LEKSION 16

Ipanengneng Moy Panangarom ed Dios

Laki ya manpipikasi tan manbabasa na Biblia

Pian sikatoy napansiansiam a kaaro, kaukolan moy mitongtong ed sikato. Ontalineng ka ed sikato, tan sikatoy ontalineng ed sika. Ibagam met ed arum iray maong a bengatla nipaakar ed kaarom. Ontan met ed pagmaliw a kaaro na Dios. Konsideraen pa so ibabaga na Biblia nipaakar ed saya:

Maparanay a mitongtong ed si Jehova diad pikakasi. “Mansiansia a malet ed pikakasi.”—Roma 12:12.

Basaen so Salitay Dios, say Biblia. “Amin a Sulat ya impuyan na Dios sikato met so maabig a pakaaralan, pakasumalan, pakasimbawaan.”—2 Timoteo 3:16.

Bangatan so arum nipaakar ed Dios. “Onla kayo sirin, tan manggawa kayo na saray babangatan ed amin a nasyones, . . . ya ibangat yo ran mangunor na amin a bengabengatla ya ingganggan ko ed sikayo.”—Mateo 28:19, 20.

Duaran Tasi nen Jehova ya pupulongan day sakey ya laki

Onapit ed saray kaaro na Dios. “Miulop ka ed saray makabat a totoo, et sika naani makabat.”—Uliran 13:20.

Atendian iray miting diad Kingdom Hall. “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; . . . mansisimbawaan [“manpapasesegan,” NW] itayo.”—Hebreos 10:24, 25.

Suportaan so kimey na Panarian. “Balang sakey [iter] to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.”—2 Corinto 9:7.