Kasin Saray Tasi nen Jehova so Sakey a Kulto?
SI Jesu-Kristo so inakusan managbuanges, masiba, managbuyak na Sabaton, palson tasi, manag-ayew ed Dios, tan ibabaki nen Satanas. Sikato met so inakusan subersibo.—Mateo 9:34; 11:19; 12:24; 26:65; Juan 8:13; 9:16; 19:12.
Kayari na impatey tan inkioli nen Jesus, saray babangatan to so puntirya met na grabe iran akusasyon. Sakey a grupo ed inmunan-siglo iran Kristiano so sinonson ed saray manuley na syudad diad pangikekelyaw na totoo: ‘Saraya a mangogotgot na mundo, linmara dia met.’ (Gawa 17:6) Diad sakey ya inkagawa si apostol Pablo tan say kaiba ton si Silas so inawit ed saray manuley tan pinakasalanan ed masyadon panisigensigen ed syudad na Philipi.—Gawa 28:22.
Saginonor si Pablo so inakusa bilang sakey a “makasalot, tan manamaalagey na saray yaalza ed saray amin a Judios ed sankamundoan” tan ed panasalin “pabandayen wari so templo.” (Gawa 24:5, 6) Saray manunan lalaki na saray Judio ed Roma et suston aniskribe ed kipapasen na saray patumbok nen Jesus sanen binidbir da: “Ta no nipaakar ed sayan secta, akabatan mi a nasasalita sumpa ed ganagana’y pasen.”—Gawa 28:22.
Mapatnag, sayan balon grupon inletneg nen Jesu-Kristo so impasen na arum a sakey a relihyoson grupon walaan na radikal iran panmoria tan agagamil a nasusuppiat ed no anto so inawat ed saraman ya agew bilang normal a walna ed sosyal. Agpanduaruwaan, dakel natan so mangikokonsidera ed saray Kristiano bilang sakey a makaderal a kulto. Saray manag-akusa so mabetbet a promininte tan rerespetoen iran membro na komunidad, tan saya so ompatnag a nawalaan na kaaruman ya impluensya ed saray akusasyon. Dakel so manisia ed saray akusasyon sumpad si Jesus tan ed saray babangatan to. Ingen, unong a nayarin kabat yo, amin na sarayan panamakasalanan so palso! Say katuaan ya inkuan na totoo ed sarayan bengatla so agnanggawa ed saratan a tua.
Komusta natan? Kasin susto so panukoy ed saray Tasi nen Jehova bilang sakey a relihyoson grupon walaan na radikal iran panmoria tan agagamil a nasusuppiat ed no anto so aawaten bilang normal a walna ed sosyal? Kasin saray Tasi nen Jehova so sakey a kulto?
No Anto so Ipapanengneng na Ebidensya
Sakey ya opisyal na gobierno ed syudad na St. Petersburg, Russia, so angipaliwawa: “Saray Tasi nen Jehova so impresenta ed sikami bilang sananey a nengneng na iyaamot a sekta a gagawaen ed kabilungetan tan manpapatey na ugugaw tan manbibitkel.” Anggaman ontan, saray totoo ed Russia so agano nin nagmaliw a lalon mikabisado ed tuan walna tan kualidad na saray Tasi. Kayari impankimey a kaiba na saray Tasi nen Jehova a misiglaotan ed sakey ya internasyonal a kumbension, naimatonan na parehon opisyal: “Naimano’k natan so normal, maimis a totoo, a lalon magmaong nen say dakel a totoo a kabat ko. Sikaray mareen tan kalmado, tan sikaray manaaroan a maong ed sinansakey.” Inyarum to: “Agkon talaga natebek no akin a saray totoo so mangibabaga na ontan iran tila nipaakar ed sikara.”
Saray Tasi nen Jehova so agmanggagawa na ritualistiko iran miting, nisay say panagdayew da so iyaamot. Ibabaga na aliwan-Tasin autor a si Julia Mitchell Corbett: ‘Sano sikaray mantitipon, gendat ya aliwa labat a maminsan ed sakey simba, ed saray Kingdom Hall (say pasen na panagmitingan da so agtatawagen a simbaan), maslak ed panaon da so uusaren ed panagaral na Biblia tan diskusyon.” Saray panagmitingan da so walaan na karatola. Saray miting so para’d amin, tan say lapag so iimbitaan pian onatendi. Saray ag-inilaloan a bisita so nagkalalon naabrasa.
“Saray Tasi so napapagalangan lapud inkamatua, marespeto, tan makuli,” inyarum nen Corbett ed Libro ton Religion in America. Dakel ya aliwan Tastasi so sipaparaan a mamidbir ya anggapo so nikadkaduma nipaakar ed saray Tasi nen Jehova. Say kondukta ra so agnasusuppiat ed no anto so aawaten bilang normal a walna ed sosyal. Say The New Encyclopædia Britannica so suston mangibabaga a saray Tasi so “mangipapaskar ed atagey a totontonen a moral ed personal a kondukta.”
Say direktor na balita tan espisyal iran proyekto para’d estasyon na television ed Estados Unidos so nansulat ed saray Tasi nen Jehova bilang ebat ed pikewet a report nipaakar ed saray Tasi nen Jehova diad paway na balita ed TV a 60 Minutes. Inkuanto: “No dakel a totoo so manbilay a singa ed paraan na pananisia yo, sayan nasyon so agmagmaliw a singa ed kipapasen to. Siak so sakey a managbalita a makakaamta a say organisasyon yo so niletneg ed aro tan mabiskeg a pananisia ed Manamalsa. Kaliktan kon naamtaan yo ya aliwan amin a Managbalita so manlalabi.”
Sakey a Kabkabat a Relihyon
Kasin makatunongan so pangibaga a saray Tasi nen Jehova so sakey a melag a panatikon relihyoson grupo? Diad sakey a pantalos, saray Tasi nen Jehova so daiset lambengat no nipareng ed arum a relihyon. Anggaman ontan, nonoten pa so inkuan nen Jesus: “Mainget so pinto, tan makisir so dalan, ya mamaarap ed bilay, et daiset so saray makaromog ed sikato.”—Mateo 7:13, 14.
Anggaman kuan, saray Tasi so duma manlapud kipapasen bilang melag a panatikon kulto. Nen tiagew na 1993, masulok a 11 milyon a totoo so inmatendi ed Memoryal na impatey nen Jesus a sisilibraan na Tastasi. Balet say lalon importanti nen say bilang da et say moral a walna tan uliran ya ugali ra, a satan so sengegan na sankamundoan ya impangomenda ed sikara. Agpanduaruwaan a saya so angarum ed katuaan a dakel a bansa so mangiiter ed sikara na opisyal a panamidbir bilang sakey a kabkabat, peteg a relihyon.
Matalonggaring so sakey ya agano nin impanguley na Europeanon Korte na Saray Kanepegan na Too. Indeklara to a saray Tasi so nepeg a mangayaga ed kawayangan ed kanonotan, konsiensia, tan relihyon tan diad ontan et walaan ira na kanepegan a mansalita nipaakar ed pananisia ra tan mangibangat ed satan ed arum. Aggawaen itan a deklarasyon no saray Tasi nen Jehova so kabkabat a manguusar na makapalikdo tan mabanday iran metodo diad pan-recruit na saray membro odino no sikara so manguusar na manamalikdon metodo pian kontrolen so kanonotan na saray patumbok da.
Dakel ed sankamundoan so mikabisadon tuloy ed saray Tasi nen Jehova. Diad minilyon ya aliwan Tastasi a manaaral na Biblia a kaiba odino akiaral ed sikara ya aminsan, itepet tayo, Kasin wala so antokaman iran pangetma a man-brainwash ed sika? Kasin saray Tasi so angusar na panangontrol-ed-kanonotan iran metodo ed sika? “Andi” so andi-duaruawa a prangkan iyebat mo. Mapatnag, no sarayan metodo so inusar, niwala komon so baleg a bilang na saray biktima ya onkontra ed antokaman ya argumento ed biang na saray Tasi nen Jehova.
“Mibibiang a Tuloy ed Panutulong ed Katooan”
Mabetbet a saray membro na kulto so mangisisian ed inkasikara manlapud pamilya, kakaaro, tan anggan ed saray totoo ed inkalapagan. Kasin ontan so kipapasen na Tastasi nen Jehova? Insulat na sakey a managbalita ed Czech Republic, “Siak so agkabiangan na Tastasi nen Jehova.” Ingen inyarum to: “Mapatnag a sikaray mabiskeg a tuloy ed moral. . . . Sikaray mamibidbir ed saray pakauley na gobierno balet sisiaen dan say Panarian na Dios lambengat so makayarin manolbar ed amin a problema na katooan. Balet imanoen—sikaray aliwan panatiko. Sikaray totoon mibibiang a tuloy ed panutulong ed katooan.”
Tan sikara so ag-manbibilay ed saray grupo na totoo, ya ibibiig da so inkasikara manlapud saray kakanayon tan ed arum. Bibidbiren na Tastasi nen Jehova a say pangaro tan pangasikaso ed saray pamilya da et Makasulatan a responsabilidad da. Sikara so manbibilay tan mikikimey ed totoo ed amin a rasa tan relihyon. Sano onsabi iray desyang, sikara so aliston mangiter na saray tulong tan arum a panangasisti.
Nagkalalon importanti, sikara so mibibiang ed sakey a programan edukasyonal ya anggapoy kapara. Pigaran relihyon so walaan na organisadon sistema pian manggawa na personal iran idadalaw ed kada indibidual ed komunidad da? Saray Tasi nen Jehova so manggagawa ed saya ed masulok a 200 a daldalin tan ed masulok a 200 a lenguahe! Malinew, saray Tasi nen Jehova so “mibibiang a tuloy ed panutulong ed katooan.”
Mapeget a Panutumbok ed Biblia
Bidbiren, saray bangat na Tastasi nen Jehova so duma manlapud saramay itatarok na saray iglesia. Saray Tasi nen Jehova so manisia a si Jehova so makapanyarin-amin a Dios tan si Jesus so anak to, agkabiangan na taloran dios. Say pananisia ra so mapekder a nisiglaot ed pananisia a say Panarian na Dios so alenleneg a makapangitarok na inawa ed maniirap a katooan. Papasakbayan da so totoo ed manasingger a kadederal na sayan abulok a sistema na bengabengatla. Ipupulong da so nipaakar ed sipan na Dios a sakey a mangaraldalin a panarian para’d matulok a katooan. Agda gagalangen so krus. Agda sisilibraan so Christmas. Sisiaen da a say kamarerwa so ompatey tan anggapo so impiernon-apuy. Ag-ira mamangan na dala, nisay awaten da so panagpasaksak na dala. Sikaray ompapaliis manlapud pakapilanor ed saray pulitika tan pibibiang ed bakal. Kasin nitepet mo la ed inkasika no akin a saray bangat na Tastasi nen Jehova so duman tuloy?
Say Daily Hampshire Gazette, sakey a peryodiko ed Massachusetts, so mangipapaliwawa a saray Tasi nen Jehova so “mapeget ed panangipatalos ed Biblia a mangisesebel na dakel ya aktibidad ya ipasen na arum a matukoy . . . , amin so mangugunaet a manumbok ed ehemplo na inmunan-siglo iran Kristiano tan say salita na Biblia.” Mipakna so The Encyclopedia of Religion ya “amin a sisiaen da so nibase ed Biblia. Sikara so ‘mamaneknek ed teksto’ (salanti, say pangiter na makasulatan iran sitasyon a panuporta) ed ngalngalin amin a balikas na pananisia, ya anggapoy suppiat ya aawaten da so autoridad na Biblia, ya interamentin onsasandi ed tradisyon.” Ibabaga na libron Religion in America: “Say grupo so agbalot kinmesay ed panangiyapasakey ed panagaral na Biblia, tan saray bangat to so susuportaan na malaknab a sistema na panukoy ed kasulatan.”
Siopa so Pangulo Ra?
Maseguron lapud sayan maapit a pananumbok ed saray bangat na Biblia a say panangigalang tan panangidayew ed atooan iran lider a niyugalin tuloy na saray kulto natan so agnaromog ed limog na Tastasi nen Jehova. Ipupulisay da so ideyan pandumaan na klero tan ordinaryon too. Matukoy so ibabaga na The Encyclopedia of Religion nipaakar ed saray Tasi nen Jehova: “Isesebel so kleron klase tan pakabidbiran iran titulo.”
Tutumboken da si Jesu-Kristo bilang Pangulo ra tan bilang Ulo na Kristianon kongregasyon. Si Jesus so angikuan: “Balet ag kayo komon patatawag na Rabbi, ta sakey so managbangat ed sikayo, et sikayo ya amin sanaagi kayo. Tan anggapo’y tawagen yo na ama ed dalin, [lapud] sakey so Ama yo, a sikato’y wala ed tawen. Tan ag kayo met patatawag na katawan, [lapud] sakey so katawan yo a salanti si Cristo.”—Mateo 23:8-12.
Malinew a saray Tasi nen Jehova so aliwan sakey a kulto a singa si Jesus so aliwan sakey a masiba tan sakey a managbuanges. Tua, aliwan amin a naimpluensyaan na saray palson report nipaakar ed si Jesus tan ed saray babangatan to so apalikdo ed panagpauges ed sikato. Arum so basta nayarin lingon-apakabatan. No walaan kayo na saray tepet nipaakar ed saray Tasi nen Jehova tan ed saray sisiaen da, akin ya agkabaten iran maong? Saray puerta na saray Kingdom Hall da so silulukas para’d amin a manaanap na katuaan.
Sika so nagunggunaan met manlapud saray maalwar a panagsukimat para’d suston kakabatan ed Biblia tan manaral no panon so pandayew ed Dios a mitunosan ed saray salita nen Jesus: “Ingen say oras onsabi, tan natan la, sano saray tua a manangigalang igalang da so Ama dia ed espiritu tan katuaan; ta saray ontan so anapen na Ama a manangigalang ed sikato.”—Juan 4:23.