Kapitulo 13
Gobierno na Dios ed Kareenan
1. Anto so sinmaew a ginawa na saray gobierno na totoo?
KASIN naimano yo a saray gobierno na too, anggan saraman so walaan na maabig a getma, so sinmaew a mamenek ed saray peteg a nakakaukolan na too? Anggapo so akaresolbe ed problema na krimen tan diad panggugulaan na rasa odino akapangitarya na manepeg a tagano odino panabungan a para ed amin a totoo. Agda nibulos a nagnap so mibabaley ed sakit. Nisay ayarian na anggan anton gobierno a patundaen so itatatken odino ipapatey odino mamaoli ed inaatey. Anggapo so anggan sakey ya akapangitarok na magnayon a kareenan tan kaligenan ed saray mibabaley to. Saray gobierno na totoo so basta agmakayarin manresolbe ed baleg iran probleman akaarap ed totoo.
2. Anto so manunan mensahe na Biblia?
2 Kabat na amalsa tayo so abalbaleg a pankaukolan tayo ed sakey a gobiernon matunong a manggawan posibli ed amin a totoon manggayaga na nagnap tan maliket a bilay. Kanian sikato no akin ya ibabaga na Biblia so sakey a gobierno ed leksab na panangiwanwan na Dios. Diad tua, sayan insipan na Dios a gobierno so manunan mensahe na Biblia.
3. Antoy ibabaga na Isaias 9:6, 7 nipaakar ed gobierno na Dios?
3 Balet nayarin itepet yo: ‘Iner so pansasalitaan na Biblia ed gobierno na Dios?’ Sasalitaen to, alimbawa, ed Isaias 9:6, 7. Unong ed King James Version, kuan na sarayan bersikulo: “Ta diad sikatayo nianak so sakey ya ugaw, diad sikatayo sakey ya anak a laki so niiter: tan say gobierno so walad tapew na abala to: tan say ngaran to so natawag na Makapakelaw, Mananimbawa, Say makapanyari a Dios, Say andi-anggaan ya Ama, Say Prinsipe na Kareenan. Diad idaak na gobierno to tan kareenan anggapo so anggaan.’’
4. Siopa so ugaw a magmaliw a manuley ed gobierno na Dios?
4 Ibabaga dia na Biblia so nipaakar ed kianak na sakey ya ugaw, sakey a prinsipe. Nasabi panaon sayan ‘anak na sakey ya ari’ so magmaliw a baleg a manuley, “Say Prinsipe na Kareenan.’’ Nipaabala ed sikato so tuan makapakelaw a gobierno. Sayan gobierno so mangitarok na kareenan ed sankadalinan tan say kareenan so magnayon lawas. Say ugaw, a say inkianak to so nipasakbay ed Isaias 9:6, 7, et si Jesus. Sanen niyabawag so kianak to ed sakey a birhen a si Maria, inkuan na anghel Gabriel nipaakar ed si Jesus: “Sikato so manuley a bilang ari . . . tan anggapo so anggaan na panarian to.’’—Lucas 1:30-33.
PANANGIDANET ED KAIMPORTANTIAN NA PANARIAN
5. (a) Panoy inkipanengneng ed Biblia na kaimportantian na Panarian? (b) Anto so panarian na Dios, tan anto so gawaen to?
5 Legan a sikara so wadia ed dalin, say manunan kimey nen Jesus tan saray patumbok to, et say pangipulong tan pangibangat ed isabi na Panarian na Dios. (Lucas 4:43; 8:1) Tinugyop da so ngalgalin 140 reperensya ed satan a panarian diad Biblia. Imbangat ni ingen nen Jesus iray patumbok to a mangipikasi’d Dios: “Onsabi komon so panarian mo. Nagawa komon so linawam ed dalin, a singa diad tawen.’’ (Mateo 6:10, King James Version) Kasin sayan panarian ya ipipikasi na saray Kristiano so peteg a gobierno? Nayarin agmo inisip ya ontan, balet satan so peteg. Say Anak na Dios, si Jesu-Kristo, so Ari na Panarian. Tan say sankadalinan so magmaliw a teritoryan uleyan. Agaylan makapaliket ed satan sano saray totoo so agla naapag-apag ed dakerakel iran mansusumpaan a nasyones, noagta amin a totoo so napankakasakey ed kareenan ed silong na gobiernon Panarian na Dios!
6. Sanen si Jesus so wadiad dalin, akin a nibagan say Panarian so “asingger’’ tan “walad utel yo’’?
6 Inggapo nen Juan a Managbautismo so impangipulong ed sayan gobierno, a kuanto ed totoo: “Magbabawi kayo, ta say panarian na katawenan so inmasingger la.’’ (Mateo 3:1, 2) Akin a saya so imbaga nen Juan? Lapud si Jesus, say Sakey a magmaliw a manuley ed mangatatawen a gobierno na Dios, so ngalngalilan bautismoan to tan nalanaan na masanton espiritu na Dios. Kanian natalosan yo no akin a si Jesus et inkuanto ed saray Pariseos: “Nia! say panarian na Dios so wala ed utel yo.’’ (Lucas 17:21) Saman so lapud si Jesus, a tinuro na Dios ya ari, so wadman ed sikara. Legan na talora tan kapalduan taon na panagpulong tan panagbangat to, si Jesus, diad katooran to ed Dios ya anggad ipapatey, pinaneknekan to so kanepegan ton magmaliw ya ari.
7. Antoy mangipanengneng a say Panarian so sakey ya importantin salisalan sanen si Jesus so wadiad dalin?
7 Diad pangipanengneng a say panarian na Dios so importantin salisalan kaleganan na ministeryo nen Kristo, imanoen tayo no anto so agawa ed unor ya agew antis na impatey to. Ibabaga na Biblia ed sikatayo a si Jesus so inakusa na totoo, a kuan da: “Sayan too so aromog a mamupuligar ed nasyon tayo tan isesebel to so panagbayar na buis ed si Caesar tan ibabaga ton sikato a mismo so Kristo ya ari.’’ Diad impakadngel ed sarayan bengatla, tinepetan nen Romanon gobernador a Pontio Pilato si Jesus: “Sika ta so ari na saray Judios?’’—Lucas 23:1-3.
8. (a) Panoy impangebat nen Jesus sanen sikatoy atepetan no sikato so sakey ya ari? (b) Anto so labay nen Jesus ya ibaga sanen inkuanto a say panarian to so “agmanlapud sayan sengegan’’?
8 Ag-inebatan nen Jesus a diretsa so tepet nen Pilato, noagta kuanto: “Say panarian ko so agkabiangan na sayan mundo. No say panarian ko so kabiangan na sayan mundo, saray ariripen ko so akibakal komon pian agak niyawat ed saray Judios. Balet, a singa ontan, say panarian ko so agmanlapud sayan sengegan.’’ Onia so inyebat nen Jesus lapud say panarian to so aliwan mangaraldalin. Sikato so manuley ed tawen, aliwan bilang sakey a toon manlapud sakey a trono ed dalin. Lapud say salisalan et no kasin si Jesus so walaan na kanepegan a manuley bilang ari odino andi, tinepetan lamet nen Pilato si Jesus: “Bueno, sirin, kasin sika so ari?’’
9. (a) Anton makapakelaw a katuaan so impakabat nen Jesus? (b) Antoray baleg a tepet natan?
9 Malinlinew, si Jesus so nabibista ed bilay to lapud sikato so mangipupulong tan mangibabangat nipaakar ed sakey a balon gobierno. Kanian inebatan nen Jesus si Pilato: “Sika a mismo so mangibabaga a siak so sakey ya ari. Nisengeg ed saya siak so nianak, tan nisengeg ed saya siak so sinmabi ed mundo, pian tasian ko so katuaan.’’ (Juan 18:36, 37) On, inusar nen Jesus so bilay to ed dalin diad impangibaga to’d totoo na makapakelaw a katuaan nipaakar ed gobiernon Panarian na Dios. Sikato so manunan mensahe to. Tan say Panarian so siansia nin sankaimportantian a salisalan natan. Sarayan tepet, anggaman kuan, so mansiansia ni: Dinan a gobierno so sankaimportantian ed bilay na sakey a too? Kasin sikato so bengatlan gobierno na totoo, odino sikato so Panarian na Dios a si Kristo so manuley?