“Mantultuloy a Manakar a Mauksoy ed Sayan Parehon Kurang”
“Diad anton kalaknab na inaligwasan tayo, mantultuloy itayo komon a manakar a mauksoy ed sayan parehon kurang.”—FILIPOS 3:16.
1, 2. (a) Panon a saray maabig-uliran a tobonbalo so sengegan na kapasesegan? (b) Ingen, antoran tepet nipaakar ed sikara so nanonotan?
SANEN si Alisa so manedad na duay taon, pinaliket to so amin diad pakayari ton mangikansion ed saray kangaranan na amin ya 66 a libro na Biblia, mangidalatdat ed kangaranan na 12 apostoles, tan mangisalaysay a tekep na andawes ed saray siamiran bunga na espiritu na Dios. (Mateo 10:2-4; Galacia 5:22, 23) Diad panaon sanen sikato so wala ed komaliman grado ed eskuelaan, sikato so mangikokondukta na sinimban panangiyaral na Biblia ed sakey ya ugaw a bii ed komatlon grado, a kabekta, nilagyat to so kuya ton nagmaliw ya interesado ed Biblia. Si Alisa tan say ug-ugaw a kaiba to so angigeter na kalat da. Ninmengneng ira ed arapen diad panulop da ed sigpot-panaon a kimey na panagpulong bilang espesyal payunir.
2 Peteg, makapaliket ed anggan siopa ed sikatayo so pakaamta ed saray anak tayo a singa saraya, tan nayarin ontan yo met. Ontan met, anggaman kuan, sikatayo so manmorekdek: Anto kasi so pagmaliwan da sano ombaleg ira? Kasin sikara so mantultuloy ed espiritual ya aligwas ya anggad nadampot da so kalat da? Odino kasin sikara so isuawi na arum iran bengatla tan nagapol diad dalan?
Mantultuloy ya Iyaaligwas
3. Siopa so mankaukolan na iyaaligwas?
3 Mapatnag saray ontan a walad kalangweran so mankaukolan na baleg ya iyaaligwas ed espiritual sakbay a nadampot da so kalat da. Balet kasin saray walad kalangweran lambengat odino saray balobalo so mankaukolan na iyaaligwas? Diad tua, kasin say iyaaligwas so nakaukolan lambengat ya anggad narapat so espiritual ya inkatatken odino magmaliw a kualipikado ed sakey a pribilehyo? Aliwan ontan. Imanoen si apostol Pablo. Imbes a sikato so napenek ed agegemtan to, inkuanto ed samay sulat to ed saray taga Filipos: “Aliwan lapud sikato so naawat ko la odino siak la so agawan ayadyari, noagta uusilan kon nengnengen no ompan nakapet ko so akakapetan ko ed panamegley nen Kristo Jesus.”—Filipos 3:12.
4. Anton “kalat” so dadampoten nen apostol Pablo?
4 Malinlinew, agsasalitaen nen Pablo so nipaakar ed pakagegemtan na inkatatken, ta anggapo so suppiat a sikato la so sakey a Kristianon matatken. Ingen inkuanto a sikato so “manguusil” na bengatla ya agto ni “naawat.” Anto ’tan? Intuloy nen Pablo ya impaliwawa: “Siak so ontundas a mamaarap ed kalat diad tumang ed tawag na Dios ed tagey diad panamegley nen Kristo Jesus.” (Filipos 3:14) Say kalat a dadampoten to et aliwan say basta Kristianon inkatatken odino kualipikasyon ed sakey a posisyon, noagta say bengatlan babaleg. Para ed sikato tan ed saray kapara ton alanaan a Kristiano, et “say tawag ed tagey,” say ilalo ed mangatatawen a bilay diad panamegley na kioli.
5. (a) Akin a nakaukolan so mantultuloy ya ibabaleg? (b) Anto so nayarin isakup na “pangilingwan ed saray bengatlan walad benegan”?
5 Saya so ontulong ed sikatayon makanengneng na rason ed pantultuloy ya ombaleg tan ombulaslas ed espiritual anggaman panon la so kabayag tayo ed katuaan. No say sakey a too so inmaligwas lambengat ed punto na impagmaliw a matatken, odino dia lambengat ed punto na impagmaliw ton kualipikado ed bengatlan nikaduman pribilehyo, anton magnayon a gungguna so wala ed sikato? Say inkatatken tan nikaduma ran pribilehyo so aliwan garantiya ya arapat tayo la so unor a kalat—say andi-anggaan a bilay. Noag ingen, nepeg a gawaen tayo so singa ginawa nen apostol Pablo: ‘Lingwanan iray bengatlan walad benegan tan ontundas ed saray bengatlan walad arapen.’ (Filipos 3:13) Aliwa lambengat a benegan tayoray agmakagunggunan bengatla a nayarin agawaan tayo sakbay na impakakamang tayo diad pikakabat ed katuaan noagta nepeg tayo met so manalwar diad agpagmaliw a kontento la ed saman so agawaan tayo la. Diad arum a salita, say simbawa so ag-onsaral ed kirayewan na sakey noagta ontundas ya anggapoy tunda. Kasin saya so gagawaen yo, odino kasin sikayo, nisengeg ed sakey a rason odino diad sananey, so ontatayer?—Nengnengen so 1 Corinto 9:26.
6. Ipareng so Filipoas 3:12 ed 3:15, anto so nibaga nipaakar ed panggawa na iyaaligwas?
6 Tekep na sayan posibilidad ed kanonotan, intuloy nen Pablo: “Sikato komon, sirin, a singa dakel ed sikatayo so matatken, so walaan na onian parehon kanonotan; tan no sikayo so manisip na sananey ed anggan anton pamaakaran, ipatnag na Dios so walad tagey ya awawey ed sikayo.” (Filipos 3:15) Akadkauna, ed bersikulo 12, impanengneng nen Pablo ya agto impasen so inkasikato a singa “agawan ayadyari la.” Ingen dia et imbaga to a “singa dakel ed sikatayo so matatken,” odino, “ayadyari.” (Kingdom Interlinear) Saya so agmansumlangan. Imbes, gawaen to lambengat so punto ya anggan saray matatken a Kristiano a singa si Pablo so nepeg a mannonot ya agda ni adampot so ultimon kalat, tan nepeg da so mantultuloy ya onaligwas ta pian nadampot da. Sikato no akin a sinegek to ed onia: “Diad anggan anton pamaakaran, diad anggan anton kalaknab na inaligwasan tayo, mantultuloy itayon manakar a mauksoy ed sayan parehon kurang.”—Filipos 3:16.
Mauksoy a Kurang
7. Anton “kurang” so ipapaseseg nen Pablo ed saray Kristianos a tumboken?
7 Sanen pinaseseg nen Pablo iray Kristianos a “mantultuloy a manakar a mauksoy ed sayan parehon kurang,” kasin ibabaga to’d sikara so panggawa ed kumportablen padron na kimey tan mansiansia lad’tan ya anggad say panaon so onsabi ed sikara a mangawat ed tumang da? Say panggawa na ontan so singa panggawa ed saman so ginawa na aripen ed ilustrasyon nen Jesus ya angikutkut na sakey a talento ya inter na katawan to ed sikato tan inalagar to lambengat so ipawil na katawan. (Mateo 25:14-30) Anggaman ag-abalang na aripen so talento odino tinundaan so serbisyo to, sikato so atawag na “andi-kakanaan” tan impulisay na katawan to. Seguradon ag-ibabaga nen Pablo ed sikatayo a basta bembenan tayo so walad sikatayo ta ompan nabalang tayo. Sasalitaen to so iyaaligwas. Diad “kurang” mapatnag a walad kaisipan nen Pablo so sakey a geter na iyaabante, bengatlan singa sakey a sundalon agbasta mantanyareg ed panimano noagta sikato so onaabantin manmamartsa.
8. Diad anto so nepeg tayon pampagaan nipaakar ed serbisyo tayo ed Dios?
8 Say simbawa nen Pablo so nepeg ya ontulong ed sikatayon mamidbir ed kaimportantian na pantultuloy tan pangibanikel ya onabante, onaligwas, tan pagmaliwen tayon mas maabig so inkasikatayo diad serbisyo ed si Jehova. “Diad anton kalaknab na inaligwasan tayo,” balanglan mamatatken, ministeryal ya ariripen, saray payunir, odino manangipalapag, say manunan imano tayo et say pamaaligwas ed kalidad tan, no nayari, ed karakel na serbisyo tayo. Nepeg tayo so manalwar ya ag-itayo napelag ed parehon kipapasen na kanonotan a singa saramay nankasalanan ya Israelitas ed agew nen Malaquias a nanisip a sikara la so makapasa diad pangiyapay na abebbeba ran bagat ed si Jehova. Balet panon so liknaan nen Jehova ed saman? “On, sikato so inyakar yo [say piley tan mansasakit ya iyaapay] a singa sakey a langkap,” inkuanto. Insan inyarum to: “Kasin siak so manliket ed satan diad lima yo?”—Malaquias 1:13.
9. Panon a say simbawa nen Pablo ed Roma 12:6-8, 11 so misiglaotan diad iyaaligwas?
9 Diad kasuniyan, nepeg tayon gawaen so serbisyo tayo ed Dios a seryoso. A singa impanonot nen Pablo ed saray taga Roma, antokaman a pribilehyo na serbisyon nayarin niiter ed sikatayo, komon ta sikatayo so ‘wadtan,’ “diad peteg a gunaet” tan ag ‘mantayamtayam ed kimey tayo.’ (Roma 12:6-8, 11) Say pantayamtayam et sikato so panmeneng, ya anggapo so iyaabante a mamaarap ed anggan anton espesipikon kalat. Makapasagyat, say Griegon salita a nausar dia et literal a kabaliksan to so “inkangiras,” say sankamatukoyan a kabaliksan. Ipapanengneng na report ya, anggaman nayarian to so maples ya igalaw, ed loob na 168 oras, say sakey ya “sloth” [klase na ayep] so naugip o mansiansian ag-onggalagalaw diad loob na 139 oras—83 porsiento ed panaon. Agpankelawan a sikatayo so asimbawan agmagmaliw a “mangiras” noagta “marlang ed espiritu” tan “paaripen ed si Jehova”! Anto so ontulong ed sikatayon manggawa ed saya?
10. Akin a sikatayo so interesadon tuloy diad simbawa nen Pablo ed si Timoteo diad 1 Timoteo 4:12-16?
10 Diad 1 Timoteo 4:12-16 indalatdat nen apostol Pablo iray bengatlan nepeg a gawaen pian say iyaaligwas to so komon “nipatnag ed amin a totoo.” Diad saman, si babangatan a Timoteo so aliwa lan walad kalangweran nisay balobalo. Noagta, diad saman et sikato la so akikimey a maapit ed si Pablo diad masulok lan samplon taon tan awalaan la na dakel a responsabilidad tan autoridad a nimatalek ed sikato diad Kristianon kongregasyon, andi-duaruwan lapud iyaaligwas ya agawaan to la ed satan a punto. Ingen, siansian inter nen Pablo ed si Timoteo so ontan a konseho. Malinlinew, nakakaukolan ed sikatayon amin so pangimanon maapit ed walad ibaga nen Pablo.
Magmaliw ya uliran ed panagsalita tan ugali
11, 12. (a) Anto so ununan pasen a pangiteran tayo na imano diad iyaaligwas? (b) Akin a lalon importante nen say iyaaligwas ed pikakabat tan abilidad?
11 Ununa, diad bersikulo 12, imbaga nen Pablo: “Anggapo komon so toon manmodmora ed inkatobonbalom. Diad kasuniyan, magmaliw ya uliran ed saray matoor diad panagsalita, diad ugali, diad aro, diad pananisia, diad kasimpitan.” Sayan listaan so mangipanonot ed sikatayo na “bunga na espiritu,” ya indatak nen Pablo ed Galacia 5:22, 23. Siopa so makapangipulisay a balang sakey ed sikatayo so mankaukolan ed sayan bunga diad babaleg a kalaknab ed bilay tayo? Kaslakan ed sikatayo so angibanikel na baleg a sagpot diad pangaral tan pangipatlep ed siamiran bunga na espiritu, tan diad pangibangat ed saray walad kalangweran tan diad saray balobalo a manggawa met na ontan. Balet kasin sikatayo so mangibabanikel na ontan lan kalaknab na sagpot a mamayubo ed saratan? Inturo nen Pablo a saramay matatken so nepeg ya uliran ed sarayan pamaakaran. Peteg, saya so sakey a pasen ed bilay tayo a mainomay tayon amin a paaligwasen.
12 Diad sakey a pantalos, angangko, sarayan kalidad so nagkalalo nin sakey a pamatnagan na espiritual ya iyaaligwas tayo nen say pikakabat tan abilidad, lapud saray akauna et bunga na espiritu na Dios, bang say saginonor et sikara so mabetbet a misiglaotan ed saray nianakan ya abilidad tan edukasyon. Saray eskribas tan Pariseos ed agew nen Jesus so mikabisadon maong ed saray Kasulatan, tan sikara so maalwar diad pananumpal ed saray detalye na Ganggan. Ingen, sikara so kinondena nen Jesus, a kuanto: “Kasi kayo la, eskribas tan Pariseos, mansimpisimpitan! Lapud sikayo so angiter na kakaplo na yerbabuena tan anis tan kumino, balet imbaliwala yo so ambebbelat iran pamaakaran na Ganggan, salanti, say inkaalas tan panangasi tan katooran.” (Mateo 23:23) Agaylan importante so pantultuloy tayon onaligwas diad pamayubo ed sarayan “ambebbelat iran pamaakaran” ed bilay tayo!
Ikana ed panagbasa, panamilin, tan panagbangat
13. Panon so kagunggunaan na saray aturon manangasikaso ed simbawa nen Pablo diad 1 Timoteo 4:13?
13 Ontumbok, sinimbawa nen Pablo si Timoteo a “mantultuloy ya ikana to [ed inkasikato] ed mapublikon panagbasa, ed panamilin, ed panagbangat.” (1 Timoteo 4:13) Inerman ni ed saray sulat to, kinomendaan nen Pablo si Timoteo a bilang sakey a makayari tan matoor a ministro. (Filipos 2:20-22; 2 Timoteo 1:4, 5) Ingen ta sinimbawa toy Timoteo a mangiter na mantultuloy ya imano ed sarayan makanan responsibilidad na sakey a manangasikaso. No sika so sakey ya aturon manangasikaso ed kongregasyon, kasin “itultuloy mon ikana ed inkasika” irayan bengatla? Alimbawa, kasin seryoson gagawaen moray suhestion ed Theocratic Ministry School Guidebook tan kikimeyan moray kakulangan mo, odino liknaen mon sayan konseho so para lambengat ed saray balobalo? Kasin aaralen mo so Biblia tan saray palapagan na Sosyedad a maalwar ta pian sika so makayarin “mamilin, a tekep na amin a panangitepel tan dunong na panagbangat”?—2 Timoteo 4:2; Tito 1:9.
Aglilingwanan so langkap na kimey
14. Panon so pakapangipanengneng tayo na iyaaligwas diad lawak na ministeryo tayo?
14 Manwarin pigara lambengat so aturon manbangat ed kongregasyon, amin a Kristianos so ingganggan nen Jesu-Kristo a mibiang ed panagtasi ed Panarian tan diad kimey na panaggaway-babangatan. (Mateo 24:14; 28:19, 20) Saya so manasaglawi na pangibangat ed saray masimpit-impanpuson totoo diad katuaan na Biblia, a bilinen iran mamasimbalo ed saray bilay da tan ontalindeg ed dapag nen Jehova. Kasin “itutultuloy mon ikana so inkasika” diad pamaaligwas mo’d saray abilidad mo ed ministeryo? Kasin magunaet mon uusaren iray suhestion diad Ministeryo Tayo Ed Panarian tan say sinimban Tipon ed Panagserbi ta pian ‘gawaen so kimey na ebanghelisador, sumpal mon nagnap so ministeryom’?—2 Timoteo 4:5.
15. Anto so “langkap” nen Timoteo, tan anto met natan?
15 Diad akauna, inter nen Pablo ed si Timoteo iyan panonot: “Agmo papaulianan so langkap ed sika a niiter ed sika diad panamegley na panamasakbay tan sanen saray ulop na mamatatken a lalaki so angitapew na lima ra ed sika.” (1 Timoteo 4:14) Mapatnag, diad panamegley na inkiwas na masanton espiritu, si Timoteo so aturo ed arum iran nikaduman serbisyo ed Kristianon kongregasyon. (1 Timoteo 1:18; 2 Timoteo 1:6) Mipadpara, natan et walaray dakel ed organisasyon ya amayubo na inter na Dios iran abilidad, a nansumpal diad inkaturo ra a bilang managbiahen manangasikaso, misionero, regular o espesyal payunir, mamatatken, tan arum nira. Anggaman anggapo so nalalanor a nikaduman panagpasakbay odino panangitapew na lima, say simbawan “agmo papaulian so langkap ed sika” so onaplika ed mipadparan puersa.
16. Anto so mangamper ed sikatayo diad pakapaulian ed “langkap” tayo?
16 Say pamaulian ed bengatla, unong ed diksionaryo, et kabaliksan to so pangiter na samet ya imano ed satan odino panaynan ed satan ya ag-agawaan diad inkaandi-alwar. Sano say bengatla so nagmaliw lan kaslakan a pasen, magmainomay a nalingwanan. Saya so nayarin nagawa no ontunda itayon manpaaligwas, odino onabante, balet ipasen a baliwala iray kimey a nipabtang. Sirin, sikatayo so nagunggunaan ed samay imbaga nen Pablo ed Colosas 3:23, 24: “Antokaman a gagawaen, gawaen yon sigpot-kamarerwa ed si Jehova, tan aliwan diad totoo, ta kabat yo a manlapud si Jehova so pangawatan yo na manepeg a tumang a tawir. Paaripen ed Katawan, si Kristo.”
Mangitarok na Bendisyon So Mantultuloy a Sagpot
17. Panon lambengat so pakanengneng tayo ed resulta na saray sagpot tayo?
17 Sano imanoen tayon maapit iray pamaakaran ya asingbat ed tagey, napaseguroan itayo ya ag-itayo napelag ed patit na panangibaliwala odino dilin-pakapnek. “Morekdek mo irayan bengatla; sikara labat so arapen mo, pian say iyaaligwas mo so nipatnag komon ed amin a totoo,” so inkuan nen Pablo. (1 Timoteo 4:15) Say “iyaaligwas,” et aliwan say diad gagalan pangipangta odino pamasagyat ed arum. Sano sikatayo, ugaw tan matatken, so ombaleg tan ombulaslas ed espiritual, mangitarok itayo na gayaga tan pakapasesegan ed amin a mililimog ed sikatayo, a singa ginawa nen ugaw ya Alisa tan samay kaiba to ya akaunan abitla ed sayan artikulo.
18. Anton doblen bendisyon so manaalagar ed sikatayo no iyaplika tayon maseseg so simbawa nen Pablo?
18 Manalagar so doblen bendisyon ed sikatayo no iyaplika tayon maseseg so simbawa nen Pablo. “Imanoen mon naynay so inkasika tan say ibabangat mo,” so kuan nen Pablo. “Mansiansia ed sarayan bengatla, ta diad panggawam ed saya et nilaban mo so inkasika tan saraman so ontalineng ed sika.” (1 Timoteo 4:16) On, diad pirmin pangusisa tayo ed inkasikatayo no kasin gagawaen tayo so ibabangat tayo ed arum a gawaen, salanti, say iyaligwas, ibaleg, tan ibulaslas ed espiritual, napaliisan tayo so kaatapan na ‘agkaabobonan.’ (1 Corinto 9:27) Imbes, say maliket ya ilalo ed bilay diad insipan na Dios a Balon Oksuy so nipaseguro ed sikatayo tan diad saraman so apribilehyoan tayon magayagan tulongan. Sirin, para ed kabendisyonan tayo tan ed kabendisyonan na arum, tan para ed kirayewan nen Jehovan Dios: “Mantultuloy a manakar a mauksoy ed sayan parehon kurang”!—Filipos 3:16.
Kasin Nanonotan Yo?
◻ Anto so ultimon “kalat” a nepeg a walad kanonotan tayo? Panon so pakadampot tayo ed satan? (Filipos 3:12, 13)
◻ Anto so “kurang” a nepeg tayon panakaran? (Filipos 3:16)
◻ Akin a nepeg tayo so mantultuloy ya onaligwas ed Kristianon ugali tan panagsalita? (1 Timoteo 4:12)
◻ Panon so iyaligwas na mamatatken, ministeryal ya ariripen, tan arum ni diad abilidad da ed panagbangat? (1 Timoteo 4:13)
◻ Anto so nepeg tayon gawaen diad agpamaulian “ed langkap” a nimatalek ed sikatayo? (1 Timoteo 4:4)
[Litrato ed pahina 20]
Si Alisa tan say iyaaralan to na Biblia so angigeter ed sigpot-panaon a ministeryo a kalat da