Leksion 12

Panangipanengneng na Respeto ed Bilay tan Dala

Panoy nepeg tayon panmoria ed bilay? (1) ed aborsyon? (1)

Panoy pangipapanengneng na saray Kristiano a sikaray manonot ed inkaligen? (2)

Kasin mauges so pamatey na ayayep? (3)

Antoray pigaran agagamil ya agmangipapanengneng na panagrespeto ed bilay? (4)

Antoy ganggan na Dios ed dala? (5)

Kasin ilalaktip na saya so panangiyalis na dala? (6)

1. Si Jehova so Subol na bilay. Amin a mabilay a bengatla et otang day bilay da ed Dios. (Salmo 36:9) Say bilay so sagrado ed Dios. Anggan say bilay na agni-nianak ya ugaw ed eges na ina to so mabli ed si Jehova. Say sigagagalan pamatey ed ontan a natitibukel ya ugaw so kasalanan ed imaton na Dios.​—Exodo 21:22, 23; Salmo 127:3.

2. Saray tuan Kristiano so manonot ed inkaligen. Seseguroen da a saray kotse ra tan saray ayaman da so agmakarisgo. (Deuteronomio 22:8) Saray ariripen na Dios so agmangiririsga ed bilay da lapu labat ed likeliket odino panliketan. Kanian sikaray agmibibiang ed marawal iran esport a sigagalan mamasakit ed arum a totoo. Papaliisan da so panliliket a mangipapaseseg na karawalan.​—Salmo 11:5; Juan 13:35.

3. Say bilay na ayep so sagrado met ed Manamalsa. Nayarin say sakey a Kristiano so mamatey na ayayep a mangitarok na tagano tan kawesen odino pian protektaan so inkasikato manlapud sakit tan kapeligroan. (Genesis 3:21; 9:3; Exodo 21:28) Balet mauges so lingon pantrato ed ayayep odino pamatey ed saratan lapu lambengat ed esport odino likeliket.​—Uliran 12:10.

4. Say panagsigarilyo, panaggagal, tan panagdruga parad likeliket so sebel ed saray Kristiano. Sarayan agagamil so mauges lapud (1) gagawaen da itayon ariripen da, (2) saratan so mamasakit ed lamalaman tayo, tan (3) saratan so agmalinis. (Roma 6:19; 12:1; 2 Corinto 7:1) Nayarin mairap so pangitunda ed sarayan niugali. Balet nepeg tayon gawaen itan pian napaliket si Jehova.

5. Say dala so sagrado met ed imaton na Dios. Ibabaga na Dios a say kamarerwa, odino bilay, so walad dala. Kanian mauges so pangan na dala. Mauges met so pangan na karne na ayep ya agsuston aparalaan. No say sakey ya ayep so abitkel odino inatey ed kalot, satan so agnepeg a kanen. No satan so apana odino apaltog, kaukolan a naparalaan itan a tampol no satan so kanen.​—Genesis 9:3, 4; Levitico 17:13, 14; Gawa 15:28, 29.

6. Mauges ta so pangawat na panangiyalis na dala? Tandaan, kakaukolanen nen Jehova ya onarawi itayo ed dala. Kabaliksan na saya ya ag-itayo nepeg a mangiloob ed laman tayo ed dinanman a paraan na dala na arum a totoo odino anggan say dilin dala tayo ya impreserba. (Gawa 21:25) Kanian saray tuan Kristiano so agmangawat ed panangiyalis na dala. Sikaray mangawat na arum a nengneng na medikal a panagtambal, a singa say panangiyalis na anggapoy dala iran produkto. Kaliktan da so manbilay, balet ta agda salien ya isalba so bilay da diad pamuyak ed saray ganggan na Dios.​—Mateo 16:25.

[Saray litrato ed pahina 25]

Pian napaliket so Dios, nepeg tayon paliisan so panangiyalis na dala, agmalinis iran niugali, tan agkapilitan iran panangirisga