Sakey ya Apresasyon​—Balet Akin a Bawien?

NEN Nobyembre katantaon, legan na sakey a kumbension na saray Italyanon obispo ed Bologna, Italya, say Iglesia Katolika so angipabanto na panangataki ed saray Tasi nen Jehova. Diad silong na teman “Si Kristo a Dios Tayo tan Ilalo Tayo: Saray Kristianos ed arap na saray Tasi nen Jehova,” impakasalanan nen parin Giovanni Marinelli a saray Tasi so “sakey a kaatapan na relihyon tan sosyedad.” Lapud maples ya ibabaleg da ed Italya a manlapud limog na saray Katoliko, saray Tasi so inakusa to a bilang ‘sakit a mangakabil nagkalautla ed saraman so maparungtal a tuloy.’

Saray opisyal na katoliko tan membro ed interon Italya so binilin a mangala na aktibon talindeg a sumpad saray Tasi. Panon? Diad impamorma ed kada syudad na saray grupo a “mamainteres ed inkasikara” diad kimey na saray Tasi ta pian “nalukasan so mata na saray matoor tayo.”

Panon so nansumpalan na ontan a kurang a sumpad saray Tasi nen Jehova? Diad sakey a sulat ya impalapag ed Piario Parish Magazine, insulat na sakey a pari: “Diad personal, saray Tasi nen Jehova so labay ko; satan so prankan akuen ko. Sikayon amin so bulos a manisip na duma tan, angangko, et anggan mangekal ed siak. . . . Saramay kabat ko so andian na pakabalawan ed ugali, maulimek-a-mansalita . . . [tan] makatangguyor a tuloy. Kapigan tayon natalosan a say katuaan so mankaukolan na makapasagyat a presentasyon? A saramay mangiyaabawag ed katuaan so agnakaukolan a kapkapalduan-puso, ambanget, atakatak, akulastay?

“Ontan met, saray Tasi nen Jehova so ondago tan dalawen da kayo ed abung. Diad abung et wala kayo ed dilin kaliberliber yo tan sirin walaan na bentaha. . . . Nayarian yon gawaten tan alaen so Biblia yo . . . a manlapud estante, tan nayarian yon usisaen no kasin say sakey a nisitan bersikulo so susto, a natebek yo so suston pantalos ed satan, tan arum ni.

“Tan nayarin ibagak met a say peteg ya anagyat ed siak et say katuaan a saray Tasi nen Jehova so manliknan personal ya ‘atawag’ . . . ed ministeryo na salita. Satan so sakey a kimey ya abayaglan alingwanan tayo tan nansengegan na agnaisip a deral ed panag-ebanghelyo tayo. ‘Panon so pakadngel da no anggapo so sakey a mangiyabawag ed satan?’ Diad siak et saray Tasi nen Jehova so ompatnag a ‘kumpleto’: aliwa lambengat ed abung, trabaho, tan diad panagrelaks, noagta no nipaakar ed personal a panagaral da ed saray bangat da tan no panon so panulong ed arum a mantalos ed saratan. Balet no iner so ‘pateyan’ ko et diad panangiponpon na saray Tasi nen Jehova. No sikara so ipareng ko ed panangiponpon tayon Katoliko, a say alenleneg a toon mareereen et samay inatey, ya anggapo so anggan sakey ya akaegna na Biblia a manumbok ed komunal a panagbasa. . . . Agaylan liwawa! Agaylan pikakasi! Agaylan pananisia! Agaylan inkamareen! Siopa so mikabat no kasin nayarian kon sumpaen so tukso na pangarum ed kaliktan ko: ‘Pilalek ko so panangiponpon na saray Tasi nen Jehova.’ Siopa so mikabat!

“Saray panangigapo ra so sankamatukoyan a tuloy. Angangko ta lapud siak met so diskontento, agnapepenek, a natalosan ko ray lukalukas ya akusasyon da. Ikuan da, ‘Say mundon pambibilayan tayo so napno na karawalan tan imoralidad.’ Kasin liknaen yon labayen a salien a paneknekan a sikara so lingo? Andi ed siak. . . . ‘Say Iglesia Katolika, a sikato so sakey ed saray lalon sankalaknaban a nanaagamil tan sankaraanan a relihyon, so walaan na manunan responsabilidad ed ontan ya inkipabpaabeba.’ Kasin itagey yo so boses yo diad isuppiat? Agko gawaen. Sankaabigan a totoo, maong-impanugali, . . . dedikado. Saray Tasi nen Jehova so walaan na tepel ya onsabi ed katunongan. Manampot ira diad pangikuan, ‘Sirin, benegan yoray iglesia yo tan miulop kayo ed sikami.’

“Bidbiren ko a say pangibeneg ko ed relihyon a kabkabat ko la a nanlapud impansusok ed gatas nen inak, tan miulop ed sananey, so ansakit. Balet no satan so makatunongan, akin a sayan kundang so aggawaen? Satan pa so isipen, say pansalat na relihyon so aliwa lamlamang a makapaabeba. . . . Makapaabeba so panaynan ed sakey a relihyon diad pakaromog lambengat ed kaapaan, a pultoten so pataga pian onggapon ompalir ya ag-amta so pugtaen to. Balet anto no isipen kon say impesak ko so amputi lapu lambengat ta agko anengneng so impesak mo? Singa makatunongan ed siak so pamili na magmaong a sabon, sakey a mamaputin lalo nen say amputi! Say getma na saray misionero so saksakey, tan sakey lambengat: salatan so relihyon na totoo. . . . Akin ya agko salatan so relihyon ko no say konsiensiak so mangibabaga ed siak na ontan? No say managpulong so mangumbinse ed siak a manggawa na ontan? No makatunongan so panggawa na ontan? No say relihyon na saray Tasi nen Jehova so lalon susto . . . , sirin . . . siak so miulop ed saray Tasi nen Jehova. . . . Labay kon amtaen no saray Tasi nen Jehova so susto.”

Diad impanampot ed sulat to, indanet na pari a say panguusar na saray Tasi ed Jehova imbes a Yahweh sano ibabalikas so madibinon ngaran so “aliwan rason ed siak na pakabalang ed mabiskeg a panlabay ko ed saray Tasi nen Jehova.” Akin? “Tutal,” inyarum to, “sikara so Tastasi na Dios tan satan so makabaliksan!”

Paimano: Mapatnag a say sulat na pari so amalesa na bagyo ed saray atagtagey ya ulop na hierarkia. Diad sakey a saginonor a paway na magasin na simbaan, binawi to so komento to nipaakar ed saray Tasi nen Jehova.

1. “Grido d’allarme della Chiesa contro i testimoni di Geova,” nen Dominico Del Prete. Say artikulo so nipalapag ed La Republika, (peryodiko, Italya) a Nobyembre 12, 1985. Nitekep so kopya na patalos.

2. Sulat ya apauloan na “Jehovah’s Witnesses” a nipalapag ed The Piario Parish Magazine, “La Voce,” Piario (Bergamo?), Italya, Pebrero 1986, No. 2. Nitekep so kopya na patalos.