Anto so Nagawa diad Ipatey?

Say patey so kasunian na bilay. Say patey et singa maitlep ya ugip. (Juan 11:​11-14) Saray inaatey so agla makarengel, agla makanengneng, agla makapansalita, nisay makapannonot ni na antokaman. (Eclesiastes 9:​5, 10) Ibabangat na palson relihyon a saray inaatey et onla ed espiritun ayaman pian manbilay a kaiba na inmuunan atateng da. Aliwan ontan so ibabangat na Biblia.

Ag-itayo natulongan na saramay inaatey la, tan agda itayo napasakitan. Kaslakan la parad totoo so panggawa na saray ritual tan panangiyatang a papanisiaan dan mamaliket ed saramay inaatey la. Saya so makapaermen ed Dios lapud nibase itan ed sakey ed saray katilaan nen Satanas. Agmet napaliket iray inaatey ed satan, lapud andian laray bilay. Agtayo nepeg a takotan odino dayewen iray inaatey. Nepeg tayo labat a dayewen so Dios.​—Mateo 4:10.

Nabilay lamet iray inaatey. Liingen nen Jehova iray inaatey ed bilay diad paraison dalin. Diad arapen ni itan a panaon. (Juan 5:​28, 29; Gawa 24:15) Nayarian na Dios a liingen iraman so inaatey la no panon a sarasarag mon liingen so sakey a toon naugip.​—Marcos 5:​22, 23, 41, 42.

Say ideyan ag-itayo ompatey et sakey a katilaan ya inkayat nen Satanas a Diablo. Paniisipen nen Satanas tan saray demonyo to iray totoo a saray espiritu na inaatey et mabilay ni tan sarag day mamawala na sakit tan arum niran problema. Papalikdoen nen Satanas iray totoo, no maminsan et diad panamegley na saray kugip tan pasingawey. Kokondenaen nen Jehova iraman so manasalin mitongtong ed inaatey.​—Deuteronomio 18:​10-12.