Gamoran So Kareenan ed Dios Diad Panamegley na Dedikasyon tan Bautismo

“Ituloy nen Jehova ya ibaga: ‘ . . . Anggan siopan toon walaan na tanda so agyo aasinggeran.’”​—EZEQUIEL 9:4, 6.

1, 2. (a) Akin a saray totoo ed inkalapagan so agmikakareenan ed Dios? (b) Akin a makana ed amin so pakagamor na ontan a deen?

GAMORAN so kareenan ed Dios? Balet akin? Pigpigaran totoo so mangipapasen na inkasikaran milalaban ed Dios? Kasin posibli, anggaman kuan, so pagmaliw a peteg a kabusol na Dios tan satan so agkabat? Impaliwawa nen apostol Pablo ed saray Kristianos nen inmunan siglo: “Sikatayo ya aminsan so angikiwas na inkasikatayo a mitukoyan ed saray pilalek na laman tayo, a nanggawa ed saray bengatlan kinaliktan na laman tan saray kaisipan, tan sikatayo so ananak na sanok ed inkatoo anggan singa saray arum.”​—Efeso 2:3.

² Ontan met natan, anggaman nayarin sikayo so interesado diad pamaliket ed Dios, say kasalanan ya atawir ed si Adan so mangapekta ed panmoria yo tan nayarin managdag ed sikayon manumbok “ed saray bengatlan kinaliktan na laman.” Anggano sika so sakey a toon manaaral na Biblia ed saray Tasi nen Jehova odino sakey a tobonbalon aliwan bautismado a saray atateng so Tastasi, say sinisiblet a gawaen-ko-so-panliketan-ko ya awawey so nayarin nailuam a tuloy ed bilay mo tan mantutultuloy ya isisiaen to ka a manlapud Dios. Say sakey a toon mamasiansia na ontan a kurang so ‘mangisisimpen na sanok ed inkasikato.’ (Roma 2:5; Colosas 1:21; 3:5-8) Ibalikas na Dios so sigpot a sanok to legan na maples-onsasabin “agew na sanok tan diad kipatnag na matunong a panangukom na Dios.” (Roma 1:28-2:6) Panon so pakagamor mo na kareenan ed Dios tan makaliktar ed sayan “agew na sanok”?

Say Pundasyon ed Kareenan

3. Panon so impangitarya na Dios ed letnegan na pipupulangan?

³ Si Jehova so inmunan kinmiwas ya ontulong. “Inaro to itayo tan imbaki to so Anak to a bilang mananakbong a bagat ed saray kasalanan tayo.” (1 Juan 4:10) Say sakripisyon impatey nen Jesus so manakbong, salanti, manimbang o mamenek ed inkaalas nen Jehova. Saya so mangiter na legal a letnegan diad kaperdona na saray kasalanan tan, saginonor, diad kumpleton kaekal na gulaan ed baetan na Dios tan too. On, posibli so “pakapipulangan ed Dios diad panamegley na impatey na Anak to,” a singa insulat nen apostol Pablo.​—Roma 5:8-10.

4. Anton misiglaotan a pasingawey so niiter ed si Ezequiel, tan akin a satan so walaan na importansya ed sikatayo?

⁴ Balet pian nagunggunaan a personal ed bagat nen Kristo, nepeg tayon gawaen so pigaran kundang. Saraya so nipatnag diad sakey a dramatikon pasingawey a niiter ed si propeta Ezequiel, pasingawey ya asumpal legan na panaon tayo sano say “agew na sanok” na Dios so asingsingger la. Saray manamatey a puersa na Dios so niretrato ed pasingawey na anemiran armadon lalaki. Sakbay ya ibalikas na saraya so sanok na Dios, nibaga ed komapiton laki, a sankaawit to so tinteroan na sekretaryo: “‘Ondalan ed pegley na syudad, . . . tan tandaan mo ed muling iray lalakin mansibek tan managogol ed amin na saray makapadimlan bengatla a nagagawa ed pegley to.’ Tan diad [anemiran armadon lalaki] et nibaga ed pandengel ko: ‘Ondalan ed pegley na syudad ya ontumbok ed sikato tan mangabil. . . . Balet anggan siopan toon walaan na tanda so agyo aasinggeran.’”​—Ezequiel 9:1-6.

5. Anto so mangitonton ed panagbabawi?

⁵ Sarayan asalimbengan a ‘tinandaan’ so adimla lapud saray totoon mangibabagan mandadayew ed tuan Dios so ‘amano ed dalin na karawalan’ tan manggagawa na seksual ya imoralidad, panagtalintao, tan amin nin arum a nengneng na gawan mauges. (Ezequiel 8:5-18; Jeremias 7:9) Ontan met natan, saraman so ‘natandaan’ so nepeg nin mangaral ya ununa, diad panamegley na panagaral ed Biblia, a pablien daray estandarte na Dios tan naermenan ed puso, on, ‘mansibek tan managogol,’ diad saray bangabangat tan gawagawa a mamapabanday ed sikato. Angangko lapud agpikakabat et arum so nanggawa na mauges iran gawa odino angonsente ed saray ontan diad impangiter da na suporta ra. Ingen, natan et gapoan dan moriaen so ontan iran kimkimey unong a singa panmoria na Dios ed saratan​—a makapadimla! (Roma 1:24-32; Isaias 2:4; Apocalipsis 18:4; Juan 15:19) Sayan apadaak ya apresasyon so mangitonton ed sakey ed saray ununan kundang diad pakagamor na kareenan ed Dios: panagbabawi. Impaseseg nen apostol Pedro: “Magbabawi, sirin, tan ombeneg ta pian saray kasalanan yo so napunas, a saray panaon na kainawaan [imbes a sanok] so onsabi komon a manlapud arap nen Jehova.” (Gawa 3:19) Agaylan makapainawa so ontan a kaperdona!

Panangala ed “Tanda”

6. Nisengeg ed antoran rason a saray arum a totoo so atandaan legan na kadaanan a panaon?

⁶ Pian niliktar ed sanok na Dios, saraman so ‘mansibek tan managogol’ so nakaukolan a natandaan ed muling da. (Ezequiel 9:4) Diad kadaanan iran panaon et saray ariripen so mabetbet ya atandaan ed muling pian mabitar a nabidbir. Saray pakatandaan a marka ed muling tan inerman so nayarin mangipanengneng met a say sakey a too so mandadayew ed sakey a dios.a (Ipareng so Isaias 44:5.) Sirin, diad agew tayo, anto so nikadkaduma, manangisalban tanda a mabitabitar a mangibiig ed saray manangitarok ed satan a bilang tuan managdayew tan ariripen nen Jehova?

7. Anto so simbolikon tanda?

⁷ Say simbolikon tanda so ebidensya, a singa niparungtal ed agsinakbongan a muling, (1) a sika so sakey a dedikado, bautismadon babangatan nen Jesu-Kristo tan (2) a sika so angisulong ed singa-Kriston balon personalidad. (Efeso 4:20-24) Lapud saraman sirin so ‘atandaan’ et nepeg ya ununan manggawa na dedikasyon, nakaukolan tayon amtaen no anto so lalanoren na saya. Impaliwawa nen Jesus: “No siopaman et labay to so ontumbok ed siak, italirak to so inkasikato tan sakbaten to so panamairapan a kiew to tan tumboken toak a naynay.”​—Marcos 8:34.

8, 9. (a) Anto so kabaliksan na ‘pangitalirak mo ed inkasika’? (b) Panon so nayarin kiyilustra ed nakakaukolan na dedikasyon?

⁸ Say Griegon salita a nipatalos dia na “italirak” et kabaliksan to so “pangiburin sigpot” odino “pangibeneg.” Sirin, say ‘pangitalirak mo na inkasika’ et kabaliksan to so mas nen say pangisiblet mo ed inkasika na bengatlan liket odino kagletan natan tan diad arapen. Imbes, kabaliksan to so pagmaliw a mabulos a mangibaga na andi ed inkasika sano nipaakar ed pangiyabuloy mo ed bilay mo a dominaen na saray personal a pilalek tan ambisyon mo. Sikatayo so atulongan a makanengneng ed kalaknab na saray salita nen Jesus diad pangimano ed no panon a sayan kaisipan so nipatalos ed nanduruman lenguahe: “Itundan manggawa ed saman so labay na puso na sakey” (Tzeltal, Mexico), “agto la pangayarian a balot ed inkasikato” (K’anjobal, Guatemala), tan “ibeneg ed inkasika” (Javanese, Indonesia). On, kabaliksan na saya so sigpot a dedikasyon, aliwan basta pipapaknan gawaen diad saray pigaran bengatla.

⁹ Sakey a Kristianon manngaran na Susan, a datin sikato so independente, so angipaliwawa ed kabaliksan na dedikasyon ed sikato: “Isusukok so interon inkasiak ed sananey. Si Jehova natan so manitermina ed kurang ko, mangibaga ed siak na gawaen ko, tan mangigeter ed saray unaen ko.” Kasin sika so mabulos a manggawa na parehon sigpot a dedikasyon ed si Jehova a Dios? Nonoten, say simbolikon marka so mananda ed sika a bilang ‘kayarian’ na Dios, bilang maliket ya aripen ed Katawan to.​—Ipareng so Exodo 21:5, 6; Roma 14:8.

10. Antoran pamaakaran so nepeg a nonoten na sakey sakbay a manggawa na dedikasyon?

¹⁰ “Siopa ed sikayo a malabay a mangipaalagey na sakey a tori et agni ununan onyurong tan kuentaen to so gastos, pian nengnengen to no kasin sikato so walaan na magenap a panumpal ed satan?” so intepet nen Jesus. (Lucas 14:28) Sirin kasin sika so maliket ya: Onatendi ed saray Kristianon pantitipon a maparanay? (Hebreos 10:25) Pansiansiaen so atagey ya estandarte ed moral ya inletneg na Dios ed saray ariripen to? (1 Tesalonica 4:3, 4, 7) Nawalaan na pibiang a nagnap ed kimey na panangipulong ed Panarian diad anggaan na nayarian mo? Iyuna so linawa na Dios sano pilien so sakey a karera odino mangigeter na saray kalat ed bilay? (Mateo 6:33; Eclesiastes 12:1) Asikasoen moray obligasyon mo ed pamilyam? (Efeso 5:22-6:4; 1 Timoteo 5:8) Diad bektan ginawam so personal a dedikasyon diad pikakasi, say malaknab a kundang et say opisyal a pakaamta na arum ed saya.

Bautismo​—Para ed Siopa?

11. Anto so isisimbolo na bautismo, tan anto so nagawaan ed satan?

¹¹ Ingganggan nen Jesus a saray patumbok to so bautismoan. (Mateo 28:19, 20) Sikara so nakaukolan a sigpot a nipalgep ed danum tan inmuasen ditan. Singa kiponpon tan kioli, saya so mangiretraton maong ed ipapatey na sakey a too diad sinisiblet a dalan na bilay tan nagawan mabilay a manggawa ed linawa na Dios. Diad panamegley na bautismo et ipabidbir mo so inkasika a sakey ed saray Tasi nen Jehova a mililimog ed sankamundoan a kongregasyon na Dios.b Pagmaliwen na bautismo a balido so sakey a seryoson paknaan a ginawa ed Dios. (Ipareng so Exodo 19:3-8.) Say bilay mo so nepeg a mitukoyan ed saray ganggan to. (Salmo 15; 1 Corinto 6:9-11) Say bautismo, a mangoordina ed sika a bilang sakey a ministro na Dios so mangisindag met na sakey a “kerew ed Dios a para ed maabig a konsiensia” lapud kabat mo a sika so akikareenan ed Dios.​—1 Pedro 3:21.

12. Kapigan a saray ananak so nasalimbengan diad “tanda” na atateng da?

¹² Kasin anggan saray tobonbalo so mannonot ed bautismo? Bueno, nanonotan ya imbaga nen Jehova ed saray anemiran armadon lalaki ed pasingawey: “Mamasiken, walad kalangweran a lalaki tan mamarikit tan melag ya ugaw tan bibii so nepeg mon pateyen​—diad kadederal. Balet diad anggan siopan too a walaan na tanda so agyo aasinggeran.” (Ezequiel 9:6) Siempre, saray anak ya ugaw a tuloy a manggawa na sakey a dedikasyon so nasalimbengan diad “tanda” na ateng no satan ya ateng so manbabanikel a mamapabaleg ed saray anak diad panangaro ed si Jehova tan no sikara so matulok ya onkikiwas. (1 Corinto 7:14) Ingen, no say sakey ya ugaw so magenap lan matudio a manggawa ed personal a desisyon tan arapat to la so punto a “kabat [to] la no panon a gawaen so duga,” ag-ipapasen a sikato so mantultuloy lawas ed silong na merito na “tanda” na ateng to.​—Santiago 4:17.

13. Anto so arum ed saray imanoen diad panitermina ed inkamaparaan na sakey a tobonbalo ed bautismo?

¹³ Sakbay a manggawa na sakey a dedikasyon, say sakey a tobonbalo so nepeg a nawalaan na magenap a pikakabat a mantebek ed no anto so nalalanor tan nepeg ya anapen to so personal a relasyon ed Dios. Nepeg ton talosan tan sumpalen iray prinsipyo na Biblia, a kabat ton sikato so mipalinewan ed satan. Nepeg met a sikato so nawalaan na magenap ya eksperiensia diad pangipanabang na pananisia to ed arum tan amtaen a saya so makanan kabiangan na tuan panagdayew; nepeg a tuan labay ton panlingkoran so Dios. Siempre, agto nailaloan so pangipanengneng na inkatatken na sakey a matatken, balet say espiritual ya aligwas to so nepeg a rasonablen mantultuloy.

14. Akin a say sakey a walad kalangweran so angipasen ed bautismo a salimbeng?

¹⁴ No say sakey et ‘akuenta to la so gastos,’ ipapasen to la so sakey a walaan na bentahan manggawa na dedikasyon bilang tobonbalo. Diad ngalngalin amin a balon Kristiano, kayari na bautismo et onaralem so apresasyon. “Diad inkabautismoan bilang sakey a walad kalangweran so sakey a salimbeng ed siak,” so impaliwawa nen David. “Legan a siak so ontatatken, naimanok no panon ya arum ed saray aliwan bautismadon tobonbalo ed kongregasyon so nanliknan bulos ed autoridad na saray mamatatken tan bilang nansumpalan et sikara so nipaglet ed gawan mauges. Balet ta nanonotan kon naynay ya indedikak so bilay ko ed Dios. Say bilay ko so inala la, ta pian agko la natumbok iratan a walad kalangweran.”

15. (a) Panoy pikabat tayo a posibli ed saray tobonbalo so pamemben na seryoson panmoria ed tuan panagdayew? (b) Panon so sankaabigan a pakatulong na atateng?

¹⁵ ‘Anto, anggaman kuan, no say anakon laki odino bii so abautismoan sanen ugaw ni tan insan binmetel?’ so inkuan na arum ya atateng. Peteg, say sakey a tobonbalo so agmanpabautismo pian paliketen to lambengat so ateng odino lapud satan met so gagawaen na arum a kakaaro. Ingen si Jose, Samuel, Arin Josias, tan si Jesus sanen sikara so tobonbalo so walaan ya amin na seryoson panmoria ed panagdayew ed Dios tan nansiansia ed satan. (Genesis 37:2; 39:1-3; 1 Samuel 1:24-28; 2:18-21; 2 Awaran 34:3; Lucas 2:42-49) Diad modernon panaon, sakey a Kristianon manngaran na Jean so abautismoan sanen sikato so manedad lambengat na samploy taon. Sanen atepetan ed pigaran taon diad saginonor no kasin peteg ya atalosan to so kundang, inmebat si Jean: “Kabat ko ya inarok si Jehova, inapresyak so ginawa nen Jesus ed sikatayo, tan kinaliktan kon panlingkoran si Jehova.” Sikato so nanserbin matoor ed 40 taon nanlapulad inkabautismoan to. Kada tobonbalo so sakey ya indibidual; anggapo so makapangigeter na estandarte diad getar na edad. Saray atateng so nepeg a manbanikel diad panabi ed puso na anak da, a tulongan da a mamayubo na maridios a debosyon.c Agda lambengat itultuloy ya iyarap ed saray anak da so pribilehyo na bautismo tan dedikasyon noagta salimbengan da ra met a magmaliw ya agnagiing a managdayew.

Talonaan Iray Babeng

16. Akin a nagkalalo nen say pikakabat ed ulo so nakaukolan?

¹⁶ Manwarin say pikakabat ed Biblia so makana, say “tanda” so manasaglawi na mas nen say pikakabat a wala ed ulo. Alimbawa, diad pasingawey a niiter ed si Ezequiel, nayarin saray mamatatken a pinatey diad impangiyapay da na insenso ed saray palson dirios so walaan na malaknab a pikakabat ed insulat a salita nen Jehova. Balet saray awawey da ed dalem na saray saradon puerta so angipanengneng a sikara so aliwan tuan managdayew. (Ezequiel 8:7-12; 9:6) Sirin, say ‘katandaan’ a para ed kililiktar so mankaukolan na pangisulong “ed balon personalidad ya apalsa unong ed linawa na Dios diad tuan inkatunong tan katooran.”​—Efeso 4:22-24.

17. (a) Anton babeng so manesebel ed arum diad bautismo? (b) Panon a niyaplika so simbawa ed Santiago 4:8?

¹⁷ Sakey a tatakotan a babeng et say impluensya na makasalanan a laman mo. (Roma 8:7, 8) Arum so agni malabay a manpabautismo lapud agda pakakontrol ed arum iran seryoson kakapuyan na laman odino lapud panlabay da nin manggawa ed saray marutak a minumudon likeliket. (Santiago 4:1, 4) Saray ontan so makakasaew na mablin relasyon. Isisimbawa na Salita na Dios: “Onasingger ed Dios, tan sikato so onasingger ed sikayo. Linisan yoray lima yo, sikayo a managkasalanan, tan gogolan yoray kapusoan yo, sikayoran manduaruwa.” (Santiago 4:8) Nakakaukolan so desididon aksion. Bilang alimbawa, sakey a lakin ginmapon manaral ed Biblia so managbuanges tan managdruga ed loob na 16 taon tan sikato so maniinagem ed ipapatey lapud saya. Tekep na determinasyon et sarayan mauges a bisyo so atalonaan to. “Balet legan a siak so mamapaarap ed dedikasyon, sakey a bii so mangekerew ed siak na pirelasyonan ed sikato. Saman so peteg a tukso, so inako. Anggaman inisip na bii a siak so ambagel, imbagak ed sikato: ‘Siak so manaaral na Biblia ed saray Tasi nen Jehova, tan satan so agko labay a gawaen.’” Anto so anagdag ed ebat to? “Anengneng ko so ginawa nen Jehova ed bilay ko diad impanulong ed siak a makalukpos ed mabayanin iinumen. Siak so tinulongan to ed arum a dalan met. Saya so nantultuloy ya angiyasingger ed siak diad sikato. Sikato so agko nayarian ya ipabaing.” Sayan laki so lalon inmapit ed Dios.

18. Anto so tombok diad panalona ed saray babeng?

¹⁸ Say nibilang et aliwan say no panon karakel so kabat mo noagta no panon kalaknab so pangarom ed kabat mo. Ibabaga na Salmo 119:165: “Say daakan a kareenan so kayarian na saraman so mangaaro [aliwan basta mangaamta] ed ganggan mo, tan diad sikara et anggapo so baton kagapolan.” Say tombok so aroen so ganggan na Dios, aralem a pablien so kablian to ed bilay mo.​—Isaias 48:17, 18.

19, 20. (a) Antoran babeng so nepeg a talonaan, tan anton paseguro so wala ed sikatayo? (b) Say maaligwas a pakatalona ed amin na saray babeng so mansumpal ed anto?

¹⁹ Siempre, arum iran babeng odino baton kagapolan so nayarin onlesa. “Say sankairapan ed siak,” inkuan na agin lakin asalambit ed tagey, “et say takot ed totoo. Siak so walaan na saray taga mundon ‘kakaaro’ a datin kainuman ko. Sankairapan a bengatla ed siak so pangibaga ed sikara a pegpegen ko la so pililimog ko lapud idedikak la so bilay ko ed Dios.” (Uliran 29:25) Arum so nidunget diad panagludlurey na saray membro na pamilya. Sakey a balobalon bautismadon Tasi, ya akatalona ed isusumpa na masiken to, so angikuan: “Imbes a sakey a manunan talonaan, wala ra so dakel iran angkekelag a talonaan a sikara so sakey-sakey ya aluksoan ko.” Say matoor a panalona ed kada babeng ya onsabi so mamabiskeg ed pusom. Napaseguroan ya anggapo so babeng ya agnatalonaan na saraman so mangaaro ed ganggan na Dios!​—Lucas 16:10.

²⁰ Legan a natalonaan mo so kada kagapolan a bato, sika so makagamor na “daakan a kareenan.” (Salmo 119:65) On, “sika so manakar ed kaligenan diad dalan mo . . . Say ugip mo so makapaliket. Agnakaukolan a sika so antakot ed anggan anton biglan makapakebbiew a bengatla, nisay ed bagyo ed saray marelmeng, lapud sikato so onsabi. Lapud si Jehova a mismo so wala ed sika, diad tua, say talek mo.”​—Uliran 3:23-26.

[Saray Paimano ed Leksab]

Saray Punto a Repasoen

◻ Panon so panulong na Dios ed sikatayon makagamor na kareenan ed sikato?

◻ Anto so simbolikon manangiliktar-bilay a tanda?

◻ Anto so kakanaan na dedikasyon tan bautismo?

◻ Antoran nengneng na babeng so nepeg ya arapen, tan panon so pakatalona ed saraya?

[Kahon ed pahina 11]

Kipalgep o Kawalsikan?

Say awaran na bautismo nen Jesus so manasalambit na “inimmuas to ed danum.” (Marcos 1:10) A si Jesus so nipalgep so matukoy ed kabaliksan na Griegon salitan nipatalos a bautismo (baʹpti·sma). Saya so nanlapud salitan ba·ptiʹzo a kabaliksan to so “kilereg, kipalgep.” No maminsan et nausar a maniskribe ed kiteneb na sakey a barko. Say komaduan-siglo a Lucian so angusar na misiglaotan a salitan maniskribe ed pangilener na sakey a too ed sananey: “Pangilereg ed sikato ya aralem [ba·ptiʹzon·ta] ya agla makaimmuas lamet.” Inkuan na The New International Dictionary of New Testament Theology: “Anggaman ed saray paliwawan misumlangan, ompatnag a say baptizo, namparan diad Judio tan Kristianon konteksto, so normal a kabaliksan to so ‘kipalgep’, tan anggan sano satan so magmaliw a terminon teknikal a para ed bautismo, say kaisipan na kipalgep so mansiansia.”