Mauges so Panagmadyik tan Panananem

Labay nen Satanas a mangagamil ka na madyik. Dakel so mangiyaatang parad saray inmuunan atateng da odino ed saray espiritu pian protektaan day inkasikara manlapud pakasakitan. Gagawaen da iya lapud tatakotan da iray pakayarin manlalapud pasen na saray espiritu. Mansusulong ira na saray singsing odino purselas a de-galing. Mantutumar ira odino pupuyokan daray laman da na “saray tambal” ya ipapasen dan makasombra. Diad saray abung da odino diad dalin da, arum a totoo so mangiyaamot na saray bengatlan panisiaan dan makaprotekta. Arum so manguusar na mamilagron “tambal” lapud panisiaan dan mangitarok itan na italona ed negosyo, saray eksamin ed eskuelaan, odino panagkaraw.

Say sankaabigan a proteksion sumpad si Satanas et say pakapikaaro ed si Jehova. Si Jehova a Dios tan saray anghel to so makapanyarin tuloy nen say si Satanas tan saray demonyo to. (Santiago 2:19; Apocalipsis 12:9) Magunaet si Jehova a mangipanengneng na biskeg to nisengeg ed saray kaaro to​—saraman so sigpot a matoor ed sikato.​—2 Awaran 16:9.

Ibabaga na Salitay Dios: ‘Agkayo mangagamil na panagparles [“madyik,” NW].’ Kokondenaen nen Jehova so panagmadyik tan panananem lapud saratan ya agamil so direktan mangipasen ed sakey ed silong na pakapanyari nen Satanas a Diablo.​—Levitico 19:26.