Kasin Napepenek Kayo ed Saray Espiritual a Tarya nen Jehova?
“‘Suboken yoak, ipangasi yo, ed sayan pamaakaran,’ kuan nen Jehova na saray ehersito, ‘no kasin agko lukasan ed sikayon totoo iray pinto na katawenan tan peteg ya iyupot ko ed sikayo so bendisyon ya anggad anggapo so pankulangan.’”—MALAQUIAS 3:10.
1. Diad antoran tarya so kapepenekan na maslak a manbibilay a pinalsa?
NO ONTUNDA ka lan manungap na dagem, sika la so ompatey ed pigaran minutos. No ontunda ka lan oninum na danum, sika la so ompatey ed pigaran agew. No sika so ontundan mangan na tagano, sika la so ompatey ed pigaran simba. No ontunda kan mangan ed espiritual a tarya nen Jehova, sirin sano sika so ompatey et sika la so ompatey ed ando lan ando. Si Jehova so mangitatarya ed dagem, danum, tan tagano a nakakaukolan na amin a manbibilay a pinalsa. Sirin, diad si Jehova et ibabaga na salmista: “Lukasan mo so limam tan peneken mo so pilalek na amin a mabilay a bengatla.” (Salmo 145:16) Say pilalek na maslak ed saray mabilay a bengatla so nasumpal diad panamegley na materyal iran probisyon. Balet saya so aliwan tua ed saray totoon pinalsa.
2. Anto so pilalek na puso na too, tan anton tarya so nakaukolan diad kasumpalan to?
2 Saya so impabitar nen Jesus sanen inkuanto: “Say too so manbilay, aliwan diad tinapay lambengat, noagta diad amin a balikas ya ompaway ed sangi nen Jehova.” (Mateo 4:4) Saray abebbeban pinalsa so andian na kaisipan ed maando, balet say too so walaan na kaisipan ya ontan, a singa ibabaga na Eclesiastes 3:11: “Anggan say panaon ya ag-ageteran so inkarga to ed puso ra.” Odino singa impangipatalos na Revised Standard Version ed satan: “Inkarga to so inkamaando ed kanonotan na too.” Sirin, say impapuson pilalek na too et say pambilay ed panaon ya ag-ageteran, anggan ed ando lan ando. Say dagem, danum, tan say tinapay lambengat so aliwan magenap a para ed satan. Pian manbilay na ando lan ando et nakaukolan so espiritual iran tarya a nibase ed “amin a balikas ya ompaway ed sangi nen Jehova.” Natan, sikara so naromog ed sakey a libro, say Biblia, tan say suplay so agnaupot—amin a nakaukolan yo, a nagkalalo nen say nayarian yo a samelen. Sayan kargaan so agbalot naandian.
3. Anto so inturo nen Jesus a sankaimportantian, tan anton sekreto so naaralan nen Pablo?
3 Sikatayo so imbangat nen Jesus a mangipikasi ed nakakaukolan a taganon materyal: “Iter mo ed sikami natan so tagano mi a para ed sayan agew.” Balet agnambayag kayari to et impasen toray espiritual a bengatla ed ununan lugar sanen inkuanto: “Itultuloy yo, sirin, ya anapen ya ununa so panarian tan say inkatunong to.” (Mateo 6:11, 33) Say materyal a tagano so mamasiansia ed sikatayon mabilay ed sakey ya agew; say mantultuloy a panangan ed espiritual so manggawa ed satan diad legan na bilay, tan anggan ed ando lan ando. Sirin agmapaga nipaakar ed saray materyal a bengatla. Si Pablo so aliwan ontan. Sinalita toray espiritual a biskeg a nanggawa ed sikaton makayarin mankontento anggaman ed saray materyal a sirkumstansya, a kuanto: “Naaralan ko so tombok na namparan no panon so pagmaliw a napesel tan no panon so kaerasan, namparan no panon so nawalaan na daakan tan no panon so panagmak na ikulang. Diad amin a bengatla et siak so walaan na biskeg diad panamegley na saman so mangiter ed siak na pakayari.”—Filipos 4:12, 13.
Desyang So Onsabi ed Saraman So Agnapnek
4. Antoran tarya so agmagenap ed inmunan toon paris, tan anto ni so kinaliktan da?
4 Dakel, anggaman kuan, so agnapepenek ed saray tarya nen Jehova. Saray inmunan atateng tayo so agnapnek. Sikara so nambilay ed sakey a paraison hardin—masanting a senaryon nanliketan na mata ra, saray samiong na karosasan ya amalingit ed dagem a sinungap da, saray mananam a taganon amasamit na pakataway da, saray kanta na kamanokan ya anambayo ed saray kalayagan da. Nagkalalo ni, sikara so awalaan na makapasagyat a kimey diad pangasikaso ed sayan tanamanan, niarum so bendisyon na pamano ed dalin na ayadyarin ilalak. Balet sikara so masiblet. Say inter na Dios so aliwan magenap. Kinaliktan da so nagkalalo ni. Kinaliktan dan desidien ed inkasikara no anto so duga tan no anto so aliwa. Sirin ginawa ra, tan say mismon inmunan desisyon a ginawa ra so makadesyang a nansumpal ed inkabalang na amin a bengatla, ed inkasikara tan ed saray ilalak da.—Genesis 3:1-7, 16-19.
5. Diad anto so amendisyonan nen Jehova ed saray Israelitas, tan anto so reaksion da?
5 Inalig na saray Israelitas so mauges ya ehemplo ra. Sikara so inliktar na Dios a manlapud inkaaripen ed Ehipto, ginawa toran sakey a nasyon, inikdan tora na sakey ya ayadyarin Ganggan, inwanwan tora ed saray impanbiahe ra ed kalawakan, intaryaan tora na kawes ya agbalot dinmaan, tan mamilagron nilegpet tora na mana a nanlapud tawen tan danum a pinmusitsit ed bato. Balet sikara so agnapnek ed saray tarya nen Jehova. (1 Corinto 10:1-5) Legan a sikara so nambiahe ed kalawakan, sikara so mabetbet a nanreklamo.—Exodos 13:21, 22; Numeros 11:1-6; Deuteronomio 29:5.
6. Anton kurang so angitarok na kadederal ed saray Israelitas bilang sakey a nasyon?
6 Siansia nin sikara so nannguronguro kayari na inkiletneg da ed Insipan a Dalin—sakey a mabuna, asalog-a-maong a dalin “a panag-agusan na gatas tan dilo.” Siansia nin malamang, siansia nin agnapnek ed saray tarya nen Jehova, tinaynan da so panagdayew ed sikato, inmarap ira ed saray idolatroson panagdayew ed sekso, imbagat daray anak da ed si Molec, tan angitarok na kadederal ed inkasikara bilang sakey a nasyon. Nipawil a nanlapud inkakautibo ed Babilonia, tinumbok daray insangin tradisyon a nanggawan andi-kakanaan ed Salita na Dios. Sikara so nansumpal diad impamatey ed insipan a Mesias, si Kristo Jesus.—Deuteronomio 6:3; 8:7-9; Uko-ukom 10:6; 1 Arari 14:22-24; 2 Arari 21:1-16; Isaias 24:1-6; Mateo 15:3-9; 27:17-26.
7. Panon a saray klero na Kakristianoan natan so nantultuloy ed parehon kurang a singa ginawa na saray agmatoor a saserdote ed panaon nen Malaquias?
7 Angga ed sayan agew et say katooan ed inkalapagan so nantultuloy a manlabay ed saray palson relihyoson kredo. Saray klero so nanmodmora ed ngaran nen Jehova, agda anggan uusaren. Sikato so agda papagalangan ed ontan iran agmakasulatan a bangat a singa say Trinidad, say ag-ipapatey na kamarerwa, tan say maandon kapairap diad impiernon-apuy. Saray doktrina ra so aliwa lambengat a dinutakan na katilaan a nilamut ed kadaanan a Babilonia tan Ehipto noagta ontan met, ed dakel iran kipapasen, sinamalan na impangidepak ed dondon nen Kristo tan say impangawat ed ebolusyon. Sinamsaman da si Jehova ed manepeg a dayew to, a singa ginawa na saray saserdote ed agew nen Malaquias.—Malaquias 1:6-8; 3:7-9.
8. (a) Anton imbitasyon so impulisay na saray saserdote ed agew nen Malaquias tan saray relihyoson papangulo natan? (b) Siopa so inmebat ed imbitasyon, tan tekep na anton resulta?
8 Saray Israelitas nensaman so apaseseg a manlinis ed inkasikara tan ompawil ed si Jehova. “Pawil kayo ed siak, tan siak so ompawil ed sikayo,” kuan nen Jehova. Sikara ni so inimbitaan to, “‘Suboken yoak, ipangasi yo, ed sayan pamaakaran,’ so inkuan nen Jehova na saray ehersito, ‘no kasin agko lukasan ed sikayon totoo iray pinto na katawenan tan peteg ya iyupot ko ed sikayo so sakey a bendisyon ya angga ed anggapo la so pankulangan.’” (Malaquias 3:7, 10) Sakey a nakdaan lambengat na Judion nasyon so pinmawil; natan, sakey a nakdaan na espiritual ya Israel so pinmaway a nanlapu ed saray palson relihyon na sayan mundo. Sikara, a pati say ombabaleg a baleg ya ulop na arum a malakarneron managdayew, so mangidadayew ed si Jehova a bilang Tastasi to. (Juan 10:16) Diad sikara, sinumpal nen Jehova so sipan to tan ‘nilukasan toray pinto na tawen tan inyupot to ed sikara so bendisyon ya anggad anggapo so pankulangan.’—daakan a piesta na espiritual a tagano!—Isaias 25:6.
Daakan a Taganon Espiritual
9. Antoran espiritual a tarya so nipaparungo natan, diad panamegley na anton paraan, tan tekep na anton resulta?
9 “Say matoor tan makabat ya aripen” ya impasakbay nen Jesus ed agew tayo so okupadon tuloy a mangitatarya na taganon espiritual diad inkadaakan. (Mateo 24:45) Nen katantaon lambengat, ed 208 daldalin tan pulpulo na kadayatan, tan diad 200 lenguahe, masulok a taloran milyon a Tastasi nen Jehova so angitarya ed sarayan espiritual a tagano diad panamegley na impankabkaabungan tan diad panangibunog ed saray nilasus milyon iran libro, magasin, tan Biblia. Dakel so akibiang ed sayan espiritual a tagano tan napnek: Masulok a 225,000 iran balobalo so abautismoan ed sakey a taon!
10. Antoran tarya so wala diad italineng ed simbawa nen Pablo a mantitipon?
10 Saray espiritual a tarya nen Jehova so nipaparungo met ed panamegley na saray kumbension distrito, asamblea sirkito, tan diad saray limaran sinimban pantitipon a nagagawan maparanay diad masulok a 52,000 kongregasyon na saray Tasi nen Jehova—amin diad katutulok ed simbawa nen Pablo ed Hebreos 10:25 ya ‘agpapaulian so pantitipon tayo.’
11. Anto so mangiyilustra ed pilpilaleken a dalan diad kiparaan na espiritual a tagano?
11 Sanen imbitaan na sakey a bii iray sankaili ed sakey a panangan, sikato so aglambengat mangilambong na sakey a tegteg na karne tan ipasaplak to ed plato. Kargaan to na saray rekado tan digo a mangarum ed nanam tan dekorasyon a managyat ed mata. Unong a say itsura tan alingasew so magenap lan mamainam tan managdag a mangan. Ontan so inkiparaan na saray espiritual a tarya nen Jehova—aliwan diad amagamaga, estilon makapasawa, noagta diad mananam a dalan a mamaliket ed kanonotan tan manenyeg ed puso. Balang sinansakey a Kristiano so nepeg a manumbok ed satan ya ehemplo. “Agta say layag a mismo so manubok ed saray salita a singa saray tawentawen so manaway ed tagano?”—Job 12:11.
12. Antoran ehemplo so wala ed sikatayo diad espiritual a taganon nitataryan mananam?
12 Say Theocratic Ministry School Guidebook ed ununan leksion so mangidadanet na pangusar ed saray makapasagyat a salita. Inusar nen Solomon so aliwa lambengat a dugan salita noagta ontan met ed saray makapasagyat a salita. (Eclesiastes 12:10) Impasakbay na Salmo 45:2 so nipaakar ed Mesias, si Jesu-Kristo: “Say kalimgasan so nikalbo ed saray bibil mo.” Apaneknekan ya ontan. Saray dumerengel to so nankelaw “ed makapasagyat iran salita ya ompapaway ed sangi to.” Sikara so pirmin tinmumbok ed sikato ya ondengel, a sinmabin asakbay ed templo pian ondengel ed sikato, tinmalineng ed sikato a tekep na liket, nikelawan ed dalan na panagbangat to. Saray opisyales ya imbakin mangerel ed sikato so angikuan: “Anggapon balot so sananey a toon nansalita na singa saya.” (Lucas 4:22; 19:48; 21:38; Marcos 12:37; Mateo 7:28; Juan 7:46) Say Guidebook so nitaryan ontulong ed sikatayon mansalita ed saray makapasagyat a salita na katuaan. Kasin satan so uusaren yo a nagnap?
13. Panon inkaranet so Efeso 5:15-17 nipaakar ed ‘panganamot na panaon,’ tan akin a saya so nidanet?
13 Sikatayo so sisimbawaen na Efeso 5:15-17: “Manbantay kayo a say panakar yo so aliwan singa agmakabat noagta singa makabat a totoo, ya anamoten yo so pankanawnawan panaon, lapud saray agew so marelmeng. Nisengeg ed saya et tundaan yo la so magmaliw ya agmakatunongan, noagta itultuloy yon tebeken no anto so linawa nen Jehova.” Say Griegon salita dian nipatalos a “panaon” et agto kabaliksan so panaon ed basta inkalapagan a pantalos noagta ituturo to so sakey ya aturon panaon, sakey a panaon a para ed espesipikon gagala. Say Griegon berbon nipatalos ya “anamoten” so wala ed malaknab a porma, tan “diad sayan konteksto et nayarin kabaliksan to so ‘panaliw a malaknab’; i.e., a samboten so amin a pankanawnawan onsabi.”a Kasin sasamboten yo so panaon a manlapud eskedyul yo pian gawaen yo so inkasikayon makabat diad pibiang ed saray espiritual a tarya nen Jehova? Nepeg a gawaen yo. Nepeg a gawaen tayon amin. Akin? “Lapud saray agew so mauges.”
Manlapud Espiritual a Kabueran diad Espiritual a Paraiso
14. Anton bersikulo na Biblia so manserbin sakey ya ehemplo na anton punto ed lenguahen-Ingles a New World Translation Reference Bible?
14 Say matalonan espiritual a tarya et say New World Translation of the Holy Scriptures—With References tayo, ya impaway nen 1984. Sikato so walaan na dakerakel a punton manggawan posiblen usaren diad pamadaak ed pikakabat tayo.b Sakey ya ehemplo et say cross-references. Alaen so Salmo 1:3, a sasalaysayen to so kipapasen na too a mandalepdep ed ganggan na Dios ed agew tan labi. Satan a bersikulo so nabasa: “Sikato so peteg a magmaliw a singa sakey a kiew a nitanem ed agus na danum, a mangiter na dilin bunga to ed panaon tan saray bulong to so agnalenes, tan amin a bengatlan gawaen to so onaligwas.” Wala so nagkalalo, mas lalo, ed sayan bersikulo nen say pangabet ed mata na managbasa a basaen to lambengat a maples tan palabasen to.
15. Antoran tepet so apalesa nipaakar ed kiew diad Salmo 1:3, tan anton pakaliwawaan so iter na Isaias 44:4?
15 Ipangasin imanoen: Say kiew so nitanem. Siopa so nantanem? Sikato so diad gilig na saray agus, plural. Kasin say sakey a kiew so ontubo ed gilig na saray pigaran agus? Andi. Sirin manusisa. Anto iyan kiew? Say cross references so mangilukas ed mata na kanonotan tayo. Sikara so Isaias 44:4, 61:3, tan Jeremias 17:8. Ibabaga na Isaias 44:4 a saray totoo to so singa ra kiew “ed gilig na agusan na danum.” Dakel iran kanal na danum? Akin, on! Saray agus so kanal na irigasyon a manalog ed saray kakiewan!
16. Anton malaknab a panamalinew so inter na Isaias 61:3 tan Jeremias 17:8?
16 Tatawagen na Isaias 61:3 so arum ed sarayan kiew a “baleg a kakiewan na inkatunong, say tanem nen Jehova, pian sikato so naparakep.” Si Jehova so sakey a nantanem tan manalog ed saraya, tan sikato so sakey a parakepen na saray bungan pawalaen na kakiewan! Impareng na Jeremias 17:8 so toon manmorekdek ed ganggan na Dios ed agew tan labi ed “sakey a kiew a nitanem ed gilig na saray danum, a saray lamut to so ompaway ed saray agusan na danum; tan agto nanengneng sano onsabi so petang, balet saray bulong to so peteg a mansumpal a mabuna. Tan diad taon na kelang et sikato so agnapagaan, nisay sikato so agmamawala na bunga.” Saray bulong to so agnalenes; amin a bengatlan gawaen to so ontalona!
17. Anton retrato so ontatalindeg natan nipaakar ed Salmo 1:3, tan anton betang so kikiwasan tayo ed satan?
17 Natan saray pagsen so naekal ed mata tayo! Ipipinta na Salmo 1:3 so sakey a masansanting a retrato. Saraman so manmorekdek ed ganggan nen Jehova ed agew tan labi so singa ra kakiewan a nitanem ed gilig na ag-onsaew a subol na bilay. Sikara la so aliwan kabiangan na espiritual ya akelangan a minumundon organisasyon noagta sikara so nikasakey natan ed organisasyon na Dios a sikato so natatagano na daakan ed saray makarepreskon danum na katuaan. Peteg, sikara so wala ed espiritual a paraiso, narerepreskoan ed espiritual, tan mamapawala na espiritual a bunga diad kirayewan nen Jehova. Tan isipen pa! Uusaren na Dios so Tastasi to a mangidirihe ed totoo a manlapud amagaan, akelangan, minumundon organisasyon ya onarap ed sayan makarepresko, nasasalog-a-maong a paraison espiritual.
18. Panon so ikiwas na arum sano nanengneng daray arum ya ontatalona ed panagtasi, tan akin a nayarin sikara so onkulang?
18 Pian sayan kimey so nasumpal ya epektibo, nepeg a disiplinaan tayo so kanonotan tan puso tayo ta pian naanamot so amin ya espiritual a tarya nen Jehova. Narengel na arum so arum a mangipaliwawa ed saray teksto na Biblia tan insan ikuan da: “Agla kabat ko so Biblia a singa sikato!” Balet no saray ontan so manisiplina ed inkasikara a manaral ed Biblia, sikara met so ombulaslas diad pikakabat ed Biblia. Arum so makakadngel ya arum a tasi ed saray puerta tan insan ikuan da: “Agla nayarian ko so mantasi ed saray puerta a singa sikato!” Balet no disiplinaan da so inkasikaran mibiang a maparanay ed lawak na kimeyan, ya usaren da so libron Reasoning From the Scriptures, sikara met so makapagmaliw a lalon onsianon Tastasi. Arum so makadngel ed arum a mangiter na paliwawa ed Biblia tan insan ikuan da: “Agla nayarian ko so mangiter na paliwawa a singa sikato.” Balet, lamet, no saraya so manisiplina ed inkasikara a manparaan ed saray paliwawa ra a maong, ya aralen dan maong so leksion ed Theocratic Ministry School Guidebook, sikara met so onaligwas diad abilidad na panagpaliwawa.
19. Anto so tombok diad pamayubo na saray pakayari tayo ed panagtasi?
19 Natan, say pampirawat so maabig, balet say pampirawat ya andian na kimey so agmanggawan makasumpal ed kimey. Say kimey so manggawan tua ed pilalek. Disiplinaan mo so inkasika a manganamot na panaon, tan gawaen so kimey a manggawa ed pilalek ya ontua. No agmo usaren so masel mo, sikato so onkapuy. No agmo usaren so abilidad mo, sikato so onkupas. No agmo usaren so kanonotan mo, say pakayari na isip mo so onkapuy. No agmo usaren so pikakabat, nabalang mo so wala ed sika. Diad kada sakey tan ed amin a kipapase, say totontonen so, “Usaren mo odino nabalang mo.” Sikato so ‘diad panamegley na pangusar a saray pakayari na panagmorekdek so nipasal.’ Sirin say “pakayari na panagnonot a mismo so manbantay lawas ed sikayo, say pakatebek a mismo so manalimbeng ed sikayo.”—Hebreos 5:14; Uliran 2:11.
20. Diad panganamot ed saray espiritual a tarya nen Jehova, anto so paliisan tayo, tan anto so nagamoran tayo?
20 Sirin usaren iray espiritual a tarya nen Jehova. Miliket ed saray napepenek. Liktaran so eras ya impasakbay nen Amos: “‘Nia! Walaray agew ya onsabi,’ so kuan na Soberanon Katawan a Jehova, ‘tan ibakik so eras ed dalin, sakey ya eras, aliwan diad tinapay, tan kapegaan, aliwan diad danum, noagta diad pandengel ed saray salita nen Jehova.’” (Amos 8:11) Minabang ed saraman so mamangan tan manliliket, aliwan diad saraman so mangipupulisay ed tagano tan managmak na kibabaing: “Onia so kuan na Soberanon Katawan a Jehova: ‘Nia! Saray dilin ariripen ko so mangan, balet sikayo so naerasan. Nia! Saray dilin ariripen ko so oninum, balet sikayo so napegaan. Nia! Saray dilin ariripen ko so manliket, balet sikayo so managmak na kibabaing.”—Isaias 65:13.
[Saray Paimano ed Leksab]
a Nengnengen so The New International Dictionary of New Testament Theology, Tomo 1, pahina 268, nen Colin Brown.
b Nayarin satan so anggapo ni ed lenguahe yo balet andi-duaruwan naromog yo so interes diad walad tagey ya ehemplo ed inkausar to.
Kasin Nanonotan Yo?
◻ Panoy impangipanengneng na nasyon na Israel diad inkapenek ed saray tarya nen Jehova?
◻ Panon so inkasumpal na Malaquias 3:10 ed saray Tasi nen Jehova?
◻ Anto so maranet a kabaliksan na Salmo 1:3?
◻ Akin a makana so pangusar ed saray bengatlan naaralan ed panamegley na saray espiritual a tarya nen Jehova?
[Litrato ed pahina 13]
Saraman so mandalepdep ed ganggan nen Jehova so singa ra kiew a nitanem ed ag-onsaew a subol na danum