Say Pribilehyo Tayon Manpikasi

1, 2. Parad sika, akin ya espisyal a regalo so pikakasi, tan akin ya kaukolan tayon amtaen so ibabaga na Biblia nipaakar ed satan?

NO IKOMPARA ed uniberso, say dalin et melmelanting. No onnengneng si Jehova ed dalin, saray totoo ed saray nasyon et singa labat sankatedter a danum ed timba. (Salmo 115:15; Isaias 40:15) Anggano melmelanting tayo no ikomparad uniberso, ibabaga na Salmo 145:18, 19: “Si Jehova et asingger ed amin ya ontatawag ed sikato, amin ya ontatawag ed sikato diad katuaan. Pepeneken to so pirawat na saramay ontatakot ed sikato; dedengelen to so ikekerew day tulong, tan ililiktar to ra.” Marakdakep itan ya pribilehyo! Si Jehova, say makapanyarin-amin ya Amalsa, et labay toy magmaliw ya maapit ed sikatayo tan labay ton dengelen iray pikakasi tayo. On, say pikakasi et pribilehyo odino espisyal a regalo nen Jehova ed sikatayon amin.

² Balet, dengelen itayo labat nen Jehova no mitongtong tayod sikato diad paraan ya aabobonan to. Panon tayon nagawaan itan? Nengnengen tayoy ibabaga na Biblia nipaakar ed pikakasi.

AKIN ET MANPIKASI KA ED SI JEHOVA?

3. Akin et kaukolan ya manpikasi ka ed si Jehova?

³ Labay nen Jehova ya manpikasi o mitongtong ka ed sikato. Panon tayon amta? Ipangasin basaen so Filipos 4:6, 7. Isip mo pa itan ya maaron imbitasyon. Say Manuley na uniberso et interesado ed pankaabigan mo tan labay ton ibagam ed sikato no antoy naliliknam, pati saray problemam.

4. Panon ya ontulong so naynay ya pampikasi ed si Jehova pian onelet so pikakaarom ed sikato?

⁴ Ontulong so pikakasi pian onelet so pikakaaro tayod si Jehova. No lanang ya pantotongtongan na sankaaro iray iisipen, pampapagaan, tan nalilikna da, mas onelet so pankakaaro da. Ontan met ed panagpikasi ed si Jehova. Panamegley na Biblia, impaamta tod sika so iisipen tan nalilikna to, tan impaamta to met ed sika so gawaen to ed arapen. Sarag mo met ya ibagad sikato so amin ya naliliknam tan nononoten mo diad naynay ya pitongtong mo ed sikato. Legan mon gagawaen itan, lalon oneelet so pikakaarom ed si Jehova.​—Santiago 4:8.

ANTOY NEPEG TAYON GAWAEN PIAN DENGELEN ITAYO NA DIOS?

5. Panon tayon amta ya wala ray pikakasin agdedengelen nen Jehova?

⁵ Kasin dedengelen nen Jehova so amin ya pikakasi? Andi. Diad panaon nen propeta Isaias, oniay imbaga nen Jehova ed saray Israelita: “Anggano dakerakel so pikakasi yo, agko dedengelen iratan; saray lima yo et napnoy dala.” (Isaias 1:15) Kanian no agtayo manalwar, ompan makagawa tayo na mangiyarawi ed sikatayo ed si Jehova, tan lapud satan et agto dengelen iray pikakasi tayo.

6. Akin et importante so pananisia? Panon mon napaneknekan ya walay pananisiam?

⁶ No labay tayon dengelen nen Jehova iray pikakasi tayo, kaukolan ya walay pananisia tayod sikato. (Marcos 11:24) Oniay impaliwawa nen apostol Pablo: “No anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.” (Hebreo 11:6) Balet agmagenap so pangibaga ya walay pananisia tayo. Nepeg tayon paneknekan so pananisia tayo diad inagew-agew ya pangunor ed si Jehova.​—Basaen so Santiago 2:26.

7. (a) Akin et nepeg ya mapaabeba tan marespeto so pampikasi tayod si Jehova? (b) Panon tayon nipanengneng ya masimoon so pikakasi tayo?

⁷ Nepeg ya mapaabeba tan marespeto so pampikasi tayod si Jehova. Akin? No mitongtong tayod ari odino presidente, nepeg ya marespeto itayo. Si Jehova so Makapanyarin-amin a Dios, kanian agta duga labat ya mas marespeto tan mapaabeba itayo no mitongtong tayod sikato? (Genesis 17:1; Salmo 138:6) Kaukolan met ya masimoon tan manlapud puso so pikakasi tayod si Jehova, aliwan basta uulit-uliten labat iray impatlep ya salita.​—Mateo 6:7, 8.

8. No walay ipipikasi tayo, antoy nepeg tayon gawaen?

⁸ Tan kaunoran, no walay ipikasi tayod si Jehova, nepeg ya pansagpotan tayon gawaen so ipipikasi tayo. Singa bilang, no ipipikasi tayod si Jehova ya iter toy inagew-agew a pankaukolan tayo, nepeg ya agtayo mangiras tan agtayo iilaloan ya iter lan amin nen Jehova anggano sarag tayo met ya pankimeyan. Kaukolan tayoy mankuli tan awaten so anggan anton trabaho ya sarag tayon gawaen. (Mateo 6:11; 2 Tesalonica 3:10) Odino, no ipipikasi tayod si Jehova ya tulongan to tayon itunda so makapuy a kagagawa, nepeg tayon arawian so amin ya situasyon a posiblin pakatuksoan tayo. (Colosas 3:5) Pantongtongan tayo natan so arum ed saray maslak ya tepet nipaakar ed pikakasi.

SARAY MASLAK YA TEPET NIPAAKAR ED PIKAKASI

9. Siopay nepeg tayon pampikasian? Antoy naaralan tayod Juan 14:6 nipaakar ed pikakasi?

⁹ Siopay nepeg tayon pampikasian? Imbangat nen Jesus iray papatumbok to ya manpikasi ed ‘Ama tayo a walad tawen.’ (Mateo 6:9) Imbaga to met: “Siak so dalan tan say katuaan tan say bilay. Anggapoy makasabi ed Ama no aliwan diad panamegley ko.” (Juan 14:6) Kanian, say nepeg tayon pampikasian et si Jehova panamegley nen Jesus. Antoy labay ya ibaga na pampikasi panamegley nen Jesus? Pian awaten nen Jehova iray pikakasi tayo, nepeg tayon respetoen so espisyal ya posisyon ya inter nen Jehova ed si Jesus. Singa naaralan tayo la, linma diad dalin si Jesus pian iliktar itayo ed kasalanan tan patey. (Juan 3:16; Roma 5:12) Sikato met so tinuro nen Jehova bilang Atagey a Saserdote tan Ukom.​—Juan 5:22; Hebreo 6:20.

10. Kasin walay kakaukolanen ya posisyon no manpikasi tayo? Ipaliwawa.

¹⁰ Kasin walay kakaukolanen ya posisyon no manpikasi tayo? Anggapo. Ag-imbaga nen Jehova ya kaukolan ya akatalimukor, akayurong, odino akaalagey itayo. Ibabangat na Biblia ya sarag tayoy mitongtong ed si Jehova ed anggan anton marespeton posisyon. (1 Awaran 17:16; Nehemias 8:6; Daniel 6:10; Marcos 11:25) Aliwan say posisyon tayo legan ya manpipikasi so mas importante ed si Jehova, noagta say marespeto tan manlapud puso ya pitotongtong tayo. Sarag tayoy manpikasi ya sankarengel odino diad isip labat inerman so kawalaan tayo tan anggan anton oras, agew man o labi. No manpikasi tayod si Jehova, makapanmatalek tayo ya dengelen to itayo anggano ag-itayo labay ya dengelen na arum.​—Nehemias 2:1-6.

11. Anto ray sarag tayon ipikasi ed si Jehova?

¹¹ Anto ray sarag tayon ipikasi? Sarag tayon ipikasi so amin ya unong ed panlabayan nen Jehova. Ibabaga na Biblia: “Antokaman so kekerewen tayo unong ed linawa to, dedengelen to itayo.” (1 Juan 5:14) Kasin sarag tayon ipikasi iray personal a bengatla? On. Say pampikasi ed si Jehova et singa pitongtong ed maapit a kaaro. Sarag tayon ibagad si Jehova so amin ya walad nonot tan puso tayo. (Salmo 62:8) Sarag tayon ipikasi ya ikdan to tayoy mabiskeg ya masanton espiritu to ya ontulong ed sikatayon gawaen so duga. (Lucas 11:13) Sarag tayo met ya kerewen ed si Jehova ya ikdan to tayoy karunongan pian makapanggawa tayoy dugan desisyon, tan sarag tayon ipikasi ya ikdan to tayoy biskeg pian nasarag tayo ray problema. (Santiago 1:5) Nepeg tayon kerewen so panamerdona nen Jehova ed saray kasalanan tayo. (Efeso 1:3, 7) Kaukolan tayo met ya ipikasi so arum, kaiba la ray kapamilya tayo tan saray agagi ed kongregasyon.​—Gawa 12:5; Colosas 4:12.

12. Antoy nepeg ya sankaimportantian ya ipikasi tayo?

¹² Antoy nepeg ya sankaimportantian ya ipikasi tayo? Say nipaakar ed si Jehova tan say linawa to. Nepeg ya impapuso tayon pisalamatan si Jehova ed amin ya ginawa to parad sikatayo. (1 Awaran 29:10-13) Amta tayo iya lapud nen wadiad dalin si Jesus, imbangat to ray disipulo to no panon so pampikasi. (Basaen so Mateo 6:9-13.) Imbaga to ya nepeg tayon ipikasin unona ya napasanto so ngaran na Dios. Kabaliksan na satan ya ipasen tayon sagrado o masanto so ngaran to. Insan imbaga nen Jesus ya nepeg tayon ipikasi so isabi na Panarian na Dios tan say pakagawa na linawa nen Jehova diad interon dalin. Imbaga nen Jesus ya kayari tayon ipikasi iratan ya importantin bengatla, insan tayo la ipikasi iray personal ya pankaukolan tayo. No diad pikakasi tayo et iyuuna tayo si Jehova tan say linawa to, ipapanengneng tayo no antoy sankaimportantian ed sikatayo.

13. Panon so nepeg ya karukey na pikakasi tayo?

¹³ Panon so nepeg ya karukey na pikakasi tayo? Anggapoy ibabaga na Biblia. Saray pikakasi tayo et nayarin antikey o andukey, depende ed situasyon. Singa bilang, nayarin antikey labat so pikakasi tayo antis ya mangan, balet mas andukey no pisalamatan tayoy Jehova odino no ibaga tayod sikato iray kapagaan tayo. (1 Samuel 1:12, 15) Agtayo paparukeyen iray pikakasi tayo pian labat pabiliben iray ondedengel, a singa ginawa na arum ed panaon nen Jesus. (Lucas 20:46, 47) Agnaliliketan si Jehova ed saray ontan ya pikakasi. Say importante ed si Jehova et manlapud puso so pikakasi tayo.

14. Panon kabetbet so nepeg ya pampikasi tayo, tan antoy ibabangat na satan nipaakar ed si Jehova?

¹⁴ Panon kabetbet so nepeg ya pampikasi tayo? Papasesegen itayo nen Jehova ya naynay tayon mitongtong ed sikato. Ibabaga na Biblia ya nepeg ya ‘agtayo ontutundan manpikasi,’ ‘manseet tayod pikakasi,’ tan ‘naynay tayon manpikasi.’ (Mateo 26:41; Roma 12:12; 1 Tesalonica 5:17) Naynay ya akaparaan si Jehova ya ondengel ed sikatayo. Sarag tayon pisalamatan ya inagew-agew lapud panangaro tan inkamaiter to. Sarag tayo met so onkerew na panangigiya, biskeg, tan ligliwa. No talagan papablien tayo so pribilehyo tayon manpikasi ed si Jehova, anamoten tayo so amin ya pankanawnawa tayon mitongtong ed sikato.

15. Akin et nepeg tayon ibaga so “amen” diad sampot na pikakasi?

¹⁵ Akin et nepeg tayon ibaga so “amen” diad sampot na pikakasi? Say labay ya ibaga na “amen” et “segurado,” odino “ontan pa komon.” No ibaga tayo itan, ipapanengneng tayon seryoso tan nanlapud puso so pikakasi tayo. (Salmo 41:13) Ibabangat met na Biblia ya maabig so pangibaga na “amen,” balanglan makalna o sankarengel, diad sampot na pikakasi ed publiko pian nipanengneng tayon miabobon tayo ed impikasi.​—1 Awaran 16:36; 1 Corinto 14:16.

NO PANON YA EEBATAN NA DIOS IRAY PIKAKASI

16. Talaga kasin eebatan nen Jehova iray pikakasi tayo? Ipaliwawa.

¹⁶ Talaga kasin eebatan nen Jehova iray pikakasi tayo? On. Diad Biblia et sikatoy tinukoy ya “Dumerengel na pikakasi.” (Salmo 65:2) Dedengelen tan eebatan nen Jehova so impapuson pikakasi na minilyon ya totoo, tan gagawaen to itan ed nanduruman paraan.

17. Panon ya uusaren nen Jehova iray anghel tan saray lingkor to diad dalin pian ebatan iray pikakasi tayo?

¹⁷ Uusaren nen Jehova iray anghel tan saray lingkor to diad dalin pian ebatan iray pikakasi tayo. (Hebreo 1:13, 14) Dakdakel so eksperiensya na totoon nampikasi pian natalosan day Biblia, tan ag-abayag et walay binmisita ed sikara ya Tasi nen Jehova. Ipapanengneng na Biblia ya mibibiang iray anghel ed pangiyaabawag ed “maong a balita” diad interon dalin. (Basaen so Apocalipsis 14:6.) Ontan met, dakel ed sikatayo so nampikasi ed si Jehova nipaakar ed sakey ya espisipikon problema o pankaukolan tan kayari na satan et akaawat tayoy tulong manlapud sakey ya kaagian tayo.​—Proverbio 12:25; Santiago 2:16.

18. Panon ya uusaren nen Jehova so masanton espiritu to tan say Biblia pian ebatan iray pikakasi tayo?

¹⁸ Uusaren nen Jehova so masanton espiritu to pian ebatan iray pikakasi tayo. No ipikasi tayon tulongan to tayo ed problema tayo, nayarin usaren toy masanton espiritu to pian igiya tan pabiskegen itayo. (2 Corinto 4:7) Uusaren met nen Jehova so Biblia pian ebatan iray pikakasi tayo tan tulongan itayon manggaway dugan desisyon. No basaen tayoy Biblia, nayarin makalmo tayo na teksto ya makatulong ed sikatayo. Sarag met ya pakiwasen nen Jehova so sakey ya kaagian a mangikomento diad aral na punto ya dugarugad pankaukolan tayo, odino sakey ya elder ed kongregasyon ya manginabang ed sikatayo na makatulong a punto ed Biblia.​—Galacia 6:1.

19. Akin ya no maminsan et singa agni inebatan nen Jehova iray pikakasi tayo?

¹⁹ Balet no maminsan, ompan naisip tayo, ‘Akin kasi et agni inebatan nen Jehova so pikakasik?’ Tandaan, amta to no kapigan tan no panon ton ebatan iray pikakasi tayo. Amta to ray pankaukolan tayo. Ompan kaukolan tayo nin tuloytuloy ya ipikasi itan pian nipanengneng tayo ya talagan seryoso tayo ed ipipikasi tayo tan talagan walay pananisia tayod sikato. (Lucas 11:5-10) No maminsan, eebatan nen Jehova iray pikakasi tayo diad paraan ya agtayo iilaloan. Singa bilang, nayarin ipikasi tayo so sakey ya mairap a kipapasen, balet imbes ya ekalen to so problema, nayarin ikdan to tayo na biskeg ya naanosan itan.​—Basaen so Filipos 4:13.

20. Akin et nepeg ya naynay itayon manpikasi ed si Jehova?

²⁰ Talagan marakdakep ya pribilehyo a sarag tayoy manpikasi ed si Jehova! Makaseguro itayo ya dengelen to tayo. (Salmo 145:18) Tan no mas mabetbet itayon impapuso ya manpikasi ed si Jehova, lalon onelet so pikakaaro tayod sikato.