Kapitulo 10

Say Sinambaan na Dios a Gawaen ed Katooan​—Asingsingger La!

1, 2. (a) Diad anton pantalos a say Dios so mansamba, tan akin? (b) Anto so imbaga na Dios ed Isaias 45:23? (c) Diad antoran balikas nen propeta Isaias so nayarian tayon pipaknaan?

KASIN mansamba so Dios? On, mansamba so Dios, balet agto usaren ed panamauges, iterak na sanok tan pakabalang na kontrol. Say panagsamba to so naynay a mitukoyan diad pamabiskeg ed saman so iyaabawag ton gagala to. Mangiter na kaaruman a paseguro ed saraman so naapektaan. Sirin, maong no amin a katooan so mangiter na imano ed saray salita to diad Isaias 45:23: “Diad dilin inkasiak et sinambaan ko​—manlapud dilin sangik ed inkatunong et say salita so pinmaway, ta pian ag-ompawil​—ta dia ed siak et amin a pueg so ontalimukor, amin a dila so mansamba.”

² Natan, masulok a 2,700 a taon kayari na saman a propesiya, kasin sikatayo so akumbinse a say balikas na propeta ed Isaias 45:24 so tua: “Peteg a diad si Jehova et wala so nagnap ya inkatunong tan biskeg. Amin na saraman so onsanok a sumpad sikato so onarap ed sikato tan nabaingan”? No ontan, sirin sikatayo met so mipakna ed onggendan a salita nen Isaias ed bersikulo 25: “Diad si Jehova et amin a bini na Israel so mansumpal a maptek tan manpangta ed inkasikara.”

3, 4. (a) Akin a say Isaias 45:25 so agmanagdag ed sikatayon manisip ed Republika na Israel? (b) Kasin wala so anggan anton insaew ed kasumpalan na Isaias 45:23-25, tan akin ya ontan so ebat yo?

³ Sano babasaen so Isaias 45:25, kasin isipen tayo so republika na Israel? Andi! Saratan ya Israelis so agmangipapabtang na impanalo ra ed Dios diad saray sagradon Hebreon Kasulatan da. Manlapud lingon panamasantos et agda anggan bitlaen so ngaran to.

⁴ Diad saya, kasin isasangsang tayo a say Isaias 45:23-25 so sinmaew ed kasumpalan ya anggad sayan taon? Andi! Wala so insaew ed kasumpalan na propesiya ed aturon panaon nen Jehova. Diad sikato, say isaew ed propesiya to so imposibli! Aliwa lambengat a say salita so napanmatalkan tan napandependian noagta sikato so nagkalalo sano si Jehova so mansamba ed satan, ya aruman to so samba, a pamekder ed saray pamaakaran.

Sinmalta So Dios a Tekep na Sakey a Samba

5. Panon so pangipaliwawa na Hebreos 6:13-18 ed insalta na Dios ed sakey a samba diad sipan ed si Abraham?

⁵ Nipaakar ed saya, nabasa tayo ed Hebreos 6:13-18: “Ta sanen ginawa na Dios so sipan to ed si Abraham, lapud sikato so agmakapansamba ed siopaman a babaleg, sikato so nansamba ed inkasikato, a kuanto: ‘Nipaseguro ed bendisyon a bendisyonan takayo, tan pamarakel et parakelen takayo.’ Tan sirin kayari na impangipanengneng nen Abraham na anos, agamoran to so sayan sipan. Ta saray totoo so mansamba ed sakey a babaleg, tan say samba ra so anggaan na amin a pansusuppiatan, a singa dia ed sakey a legal a garantiya ed sikara. Diad sayan nengneng et say Dios, sanen ginagala ton ipatnag a nagkalalon daakan ed saray mananawir na sipan so agpananguman na simbawa to, sinmalta ed sakey a samba, ta pian, diad panamegley na duaran agnauman a bengatla ya agnayarin pantilaan na Dios, sikatayo a binmatik ed salimbengan so nawalaan na mabiskeg a kapaseseg a mamemben ed ilalon niiyan ed arap tayo.”

6. (a) Anton motibasyon so wala ed pansamba na Dios ed inkasikato nipapaakar ed sipan to ed si Abraham? (b) Panon so pangusar nen Jehova ed “kaaro” to?

⁶ Inkalapagan, wala so mabibiskeg a motibasyon diad pansamba, diad pangibalikas na sakey a samba. Satan so nagkalautlan tua sano say panagsamba so diad dilin linawa na Dios, boluntaryo. Say ontan a motibasyon so nagawa ed sayan kipapasen a si Jehova so nibalitan mansasamba, on, mansasamba ed inkasikaton dili. Say sinambaan a sipan a ginawa nen Jehova ed si Abraham, a “kaaro” to, so mangapekta ed amin tayo natan. Satan so inapresya nen Jehova sanen si Abraham so kinmiwas ed madibinon imbitasyon tan tinaynanan to so nianakan ton dalin pian onla ed dalin ya iter nen Jehova ed saray kapolian nen Abraham a bilang kayarian. Nayarian nen Jehova a gawaen a maligen so ngaran na sayan “kaaro” a baleg tan nayarian ton usaren diad kabendisyonan na arum. Nayarian a maong nen Jehova ya ibaga ed sikato: “Tan papalaren ko raman so mamapalar ed sika, tan say manawag ed sika na mauges so ayewen ko, tan amin a pamilya ed dalin so peteg a mamapalar ed inkasikara diad panamegley mo.”​—Genesis 12:3; Isaias 41:8.

7. (a) Diad anton milagro a pinalaboan na Dios si Abraham sanen manedad na 90 taon so asawa to? (b) Panon so impangipatnag nen Abraham na pananisia to tan katutulok ed nikadkaduman dalan?

⁷ Sanen manedad na 90 taon si Sara ya asawa nen Abraham, linmabas la ed edad na panag-anak, so mamilagron pinaboran na Dios diad impangiter ed si Abraham na inad-aron anak da, si Isaac, diad panumpal ed makapakelaw a sipan to ed si Abraham. Pinaneknekan nen Abraham so inkasikaton akaparaan tan mabulos a mangiyapay ed anggan sayan pinabpablin anak a bilang sakey a toon bagat diad katutulok ed ganggan na Dios to, si Jehova. Sayan nikadkaduman panangipatnag na pananisia tan katutulok so anenyeg a tuloy ed si Jehova ya imbaga to ed si “kaaro” to, si Abraham:

8, 9. (a) Panon so inkiwas nen Jehova ed sayan impangipatnag na pananisia tan katutulok nen Abraham? (b) Diad siopa so nanggawaan na Dios ed inkasikato a responsabli?

⁸ “‘Diad siak a dili et sambaan ko,’ so kuan nen Jehova, ‘a diad panamegley na katuaan a sayan bengatla so ginawam tan agmo inkibot so anak mo, say alenleneg mo, tan peteg a papalaren taka tan peteg a parakelen ko so binim a singa saray bibitewen na katawenan tan singa saray kabueran na dayat; tan say binim so mangayarian ed pinto na saray kakabusol to. Tan diad panamegley na binim et amin a nasyones na dalin so peteg a mamapalar ed inkasikara nisesengeg ed katuaan a tinalineng mo so boses ko.’”​—Genesis 22:15-18.

⁹ Saya so ununan pasen ed Biblia a si Jehova so nibalitan mansasamba. Lapud anggapo so nayarian ton pansambaan a babaleg, sikato so nansamba ed inkasikato, a pinaeletan to ed dilin inkasikato. Diad onia et ginawa to so inkasikaton responsabli ya aliwan diad siopaman noagta diad inkasikaton dili. Dia ed dilin galang to a sumpalen to so dilin inyabawag ton gagala.

Diad Anton Kalaknab?

10. Ngalngalin panon kabayag a ginawa na Dios so sipanan to ed si Abraham, tan anton tepet sirin so onlesa?

¹⁰ Si Abraham so linmoob ed insipan a dalin na Canaan ed ngalngalin 4,000 taon lan linmabas. Sirin natan, diad anton kalaknab so inkasumpal na satan a sipanan a ginawa nen 1943 K.K.P.?

11. (a) Anto so ipapanengneng na pimemembro na Republika na Israel ed NU, tan tekep na antoran nansumpalan? (b) Kasin saray silalaman a kapolian nen Abraham so misukat ed saray nakakaukolan diad pagmaliw ya insipan a “bini”?

¹¹ Natan, wala so Republika na Israel ed Pegley Bukig. Diad kasibletan, sikato so sakey a membro na Nasyones Unidas. Say NU so mangirerepresenta na impangipulisay ed Panarian nen Jehova a Dios ed panamegley na nisipan a “bini” nen Abraham tan sirin sikato so naderal ed “bakal na baleg ya agew na Dios a Makapanyarin-amin,” Armagedon. Kada membro na NU, a pati say Republika na Israel, so napunas ed kiwawala. Makapaermen, say silalaman, natural iran kapolian nen Abraham so ag-onsukat ed saray nakakaukolan diad pagmaliw a nisipan a Mesianicon “bini” a diad panamegley to et bendisyonan nen Jehova a Dios so amin a katooan.​—Apocalipsis 16:14-16.

12, 13. (a) Aliwan singa si ama ton David, akin a say “Prinsipe na Kareenan” so agmanuley a bukbukor? (b) Kasin saray alanaan a Kristianos so nakaukolan a manalagar ya anggad say Panarian so niletneg nen 1914 pian awaten so nisipan a bendisyon, ta panon so pikabat tayo?

¹² Malinlinew a tuloy ed pakaimano na amin, say nisipan a Mesias so agmanuley ed Pegley Bukig, mangaraldalin a Jerusalem diad kasumpalan na Abrahamicon sipanan. Aliwan singa si ama ton David nensaman, say Mesias tan “Prinsipe na Kareenan” so agmanuley a bukbukor. Insipan to ya ikasakey ed inkasikato diad pananguley to so 12 matoor ya apostoles to tan say arum nin nailalak-ed-espiritun babangatan to, diad bilang a 144,000. (Apocalipsis 7:1-8; 14:1-4) Wala ni so nakdaan na ontan iran babangatan ed dalin. Anto so agawa ed sikara diad kiyabante na kasumpalan na Abrahamicon sipanan a sinambaan na Dios? Sakey a sikato so manunan prospektibon kaiba ed satan a Panarian, si apostol Pablo, so angisulat ed Galacia 3:8: “Natan say Kasulatan, ya anengneng ed akauna a say Dios so mangiyabawag ed totoo na nasyones a matunong nisesengeg ed pananisia, so angiyabawag ed maong a balita ya akauna ed si Abraham, salanti: ‘Diad panamegley mo et amin na saray nasyones so napapalar.’”

¹³ Saray Kristianon pinili a nanlapud limog na nasyones so agnakaukolan a manalagar ya anggad kayari kiletneg na Panarian nen 1914 a mangawat ed nisipan a bendisyon, lapud intuloy nen Pablo ya imbaga: “Kanian sirin et saraman so mansiansia ed pananisia so napapalar a mankakasakey a pati si Abraham.” (Galacia 3:9) Si Pablo so sakey a Kristiano tan abendisyonan tan ontan met ed amin nin arum a nailalak-ed-espiritun Kristianos ed agew to.a Ontan met natan, say nakdaan, a tinugyop na nailalak-ed-espiritun Kristianos, a mansungdo ed pananisia diad Mesias a bilang say manunan “bini” nen Abraham a para ed kapapalar na amin a katooan, so makakasagmak ed nisipan a bendisyon.

14. (a) Panon a saray alanaan a Kristianos so nikadkaduman abendisyonan unong ed Abrahamicon sipanan? (b) Diad anton dalan a saya so angalangon ed si Jehova?

¹⁴ Diad pangidedika ra na inkasikara ed si Jehova tan sayan dedikasyon so isimbolo ra diad kabautismoan ed danum tan insan ilalaken na espiritu na Dios ed sakey ya espiritual a kipapasen, sarayan Kristianos so magmaliw ya espiritual iran ananak na Babaleg ya Abraham, si Jehova a Dios. Sikara met so magmaliw a kaiban mananawir nen Jesu-Kristo, say Babaleg ya Isaac. (Roma 8:17) Sikara a peteg so nikadkaduman abendisyonan unong ed Abrahamicon sipanan. Susumpalen nen Jehova so sinambaan ton gawaen, a ditan et aalangonen to so inkasikato a bilang sakey a manangibaga na katuaan, Sakey ya ayadyarin makayarin mangitarok ed saman so sinambaan ton gawaen ed dilin ngaran to.

15. Anto so ibabaga nen apostol Pablo a kipapasen na kada membro na nakdaan na nailalak-ed-espiritun Kristianos?

¹⁵ Kada membro na nakdaan na nailalak-ed-espiritun Kristianos so sakey a Judio ed espiritual a pantalos. A singa imbaga nen apostol Pablo: “Sikato so aliwan Judio ed paway, nisay galsim a wala ed paway na laman. Balet sikato so Judio ed loob, tan say galsim to so diad puso ed panamegley na espiritu, tan aliwan diad insulat a ganggan.”​—Roma 2:28, 29.

16. Saray espiritual a Judios so manibukel na anton klase a nipasakbay ed Zacarias 8:23?

¹⁶ Diad sayan “kasampotan na sistema na bengabengatla,” saratan a nailalak-ed-espiritun Kristianos, a Judios ed dalem a tekep na inkagalsiman ed kapusoan da, so manitibukel na Judion klase a nipasakbay ed Zacarias 8:23, a nisulat: “Saya so imbaga nen Jehova na saray ehersitos, ‘Nagawa ed saratan ya agew a samploran lalaki a nanlapud amin a pansasalita na amin a nasyones so ombemben, on, sikara so peteg ya ompeket ed kawes na sakey a laki a sikato so sakey a Judio, a kuan da: “Mila kami ed sikayon totoo, lapud nadngelan mi a say Dios so wala ed sikayon totoo.”’”

17. (a) Siopa so inrepresenta na “samploran lalaki” a malabay a mandayew ed si Jehova a kaiba na kaplesay-agew a nakdaan na saray espiritual a Judios? (b) Diad pilimog ed saray espiritual a Judios diad panagdayew ed si Jehova, anto natan so panggagayagaan na saray membro na “arum a karnero”?

¹⁷ Say “totoo” a nilabay a piulopan na saratan a “samploran lalaki” ya onlan mandayew ed si Jehova a Dios et say kaplesan-agew a nakdaan na saratan ya espiritual a Judios, say klase a manibukel “na matoor tan makabat ya aripen” ed Mateo 24:45-47. Lapud say bilang a samplora so mangirerepresenta ed inkagnap ed mangaraldalin a nengneng, say “samploran lalaki a nanlapud amin a pansasalita na nasyones” so mangitalindeg ed amin a simbolikon karnero a nipasakbay ed Mateo 25:32-46. Saraya so “arum a karnero” a klase ya imbaga nen Jesus ya itarok ton ikasakey ed singa-karneron nakdaan a manibukel ed sikara na “sakey a pulok” diad panangasikaso na “sakey a pastol,” a mismo. (Juan 10:16) Diad onia et sikara la so masakbay a makataway ed saray bendisyon na Abrahamicon sipanan ed panamegley na “bini” na Babaleg ya Abraham, si Jehova a Dios. Peteg, sirin, say sinambaan na Dios a gawaen ed amin a katooan so asingsingger la!

[Paimano ed Leksab