Kasin Oniay Labay na Dios ya Nagawa?

NO MANBASA ka na anggan dinan a dyaryo, man-TV, odino ondengel ed radyo, dakdakel so balita nipaakar ed krimen, guerra, tan terorismo! Isip mo pa ray mismon pakakaaburidoan mo. Ompan mapagpaga kan maong lapud pansasakit odino impatey na sakey ya inad-arom ed bilay. Nayarin naliknam met so alikna na maong a toon si Job, ya kuan ton “napno ak na kababaingan tan kairapan.”—Job 10:15.

Tepetan mo pay sarilim:

Kasin oniay labay na Dios ya nagawad siak tan ed amin a totoo?
Antoy makatulong pian nasarag ko ray problemak?
Onsabi ni kasi panaon ya magmaliw a mareen so mundo?

Mangiiter so Biblia na susto tan makapaliket iran ebat ed saratan a tepet.

IBABANGAT NA BIBLIA YA GAWAEN NA DIOS IRAYAN PANANGUMAN DIAD DALIN.

“Punasen to so amin a lua ed kamataan da, tan anggapo lay patey, anggapo met lay panermen tan panakis tan panotot.”—Apocalipsis 21:4

“Onlukson singa ulsa so piley.”—Isaias 35:6

“Makanengneng la ray . . . bulag.”—Isaias 35:5

“Amin a walad pakanodnonotan iran lubok et . . . ompaway.”—Juan 5:28, 29

“Anggapoy manaayam ditan a mangibagay: ‘Mansasakit ak.’”—Isaias 33:24

“Dakdakel so anien ya ilik diad dalin.”—Salmo 72:16

Saray pananguman ya ginawa na Dios diad mundo: Unugaw so matatken, onabig so mansasakit tan makanengneng la ray bulag, ombilay iray inaatey, dakdakel so naakan

SARAY NAGUNGGONA ED IBABANGAT NA BIBLIA

Agmo komon iisipen a tampol ya singa imposiblin nagawa iray nipanengneng ed inmuunan pahina. Impromisa na Dios ya gawaen to iratan, tan ipapaliwawa na Biblia no panon ton gawaen iratan.

Manaaral na Biblia so duaran laki ya uusaren da so libron Ibabangat na Biblia

Balet dakel ni so nagunggona ed Biblia. Wadtan iray praktikal a paraan pian natan ni labat et na-enjoy mo lay bilay. Isip mo pan magano iray pakakaaburidoan mo tan problemam. Nayarin kaibad saratan so problemad kuarta, pamilya, sakit, odino impatey na inad-aro. Makatulong ed sika so Biblia pian nasarag mo ray problema natan, tan mangiiter itan na makaligliwa iran ebat ed sarayan tepet:

Akin et maniirap itayo?
Panon tayon nasarag iray problema?
Antoy nagawaan tayo pian magmaliw a mas maliket so pamilya tayo?
Antoy nagawad sikatayo no ompatey itayo?
Kasin nanengneng tayo lamet iray inaatey lan inad-aro tayo?
Panon tayon naseguro ya tooren na Dios iray impromisa to?

Ipapanengneng na pambabasam ed sayan libro ya labay mon naamtaan no antoy ibabangat na Biblia. Makatulong ed sika iyan libro. Nanengneng mo dia ya kada parapo et walay tepet tod leksab. Labalabay na minilyon a totoo iyan tepet tan ebat a paraan diad panaaral day Biblia ed saray Tasi nen Jehova. Seguradon na-enjoy mo met itan. Komon ta bendisyonan na Dios so makapalikliket ya panaaral mo ed no anton talagay ibabangat na Biblia!