Ligliwa ed Saray Manamemben na Katooran
“Lapud katooran ko siak so intandorom.”—SALMO 41:12.
1. Akin a nakaukolan na saray totoo nen Jehova so ligliwa?
SARAY manamemben-na-katooran a tastasi nen Jehova so mankaukolan na ligliwa lapud sikara so puntirya na panamasegsegang. Siempre, nepeg dan ilaloan so ontan iran subok, lapud imbaga nen Jesus ed saray patumbok to: “Say aripen so aliwan babaleg nen say katawan to. No siak so pinasegsegang da, sikayo met so pasegsegangen da.” (Juan 15:20) Nagkalautla natan a saray totoo nen Jehova so mankaukolan na ligliwa. Akin? Lapud say orihinal a managbuyak na katooran, si Satanas a Diablo, so nibantak ed kaliberliber na dalin, tan antiktikey la so panaon to. Sirin, gagawaen to la so ultimon talindeg to bilang mibabakal a sumpad Dios tan diad saray ariripen to.—Apocalipsis 12:7-9, 17.
2. Panon so liknaan na saray Kristianos nipaakar ed irirap na kapananisiaan?
2 Bilang ariripen nen Jehova, masimoon ya ipipikasi tayoray agagi tayon lalaki tan bibii a mankikimey ed leksab na panangisebel odino sikara so niniiyan ed kairapan odino papairapen na saray managpasegsegang. (Gawa 12:1; 2 Tesalonica 1:4) Komendaan tayoray Kristianon mangisusungdon sitotoor ed panagbalaw na saray apostata tan saray arum. (Mateo 5:11) Walaan itayo na maaron panangimano ed saray kapananisiaan a sinumpa na kakanayon odino manaayam ed sankaabungan a naapag-apag ed relihyon. (Mateo 10:34-36) Tan say impapuson panangabagey tayo so wala ed saray manamemben na katooran a manasagmak ed kakapuyan na laman tan abayaglan sakit. Balet akin a wala so onia lan kairapan? Tan anton ligliwa so wala ed saray lalaki tan bibii na katooran?
Nonoten so Rason tan say Salimbengan
3. Uusaren nen Satanas so panamasegsegang diad getman manggawa na anto?
3 Balanglan diad panamegley na too odino diad panamegley na denidemonyon paraan, say Diablo et aanapen ton “buagen” iray Kristianos. (1 Pedro 5:8) On, uusaren nen Satanas so panamasegsegang tan arum iran kairapan diad pangegetman paneral ed relasyon tayo ed si Jehova a Dios, pian gawaen to itayon aliwan matoor a managbuyak na katooran. Balet diad amin na saya, kasin sikatayo so andian na depensa? Andin peteg!
4. Sano nidunget ed panamasegsegang tan arum iran kairapan, diad anto so pakapanseguroan na saray manamemben na katooran?
4 Si Jehova so salimbengan tayo no sipipikasin kerewen tayo so tulong to. Sano gewgewen na panamasegsegang tan arum iran kairapan, nayarian tayo so mikasi ed sikato a singa ginawa nen salmista David: “Ipanengneng mo ed siak so panangasi, O Dios, ipanengneng mo ed siak so panangasi, ta diad sika so pansalimbengan na kamarerwak; tan diad anino na saray payak mo et siak so mansalimbeng ya anggad onlabas iray kairapan.” (Salmo 57:1) Bilang manamemben na katooran, makapanseguro tayo a, nasabi panaon, et onsabi so inawa a manlapud si Jehova, say Salimbengan. Tan sikatayo so ontan lan sitatalek a singa si David sanen inkuan to diad pikakasi to ed Dios: “Lapud katooran ko et siak so inampupom, tan siak so ipasen mo ed arap na lupam ed ando lan ando.”—Salmo 41:12.
5. Anton kalidad so nakaukolan na saray napapasegsegang a Kristianos, tan anton ilalo so wala ed sikatayo?
5 Lapud saray subok so nayarin mantultuloy ed sakey a panaon, anggaman kuan, nakaukolan tayon bayuboan so panagsungdo. Pinaseseg nen apostol Pablo iray Hebreon Kristianos ya “itultuloy dan nonoten iray inmunan agew a . . . sinungdoan [da] so baleg a laslasan diad leksab na irirap.” Insulat to ni: “Wala so pankaukolan yo ed panagsungdo, pian diad ontan, kayari na impakapangggawa yo ed linawa na Dios, et awaten yo komon so kasumpalan na sipan.” (Hebreos 10:32-36) Para ed saray alanaan a Kristianos, say kasumpalan na sipan na Dios so mangitarok na tumang ya imortal a bilay ed tawen. Balet nipaakar ed “baleg ya ulop,” wala so ilalo ed maandon bilay diad mangaraldalin a paraiso. (Apocalipsis 7:9; Lucas 23:43) Peteg, say kilalaban a mangipugta ed maandon bilay so posibli ed amin a mansungdo ya anggad kasampotan bilang manamemben na katooran.—Marcos 13:13.
6. Akin ya arum ed limog na saray Tasi nen Jehova so walaan na nikaduman pankaukolan ed panagsungdo, tan anton tulong so wala ed sikara?
6 Diad pigamplon taon, saray Tasi nen Jehova ed arum a daldalin so nagkalautlan ‘walaan na pankaukolan ed panagsungdo.’ Akin? Lapud nepeg dan isumpal so sagradon serbisyo ra diad mairap a teritorya odino diad arap na nanduruman kairapan, a pati saray panangisebel na gobierno. Angangko ta sikan mismo so nakaukolan a mangisungdo ed kaleteyan na laman odino isusumpa na pamilya ed Kristianon kimey mo. Say ontan iran subok so mamatunda ed saraman so onsasaral ed biskeg na too lambengat, balet agda napatunda iray Tasi nen Jehova lapud say “tulong et manlalapud si Jehova, say Managgawa na tawen tan dalin.”—Salmo 121:1-3.
7. (a) Saray subsubok a mantultuloy so mangiter ed sikatayo na anton pankanawnawa? (b) Akin a sikatayo so manisia ed imbaga nen Pablo ed Filipos 4:13?
7 Arum iran kipapasen so nayarin nakaukolan a sungdoan ya anggad anggaan na sayan sistema na bengabengatla. Ingen say mantultuloy iran subok so mangipalugar ed sikatayo na pankanawnawan mamaneknek na katooran tayo ed Dios tan paliketen so puso to. (Uliran 27:11) Ontan met, iter nen Jehova so biskeg a nakaukolan pian makapansungdo ed katooran. Insulat nen apostol Pablo: “Ta amin a bengatla et siak so walaan na biskeg diad birtud na saman so angiter ed siak na pakayari.” (Filipos 4:13) Nayarian yon sisiaen iratan a manamaseguron salita, lapud sikara so pirmin napapaneknekan a tua diad kipapasen na “interon panlilimog na agagi yo ed sankamundoan.”—1 Pedro 5:9, 10.
Sikatayo so Pasesegen na Saray Manamemben na Katooran
8. Iyilustra no panon a saray manamemben na katooran ed naapag-apag a sankaabungan so nayarin nabendisyonan.
8 Sikato so subol na baleg a pakapasesegan diad pakanengneng ed katooran a pansiasiansiaen na ‘interon panlilimog na agagi tayo ed mundo.’ Arum ed sikara so atumangan a siyayaman diad impamemben da na katooran da ed si Jehova ed naapag-apag a sankaabungan. Alimbawa, sanen nigapo so panangiyaral na Biblia ed sakey a biin Katoliko ed Ireland, impatnag na masiken to so ampait ya isusumpa tan sikato so binegya ton ideborsyo. Anggaman kuan, intultuloy to so impanaral to, tan sakey ya agew et inikdan to so masiken to na sakey a kopya na libron You Can Live Forever in Paradise on Earth. Sikato so asagyat ed inkalinew to, inkadirekta, tan maabig iran ilustrasyon. Agnambayag et say asawan laki so nanaral na Biblia diad tulong na sayan libro. Intunda to so panagsigarilyo tan agnambayag et say sanasawa so nandimite ed Iglesia Katoliko tan dineral daray tatawagen a masanton retrato. Agnambayag, say bii so abautismoan tan mibibiang ed kimey na panag-auxiliary payunir, bang say asawa to so maaligwas ed ministeryo. Say ontan iran eksperiensia so peteg a kapasesegan na saraman so wala ed naapag-apag a sankaabungan a mansusungdo bilang manamemben na katooran.—1 Corinto 7:12-16.
9. Panon so pakatulong na saray agmakayari ed pisikal a manamemben na katooran ed arum?
9 Arum a manamemben na katooran so nansiansian matalek anggaman ed agpakayari na laman. Diad Britanya, sakey ya agmakayarin Kristiano a manguusar na wheelchair so anggaman kuan et akaromog na kasumpalan ed ministeryo to. Insulat to: “Anggaman siak so agmakaimpleyo ed sekular nanlapu la nen 1949, si Jehova so aliketan a mangusar ed siak diad amin na sayan panaon. Sirin saray taon so linmabas a maples. Naaralan ko ya anggan say graben agmakayarin too so magmaliw a baleg a serbisyo ed arum. Say asawak tan siak so nagmaliw a nengneng na pataga ed saray nanduruman agagi ed kongregasyon. Lapud saray kipapasen mi et sikamin naynay so wadia, naynay ya akaparaan.” On, agkomon abuloyan na Kristianon agmakayari a sikato so nadismaya, lapud sikato so nayarin kapasesegan na arum.
10. Diad ag-isuko ed panamasegsegang, panon so pakatulong na saray manamemben na katooran ed saray kapananisiaan?
10 Saray manamemben na katooran so ag-onsuko ed panamasegsegang. Nipangaw diad impamemben to ed Kristianon neutralidad, inkuan na sakey ya agin laki: “Saray inkapekpekpek . . . so nagmaliw a maparanay a kabiangan na bilay ko, a dinmaak ed bilang tan inkasakit. Siak so kinmapuy ed kada agew, legan a siak so mabetbet a sibletan da na tagano. Pirmin siak so nampikasi ed si Jehova, tan nibagak ya agtoak kinaindanan. Kapiganman a lalon pekpeken da ak, mandaiset so pakaliknak.” Anggaman asentensyaan ed masulok a duay taon ed pangawan, sayan tasi nen Jehova so amemben na neutralidad to. (Isaias 2:2-4; Juan 15:19) Dakel nin arum a manamemben na katooran so angala na miulibay a talindeg. Petepeteg, say ontan a panamemben na katooran so mangiter na makapaseseg ya ehemplo a nayarin mamakiwas ed saray kapananisiaan diad katooran.
Ag-onsaew a Ligliwa
11. Anton Makasulatan a paseguro na ligliwa so wala ed saray Kristiano?
11 Saray wala ed unaan so pigara lambengat ed saray agnabilang ya eksperiensian mamapaneknek a si Jehova so wala ed saray matoor a totoo to. Sikato so “Ama na matamoy iran panangasi tan say Dios na amin a ligliwa, a manligliwa ed sikatayo ed amin a kairapan tayo.” (2 Corinto 1:3, 4) On, “say Dios so dia ed sikatayo et sakey a salimbengan tan biskeg, sakey a tulong ya akaparaan a naromog legan na gonigon.” (Salmo 46:1-3) Agaylan makaligliwa so pakaamta a sikatayo so ampupoen to tan saray kapananisiaan tayo ed amin a kairapan tayo!
12. Panon a say kurang na panamemben nen Pablo na katooran so mangapekta ed saray kaparan Kristianos?
12 Makaagwat itayo na tepel a manlapud pakanengneng ed saray kaparan managdayew ed si Jehova a mansusungdo bilang matoor a Kristianos diad nanduruman kairapan. Ontan so agawa sanen saray arum so akaimaton ed katooran nen apostol Pablo. Insulat to: “Saray kimey ko so nagmaliw a kinmana ed inkiyabante na maong a balita imbes ya aliwan ontan, ta pian saray balor ko so nagmaliw a kabat ed lapag . . . ; tan maslak ed saray agagi ed Katawan, a liknaen dan matalek nisesengeg ed saray balor na inkipangaw ko, so angipanengneng na nagkalalon tepel a mansalita ed salita na Dios ya andi-takot.”—Filipos 1:12-14.
13. Say dilin panamemben tayo na katooran so walaan na anton epekto?
13 On, sano kabat tayo ya arum ed saray tasi nen Jehova so mamebemben na katooran da ed sikato diad arap na panamasegsegang, sikatayo so napabiskeg a mansiansian matoor. Diad biek a dapag, sano sikatayon mismo so mamemben na katooran ed leksab na subok, papasesegen tayo so arum a mansalita ed salita na Dios ya andi-takot. Tan peteg a makaromog itayo na kapenek diad pakaamta a say katooran tayo so sengegan na kapaseseg tan kabendisyonan da.
14. Anton duaran paraan so panliligliwaan nen Jehova ed sikatayo?
14 Sikatayo so pabiskegen nen Jehova diad panamegley na masanton espiritu to. Diad tua, a singa insulat nen Pedro, ‘no sikatayo so nabalaw nisesengeg ed ngaran nen Kristo, sikatayo so maliket, lapud say espiritu na gloria, anggan say espiritu na Dios, so manaayam ed sikatayo.’ (1 Pedro 4:12-16) Sikatayo met so ligliwaen na Dios tan saray maniirap a kapananisiaan tayo diad pangebat to ed saray pikakasi tayo. “Agkayo mapaga ed antokaman,” so insulat nen Pablo, “balet diad amin a bengatla ed pikakasi tan pikekerew a tekep na pisasalamat et saray kerew yo so nipakabat komon ed Dios; tan say deen na Dios a manalona ed amin a kaisipan so manbantay ed kapusoan yo tan saray pakayari na nonot yo diad panamegley nen Kristo Jesus.” (Filipos 4:6, 7) Kasin walaan kayo na miulibay a talek diad “Dumerengel na pikakasi”?—Salmo 65:2.
Mangagwat na Ligliwa a Manlapud Salita na Dios
15. Panon yon iyilustra so katuaan na Roma 15:4?
15 Say sagradon Salita na Dios so sakey met a subol na baleg a ligliwa. A singa impaimano nen apostol Pablo: “Amin a bengatlan nisulat nensaman so nisulat ya onkanan kibangatan tayo, pian diad panamegley na panagsungdo tayo tan diad panamegley na panamaligliwa na Kasulatan et nawalaan itayo komon na ilalo.” (Roma 15:4) Alimbawa, sano nabasa tayo so nipaakar ed makapakelaw o mamilagron inkiliktar na Israel a manlapud Ehipto odino inkipreserba na saray Judios ed agew nen Reyna Ester, agta satan so mamabiskeg na talek tayo ed si Jehova bilang andi-kaparan Manangiliktar? Kumusta so nipaakar ed rekord na katooran diad impamemben nen Job na katooran ed arap na baleg a kairapan? Peteg, saya so mangiyilustra no panon a saray modernon agew ya ariripen nen Jehova so makayarin mangisungdo ed saray irirap diad biskeg ya iter na Dios. Say “ligligwa a manlapud Kasulatan” so peteg a mamano ed saray manamemben na katooran na ilalo tan tepel.
16. Anto makaligliwan paseguro so naromog ed 1 Pedro 5:6, 7 tan 1 Corinto 10:13?
16 Balet anto no saray problema tayo so mangonigon a tuloy ed sikatayo? Peteg, say ligligwa a manlapud panamaseguro na Kasulatan so manggawa ed sikatayon manliknan maligen diad panangasikaso nen Jehova tan ontulong a mamalemew na irap tayo. Insulat nen apostol Pedro: “Ipaabeba yo so inkasikayo . . . diad leksab na makapanyarin lima na Dios, pian sikayo komon so itandoro to ed manepeg a panaon; legan ya ipasakbat yo so amin a kapagaan yo ed sikato, lapud sikayo so talimaen to.” (1 Pedro 5:6, 7) On, “sikayo so talimaen” nen Jehova. Agaylan makaligliwan kanonotan! Anggapo so nagawa ya agto nanengneng odino agto nakontrol. Nagkalalo, sayan paseguro so inter nen Pablo: “Say Dios so matoor, tan agto kayo abuloyan a natukso ed labas na nitepel yo, noagta dingan na tukso et itarya to met so dalan ta pian nayarian yon sungdoan.” (1 Corinto 10:13) Bilang sakey a toon determinadon magmaliw a manamemben na katooran, sika so makapanmatalek ed satan!
17. Antoran probisyon so wala a mangitarok ed sikatayo na ligliwa?
17 Say sipipikasin panagaral ed Salita na Dios tan diad saray Kristianon palapagan ya intarya na “matoor tan makabat ya aripen” so makapangitarok na ligliwa ed saray panaon na gonigon. (Mateo 24:45-47; Salmo 119:105) Ontan met ed saray maabig a simbawan Makasulatan a manlapud saray mauyamon mamatatken ed kongregasyon. Diad limog na arum a bengatla, sikara so atawag a “mansalitan sililigliwa ed saray apairap a kamarerwa a pabiskegen da so makapuy, a masungdo ed amin.”—1 Tesalonica 5:14.
18. No sikatayo lambengat so walaan na daiset ed materyal a pamaakaran, anton ligliwa so wala ed sikatayo?
18 Balet anton ligliwa so wadtan no sikatayo so nanaabot ed materyal a bengatla? Peteg a makaligliwa so pakaamta a wala so maabig iran abung a panayaman, daakan a tagano, tan arum iran materyal a bendisyon diad Balon Oksuy na Dios. (Salmo 72:16; 2 Pedro 3:13; ipareng so Isaias 65:17-25.) Balet anggan natan et say Kristianon panagbilay so mangekal na panagpirdi ed kuarta diad makaderal a panagtabako, panagbuanges, panagsugal, tan arum nira. Sirin say kuartan nasalba so nayarin usaren diad pangungguna ed pamilya na sakey. Say panumbok ed Salita na Dios so ontulong met ed sikatayon magmaliw a kontento ed daiset diad materyal a dalan. Si Pablo so ontan, lapud inkuanto: “Pian maseguro, sikato so paraan na baleg a pananubo, sayan maridios a debosyon a tekep na dilin pamasarag. Ta anggapo so intarok tayo ed mundo, tan nisay makapangitarok tayo na antokaman. Sirin, no walaan itayo na pantagano tan kawesen, pasaragen tayo la irayan bengatla.” (1 Timoteo 6:6-8; Filipos 4:11, 12) Say pangiyapasakey ed saray pribilehyo tayo ed serbisyo nen Jehova so mansumpal ed dakel iran bendisyon a manggawa ed sikatayon peteg a mayaman.—Uliran 10:22.
19. Panon a nitepel so abayaglan sakit?
19 Ingen, anto no sikatayo so mangisungdo ed abayaglan sakit? Saya so nitepel tayo diad tulong nen Jehova tan ligliwan nitarya ed panamegley na Salita to. Alimbawa, inkuan nen salmista David: “Maliket so siopaman ya onkiwas a tekep na panangimano ed abeba . . . si Jehova a mismo so mangampupo ed sika diad dukolan na sakit.” (Salmo 41:1-3) Saya so aliwan panaon na mamilagron katambal. Balet ta iter nen Jehova ed saray mansasakit so kakabatan tan biskeg a nakaukolan diad pangarap ed saray sakit da legan ya iyuna ra ed bilay so intereses na Panarian.—Mateo 6:33; 2 Corinto 12:7-10.
20. Panon so pakatalona tayo ed kaermenan sano ompatey so sakey ya inad-aro?
20 Panon tayon talonaan so ermen a nasagmak sano ompatey so sakey ya inad-aro tayo? Say ligliwa so nayarin naasol a manlapud pailalo na Biblia ed kioli. (Juan 5:28, 29; Gawa 24:15) Sirin, anggaman sikatayo so apaermen diad impatey na sakey ya inad-aro, sikatayo so “agmanermen a singa met saray arum ya andian na ilalo.” (1 Tesalonica 4:13) Agaylan ligliwa so itarok na ilalo ed kioli diad saray manamemben na katooran!
Mansiansian Matalek ed Dios na Ligliwa
21. Say panamasegsegang a sinungdoan so mabetbet a mansumpal ed anto?
21 Maseguro a si Jehova, “say Dios na amin a ligliwa,” so agbalot mangikaindan ed saray dedikado tan matoor a totoo to. (2 Corinto 1:3; Salmo 94:14) Makatulong met so pannonot a say panamasegsegang a sinungdoan na saray Kristianos so makapangidayew, o mangigloria, ed Dios. Say ontan a tratamento so manawag na imano ed saray totoo to tan diad kimey na panagpulong da ed Panarian, tan saya so mabetbet a mansumpal diad babaleg ya idaak ed bilang na saray managdayew ed si Jehova.—Ipareng so Gawa 8:4-8; 11:19-21.
22. No nipaakar ed katooran, anto so nepeg a determinasyon tayo?
22 Sirin, diad tulong na Dios, sikatayo komon so determinadon ag-onsuko ed saray getma nen Satanas a mamuyak ed katooran tayo. Onkiwas ed pananisia, komon ta sikatayo so mantultuloy a manmatalek ed si Jehova. Agtayon balot komon ibaliwala iray dakel a pamibendisyonan to, pangitatandoroan to, tan panliligliwaan to ed sikatayo bilang ariripen to. Komon ta paneknekan tayo so debosyon tayo ed sikato tan diad saray matunong a prinsipyos to, ya itandoro so inkasoberano to. Nonoten, met, a saya so personal a pamaakaran. Mantultuloy a gawaen so madibinon linawa legan a sikayo so mikimey ed muyongan nen Jehova ed sarayan mankaganatan ya agew. Manliket ed pribilehyo diad panamaliket ed puso nen Jehova diad pansiansian matoor ed sikato tan agbalot lilingwanan a sikato so ag-onsaew a mangitarya na ligliwa ed amin a manamemben na katooran.
Anto So Ebat Yo?
◻ Akin a saray ariripen nen Jehova so nagkalautlan mankaukolan na ligliwa?
◻ Akin ya uusaren nen Satanas so panamasegsegang a sumpad saray Kristianos?
◻ Panon so pakapaseseg na saray manamemben na katooran ed sikatayo?
◻ Panon so pakaagwat tayo na ligliwa a manlapud Salita na Dios?
◻ Diad anto a sikatayo so apaseguroan ed 1 Pedro 5:6, 7 tan 1 Corinto 10:13?
[Litrato ed pahina 9]
Aanapen nen Satanas a buagen iray ariripen nen Jehova, balet sikatayo so lawas walaan na depensa
[Litrato ed pahina 11]
Ebatan nen Jehova so pikakasi na saray manamemben na katooran. Kasin sikayo so manpipikasin maparanay?