Akin a Takotan So Dios, Aliwan Totoo?

“SAY igiwgiw ed totoo so mangitarok na kalot, balet saman so manmatalek ed si Jehova so nasalimbengan.” (Uliran 29:25) Diad sarayan salita na kadaanan ya uliran et liingen to itayo ed nengneng na takot a sikato so peteg a samal na nonot​—say takot ed too. Sikato so nipareng ed sakey a kalot. Akin? Lapud say melag ya ayep, a singa say rabit, so pakaskasi sano naerel ed sakey a kalot. Labay to so ombatik, balet say kalot so mangisinger ed sikato. Say biktima so, diad epekto, paralisado.

No sikatayo so nadaeg na takot ed too, sikatayo so singa saya a rabit. Nayarin kabat tayo so nepeg tayon gawaen. Nayarin labay tayo ni ingen a gawaen itan. Balet say takot so mangaamper ed sikatayo. Sikatayo so paralisado tan agmakayarin onkiwas.

Say Kalot na Itakot ed Too

Isipen so arum ya ehemplo ed panaon na Biblia diad saraman so kinautibo na kalot na takot. Diad saray agew nen Josue, 12 so nibakin man-espiya ed dalin na Canaan sakbay na implanon ilubak na saray Israelitas. Saray espiya so pinmawil tan imbalita ra a say dalin so mabuna tan mayaman, a singa imbaga na Dios. Balet samplora ed saray espiya so atalagnaw diad biskeg na saray manaayam. Sirin, dinaeg na takot ed too, sikara so angiter na alalbalas a balita nipaakar ed sayan biskeg diad saray Israelitas tan ginawa to so interon nasyon a nadaeg na takot. Saray Israelitas so agmalabay a mangunor ed ganggan na Dios a manmartsan onloob ed Canaan tan kayarianen so dalin. Bilang nansumpalan, kaleganan na ontumbok ya 40 taon, say interon populasyon na saray walad edad ed saman a panaon, a tekep na pigaran nilikud, so inatey ed kalawakan.​—Numeros 13:21–14:38.

Si Jonas so sananey a biktima na takot ed too. Sanen niganggan a manpulong ed baleg a syudad na Nineve, sikato so “tinmalindeg tan binmatik ed Tarsis a manlapud arap nen Jehova.” (Jonas 1:3) Akin? Saray Ninevitas so walaan na reputasyon na kipapasen ya andi-panangasi tan maruksan totoo, tan peteg a satan so kabat nen Jonas. Say takot ed too so anagdag ed sikaton ombatik diad pasen ya arawi ed Nineve. Tua, diad kaunoran et inawat to so kimey balet ta dia lambengat ed kayari impangawat to na nikaduman disiplina a nanlapud si Jehova.​—Jonas 1:4, 17.

Anggan saray arari so nayarin ontakot ed totoo. Diad sakey ya inkagawa, direktan sinumlang nen Arin Saul so balikas na ganggan a nanlapud Dios. Say baraan to? “Aluksoan ko so ganggan nen Jehova tan saray salitam, lapud tinmakot ak ed totoo tan sirin inunor ko so boses da.” (1 Samuel 15:24) Pigaran siglos ed saginonor, nen say Jerusalem so inataki na saray taga Babilonia, si Jeremias, sakey a matoor a propeta, so animbawa ed si Arin Zedekias ya onsuko tan sirin nilaban so Jerusalem manlapud baleg a kipaagus na dala. Balet agnilabay nen Zedekias. Akin? Impatua to ed si Jeremias: “Siak so tinmakot ed saray Judios a naplag ed saray Caldeo, tan ompan siak so iyawat da ed lima ra tan sikara so peteg a mamauges ed siak.”​—Jeremias 38:19.

Kaunoran, anggan say sakey ya apostol so nayarin ontakot. Diad agew na impatey nen Jesus, pinasakbayan toray patumbok to a sikaran amin so manaynan ed sikato. Si Pedro, anggaman kuan, so makpel ya angibaga: “Katawan, siak so akaparaan a mila ed sika diad pangawan tan diad patey.” (Lucas 22:33; Mateo 26:31, 33) Agaylan saraman a salita so aliwan tua! Pigaran oras lambengat ed saginonor, sitatakot ya imburi nen Pedro a sikato so akiulop ed si Jesus odino anggan kabat to. Say takot ed too so tinmalona ed sikato! On, say takot ed too so peteg a samal na nonot.

Siopa So Nepeg Tayon Takotan?

Panon tayon natalonaan so takot ed too? Diad pangisandi ed satan na mas lalon mabunigas a takot. Sayan nengneng na takot so impaseseg na parehon apostol, si Pedro, sanen inkuanto: “Ontakot ed Dios.” (1 Pedro 2:17) Say anghel ya anengneng nen Juan so tinmawag ed katooan: “Takotan so Dios tan iter ed sikato so gloria.” (Apocalipsis 14:7) Say makabat ya arin Solomon so angipaseseg met ed ontan a takot, sanen inkuanto: “Say anggaan na pamaakaran, amin a bengatlan nadngel, so: Takotan so tuan Dios tan sumpalen iray ganggan to. Lapud saya so interon obligasyon na too.” (Eclesiastes 12:13) On, say takot ed Dios so sakey ya obligasyon.

Say takot ed Dios so mangitarok na saray gungguna. Inkanta na kadaanan a salmista: “Peteg a say panangilaban nen [Jehova] so asingger ed saraman so ontakot ed sikato.” (Salmo 85:9) Indanet na sakey ya uliran na Biblia: “Say mismon takot ed si Jehova so mangarum na saray agew.” (Uliran 10:27) On, say takot ed si Jehova so sakey a mabunigas, makagunggunan bengatla. ‘Balet peteg,’ nayarin ikuan yo, ‘Si Jehova so sakey a maaron Dios. Akin a nepeg tayon takotan so sakey a Dios na aro?’

Takotan So Sakey a Dios na Aro?

Lapud say takot ed Dios so aliwan say pakaskasi, makapalupoy a takot a mangegemgem ed totoo ed arum a kipapasen. Sikato so nengneng na takot a nayarin nalikna na sakey ya ugaw ed ama to, anggamano inaro to so ama to tan kabat ton sikato so inaro na ama to.

Say takot ed Dios so peteg a sakey a malaknab a pangigalang ed Amalsa a sinengeg diad pakamoria a sikato so sigpot a katibukelan na inkatunong, inkahustisya, kakabatan, tan aro. Lalanoren to so mabunigas ya itakot diad agpakapaliket ed Dios lapud sikato so Supremon Ukom a walaan na pakayarin manumang tan manusa. “Makapataktakot a bengatla so napelag ed lima na mabilay a Dios,” so insulat nen apostol Pablo. (Hebreos 10:31) Say aro na Dios so aliwan bengatlan leglemewen, nisay say panangukom to so bengatlan modmoraen. Sikato no akin a sikatayo so papanonotan na Biblia: “Say takot ed si Jehova so gapo na kakabatan.”​—Uliran 9:10.

Nepeg tayon nonoten, anggaman kuan, a legan a si Jehova so walaan na pakayarin manusa ed saraman so ontunganga ed sikato​—tan mabetbet ya ontan​—sikato so agbalot napgaan-ed-dala odino maruksa. Sikato a peteg so sakey a Dios na aro, anggaman sikato, singa maaron ateng, so no maminsan et situtunong ya onsanok. (1 Juan 4:8) Sikato no akin a say itakot ed sikato so mabunigas. Itonton to itayon mangunor ed saray ganggan to, a nigana ed pankaabiganan tayo. Say panangunor ed saray ganggan na Dios so mangitarok na liket, bangta say itunganga ed sikara so naynay a mangitarok na mauges iran pansumpalan. (Galacia 6:7, 8) Say salmista so apuyanan a mangiyabawag: “Takotan si Jehova, sikayoran sasanto to, lapud anggapo so kakulangan na saraman so ontakot ed sikato.”​—Salmo 34:9.

Siopa So Takotan Yo?

Panon a say takot ed Dios so ontulong ed sikatayon manalona diad takot ed too? Bueno, saray totoo so nayarin manludlurey ed sikatayo odino anggan mamasegsegang ed sikatayo diad panggawa ed saman so maptek, a mangitarok na desdes ed sikatayo. Balet say magalang a takot ed Dios so mangidetdet ed sikatayon mansiansia ed maptek a kurang, lapud agtayo labay a sikato so agnapaliket. Nagkalalo ni, say aro ed Dios so managdag ed sikatayo a manggawa ed saman so mangitarok na liket ed puso to. Niarum ni, nonoten a sikatayo so tumangan na Dios a siyayaman diad panggawa na maptek, a manggawa ed sikatayon mangaron nagkalalo tan gawaen to itayon manlabay a manggawa ed linawa to. Sirin, say asimbang a panmoria ed Dios so ontulong ed sikatayon manalona ed anggan anton takot a nayarin wala ed sikatayo diad totoo.

Alimbawa, dakel so nadedesdes ed panaggawa na mauges lapud takot ed isipen na saray kaedaran. Saray walad kalangweran ed eskuelaan so nayarin mansigarilyo, mangusar na mauges iran lenguahe, manlastog ed seksual ya eksperiensia (peteg odino iisipen), tan anggan maneksperimento ed alkohol odino druga. Akin? Aliwan naynay a lapud labay da, noagta lapud sikara so antakot ed ibaga na saray kaedaran da no sikara so onkiwas a duma. Diad sakey a kalangweran, say kaludlurey tan kipabpaabeba so nayarin mairap a sungdoan a singa say pisikal a kapasegsegang.

Say sakey a matatken so nayarin manlikna met a nadesdes ed panggawa na mauges. Anganko say amo ed trabaho so mangibaga ed sakey ya impleado a mangabuso ed sakey a kliente odino sisasaol a manggawa ed porma na panagbuis na kompanya ta pian napaabeba so eebatan ed buis. Nayarin liknaen na Kristiano a no agto ontulok, nabalang to so trabaho to. Sirin, say takot ed too so nayarin managdag ed sikaton manggawa na mauges.

Diad namparan kipapasen, say mabunigas a takot ed Dios tan respeto ed saray ganggan to so mangamper ed Kristiano diad kalupoy ed panamegley na takot ed too. Tan say aro ed Dios so mangamper ed sikato diad pibiang ed saray gawan insebel na Dios. (Uliran 8:13) Nagkalalo ni, say pananisia to ed Dios so mangipaseguro ed sikato a no sikato so kinmiwas unong ed nipasal-ed-Biblian konsiensia, sikato so suportaan na Dios ed antokaman a pansumpalan. Imbalikas nen apostol Pablo so pananisia to ed sarayan salita: “Diad amin a bengatla et siak so walaan na biskeg diad birtud na saman so angiter ed siak na pakayari.”​—Filipos 4:13.

Itatarya na Biblia so dakel iran ehemplo na lalaki tan bibii a matoor ed si Jehova diad leksab na anggan diad saray mabiskeg a subok. “Inawat [da] so inkasubok diad panamegley na kaludlurey tan inkabakbak, . . . diad inkabalor tan inkipangaw. Sikara so tinupak na bato, sikara so asubok, sikara so alagari, sikara so pinatey diad impamatey na kampilan.” (Hebreos 11:36, 37) Balet agda inabuloyan so takot ed too a mangontrol ed kanonotan da. Imbes, tinumbok da so parehon makabat a kurang ya inter ed saginonor nen Jesus ed saray babangatan to: “Ag-ontatakot ed saraman so mamatey na laman balet agda nayarian a pateyen so kamarerwa; noag ingen ontakot ed saman [Dios] so makayarin maneral ed kamarerwa tan laman diad Gehenna.”​—Mateo 10:28.

Say panumbok ed sayan simbawa nen Jesus ya ontakot ed Dios imbes a diad too so nanggawa met ed saray inmunan Kristianos ya akapangisungdo ed amin a nengneng na irirap, inkasubsubok, tan panamasegsegang “nisesengeg ed maong a balita.” (Filemon 13) Si apostol Pablo so makatantandan ehemplo ed saya. Diad komaduan sulat to ed saray taga Corinto, impanengneng to no panon a say takot ed Dios so amakpel ed sikaton mangisungdo ed saray inkipangaw, inkapekpek, inkabato, inkakneb, nanduruman kaatapan ed kalsada, agpakaugip ed labi, eras, inkapgaan, betel, tan inkalabos-lakseb.​—2 Corinto 11:23-27.

Say takot ed Dios so amabiskeg met ed saraman so inmunan Kristianos ya ontalindeg ed mabiskeg ya inkapasegsegang ed leksab na Imperyo na Romano, sanen arum so anggan imbantak ed saray atap ya ayep diad arena. Diad saray Edad Medya, saray makpel a mananisia so mapublikon pinoolan ed patey nisesengeg ed agda impangikumpromiso ed pananisia. Kaleganan na unor a guerra mundial, nilabay na saray Kristianos so manirap tan ompatey diad saray kampo na panangipangawan imbes a manggawa ed saray bengatlan agmakapaliket ed Dios. Agaylan mabiskeg a puersa na maridios a takot itan! Peteg, no pinabiskeg toray Kristianos a manalona ed takot diad too ed leksab na ontan a makasubsubok a kipapasen, nayarian to itayo met a pabiskegen ed antokaman a kipapasen a nayarin kawalaan tayo.

Natan, si Satanas a Diablo so manggagawa ed anggaan na nayarian to a manesdes ed sikatayo diad agpamaliket ed Dios. Saray tuan Kristianos sirin so nepeg a nawalaan na parehon determinasyon a singa saman so imbalikas nen apostol Pablo sanen insulat to: “Sikami so aliwan nengneng na onsener ed kadederal, noagta nengneng na walaan na pananisia diad kiliktar a mabilay na kamarerewa.” (Hebreos 10:39) Say takot ed si Jehova so sakey a peteg a subol na biskeg. Diad tulong to, komon ta sikatayo “so wala ed maabig ya inkakpel tan ikuan tayo: ‘Si Jehova so mananulong ko; agak antakot. Anto so nagawaan na too ed siak.’”​—Hebreos 13:6.

[Litrato ed pahina 7]

Say takot ed Dios so amakpel ed si Pablo a mangisungdo ed amin a bengatla, a pati saray inkapekpek, inkipangaw, tan anggan inkakneb.​—2 Corinto 11:23-27