Ipulisay so Palson Relihyon!

Aglabay nen Satanas tan saray demonyo to a manlingkor ka ed Dios. Labay dan pabenegen so siopaman manlapud Dios no nayarian da. Panon dan panggugunaetan a gawaen iya? Say sakey a paraan et diad panamegley na palson relihyon. (2 Corinto 11:​13-15) Palso so sakey a relihyon no agto ibabangat so katuaan manlapud Biblia. Say palson relihyon et singa bogus a kuarta​—singa tudtua, balet satan so andiay balor. Pamproblemaan mo ni ingen itan.

Say inkapalso na relihyon so agbalot mamaliket ed si Jehova, say Dios na katuaan. Sanen wadiad dalin si Jesus, wala so sakey a relihyoson grupo a malabay a mamatey ed sikato. Inisip dan duga so paraan na panagdayew da. Inkuan da: “Wala so sakey ya Ama mi, salanti Dios.” Kasin inmabobon si Jesus? Andi! Inkuanto ed sikara: “Sikayo kien kayo na ama yo a Diablo.” (Juan 8:​41, 44) Natan et isipen na dakel a totoo a dadayewen da so Dios, balet diad tua et sikaray manlilingkor ed si Satanas tan saray demonyo to!​—1 Corinto 10:20.

No panon a say makapuy a kiew et manbunga na makapuy a bunga, say palson relihyon so mamawala na totoon manggagawa na mauges iran bengatla. Say mundo so napno na kaguloan lapud mauges iran bengatlan gagawaen na totoo. Wadtan so imoralidad, panlalaban, panagtakew, panaglames, panagpatey, tan panagpasoot. Dakel a manggagawa’d sarayan mauges a bengatla so walaan na relihyon, balet say relihyon da et agmamapakiwas ed sikaran manggawa na maong. Ag-ira nayarin magmaliw a kakaaro na Dios likud no itunda ray panggagawa ray mauges iran bengatla.​—Mateo 7:​17, 18.

Ibabangat na palson relihyon iray totoo a manpikasi ed saray talintao. Ibabaga na Dios ya agmanpipikasi ed saray talintao. Makatunongan iya. Kasin panliketan mo no say sakey et agbalot mitongtong ed sika balet ta mitongtong labat ed litratom? Kasin satan a too et magmaliw a tuan kaarom? Andi, agnayari. Labay nen Jehova a mitongtong iray totoo ed sikato, aliwan ed sakey ya estatua odino sakey a litrato, ya andian na bilay.​—Exodo 20:​4, 5.

Ibabangat na palson relihyon ya agmauges so pamatey ed arum no panaoy guerra. Inkuan nen Jesus a saray kaaro na Dios so nawalaan na aroan ed limog da. Agtayo pateyen iray totoon aaroen tayo. (Juan 13:35) Aliwan maong ni ingen parad sikatayo a pateyen so mauges a totoo. Sanen saray kabusol nen Jesus so linman mangerel ed sikato, agto inabuloyan iray babangatan to a milaban pian sikatoy iyagel da.​—Mateo 26:​51, 52.

Ibabangat na palson relihyon a saray marelmeng so manirap ed impierno. Ingen, ibabangat na Biblia a say kasalanan so sengegan na ipapatey. (Roma 6:23) Si Jehova so Dios na aro. Kasin say maaron Dios et pairapen toy totoo ed ando lan ando? Siempre andi! Diad Paraiso, wala labat so saksakey a relihyon, sakey ya aabobonan nen Jehova. (Apocalipsis 15:4) Amin a relihyon a nibase ed katilaan nen Satanas so naandi la.