Kapitulo 28

Panuulop ed Balang Sinansakey Diad Aro

1. (a) Panon so nayarin pagmaliw yo a kabiangan na organisasyon na Dios? (b) Anton ganggan so nepeg yo sirin a tuloken?

LEGAN A SIKAYO so ombulaslas ed pikakabat tan diad apresasyon ed si Jehovan Dios tan diad saray gagala to, kaliktan yo so milimog a maparanay ed saray totoon walaan na sayan parehon pananisia tan ilalo. Diad panggawa na ontan, magmaliw kayon kabiangan na nanengneng a muyongan na Dios, say tuan Kristianon impanaagi. “Nawalaan na aro ed interon panlilimog na sanaagi” so diad satan et sakey a ganggan a nepeg yon sumpalen.​—1 Pedro 2:17; 5:8, 9.

2. (a) Anton balon ganggan so inter nen Jesus ed saray patumbok to? (b) Anto so malinew ya ipanengneng na saray balikas a “balang sinansakey” tan “limog yon dili”? (c) Panon kaimportante so pakawalaan na aro?

² Indanet nen Jesu-Kristo no panon kaimportante ed saray patumbok to so panaarowan ed balang sinansakey. Inkuanto to’d sikara: “Ikdan takayo na sakey a balon ganggan, a sikayo so manaarowan ed balang sinansakey . . . Diad saya naamtaan na amin a sikayoray babangatan ko, no walaan kayo na aro ed limog yon dili.” (Juan 13:34, 35) Saray balikas a “sinansakey” tan “limog yon dili” so malinlinew a mangipanengneng ya amin a tuan Kristiano so mankakasakey ed sakey a grupo odino organisasyon. (Roma 12:5; Efeso 4:25) Tan sayan organisasyon so nabidbir diad arowan na saray membro to ed sinansakey. No say sakey a too so andian na aro, amin a bengatla so andi-kana.​—1 Corinto 13:1-3.

3. Panon so pangidadanet na Biblia ed kaimportantian na pangaro tan pangasikaso ed saray kaparan Kristianos?

³ Kanian, saray inmunan Kristianos so mabetbet a naikdan na ontan a panonot a singa saraya: “Nawalaan na matamoy ya arowan ed balang sinansakey.” “Manaabrasaan so balang sinansakey.” “Paaripen ed balang sinansakey.” “Mapangasi ed balang sinansakey, matamoy ed panangabagey.” “Mantultuloy a mantetepelan ed balang sinansakey, tan manpeperdonaan so sinansakey a bulobulos no siopaman et walaan na pangidaleman a sumpad sananey.” “Itultuloy so panliligliwaan ed balang sinansakey tan manpapaalageyan so balang sinansakey.” “Mareen ed balang sinansakey.” “Nawalaan na ampetang ya arowan ed balang sinansakey.”​—Roma 12:10; 15:7; Galacia 5:13; Efeso 4:32; Colosas 3:13, 14; 1 Tesalonica 5:11, 13; 1 Pedro 4:8; 1 Juan 3:23; 4:7, 11.

4. (a) Anto so mangipanengneng a saray Kristianos so nepeg a mangaro ed arum nilikud ed “balang sinansakey”? (b) Siopa nagkalautla so aroen na saray Kristianos?

⁴ Anggaman kuan, agkabaliksan na saya a saray tuan Kristianos so mangaro lambengat ed saray kapara ran membro ed organisasyon na Dios. Sikara so mangaro met ed arum. Say Biblia, diad tua, so mamapaseseg ed sikaran ondaak “diad aro ed balang sinansakey tan ed amin.” (1 Tesalonica 3:12; 5:15) Diad impangiter to ed asimbang a punto de bista, insulat nen apostol Pablo: “Kimeyan tayo so maabig ed amin, balet nagkalautla ed saraman so misiglaotan ed sikatayo diad pananisia.” (Galacia 6:10) Kanian manwarin saray Kristianos so nepeg a mangaro ed amin a pati saray kakabusol da, nepeg dan nagkalautlan aroen iray kapara ran membro ed organisasyon na Dios, saray espiritual ya agagi ran lalaki tan bibii.​—Mateo 5:44.

5. Antoy mangipanengneng a saray tuan Kristianos, nen inmuna ran panaon tan natan, so naimano nisengeg ed arowan da?

⁵ Saray inmunan Kristianos so kabkabat a maong ed sayan aro a walad sikara diad balang sinansakey. Unong ed komaduan-siglon managsulat a si Tertullian, ibaga na totoo ed sikara: ‘Nengnengen no panon so panaarowan da ed balang sinansakey, tan no panon a sikara so akaparaan ya ompatey a nisesengeg ed balang sinansakey!’ Say ontan ya arowan so nanengneng met ed limog na saray tuan Kristianos natan. Balet kasin kabaliksan na saya ya anggapo laray problema odino gonigon ed limog na saray tuan Kristianos?

SARAY BUNGA NA AG-INKAYADYARI

6. Akin ya anggan saray tuan Kristianos no maminsan et mankasalanan a sumpad balang sinansakey?

⁶ Manlapud panaaral yo na Biblia namoria yo ya amin tayo so akatawir na ag-inkayadyari a manlapud inmunan atateng tayo, si Adan tan Eva. (Roma 5:12) Kanian sikatayo so nikiling a manggawa na mauges. “Amin tayo so nagapol ed dakel a danay,” so kuan na Biblia. (Santiago 3:2; Roma 3:23) Tan nepeg yon nonoten a saray membro na organisasyon na Dios so aliwa met ya ayadyari tan no maminsan et makapanggawa ra met na aliwan maptek. Saya so nayarin mansumpal ed saray problema tan gonigon anggan diad limog na saray tuan Kristianos.

7. (a) Akin a nakaukolan a nibaga ed si Euodia tan si Sintike a “sikara komon so wala ed parehon kanonotan”? (b) Anto so mangipanengneng, manuna, a saraya so maabig a Kristianon bibii?

⁷ Imanoen so kipapasen na duaran bibiin manngaran na Euodia tan Sintike ed inmunan kongregasyon diad Filipos. Insulat nen apostol Pablo: “Bilinen ko si Euodia tan bilinen ko si Sintike a wala ra komon ed parehon kanonotan diad Katawan.” Akin a pinaseseg nen Pablo irayan duaran bibii “wala ra komon ed parehon kanonotan”? Malinlinew, wala so linmesan gutgutan ed baetan da. Ag-ibabaga na Biblia no anto ’tan. Angangko ta sikara so nayarin maniimonan ed balang sakey. Ingen, manuna, saraya so maabig a bibii. Sikara so Kristianos ed abayaglan panaon, taotaon sakbay na impibiang da ed si Pablo diad kimey na panagpulong. Kanian sinulat to so kongregasyon: “Itultuloy yon tulongan irayan bibiin nambanikel a benebenek a kaibak diad maong a balita.”​—Filipos 4:1-3.

8. (a) Anton gutgutan so linmesa ed baetan nen Pablo tan si Bernabe? (b) No sikayo so wadman tan sayan gutgutan so naimatonan yo, anto so nayarin ibaga yo?

⁸ Diad sakey a panaon linmesa so gutgutan ed baetan nen apostol Pablo tan si Bernabe a kaiba ton nambiahe. Sanen sikara so ngalngalilan ombuat ed komaduan misioneron pambaroy da, kinaliktan nen Bernabe a papilaen si Marcos a kapinsan to. Anggaman kuan, agnilabay nen Pablo a papilaen si Marcos, lapud si Marcos so anaynan ed sikara tan anempet diad samay inmunan misioneron impanbaroy da. (Gawa 13:13) Kuan na Biblia: “Diad saya et agawa so ampetang ya interak na sanok, ta pian sikara so nansian.” (Gawa 15:37-40) Isipen! No wadman kayo tan anengneng yo so sayan “ampetang ya interak na sanok,” kasin ibaga yo la a si Pablo tan si Bernabe so aliwan kabiangan na organisasyon na Dios lapud nengneng na impanugali ra?

9. (a) Anton kasalanan so agawaan nen Pedro, tan anto so anagdag ed sikaton onkiwas na onia? (b) Anto so ginawa nen Pablo nen anengneng to so nagagawa?

⁹ Diad sananey ya inkagawa si apostol Pedro so nanggawa na mauges. Tinundaan to so pililimog a maapit ed saray Kristianon Gentil lapud takot a sikato so ipasen a makapuy na arum iran Judion Kristianos a lingo so panangipaabeba ra ed saray Gentil ya agagi ra. (Galacia 2:11-14) Sanen anengneng nen apostol Pablo so gagawaen nen Pedro, kinondena to so aliwan manepeg a kondukta nen Pedro diad arap na saray amin a wadman. Panon so liknaan yo no sikayo si Pedro?​—Hebreos 12:11.

PANRESOLBE ED SARAY GUTGUTAN DIAD ARO

10. (a) Panon so inkiwas nen Pedro sanen sikato so akorihe? (b) Anto so naaralan tayo ed ehemplo nen Pedro?

¹⁰ Si Pedro komon so sinmanok ed si Pablo. Sikato komon so asakitan diad paraan na impametek nen Pablo ed sikato diad imaton na dakel. Balet agto ginawa so ontan. (Eclesiastes 7:9) Si Pedro so mapaabeba. Inawat to so panametek, tan agto inabuloyan so aro to’d si Pablo ya ombetel. (1 Pedro 3:8, 9) Imanoen no panon ed saginonor so impanukoy nen Pedro ed si Pablo ed sakey a sulat na panamaseseg ed saray kaparan Kristianos: “Ipasen so anos na Katawan a singa kilalaban, a singa say inararo tayon agin Pablo unong ed kakabatan a niiter ed sikato et nansulat met ed sikayo.” (2 Pedro 3:15) On, inabuloyan nen Pedro so aro a manakbong ed gutgutan, a diad sayan kipapasen et nansumpal a nanlapud dilin lingon kondukta to.​—Uliran 10:12.

11. (a) Anggaman ed interak na sanok da, panon nen Pablo tan Bernabe ya impanengneng a sikara so tuan Kristianos? (b) Panon so kagunggunaan tayo ed ehemplo ra?

¹¹ Anto so nipaakar ed problema diad baetan nen Pablo tan si Bernabe? Saya met so aresolbe ed aro. Ta diad saginonor, sanen nansulat si Pablo diad kongregasyon ed Corinto, sinalita to si Bernabe a bilang maapit a kakimeyan. (1 Corinto 9:5, 6) Tan anggaman pinmatnag a si Pablo so walaan na maabig a rason diad panduaruwa ed kablian nen Marcos bilang sakey a managbiahen kaiba, sayan walad kalangweran so diad saginonor et tinmatken ed punto a nayarian nen Pablo ya isulat ed kinen Timoteo: “Itagar mo si Marcos tan itarok mo dia a kaibam, lapud sikato so mausar ed siak diad panagministro.” (2 Timoteo 4:11) Nagunggunaan itayo ed sayan ehemplo diad pananguksoy ed saray balingaan.

12. (a) Akin a nayarin ipasen a si Euodia tan si Sintike so anguksoy ed saray balingaan da? (b) Unong ed Galacia 5:13-15, akin a makana a saray Kristianos so manguksoy ed saray balingaan da diad aro?

¹² Bueno, anto so nipaakar ed si Euodia tan si Sintike? Kasin nauksoy daray balingaan da, ya inabuloyan da so aro a manakbong ed antokaman a nayarin agawaan da a sumpad balang sakey? Ag-ibabaga na Biblia ed sikatayo no anto so agawa ed sikara diad kaunoran. Balet, say kipapasen dan maabig a bibii ya akikimey ed si Pablo a benebenek diad Kristianon ministeryo, nayarin makatunongan ya ipasen tayon sipapaabeban inawat da so niiter a konseho. Sanen naawat da so sulat nen Pablo, naisip tayo lambengat so impanarapan da tan pinetek da so problema diad espiritu na aro.​—Galacia 5:13-15.

13. Anton ehemplo diad panangipanengneng na aro so inletneg nen Jehova a Dios?

¹³ Sikayo, met, so nayarin makaromog a mairap so piulop ed sakey a too, odino totoo, ed kongregasyon. Anggaman nayarin andukey ni so dalanen da diad pamayubo ed tuan Kristianon kalidad, saya pa so isipen: Kasin alagden nen Jehovan Dios ya anggad saray totoo so makaekal ed amin a dalan dan mauges sakbay a sikara so aroen to? Andi; ibabaga na Biblia: “Irerekomenda na Dios so dilin aro to ed sikatayo a, legan a sikatayo ni so makasalanan, si Kristo so inatey a nisesengeg ed sikatayo.” (Roma 5:8) Nakaukolan tayon tumboken itan a maabig ya ehemplo na Dios tan ipanengneng so aro ed saraman so manggawa na mauges tan kakulangkulangan iran bengatla.​—Efeso 5:1, 2; 1 Juan 4:9-11; Salmo 103:10.