Kasin Saray Tasi nen Jehova et Sakey ya Kulto?

Andi, aliwan kulto iray Tasi nen Jehova. Imbes, Kristiano kami tan gagawaen mi anggaay nayarian min tumboken so alimbawa nen Jesu-Kristo tan iyaplika iray bangat to.

Anto ’tay kulto?

Nandurumay pakatalos na totoo ed salitan “kulto.” Balet, ikonsidera pay duaran maslak ya iisipen na totoo nipaakar ed saray kulto tan no akin ya ag-iratan onaplika ed sikami.

• Iisipen na arum ya say kulto et balo odino agkabat ya relihyon. Saray Tasi nen Jehova et agnanggawa na balon relihyon. Imbes, say panagdayew mi et base ed ginawa na saray inmunan-siglon Kristiano ya saray alimbawa tan bangat da et walad Biblia. (2 Timoteo 3:​16, 17) Manisia kamin say Masanton Kasulatan so nepeg ya pangibasian na dugan panagdayew.

• Iisipen na arum ya say kulto et mapeligron sekta na relihyon a walay sakey ya toon lider da. Ag-ipapasen na Saray Tasi nen Jehova so anggan siopan too bilang lider da. Imbes, tutumboken mi imbangat nen Jesus ed saray papatumbok to ya: “Saksakey so Pangulo yo, say Kristo.”​—Mateo 23:10.

Aliwan kulto iray Tasi nen Jehova, imbes sayan relihyon et ontutulong ed saray membro to tan ed arum ya totood komunidad. Alimbawa, lapud ministeryo mi, dakdakel so atulongan ya nalabanay mauges iran bisyo, singa say panag-abuso na druga tan alak. Sakey ni, diad nanduruman bansa et wala ray klasen ikokondukta mi pian bangatan iray nilibon totoo ya manbasa tan mansulat. Tan aktibo kamin ontutulong no wala ray kalamidad. Gagawaen mi anggaay nayarian min manggaway maabig, a singa ingganggan nen Jesus ed saray papatumbok to.​—Mateo 5:​13-​16.