LEKSION 05
Say Biblia et Mensahe na Dios ed Sikatayo
Walay balibalin regalo nen Jehova ed sikatayo—66 ya libro ya impaniiba, say Biblia. Pero, ompan isipen mo: ‘Nanlapuan na Biblia? Siopay autor to?’ Pian naebatan iratan, pantongtongan tayo no panon ya akasabi ed sikatayo so mensahe na Dios ya walad Biblia.
1. No totoo so nansulat ed Biblia, akin balet et say Dios so Autor?
Manga 40 ya lalaki so nansulat ed Biblia, diad ngalngali 1,600 ya taon, manlapud 1513 B.C.E. anggad manga 98 C.E. Nandurumay kabibilay tan binalegan na saray nansulat ed Biblia. Pero, agmankokontraan iray insulat da. Akin ey? Lapud say Autor na Biblia et say Dios. (Basaen so 1 Tesalonica 2:13.) “Saray sinalita na totoo et nanlapud Dios legan iran igigiya na masanton espiritu.”a (2 Pedro 1:21) Kanian agda insulat so sarili dan ideya. Inusar na Dios so masanton espiritu to pian ipasulat ed saray totoo so iisipen to.—2 Timoteo 3:16.
2. Siopa ray walay Biblia?
Say “kada nasyon tan tribu tan lenguahe tan rasa” so nayarin natulongan na maong a balita ya walad Biblia. (Basaen so Apocalipsis 14:6.) Sinegurado na Dios ya say Biblia et nabasa ed dakel ya lenguahe, mas dakel ni nen say anggan anton klase na libro. Amin lawarin totoo et walay Biblia to. Anggan iner so kawalaan to tan anggan antoy lenguahe to.
3. Panon ya prinotektaan nen Jehova so Biblia?
Saray inusar ya angisulatan na Biblia et mainomay ya naderal, singa say katat na ayep tan papel ya papiro. Balet, wala ray lalaki ya manu-mano dan kinopya so Biblia tan sinegurado dan duga iratan. Sinali na saray maimpluensyan totoo ya deralen so Biblia, balet wala ray totoo ya prinotektaan da itan anggano napeligro so bilay da. Anggapoy makapatunda ed si Jehova ya ipaamta so mensahe to ed sikatayo. Ibabaga na Biblia: “Say salita na Dios tayo et mansiansia ya anggad angga.”—Isaias 40:8.
DAKEL NI NAARALAN MO
Amtaen no panon ya impaisulat na Dios ed totoo so Biblia, tan no panon ton prinotektaan itan pian nabasa na totoo.
4. Ipapaamta na Biblia so Autor to
I-play so VIDEO. Insan basaen so 2 Timoteo 3:16, tan ebatan iraya.
No totoo so nansulat na Biblia, akin balet et tinawag itan ya Salita na Dios?
Manisia ka ya sarag na Dios ya ipaamta iray mensahe to ed saray nansulat na Biblia?
Say secretary so pinanggawa na sulat, balet samay mensahe ya insulat to et nanlapu ed samay angidikta ed sikato. Ontan met, totoo so nansulat na Biblia, balet say mensahe et nanlapud Dios
5. Aprotektaan so Biblia anggan dakel so kinmontra
No say Biblia et nanlapud Dios, seguradon protektaan to itan. Manlapu la nensaman, wala ray maimpluensyan totoo ya sinali dan deralen tan patundaen so pangibubunog na Biblia. Aglabay na saray lider na relihyon ya nabasa na totoo so Biblia. Balet, anggano dakel so onkokontra tan tinaktakot da ran pateyen, siansian dakel so totoo ya angipeligroy bilay da pian naprotektaan so Biblia. Pian naamtaan tayoy agawad sakey ya laki, i-play so VIDEO, insan ebatan iraya.
Natan ta antam la no antoy ginawa pian naprotektaan so Biblia, kasin labay mo lan basaen? Akin ey?
Basaen so Salmo 119:97, insan ebatan iya:
Akin et dakel so totoon malabay ya mangipatalos tan mangibunog ed Biblia anggano nipeligro so bilay da?
6. Libro ya parad amin
Say Biblia so libro ya sankarakelan ya nipapatalos tan nibubunog. Basaen so Gawa 10:34, 35, insan ebatan iraya:
Akin et labay na Dios ya nipatalos ed dakel ya lenguahe tan ibunog so Biblia?
Antoy labalabay mo ed Biblia?
Ngalngali
100%
ed populasyon na mundo
so nayarin makabasa na Biblia diad lenguahen natalosan da
Walad masulok ya
3,000
lenguahe
so kompleto o arum a parte
5,000,000,000
Say tantiya ya bilang na Biblia ya nibunog,
mas dakel ni nen say anggan dinan ya libro
IBABAGA NA ARUM: “Karaanan la ’tay Biblia tan totoo lanlamang so nansulat.”
Antoy nibagam ey?
Anto ray ebidensya ya say Biblia et Salita na Dios?
SUMARYO
Say Biblia et Salita na Dios, tan sinegurado to ya nabasa itan na anggan siopa.
Rebyu
Panon ya impaisulat na Dios ed totoo so Biblia?
Antoy pambiliban mo ed impanprotekta, pangipapatalos, tan pangibubunog ed Biblia?
Antoy aliknam nen naamtaan mon nanggaway paraan so Dios pian nakatongtong ka?
DISKOBRIEN
Basaen so history na Biblia—no panon ya akasabid sikatayo iray karga na orihinal ya manuscript.
“Panon ya Nipreserba so Biblia Anggad Panaon Tayo Natan?” (Onliing!-E, Nobyembre 2007)
Amtaen no panon ya aprotektaan so Biblia kanian wala ni itan anggad natan.
“Say Biblia—Akin et Nipreserba?” (Say Panag-bantayan No. 4 2016)
Bantayan no anto ray peligro ya naeksperiensya na arum ya totoo pian ipatalos so Biblia.
Say Biblia et paulit-ulit ya kinopya tan impatalos ed dakel ya lenguahe. Panon kan makaseguro ya duga nin siansia so karga na satan?
“Kasin Nauman La o Asalatan so Karga na Biblia?” (Artikulo ed website)
a Ipaliwawa ed Leksion 07 ya say masanton espiritu et say aktibon puersa na Dios.