Introduksion

Sayan publikasyon ya Manpaigiya ed Saray Prinsipyo na Biblia et ginawa pian mainomay mon naanap iray teksto tan salaysay ed Biblia ya ontulong pian nasarag mo ray subok. Naanap mo met ed saya iray dugarugan teksto ed Biblia ya nausar mo pian napaseseg so arum tan natulongan iran makapanggawa na desisyon ya mamagalang ed si Jehova. Pilim may topic ya kailangan mo, ta wala ra ditay tepet tan sumaryo na saray salaysay ed Biblia ya makatulong ed sika. (Nengnengen so kahon ya “No Panon ya Usaren Iyan Publikasyon.”) Dakdakel so naalmom ditan ya mausa-usar iran bilin, panangigiya, tan ligliwa ya manlalapud Salita na Dios. Nanengneng mo met iray punton balibalin ibaga ed arum. Singa bilang, saray teksto ya mamalemew na liknaan da, makatulong ed saray problema da, mamaseseg tan manimbawa ed sikara.

No Panon ya Usaren Iyan Publikasyon

Pian naanap so sakey ya topic, sarag mon usaren so search box odino nengnengen itan diad saray kategorya. Say Manpaigiya ed Saray Prinsipyo na Biblia et inapag ed pitoran kategorya: Subok, Kondukta, Kongregasyon, Kabibilay, Pamilya, Espiritualidad, tan Kualidad. Nayarin naromog mo so topic ya aanapen mo ed sakey ed sarayan kategorya. Kanian pilim no anton kategorya, tan anap mo ditan may topic. Pero no agka segurado no iner ya kategorya, pindoten so Amin tan anap mo ditan may topic ya kailangan mo. Diad kada topic, wala ray sentence odino tepet ya mabakat iray letra to. Insan diad leksab et wala ray teksto ya mabakat met iray letra to. Legan mon babasaen iray teksto, dalepdep mo no antoy koneksion da ed samay sentence odino no panon dan eebatan so tepet. Naimanom met ya wala ray arum ya topic ya say karga da et inapag ed seksion pian mas mainomay mon naromog iray impormasyon ya aanapen mo. No maminsan et walay “Nengnengen met so,” ya ditan et wala ray kaaruman nin teksto ya mikonektaan ed topic. Diad maslak ya topic, nanengneng mo so “(Saray) Alimbawa ed Biblia.” Akakarga ditan iray teksto tan sentence ya mangipapaliwawad manunan punto odino leksion ya naaralan mo. Legan mon babasaen so teksto, nengneng mo no antoy koneksion to ed samay sentence pian nalinewan ka.

Siempre, aliwan amin ya teksto ya onkonekta ed aanapen mon topic et wadiad sayan publikasyon. Pero balibali iyan pangigapoan mod pan-research mo. (Pro 2:1-6) Pian dakel ni naaralan mo, usar mo ray marginal reference tan saray study note diad New World Translation of the Holy Scriptures ya available ed lenguahen natatalosan mo. Nayarim met ya usaren so Giya ed Pan-research na Saray Tasi nen Jehova odino Watch Tower Publications Index pian lalom ya natalosan so labay ya ibaga na sakey ya teksto tan no panon mon iyaplika itan. Nengneng mo ray sankabaloan ya im-publish ya publikasyon pian naanap iray updated ya pakatalos ed katuaan ya walad Biblia.

Komon ta makatulong so Manpaigiya ed Saray Prinsipyo na Biblia pian naanap mo so karunongan, kakabatan, tan pakatalos ya walad Masanton Kasulatan. Legan mon uusaren iyan publikasyon, lalo kan nakombinsi ya “say salita na Dios et mabilay tan makapanyari.”—Heb 4:12.