, 20.

Panagsugal. “Agki miulop ed bengatlan too a . . . maagum.”—1 Corinto 5:11.

Pambubusolan Lapud Rasa tan Etniko. “Aroen yo ray kabusol yo, tan pikasi [yo so] saray mamasegsegang ed sikayo.”—Mateo 5:43, 44.

Saray bengatlan ibabaga ed sikatayo na Dios et parad pankaabigan tayo. Aliwan lawas mainomay a paliisan so panggawa ed mauges iran bengatla. Diad tulong nen Jehova tan ed tulong na saray Tastasi to, nayarian mon paliisan so panggawa ed saray bengatlan kainglit na Dios.—Isaias 48:17; Filipos 4:13; Hebreos 10:24, 25.