Oktubre

Kasin no maminsan et nanairapan kan ontulok odino onunor? Anggan si Arin David et alikna to met itan kanian oniay impikasi tod Dios: “Pakiwas mo ak pan mabulos ya ontulok ed sika.” (Sal. 51:12) Inar-aro nen David si Aman Jehova, pero no maminsan et nanairapan ya onunor. Nasasali tayo met itan. Akin kasi? Unona, ag-itayo perpekto kanian say labay na puso tayo et manggaway aliwa. Komadua, iimpluensyaan itayo nen Satanas ya manrebelde pian magmaliw tayon singa sikato. (2 Cor. 11:3) Komatlo, maksil met so impluensya na sayan mundo. Dakel natan so “agmatulok” tan ipasoot day labay da. (Efe. 2:2) Kanian kaukolan tayon labanan so makasalanan ya puso tayo, si Satanas, tan say impluensya na sayan mundo pian naunor tayoy Jehova tan saramay inikdan to na autoridad. w23.10 6 ¶1

Antoy naaralan tayod si Jesus nen pinagmaliw ton alak so danum? Makaaral tayo ed kapaabebaan to. Agto inlastog so ginawa to. Diad tua, anggano dakdakel so agawaan to nen wadiad dalin, agton balot inlastog iratan. Lanang ton ipapaarap so dayew ed Ama to. (Juan 5:​19, 30; 8:28) Aligen tayoy Jesus. Agtayon balot ipapasirayew iray nagagawaan tayo, tan aliwa komon ya atagtagey so pakanengneng tayod sarili tayo. Say ipasirayew tayo et si Aman Jehova, ta inikdan to tayoy pribilehyon makapanlingkor ed sikato. (Jer. 9:​23, 24) Singa ginawa nen Jesus, ipaarap tayod si Jehova so amin ya dayew. Diad tua, wala tay nagawaan tayo no anggapoy tulong nen Aman Jehova? (1 Cor. 1:​26-31) On, no mapaabeba tayo, agtayo la ipapaamta ed arum so ginawa tayon kamaongan, ta agtayo labay ya sikatayo so narayew. Ayos labat anggano ag-itan nakabatan na arum, ta amta tayon anengneng tan papablien nen Jehova so ginawa tayo. (Ikompara so Mateo 6:​2-4; Heb. 13:16) Tandaan, napapaliket tayoy Aman Jehova no aaligen tayoy kapaabebaan nen Jesus.—1 Ped. 5:6. w23.04 4 ¶9; 5 ¶11-12

Pinaseseg nen apostol Pablo iray Kristiano ya isipen day pankaabigan na arum. Panon tayo yan naiyaplika diad aral? Nipanengneng tayo ya sankanonot tayoy pankaabigan na arum no tandaan tayo ya labay da met so mankomento, ya singa sikatayo. Isip mo pa: No kaistoryaan mo ray kakaarom, kasin marakep no sikan lanang so mansasalita tan agmo la ra pasaleten? Siempre andi! Pasublayen mo met iran mangistorya. Ontan met ed aral. Labay tayo ya anggad posible et amayamay so makapankomento. Diad tua, say sakey ya paraan pian napaseseg tayo ray agagi et no ikdan tayo ray tsansa ya mankomento pian naibalikas day pananisia ra. (1 Cor. 10:24) Kanian maabig no antikey labat so komentom pian dakel ni ray makapankomento. Ontan met, iwasan moy mangibaga na dakdakel ya punto. No ikomentom ya amin so walad parapo, anggapo lay iyebat na arum. w23.04 22-23 ¶11-13

Komon ta agtayo lilingwanan so ontulong ed arum, lalo lad ministeryo. Importante ya flexible tayo met ed ministeryo. Saray nakakatongtong tayon totoo et nandurumay relihyon, ugali, tan panagbilay da. Maong ya alimbawa si apostol Pablo ta marunong ya mibagay. Sikato so pinili nen Jesus ya “apostol ed saray nasyon” kanian nanduruman lahi tan klase na totoo so pinulongan to. (Roma 11:13) Wala ray apulongan ton Judio, Griego, ordinaryon totoo, matatalino, opisyal na gobierno, tan anggan arari ni ingen. Akibagay si Pablo ed “amin a klase na totoo” pian ontagos ed puso ra so mensahe na Panarian. (1 Cor. 9:​19-22) Inkonsidera toy kultura, panagbilay, tan papanisiaan da. Singa si Pablo, magmaliw tayo met ya epektibo ed ministeryo no amta tayon ibagay so presentasyon tayo ed saray napupulongan tayo. w23.07 23 ¶11-12

Ibabaga na arum ya no maulimek ka, makapuy ka. Pero aliwan tua itan, ta dapat mabiskeg so liknaan mo pian nakontrol moy sarilim anggano makapataranta so situasyon. Say inkaulimek et kaiba ed “bunga na espiritu.” (Gal. 5:​22, 23) Say Griegon salita ya inusar parad “inkaulimek” et ontutukoy no maminsan ed maatap ya kabayo ya apaamo la. Anggano maamo la, mabiskeg nin siansia. Sikatayo ran totoo ey? Panon tayon naipanengneng so inkaulimek ya nalikas balet na arum ya mabisbiskeg so liknaan tayo? Nagawaan tayo itan no manpikasi tayod si Jehova tan kerewen tayo so espiritu to. Ipikasi tayo ya naipanengneng tayo komon itan ya balibalin ugali. Apatunayan la na dakel ya aliwan imposible so maging maulimek. Singa bilang, dakel ya agagi tayo so nansiansian mahinahon anggano wala ray labay day midebati ed sikara. Saray aka-obserba ed inkaulimek da et manbilib laingen ed ugali na saray Tasi.—2 Tim. 2:​24, 25. w23.09 14 ¶3

Diad makapakelkelaw ya pasingawey, walay anengneng nen apostol Juan ya 24 ya mamatatken diad tawen ya ondadakmomo tan mandadayew ed si Jehova. Imbaga da ya si Jehova so karapat-dapat ya mangawat na “gloria tan galang tan pakayari.” (Apo. 4:​10, 11) Anggan saray matoor ya anghel et dakel so rason dan irayew si Jehova. Kaiba day Jehova diad tawen kanian kabkabat dan maong. Lapud naoobserbaan da ray kualidad to ed amin ya gagawaen to, agda napigilan so sarili da ya mangirayew ed sikato. (Job 38:​4-7) Labay tayo met ya irayew si Jehova diad saray pikakasi tayo. Ibaga tayod sikato no antoy labalabay tayon ugali to tan no akin ya balbaleg so respeto tayod sikato. No manbabasa kay Biblia o manpe-personal study ka, isip mo no anto ran kualidad o ugali nen Jehova so naaralan mo tan no antoy pambiliban mo ed sikato. (Job 37:23; Roma 11:33) Insan ibagam ed sikato no antoy epekto na satan ed sika. Agmo met lilingwanan ya irayew si Jehova lapud pangaasikaso tod sika tan ed amin ya agagi.—1 Sam. 2:​1, 2. w23.05 3-4 ¶6-7

Nen 1919, imbulos nen Jehova iray lingkor to manlapud Makapanyarin Babilonia. Diad satan met lanlamang ya taon, tinuro nen Jesus so “matoor tan makabat ya aripen.” (Mat. 24:​45-47) Dugaruga so timing to lapud wala la ray onggagapo ya manaakar diad “Dalan na Kasantosan.” (Isa. 35:8) Misatsalamat tayo ed maseet tan makulin impankimey na nanduruman totoo ya angiparaan ed satan ya dalan! Lapud sikara, saramay manaakar ditan et mas mainomay da lan nakabat si Jehova tan say gagala to. (Pro. 4:18) Amta da met la no panon dan umanen so kabibilay da ta malinew lad sikara no antoy panlabayan nen Jehova. Pero siempre, ag-iilaloan nen Jehova ya maminpinsan dan nauman iray kaukolan dan umanen. Diad inlabas na saray taon, sandaraiset ton pinino iray lingkor to. Tatalaranan tayo lay panaon ya amin ya gawaen tayo et makapaliket lan amin ed Dios! Saray literal ya karsada et kailangan ya mintinaen ya lanang. Ontan met so gagawaen nen Jehova ed “Dalan na Kasantosan.” Manlapu nen 1919, dakdakel so ginawa na organisasyon to pian mas dakel so natulongan ya makapaway ed Makapanyarin Babilonia. w23.05 17 ¶15; 19 ¶16

Saray mismon membro na Mananguley ya Ulop so mangipapasal ed saray brother ya katulongan na nanduruman committee na Mananguley ya Ulop. Natan ni labat et ambelat la ran responsabilidad so makulikulin gagampanan na sarayan katulongan. A-train iran maong, kanian baleg so tiwala tayo ya sarasarag dan asikasoen tan idaulo iray karnero nen Kristo no wala lad tawen so amin ya alanaan. Anggano kasagsagan na baleg a kairapan tan wala lad tawen so amin ya alanaan, makapantiwala tayo ya agbalot ontunda so dugan panagdayew diad dalin. Tuloytuloy tayon idaulo nen Kristo diad panagdayew tayod si Jehova. Tua, atakien itayo na alyansa na saray bansa, say Gog na Magog. (Eze. 38:​18-20) Pero ompalpak so plano ra. Agda tayon balot napatunda ya mandayew ed si Jehova. Seguradon iligtas to tayo! Diad sakey ya pasingawey, anengneng nen apostol Juan so “baleg ya ulop” na arum a karnero nen Kristo. Naamtaan nen Juan ya sayan “baleg ya ulop” et “nanlapud baleg a kairapan.” (Apo. 7:​9, 14) On, akapropesiya la ed Biblia ya makaligtas iray matoor ya lingkor na Dios! w24.02 5-6 ¶13-14

Antoy gawaen tayo pian naawat tayoy masanton espiritu? Espisipiko tayon kerewen itan no manpipikasi tayod si Jehova, basaen tan aralen tayo so Biblia, tan mansiansia tayon aktibo ed kongregasyon. No gawaen tayo iratan ya amin, nipanengneng tayo so “bunga na espiritu.” (Gal. 5:​22, 23) Tandaan tayo ya say pangiiteran labat nen Jehova na masanton espiritu et saramay malinis so iisipen tan kagagawa ra. Bawien itan nen Jehova no marutak lay panagnonot tan kagagawa tayo. (1 Tes. 4:​7, 8) Agtayo met dapat ibabaliwala o “leleglemewen iray propesiya.” (1 Tes. 5:20) Say tutukoyen dia ya “propesiya” et saray mensahe ya inter nen Jehova panamegley na masanton espiritu. Kaiba ed satan so propesiya ya manbibilay tayo lad kaunoran iran agew tan say isabi na Armagedon. “Leleglemewen” tayo itan ya propesiya no diad isip tayo et singa tayo ipo-postpone so Armagedon ta iisipen tayon mabayag ni itan. Diad kabaliktaran, papepelesen tayoy isabi na Armagedon no ‘sankanonot tayo itan ya lanang,’ no malinis iray kagagawa tayo, tan no lanang tayon busy ed kimey nen Jehova.—2 Ped. 3:​11, 12. w23.06 12 ¶13-14

Panon to no walay bigla labat ya linmetaw ya bastos ya litrato diad gadyet tayo? Ipaliis tayon tampol so mata tayo tan agtayo la itan papawilen ya nengnengen. Atan ya tampol so gawaen tayo no sankanonot tayo so mabmablin relasyon tayod si Jehova. Diad tua, wala ray litrato ya agmet ipapasen ya pornograpiya, pero ompan bilayen toy pilalek tayo ed sex. Akin et iwasan tayo met iratan? On ta no ituloy tayon nengnengen itan, ompan imadyinen tayo lay sarili tayo ya manggagaway imoral. No ontan, singa tayo la akikalugoran. Agtayo labay itan ya gawaen anggan diad isip ni labat. (Mat. 5:​28, 29) Oniay imbaga nen Brother David ya elder ed Thailand: “Iisipen ko, ‘Kasin naliketan si Jehova no ituloy kon nengnengen iyan litrato anggano agmet iya pornograpiya?’ Atan so sankanonot ko pian agak natukson onnengneng.” On, ag-itayo natukson manggaway aliwa no walay takot tayo ed si Jehova tan agtayo labay ya napaermen. Say takot ed si Jehova so “gapoan” o pinagka-pundasyon “na karunongan.” w23.06 23 ¶12-13

Say posiblin tutukoyen na “saray kuarto” et saray kongregasyon. Im-promise nen Jehova ya protektaan to tayo diad baleg ya kairapan no agtayo onsian ed organisasyon to. Importante sirin ya natan ni labat et pabiskegen tayo lay panangaro tayo ed saray agagi. Ta diad baleg ya irap, ompan ditan akasalalay no kasin makaligtas tayo o andi! Amin ya totoo et manirap no onsabi lay “baleg ya agew nen Jehova.” (Sof. 1:​14, 15) Anggapoy exempted—anggan sikatayo ran lingkor nen Jehova et nairapan met. Pero no manri-ready tayo la natan parad baleg a kairapan, kalmado tayo labat no onsabi la itan tan natulongan tayo met so arum. Mananos tayo antokaman so subok. Ipanengneng tayoy malasakit tan mansakripisyo tayo pian natulongan tayo ray agagin maniirap. Tan agtayon balot onikban ed saray agagi ta inar-aro tayo ra. No ontan so gawaen tayo, seguradoen nen Jehova ya panliketan tayoy bilay ya andi-anggaan diad balon mundo, ya ditan et agtayo lan balot nanonotan iray problema tan kairapan ya dinadalan tayo!—Isa. 65:17. w23.07 7 ¶16-17

No babasaen tayo ray salaysay ed Biblia tungkol ed saray matoor ya lingkor na Dios nensaman, say naiimadyin tayo et makmakpel tan mabisbiskeg ira. Pero diad tua, wala ray panaon ya kinmapuy met ira. Singa bilang, imbaga nen David ya no maminsan et sikatoy ‘mabiskeg ya singa palandey,’ pero wala met iray panaon ya sikatoy “tinmakot.” (Sal. 30:7) Si Samson et kabkabat ed ekstraordinaryon biskeg to, pero amta to ya nanlapu itan ed si Jehova. Inamin to ya no anggapoy tulong na Dios, ‘naandi so biskeg to tan onkapuy.’ (Ukom 14:​5, 6; 16:17) On, si Jehova so nampabiskeg ed sarayan lingkor to. Binidbir met nen apostol Pablo ya kakkaukolan toy biskeg ya manlalapud si Jehova. (2 Cor. 12:​9, 10) Wala ray problema tayo natan ya dinalan to met. Singa bilang, wala ray inanosan ton sakit. (Gal. 4:​13, 14) No maminsan et nanairapan met kunon gawaen so duga. (Roma 7:​18, 19) Tan wala ray panaon ya aburidon maong tan natatakot no antoy nagawa ed sikato. (2 Cor. 1:​8, 9) Pero imbaga to: “No kapigan a makapuy ak, diman ak mabiskeg.” Akin et ontan so imbaga to? On ta no onkukulang lay biskeg nen Pablo, wadtan si Aman Jehova ya mangaarum na biskeg to. w23.10 12 ¶1-2

Kasin abebbeba so pakanengneng mod sarilim? No on, agmo komon lilingwanan ya inyasingger kan mismo nen Jehova ed sarili to. (Juan 6:44) Nanenengneng to ray maong ya ugalim ya ompan agmo nanenengneng ed sarilim. Tan amta to no anton talagay walad pusom. (2 Awa. 6:30) Kanian no imbaga ton mabmabli ka, panisiaan mo, ta diad pakanengneng to et karapat-dapat kan aroen. (1 Juan 3:​19, 20) Wala ray agagi ya nakokonsiensia ed agawaan dan lingo antis iran nagmaliw ya Tasi. (1 Ped. 4:3) Tan diad tua, anggano abaybayag tayo lan matoor ya manlilingkor ed si Jehova, ompan wala nin siansiay lalabanan tayon kakapuyan. Sika ey, kasin say pakaliknam et agka lan balot naperdona nen Aman Jehova? Diad tua, agmo bukbukor. Anggan saray matoor ya lingkor nen Jehova nensaman et ontan met so alikna ra. Sakey lay apostol Pablo. Kada no nanonotan to ray agawaan ton lingo antis ya nagmaliw ya Kristiano, say pakalikna to et miserable so bilay to. (Roma 7:24) Tua ya nagbabawian to la iraman ya ginawa to tan abautismoan la, pero indeskribe to nin siansia so sarili to ya “sankaabebaan ed saray apostol” tan “sankamanunaan” ed saray makasalanan.—1 Cor. 15:9; 1 Tim. 1:15. w24.03 27 ¶5-6

Agnagawa ed sika imay agawad si Arin Jehoas no say pilien mon kakaaro et saramay maong so impluensya ra—amay inaro day Jehova tan labay dan paliketen so Dios. Aliwan saray kaedad mo labat so pikaaroan mo. Di ba nen ugaw ni Jehoas, inturing ton kaaro si Jehoiada anggano masiken la? Isip mo pa no siopa ray kakaarom, insan mo tepetay sarilim: ‘Kasin tutulongan da ak pian ombiskeg so pananisiak ed si Jehova? Kasin papasesegen da ak ya unoren iray ganggan na Dios? Kasin labalabay dan panistoryaan so tungkol ed si Jehova tan saray katuaan ed Biblia? Kasin nanengneng ed saray kagagawa ra ya rerespetoen day estandarte na Dios? Kasin bibilinen da ak no aliwa lay aarapen ko, odino say ibabaga da labat et amay labay kon narengel?’ (Pro. 27:​5, 6, 17) Tandaan, no saray kakaarom et agda inaroy Jehova, diad tua et agmo ra kailangan. Pero no saray kakaarom et inaro day Jehova, agka oniikban ed sikara ta seguradon maong so pansumpalan mo.—Pro. 13:20. w23.09 9 ¶6-7

Diad alphabet na saray Greek, say unonan letra et alfa tan say sampot et omega. Kanian nen imbaga nen Jehova ya sikato so “Alfa tan say Omega,” singa to ibabaga ya no antoy inggapo to et sumpalen ton sumpalen. Sikatoy ag-ontunda anggad ag-itan nagawa. Nen pinalsa nen Jehova si Adan tan Eva, oniay inkuan tod sikara: “Manbunga kayo tan manparakel kayo, pano yoy dalin tan uleyan yo.” (Gen. 1:28) Nen imbaga itan nen Jehova, singa to imbagan “Alfa.” Say gagala to et napano so dalin na perpekto tan maunor ya ananak nen Adan tan Eva tan gawaen da iyan Paraiso. No nagawa la itan, ditan la singa ibaga nen Jehova so “Omega.” Diad tua, kayari ton pinalsa so “tawen tan say dalin tan say amin a bengatlan wadtan,” walay ginawa nen Jehova pian garantiyaan so gagala to. Inggana to itan ya agew parad pakasumpal na gagala to. Singa ibabaga nen Jehova ya diad sampot na komapiton agew et seguradon asumpal la so gagala to parad totoo tan dalin.—Gen. 2:​1-3. w23.11 5 ¶13-14

Mairap so biahe manlapud Babilonia paonlad Israel, tan manga apat bulan antis ya makasabi iray Judio. Pero im-promise nen Jehova ya ekalen toy amin ya makahadlang ed ipawil da. Amta na saray matoor ya Judio ya anggan anto ni tay isakripisyo da diad ipawil dad Israel, melmelag labat iratan kompara ed saray bendisyon ya manatalaran ed sikara. Makapandayew la rad si Jehova diad paraan ya labay to​—atan so sankabalegan ya bendisyon! Diad Babilonia, anggapoy anggan sakey ya templo parad si Jehova. Anggapoy altar ya napambagatan na saray Israelita tan anggapo ray saserdote ya mangiyapay na bagat, kanian agda nauunor so Mosaikon Ganggan. Sakey ni, diad Babilonia et mas dakel iray agmandadayew ed si Jehova komparad sikara. Nanduruman dios so dadayewen na saray taga Babilonia tan anggapoy respeto dad si Jehova tan ed saray ganggan to. Kanian no sakey kad saray nilibon Judio ya matakot ed Dios, seguradon labalabay mo lay ompawil ed Israel pian nadayew moy Jehova diad dugan paraan. w23.05 14-15 ¶3-4

Kaukolan tayo so tulong na masanton espiritu na Dios pian tuloytuloy tayon manbilay “bilang ananak na liwawa.” Talagan kaukolan tayo itan ta aliwan mainomay so mansiansian malinis ed sayan imoral ya mundo. (1 Tes. 4:​3-5, 7, 8) No walad sikatayo so masanton espiritu, mainomay tayon nibiig tan nalabanan iray pilosopiya tan opinyon na sayan mundo ya kontra ed panagnonot na Dios. Say masanton espiritu met so manpakilos ed sikatayo ya manggaway “kamaongan tan inkatunong.” (Efe. 5:9) Ipapaseguro na Biblia ya si Jehova et “mangiter na masanton espiritu ed saramay onkekerew ed sikato.” Kanian imbaga nen Jesus ya agtayo nababaingan ya ipikasi ed si Jehova ya ikdan to tayo na masanton espiritu. (Luc. 11:13) Makakaawat tayo met na masanton espiritu kada no idadayew tayo si Jehova ed saray aral tayo. (Efe. 5:​19, 20) No walad sikatayoy masanton espiritu na Dios, sankanonot tayo no antoy makapaliket ed sikato. w24.03 23-24 ¶13-15

Kasin kaukolan moy magmaliw ya mas maanos? No on, ipikasim itan ed si Jehova. Say anos et kaiba ed bunga na masanton espiritu na Dios. (Gal. 5:​22, 23) Kanian pian magmaliw tayon maanos, ipikasi tayod si Jehova ya ikdan to tayo na masanton espiritu to. No wala ray situasyon ya nasubok so inkaanos tayo, ‘itultuloy tayoy onkerew’ na masanton espiritu. (Luc. 11:13) Ipikasi tayo met ed si Jehova ya tulongan to tayo pian naalig tayoy inkaanos to. Tan siempre, man-effort tayo pian nipanengneng tayoy inkaanos kada agew. No mabetbet tayon ipikasi ed si Jehova ya tulongan to tayon mananos tan gawaen tayo met so betang tayo, mas mainomay tayo lan naipanengneng iyan ugali. Dalepdepen tayo met iray alimbawa ed Biblia. Dakel so nabasa tayod Biblia ya lingkor na Dios ya makapabilib so inkaanos da. No dalepdepen moy alimbawa ra, makaaral ka no panon mo met ya nipanengneng so inkaanos. w23.08 22 ¶10-11

Nen inmoli si Jesus, walay ginawa to pian ipaseguro ed si apostol Pedro ya sikatoy agbalot paulyanan nen Jehova. Nanmilagro lamet si Jesus pian makarel na dakel ya sira si Pedro tan saray kaiba ton apostol. (Juan 21:​4-6) Lapud sayan milagro, tinmatak ed isip nen Pedro ya main-inomay nen Jehova ya iter iray materyal ya pankaukolan to. Seguro anonotan to may imbaga nen Jesus ya taryaan nen Jehova iramay ‘iyuuna da so Panarian.’ (Mat. 6:33) Akatulong iratan ya panamaseguro pian tuloytuloy ya iyuna nen Pedro so panagpulong ya kimey, aliwan say panagsigay. Nen Pentecostes 33 C.E., makmakpel ya nansalita si Pedro tungkol ed Kristo, kanian manga 3,000 so angawat ed maong a balita tan abautismoan. (Gawa 2:​14, 37-41) Tan ag-abayag, tinulongan to met iray Samaritano tan arum ni ran lahi pian magmaliw iran Kristiano. (Gawa 8:​14-17; 10:​44-48) On, inusar nen Jehova si Pedro pian naamtaan na amin a klase na totoo so katuaan tan magmaliw iran parte na Kristianon kongregasyon. Balbaleg iyan pribilehyo! w23.09 20 ¶1; 23 ¶11

Manga duay taon kayarin dineral na Babilonia so Jerusalem, walay akugip nen Arin Nabucodonosor ya balbaleg ya imahen kanian natatakot tan aburidon maong. Binantaan to ray matatalinon lalaki ed Babilonia, kaiba lay Daniel, ya pateyen to ran amin no agda nibaga ed sikato so akugip to tan no antoy kahulugan na satan ya kugip. (Dan. 2:​3-5) Kailangan ya onkilos ya tampol si Daniel, ta no andi, dakel so ompatey! Kanian akitongtong si Daniel ed ari tan akikasi ya “ikdan toy panaon pian nibaga tod ari so kabaliksan na kugip.” (Dan. 2:16) Makapabilib iyan ginawa to! Ta diad tua, antis to ’ya, anggapoy nabasa ed Biblia ya asali to lay angipatalos na kugip. Makmakpel si Daniel tan mabisbiskeg so pananisia to. Kinatongtong toy taloran kakaaro to ya “mikasi ra ed Dios na tawen ya ipaamta tod sikara iyan sekreto.” (Dan. 2:18) Inebatan nen Jehova so pikakasi ra. Diad tulong na Dios, impatalos nen Daniel so kahulugan na kugip nen Nabucodonosor. Lapud pakpel nen Daniel, aligtas so bilay to tan saray kakaaro to. w23.08 3 ¶4

Isip mo iray maabig ya resulta no maanos ka. Mas mareen tan maliket so bilay na saray totoon maanos. Lapud satan, aliwan maguloy isip da tan dakel so naiwasan dan sakit. Mas labalabay itayo na totoo no amta ran maanos tayo. Sakey ni, onelet so ulopan diad kongregasyon tan walay pankakasakey. Anggano wala bilang so pakakasyodotan tayo, palabasen tayo la pian agla ombaleg so isyu. (Sal. 37: 8, paimanod leksab; Pro. 14:29) Tan say sankaimportantian, mas aroen itayo nen Aman Jehova lapud nanenengneng to ya sikatoy aaligen tayo. Marakdakep ya ugali so inkaanos! Tua, wala ray situasyon ya nasubok so inkaanos tayo, pero diad tulong nen Jehova, sarag tayoy mananos. Legan tayon aalagaren so isabi na balon mundo, makapan-anos tayo no tandaan tayo ya “say mata nen Jehova et akabantay ed saramay ontatakot ed sikato, saramay manaalagar ed matoor a panangaro to.” (Sal. 33:18) Itultuloy tayo sirin so mananos! w23.08 21 ¶7; 25 ¶16-17

Impaimano nen Santiago ya aliwan tua so pananisia na sakey no aliwliway ugali tan panagtrato to ed arum. (Sant. 2:​1-5, 9) Binitla met nen Santiago so sakey ya Kristiano ya anengneng toy sakey ya agi ya mankaukolan na kawes tan naakan, pero agto tinulongan. Nibaga kasi ya tua so pananisia na sayan Kristiano? Andi. Anggapoy kakanaan na pananisia to ta anggapoy malasakit tod arum. (Sant. 2:​14-16) Binitla nen Santiago so alimbawa nen Rahab. Nanengneng ed ginawa nen Rahab ya tua so pananisia to. (Sant. 2:​25, 26) Abalitaan nen Rahab iray makapakelaw ya ginawa nen Jehova tan manisia ya susuportaan na tuan Dios iray Israelita. (Jos. 2:​9-11) Pero aglabat anisia. Tinekepan toy gawa so pananisia to. Inyamot to imay duaran Israelitan espiya pian ag-ira naerel na kalaban. Kanian anggano makasalanan si Rahab tan aliwan Israelita, sikatoy inyabawag ya matunong ya singa si Abraham. Naaralan tayo ed si Rahab ya importantin say pananisia tayo et atekepan na gawa. w23.12 5-6 ¶12-13

Agtayo labay ya ataptapew so pakatalos tayo ed Biblia. Pian lalo tayon onapit ed si Jehova, dapat aralen tayo iray “aralem a bengatlan nipaakar ed Dios.” Nagawaan tayo itan diad tulong na masanton espiritu. (1 Cor. 2:​9, 10) Maabig sirin no walay study project mo. Singa bilang, manpili kay pigaran karakter na Biblia, insan i-research mo no panon ya impanengneng nen Jehova ya inar-aro to ra. Insan mo tepetay sarilim, ‘Akin et patunay iya ya inar-aro ak met nen Jehova?’ Sarag mo met ya i-personal study no antoy pamparehoan na panagdayew tayo natan ed panagdayew na saray Israelita nensaman. Tan ompan labay mo met ya aralen iray propesiya ya tinmua ed si Jesus nen sikatoy wadiad dalin. Seguradon na-enjoy mon aralen iratan ya topic no man-research kad Watch Tower Publications Index o diad Giya ed Pan-research na Saray Tasi nen Jehova. No aralen mo iray aralem ya katuaan ed Biblia, ombiskeg so pananisiam tan “naromog moy kakabatan nipaakar ed Dios.”—Pro. 2:​4, 5. w23.10 18-19 ¶3-5

Say literal ya kahulugan to may salitan “aralem” ya inusar nen apostol Pedro et “apinat.” Imbaga met nen Pedro ya say ontan ya klase na panangaro et sakoban toy kasalanan. Pian natalosan tayoy labay ya ibaga nen Pedro, imanoen pa iyan ilustrasyon: No walay lamisaan tayo ya dakdakel so gasgas o mantsa to, apisan tayo itan na tela ya sarag ton sakoban so amin ya gasgas tan mantsa. Ontan met so gawaen tayo ed saray lingo tan kakapuyan na saray agagi. Say panangaro tayo ed sikara et singa stretchable ya tela. No pinaten tayoy panangaro tayo, aliwa labat ya sakey o duaran kasalanan so sarag tayon sakoban o perdonaen, noagta “dakel a kasalanan.” Aminen tayo ya no maminsan et aliwan mainomay so mamerdona. Pero no mabiskeg so panangaro tayo ed saray agagi, mabulos tayo ran perdonaen anggano mairap. (Col. 3:13) Kanian no walay akasakit ed sika tan mabulos mon pinerdona, labay ton ibaga, mabiskeg so panangarom ed saray agagi tan labay mon napaliket si Aman Jehova. w23.11 11-12 ¶13-15

Nen 26 lay taon nen Arin Josias, ginapoan ton impaapiger so templo. Legan ya aapigeren so templo, aromog so “libro na Ganggan nen Jehova ya inter diad panamegley nen Moises.” Nen arengel na ari so karga na sayan libro, kinmilos ya tampol pian naipatupad to iray akasulat ditan. (2 Awa. 34:​14, 19-21) Sika ey, kasin goal mo ya inagew-agew ya basaen so Biblia? No gagawaen mo la itan, kumusta ey, kasin nai-enjoy mo? Kasin ililistam iray bersikulo ya agusgustoan mo tan antam ya makatulong ed sika? Nen manga 39 so taon nen Josias, walay aliwan desisyon to ya sengegan na impatey to. Imbes ya manpaigiya ed si Jehova, nantiwala ed sarili to. (2 Awa. 35:​20-25) Antoy naaralan tayo? Anggano matatken tayo la o abaybayag tayo lad katuaan, importante ya manpaigiya tayon lanang ed si Jehova no mandedesisyon tayo. Antis tayon mandesisyon, manpikasi tayo tan kerewen tayoy tulong to. I-research tayo iray prinsipyo ed Biblia ya makatulong ed pandesisyon tayo tan dengelen tayoy advice na saray maespiritual ya agagi. No gawaen tayo iratan, naiwasan tayoy makagawa na makapuy iran desisyon tan magmaliw tayon mas maliket.—Sant. 1:25. w23.09 12 ¶15-16

Dakdakel so nabasa ed Biblia ya bibiin inar-aro day Jehova tan matoor iran nanlingkor ed sikato. Sikaray “balanse ed saray kagagawa ra” tan “matoor [ira] ed amin a bengatla.” (1 Tim. 3:​11, paimanod leksab) Pero, aliwan saray karakter ed Biblia labat so pakaaralan na saray kabataan ya sister. Diad kongregasyon, seguradon dakel met so maespiritual ya bibii ya maabig so alimbawa ra. No sakey kan kabataan ya sister, isip mo pa iray maespiritual ya sister ya kabat mo tan labay mon aligen so alimbawa ra. Obserbaan mo ray balibalin ugali da tan isip mo no panon mo ran naalig. Pian ontatken kad espiritual, importante so inkamapaabeba. Say sister ya mapaabeba et maong so relasyon to ed arum tan ed si Jehova. Singa bilang, mapaabeba ton suportaan so uksoyan na inkaulo ta amta to ya nanlapu itan ed si Aman Jehova. (1 Cor. 11:3) Sikatoy manpapasakop ed inkaulo diad kongregasyon tan diad pamilya. w23.12 19 ¶3-5

Labay nen Jehova ya ar-aroen na asawan laki so asawa to, tan iter toy pisikal, emosyonal, tan espiritual ya pankaukolan na misis to. Pian magmaliw kan maong ya asawa, importante so abilidad ya mannonot, panrespeto ed bibii, tan pagiging responsable. Ompan onsabi panaon ya magmaliw kan tatay. Antoy naaralan mo ed si Aman Jehova bilang tatay? (Efe. 6:4) Imbalikas nen Jehova ya inar-aro toy Jesus tan dakel so akarengel nen imbaga to itan. (Mat. 3:17) No magmaliw ka lan tatay, ibagam ya lanang ed saray ananak mo ya inar-arom ira. Komendaan mo ra ed saray balibalin nagagawaan da. No say sakey ya ama et aaligen toy alimbawa nen Jehova, baleg so posibilidad ya saray ananak to et ontatken ed espiritual. Nai-ready’m so sarilim ed sayan responsabilidad no natan ni labat et maasikaso ka lad saray kapamilyam tan kakongregasyon mo. Ipaliknam tan ibagam ed sikara ya inar-arom ira tan importante ra ed sika.—Juan 15:9. w23.12 28-29 ¶17-18

Anggano matoor tayon manlilingkor ed si Jehova, agtayo exempted ed saray problema. Mansasakit tayo, apektado tayoy irap na panagbilay, itetepel tayoy pambusol na arum, tan wala ray lugar ya papairapen na gobierno iray agagi tayo. Anggano ag-itayo ipapaliis nen Jehova ed sarayan subok, im-promise to ya tulongan to tayo. (Isa. 41:10) Kanian diad tulong to, mansiansia tayon maliket, makapandesisyon tayoy duga, tan makapanmatoor tayo anggan anto ni tay onsabin subok. Im-promise nen Jehova ya ikdan to tayoy “kareenan na Dios.” (Fil 4:​6, 7) Anto tay kareenan na Dios? Atan may nalilikna tayon inkakalmado tan deen na nonot tan puso lapud amta tayo ya walad sikatayo so pabor nen Jehova. Sayan kareenan et “palumbasan toy amin a pakatalos.” Labay ton ibaga, anggano problemado so sakey, kakkalmado nin siansia. Asalim la may kasumpal mon nampikasi ed si Jehova et kinmalma ka? Atan ya aliknam, atan may “kareenan na Dios.” w24.01 20 ¶2; 21 ¶4

Inar-aro tayoy Jehova kanian idadayew tayoy ngaran to diad interon puso. Amta nen Arin David ya no idayew toy ngaran nen Jehova, si Jehova ya mismo so idadayew to. Duga met itan, ta no narengel tayoy ngaran nen Jehova, say nanonotan tayon tampol et saray mararakep ya kualidad to tan saray makapabilib ya ginawa to. Parad si David, masanto so ngaran na Ama to tan labalabay to itan ya idayew. Idayew kuno itan na “amin a kabiangan na laman [to].” Ontan met so ginawa na saray Levita nensaman. Indaulo day pangirayew ed si Jehova. Imbaga ra ya say ngaran to et “nitandoro nen say amin a bendisyon tan dayew.” (Neh. 9:5) Singa da ibabaga ya aliwan sapat so salita pian nairayew day sagradon ngaran nen Jehova. Seguradon naliliketan si Aman Jehova ed ontan iran mapaabeba tan impapuson panangirayew ed sikato. w24.02 9 ¶6

Natatalosan nen Jehova no kailangan mon umanen ya daiset so goal mo, kanian agka mapaga. (2 Cor. 8:12) No walay panaon ya agmo agawaan so goal mo, tandaan mo ya pakaaralan mo itan. Agmo lilingwanan iray agawaan mo la. Ibabaga na Biblia ya ‘say Dios et matunong kanian agto lingwanan iray ginawam.’ (Heb. 6:10) No si Jehova et agto lilingwanan iray ginawam parad sikato, agmo met komon iratan lilingwanan. Isip mo pa iray goal ya agawaan mo la. Singa bilang, akaarom lay Jehova, manpupulong ka la, tan ompan a-baptize ka la. Agawaan mo iratan lapud nan-effort ka. Kanian no itultuloy moy man-effort, seguradon nagawaan mo met iray balon goal mo. Diad tulong nen Jehova, nagawaan mo iray goal mod espiritual. Legan kan mani-effort pian nagawaan moy goal mo, nengneng mo no panon kan tutulongan tan bebendisyonan nen Jehova. Atan ni labat et makapaliket la. (2 Cor. 4:7) Kanian komon ta itultuloy mon gawaen so goal mo. No agka onsuko, seguradon mas dakel ya bendisyon so iter nen Jehova ed sika.—Gal. 6:9. w23.05 31 ¶16-18

Labalabay nen Jehova ya ibalikas so panamabli to ed saray inar-aro to. Akarekord ed Biblia so duaran pagkakataon ya nansalita si Jehova manlapud tawen tan imbaga tod si Jesus: “Saya so Ana’ko, say inad-arok.” (Mat. 3:17; 17:5) Sika ey, kasin labay mo met ya “narengel” si Jehova ya ibaga ton inar-aro to ka? Agtayo la direktan narengel so boses nen Aman Jehova natan manlapud tawen. Pero kada no manbabasa tayoy Biblia, singa to tayo kakatongtongen, lalo la no babasaen tayoy Ebanghelyo—amay apatiran libro ya pakabasaan ed saray imbaga nen Jesus nen wadiad dalin. Amin ya ugali tan kualidad nen Jesus et naalig to met labat ed Ama to. Kanian kada no nababasam iray ekspresyon na panangaro tan panamabli nen Jesus ed saray matoor ya papatumbok to anggano wala ray kakapuyan da, marakep no imadyinen mo ya singa met ibabagan mismo nen Jehova iratan ed sika. (Juan 15:​9, 15) No bilang ta ondadalan tayod subok, agto labay ya ibagan ag-itayo la inaro nen Jehova. Diad tua, tsansa tayo ingen itan pian ipanengneng ya sikatoy inar-aro tayo tan baleg so tiwala tayod sikato.—Sant. 1:12. w24.03 28 ¶10-11