Gagawaen na Saray Kaaro na Dios so Maong

Sano walay kaarom a pandidinayewan tan rerespetoen mo, panggugunaetan mo so magmaliw a singa sikato. “Maong tan matunong si Jehova,” so ibabaga na Biblia. (Salmo 25:8) Pian magmaliw a kaaro na Dios, nepeg a magmaliw itayon maong tan matunong. Ibabaga na Biblia: “Aligen yo sirin so Dios, singa anak to kayon inararo; Tan mankurang kayo ed aro.” (Efeso 5:​1, 2) Niraya so pigaran dalan ed panggawa’d satan:

Magmaliw a matulong ed arum. “Manggawa itayo na maabig ed saray amin.”​—Galacia 6:10.

Mankuli. “Saman so nantatakew nensaman agkomon la mantakew: noag mansagpot, a gawaen na saray lima-lima to so bengatla a makapaabig.”​—Efeso 4:28.

Mansiansian malinis ed pisikal tan moral. “Linisan tayo komon so inkasikatayon dili ed ami’ tilol na laman tan espiritu, a yadyarien itayo na kasantosan dia ed takot ed Dios.”​—2 Corinto 7:1.

Tratoen moray membro na pamilyam tekep na aro tan respeto. “Balang sakey aroen to so dilin asawa to a bii a singa dilin laman to; et imanoen to komon a say asawan bii nepeg ton takotan so asawa to. Sikayon anak, ontulo’kayo ed saray kaatatengan yo.”​—Efeso 5:33–6:1.

Ipanengneng so panangaro ed arum. “Manaaroan so sakey tan sakey ed sikatayo; ta say aro kien na Dios.”​—1 Juan 4:7.

Tuloken iray ley na bansa. “Ontulok komon so balang kamarerwa ed [gobierno] . . . Bayaran yo so nabebetangan da ya amin: say buis dia ed akanbetang na buis.”​—Roma 13:​1, 7.