Kasin Say Takot So Naynay a Mauges?

NAYARIAN ton deralen so liket tan desyangen so ilalo. Satan so atukoy a bilang samal na nonot, say managderal na katunongan, tan nibagan lalon makadesyang nen say sankaugesan a kaugsan ed pisikal. On, say takot so sakey a mabiskeg ya emosyon. Ingen, kasin satan so naynay a mauges?

Isipen a sikayo so manmamaneho ed agkabisadon kalsada. Say kalsada so ontatdang ed saray kapalandeyan tan onggapon manlikuliko tan manpawilpawil. Onggapo lan mansirunget so labi, tan ditan et wala so makaburagas a liwawa na yelo. Say kotse yo so medyo dinmulas, tan amoria yon asabi yo so kaatagey a say kalsada so nagmaliw a mayelo.

Natan et nakaukolan yo so magmaliw ya alerton tuloy. Legan a sikayo so maalwar a mamebeltang ed kada mayelon liko, umamengen yon agaylan inumay so pakabalang na kontrol ed kotse diad andanglel a dalan tan nagalasugos ed leksab. Nagkalalo ni, andian kayo na ideya ed arum iran kaatapan a manatalaran ed kabilungetan. Legan na sarayan kaisipan so omparlas ed kanonotan, say sangi yo so namagaan tan say puso yo so ompatok a medyo maples. Sikayo so sililiing a tuloy. Antokaman ya iisipen yo nensaman, sikayo la natan so sigpot ya okupado ed kimey na lima yo: say pamasiansia ed kotse ed kalsada tan paliisan so aksidente.

Kaunoran, say kalsada so nampaleksab. Walaray silew ed kalsada, tan anggapo laray yelo. Kalkalna, say talagnaw so manaynan ed laman yo. Sikayo so manrelaks tan uningas na aralem ed kainawaan. Amin na satan a takot so para ed anggapo!

Balet kasin satan ya amin so anggapo? Andin peteg. Say makatunongan a nerbyos ed leksab na ontan iran sirkumstansya so normal a reaksyon. Gawaen to itayon alerto, sililiing. Say mabunigas a takot so ontulong ed sikatayon agmanggawa na antokaman a biglabigla, a pasakitan tayo so inkasikatayo. On, say takot so aliwan naynay a managderal na katunongan odino samal na nonot. Diad leksab na arum iran sirkumstansya, sikato ni ingen so makagungguna.

Sasalitaen na Biblia so nipaakar ed takot tan itatawag to so duaran partikular a nengneng ed imano tayo. Sakey a nengneng na takot so peteg a samal na nonot. Balet say arum so aliwa lambengat a normal tan mabunigas noagta makana ed kilalaban tayo. Anto so duaran nengneng na takot? Tan panon so pakaaral tayon mamayubo ed sakey bang say sananey so paliisan? Saya so nasingbat ed ontumbok ya artikulo.