Panagsekreto Lapud Ngaran na Katawan

SAY impansamal na gas ed subway na Tokyo, Japan, nen Marso 1995 so amatey na 12 totoo, sengegay impansakit na nilibo ni, tan akapangiwalwal na sekreto. Sakey a relihyoson sekta a kabkabat bilang Aum Shinrikyo (Supremon Katuaan) so maamot a nantipon na sarin gas pian usaren a pangegemtan ed saray misteryoson kalat.

Sakey bulan ed saginonor et ginaygay na bomba so federal a bilding diad Oklahoma City, E.U.A. ya inateyan na 167. Ipapanengneng na ebidensya a say ilulusob et misiglaotan ed agnapakalmadon irangay gobierno tan Branch Davidian a relihyoson kulto ed Waco, Texas, eksakton duay-taon ed asasakbay. Diad saman a panaon et 80 membro na kulto so inatey. Inwalwal met na say insabog na bomba so ag-amtay maslak a totoo: Dakerakel a grupon akasagana’d bakal so onkukurang la natan ed Estados Unidos, ya arum ed saratan so pansususpetsaan ed maamot a panagplano sumpad gobierno.

Saginonor, diad pansampot lay 1995, aromog iray pinoolan a bangkay na 16 a totoo ed matakel a pasen ya asingger ed Grenoble, Pransya. Sikaray membro na Order of the Solar Temple, melag a relihyoson kulto a nibalita nen Oktubre 1994 diad Switzerland tan Canada sanen 53 ed saray membro to so nambitkel odino pinatey. Balet anggan wala lay onian trahidya, nantultuloy nin kinmurang so sekta. Diad sayan panaon et siansia nin ag-amta no antoy motibasyon tan kalat da.

Saray Kaatapan na Relihyoson Panagsekreto

Lapud saratan ya agawgawa, pankelawan ta so paniinap na dakel a totoo ed relihyoso iran grupo? Seguradon agsuportaan na sakey so sekreton organisasyon​—relihyoso man odino andi​—ya agsuston manguusar ed panagmatalek to tan mamaskar ed sikaton gegemtanen iray kalat ya agto labay. Balet, antoy gawaen na totoo pian agnapatitan na pakapimembro’d sekreto iran ulopan a kuestionabli?

Mabitabitar, a makabat no seguroen na mimimembro’d sekreton ulopan no antoray peteg a gagala na satan. Kaukolan a sombraen so panagpaskar na kakaaro odino kabkabat, tan saray desisyon so nepeg a nibasi ed katuaan aliwan diad emosyon. Tandaan, say mismon indibidual​—aliwan arum​—so managmak ed antokaman a posibli iran pansumpalan.

Say panulok ed saray prinsipyo na Biblia so sankaseguradoan a metodon pakapaliis ed mapeligro iran grupo a saray motibo ra et aliwan kagalgalang. (Isaias 30:21) Sasaglawien na saya so pansiansian neutral ed politika, panangipanengneng na aro ed arum, pati say kakabusol, ipapaliis ed “saray gawa na laman,” tan panamayubo ed saray bunga na espirituy Dios. Sankaimportantian, saray tuan Kristiano so nepeg ya agkabiangan na mundo, no panon ya agmet akibiang si Jesus, tan sayan kurso so mangamper ed pakapilanor ed saray sekreton ulopan diad mundo.​—Galacia 5:19-23; Juan 17:14, 16; 18:36; Roma 12:17-21; Santiago 4:4.

Saray Tastasi nen Jehova so masimoon ya estudyante na Biblia a mamapabli’d relihyon da tan maparungtal a manbibilay unong ed satan. Diad sankamundoan et kabkabat ira bilang relihyoson grupo a ‘manaanap ed kareenan tan tutumboken da.’ (1 Pedro 3:11) Susto so ipapaimano na libro ran Jehovah’s Witnesses​—Proclaimers of God’s Kingdom: “Diad antokaman a paraan et aliwan sekreton ulopan iray Tastasi nen Jehova. Saray nibasi’d Biblian sisiaen da so sigpot a nipaliwawa’d saray publikasyon a naala na siopaman. Niarum ni, mangisesekar iray nikaduman sagpot pian imbitaan so totoon onatindi ed saray miting pian nanengneng tan narengel dan mismo so nagagawa.”

Maseguron ag-aagamilen na tuan relihyon so inkasekreto. Nibabangat iray managdayew ed tuan Dios ya agda iyaamot so pakabidbiran ed sikara nisay buragasen so gagala ra bilang Tastasi nen Jehova. Pinano na saray inmunan babangatan nen Jesus so Jerusalem ed panagbangat da. Mapalaway ira no nipaakar ed sisiaen tan kimey da. Ontan met ed Tastasi nen Jehova natan. Natalosan, sano sililingon pegetan na diktador iran rehimen so kawayangan ed panagdayew, nepeg a sisisilib tan sipapakpel iray Kristianon mangituloy ed kimey da, ya uunoren so “Dios nen saray totoo,” kipapasen ya impilit ed sikara lapud makpel a panagtasi ra.​—Gawa 5:27-29; 8:1; 12:1-14; Mateo 10:16, 26, 27.

Ompano isipen mon akasekreton kulto, odino sekta iray Tastasi nen Jehova, ontan ta agmo nira kabat a maong. Ontan pa met so kipapasen na dakel ed inmunan siglo.

Ibabagay Gawa kapitulo 28 ya akiabet ed Roma si apostol Pablo ed “saray manunaan na saray Judio.” Inkuan da’d sikato: “Pirawat mi a narengel ed sika no anto so kanonotan mo; tan no nipaakar ed sayan sekta, akabatan mi a nasasalita sumpa ed ganagana’y pasen.” (Gawa 28:16-22) Diad ebat, “impaliwawa to [nen Pablo] so agawa, a pinatua to so panarian na Dios,” tan “saray arum anisia ra.” (Gawa 28:23, 24) Seguradon diad magnayon a kagunggunaan da a nakabatan a peteg so nipaakar ed tuan Inkakristiano.

Lapud intalaga ra so inkasikara’d mapalaway tan mapublikon serbisyo ed Dios, saray Tastasi nen Jehova so sililiket a mangiparungtal ed saray mabitar a detalye na kimey da tan sisiaen da ed siopaman a malabay a makaamta’d katuaan. Akin ya agka manusisan mismo, ta pian sikakabat ka no nipaakar ed pananisia ra?

[Litrato ed pahina 6]

Maliket iray Tastasi nen Jehova a mangiparungtal ed no siopara tan no anto so gagawaen da