Takotan Si Jehova tan Igloria so Masanton Ngaran To
“Siopa so ag-ontakot ed sika, Jehova, tan agmangigloria ed ngaran mo, lapud sika lambengat so matoor?”—APOCALIPSIS 15:4.
1, 2. (a) Panon nen Jehova a nilukasan so mangatatawen iran pinto legan na 1991? (b) Anton eksperiensia ed bilay so anenyeg ed sakey a matoor a misionero a mangisimbawan: “Takotan si Jehova”? (Nengnengen met so 1991 Yearbook, pahina 187-9.)
SI Jehova et ‘nilukasan toray pinto na katawenan tan inkalbo to so bendisyon ya anggad agla nasabaan.’ Saratan a balikas so naulit-ulit ya onaplika ed saray Tasi nen Jehova ed sarayan panaon. (Malaquias 3:10) Alimbawa, legan na 1991 serbisyon taon, say sayaksak na saray bisitan Tastasi tan lokal iran kumbesionista so manlepwas diad Kristianon panlilimog ed espesyal iran kumbension ya agawa ed interon dalin—manlapud “Puron Lenguahe” iran kumbension ed Buenos Aires ed Abalaten ya Amerika; tan Manila, Taipei, tan Bangkok ed Oriente; anggad “Manangaro ed Kawayangan” iran kumbension ed Budapest, Prague, tan Zagreb (Agosto 16-18, 1991) ed Mamabukig a Europa.
2 Alay gayaga parad saray delegadon nanlapud biek-taew so pakapilimog ed saray abayag lan matoor a Tastasi ed saraman a pasen! Alimbawa, diad Bangkok, si Frank Dewar—ya aminsan et alenleneg a manangipalapag na Panarian ed Thailand—so angisalaysay ed 58 taon ya impanmisionero to. Saray kimey to et manlapud saray polo na Pasipiko ya anggad Mamaabalaten ya Asia, tan anggan say China. Asagmak toray kapeligroan ed inkakneb, maatap iran ayayep ed katakelan, sakisakit, tan say maruksan uley na manangipangulo ed bakal iran Hapones. Sanen atepetan no anto so nisimbawa to ed saray kumbesionista, simple so ebat to: “Takotan si Jehova!”
3. Akin a nepeg tayon idalangirang so maridios a takot?
3 “Takotan si Jehova!” Agaylan importante ed sikatayon amin a bayuboan itan a mabunigas a takot! “Say takot ed si Jehova so gapo na kakabatan.” (Salmo 111:10) Sayan takot so aliwan agmabunigas a takot ed si Jehova. Imbes, atan so aralem a respeto ed makapakelaw a katagyan tan maridios iran kalidad to, a nibased pakatebek a naawat tayo ed panagaral na Salita na Dios. Diad Apocalipsis 15:3, 4, iyaabawag na kanta nen Moises tan say Kordero: “Baleg tan makapakelaw iray kimey mo, Jehova a Dios, say Makapanyarin-amin. Matunong tan matua iray dalan mo, Ari na inkamaando. Siopa so ag-ontakot ed sika, Jehova, tan mangigloria ed ngaran mo, lapud sika lambengat so matoor?” Lapud matoor ed saray managdayew to, si Jehova so walaan na “libro na pakanodnonotan . . . a nisulat ed arap to iramay ontakot ed si Jehova tan saramay sinononot ed ngaran to.” Sikaray natumangan na andi-anggaan a bilay.—Malaquias 3:16; Apocalipsis 20:12, 15.
Ontalona so Maridios a Takot
4. Anton kadaanan a panangiliktar so nepeg a mamaseseg ed sikatayon ontakot ed si Jehova?
4 Sanen tinmainan so Israel ed Ehipto nen Paraon, malinew ya impanengneng nen Moises a si Jehova lambengat so tatakotan to. Ag-abayag, saray Israelitas so asikup ed baetan na Ambalangan Dayat tan mabibiskeg iran inayuraan na Ehipto. Anto so gawaen da? “Inkuan nen Moises ed totoo: ‘Agkayo ontatakot. Mandeen tan imatonan so panangiliktar nen Jehova, a gawaen to natan ed sikayo. Ta saray Ehipsios a nanengneng yo natan et agyo lara nanengneng lamet, andi, andi lan balot. Si Jehova so mibakal naani ed biang yo, tan agkayo labat oneseesel.’” Makapakelaw, binelsay nen Jehova so danudanum. Saray Israelitas so sinmelak ed amagan dalin. Insan say danum so pinmawil lamet. Say armada nen Paraon so apunas. Atan a matakot-ed-Dios a nasyon so inliktar nen Jehova, bangta inukom to so managmodmora-ed-Dios ya Ehipto. Ontan met natan, say katooran to so ipanengneng to diad pangiliktar ed matakot-ed-Dios iran Tasi to manlapud mundo nen Satanas.—Exodo 14:13, 14; Roma 15:4.
5, 6. Antoran ebento ed panaon nen Josue so mangipanengneng a nepeg tayon ontakot ed si Jehova imbes ed too?
5 Kayari Intainan ed Ehipto, angibaki si Moises na 12 espiya ed Insipan a Dalin. Say samplora so ataktakot diad impakanengneng ed singa-alan iran manaayam tan sinali ran dismayaen so Israel diad iloob ed dalin. Balet say duara, si Josue tan Caleb, so angibalita: “[Atan] so alay abig, maabig a tuloy a dalin. No karoyroyo itayo nen Jehova, sirin peteg ya iyakar to itayo ed sayan dalin tan iter to ed sikatayo, sakey a dalin a panagagosan na gatas tan dilo. Dapot no agkayo onsumpad si Jehova; tan sikayo, agyo takotan so totoo ed dalin, ta sikaray onkanan tinapay ed sikatayo. Say sekder da naekal ed sikara, tan si Jehova so wala ed sikatayo. Agkayo ontakot ed sikara.”—Numeros 14:7-9.
6 Anggaman ontan, saraman ya Israelitas so naplag ed takot ed too. Bilang nansumpalan, sikaray agbalot akasabi ed insipan a dalin. Balet si Josue tan Caleb, a pati say balon kailalakan na saray Israelitas, so apribelihyoan a makaloob ed atan a pinilin dalin tan mamayubo ed saray ubasan tan kakiewan na olibo to. Diad mamapatanir a paliwawa to ed asimsimpok a totoo na Israel, insimbawa nen Josue: “Takotan yo si Jehova tan lingkoran yo ed maralus tan ed katuaan.” Tan inyarum nen Josue: “No nipaakar ed siak tan say sankaabugan ko, manlingkor kami ed si Jehova.” (Josue 24:14, 15) Agaylan makapaseseg iran balikas parad saray ulo na pamilya tan ed amin a takotan si Jehova unong a manpaparaan itayon onloob ed matunong a balon mundo na Dios!
7. Panon nen David ya indanet so kaimportantian na takot ed Dios?
7 Impanengneng met na ugaw a pastol a si David so ehemplon itatakot ed si Jehova sanen inayat to si Goliat ed ngaran na Dios. (1 Samuel 17:45, 47) Sanen manpapanabos, ayarian nen David ya iyabawag: “Say espiritu nen Jehova so nansalita ed panamegley ko, tan say salita to so walad dilak. Inkuan na Dios na Israel, nansalita ed siak so Dampay na Israel, ‘Sano say manuley ed katooan et matunong, a manuley tekep na takot ed Dios, sirin sikato naani singa liwawa ed kabuasan, sano ompelnak so banwa, sakey a kabuasan ya andi lurelurem.’” (2 Samuel 23:2-4) Sayan takot ed Dios so anggapo ed limog na saray manuley ed sayan mundo, tan agaylan makadesyang so nansumpalan! Agaylan nikadkaduma sano si Jesus, “say Anak nen David,” so manguley ed dalin diad takot ed si Jehova!—Mateo 21:9.
Onkiwas diad Takot ed si Jehova
8. Akin a say Juda so inmaligwas ed uley nen Jehosapat, a mangipanengneng natan na anto?
8 Ngalngalin sanlasus taon kayari impatey nen David, si Jehosapat so nagmaliw ya ari ed Juda. Sakey lamet iyan ari a nanlingkor diad takot ed si Jehova. Impawil to so teokratikon oksuyan ed Juda, angipasen na uko-ukom ed interon dalin, tan inter to ed sikarayan bilibilin: “Agkayo mangukom nipaakar ed too noagta nipaakar ed si Jehova; et sikato so walad sikayo ed panangukom. Natan sirin say takot ed si Jehova so niwala komon ed sikayo. Manalwar tan manpeleng, lapud anggapo so ag-inkatunong o panangibiig o panangawat na pasuksok ed si Jehova a Dios tayo. . . . Saya so nepeg yon gawaen diad takot ed si Jehova tekep na katooran tan inkasigpot puso.” (2 Awaran 19:6-9) Kanian, inmaligwas so Juda lapud takot ed si Jehova, a singa say kagugunggunaan na totoo na Dios ed serbisyo na maabagey iran manangasikaso natan.
9, 10. Panon a tinmalona si Jehosapat lapud takot ed si Jehova?
9 Anggaman ontan, say Juda so walaan na kakabusol. Ginetma ran punasen so nasyon na Dios. Say atugyop iran inayuraan na Amon, Moab, tan Palandey Seir so dinmupag ed teritorya na Juda tan analagnaw ed Jerusalem. Atan so mabiskeg ya armada. Si Jehosapat so nanpikasi ed si Jehova “bangta amin na saramay walad Juda so manalalagey ed arap nen Jehova, a pati saray anak da, kaasawaan da tan anak dan lalaki.” Insan, diad ebat ed atan a pikakasi, say espiritu nen Jehova so sinmabi ed Levitan si Jahaziel, a kuanto: “Nia so kuan nen Jehova ed sikayo, ‘Agkayo ontakot o napunaw ed sayan baleg ya ulop; ta say bakal so agyo kayarian, noagta kien na Dios. Nabuas onlasor kayo a sumpad sikara. . . . Agyo nakaukolan so mibakal ed sayan bakal. Ompasen kayo, mantanyareg tan nengnengen so panangilaban nen Jehova ed sikayo. O Juda tan Jerusalem, agkayo ontakot o napunaw. Nabuas ompaway kayo a sumpad sikara, tan si Jehova so walad sikayo.’”—2 Awaran 20:5-17.
10 Kaimbuasan, saray lalaki na Juda so binmangon ya asakbay. Leleg a sikaray situtulok a pinmaway ya onabet ed kabusol, inmalagey si Jehosapat tan inkuanto: “Talineng yoak, O Juda tan sikayon manaayam ed Jerusalem! Manisia kayo ed si Jehova a Dios yo pian diad ontan niletneg kayo. Manisia kayo ed saray propeta to tan onaligwas.” Saray managkantan manmamartsa ed arapan na lalakin inayuraan so mankakanta: “Idayew si Jehova, ta say maaron-kaabigan to so andi-geter.” Imbalikas nen Jehova itan a maaron-kaabigan diad impanwetwet ed saray ulop na kakabusol a sikaray nampapateyan ed sakey tan sakey. Unong a saray lalaki na Juda so linmad panagbantayan ed kalawakan, saray bangkay lambengat na kakabusol so nansiansia.—2 Awaran 20:20-24.
11. No nipaakar ed takot, panon a saray nasyon so miduma ed totoo na Dios?
11 Sanen sayan makapakelaw a panangiliktar so nadngelan na kabangibang iran nasyon, “say takot ed Dios” so sinmabi ed sikara. Diad biek a dapag, say nasyon a tinmulok diad takot ed si Jehova natan so awalaan na “painawa ed kaliberliber.” (2 Awaran 20:29, 30) Mipadpara, sano idapo nen Jehova so panangukom ed Armagedon, saray nasyones so ontakot ed Dios tan ed Manangukom ya Anak to, si Jesu-Kristo, tan ag-ira makatalindeg ed baleg ya agew na madibinon sanok.—Apocalipsis 6:15-17.
12. Panon a say takot ed si Jehova so atumangan ed inmunan panaon?
12 Say mabunigas a takot ed si Jehova so mangitarok na mayaman iran tumang. Impanengneng nen Noe so maridios a takot tan angipaalagey na biung parad kiliktar na sankaabungan to. (Hebreos 11:7) Tan singa ed inmunan siglon Kristianos, nikurit a, kayari na peryodo na panamasegsegang, say kongregasyon so “linmoob ed panaon na deen, a napapabiskeg; tan legan a manakar ed takot ed si Jehova tan ed ligliwa na masanton espiritu et nantultuloy a dinmaak—a singa nagkalalon nagagawa ed Mamabukig a Europa natan.—Gawa 9:31.
Arowen so Maong, Gulaen so Mauges
13. Panon lambengat so pakasagmak tayo ed panamendisyon nen Jehova?
13 Si Jehova so sigpot a maong. Kanian, “say takot ed Jehova et kabaliksan to so panggula ed mauges.” (Uliran 8:13) Nipaakar ed si Jesus et nisulat: “Inarom so inkatunong, tan ginulam so kaugsan. Kanian say Dios, a Dios mo, nilanaan toka na larak na gayaga.” (Hebreos 1:9) Singa si Jesus, no pilalek tayo so bendisyon nen Jehova, nepeg tayon dimlaen so kaugsan, imoralidad, karamsakan, tan say inkaagum ed mapangtan mundo nen Satanas. (Ipareng so Uliran 6:16-19.) Nepeg tayon arowen so inaro nen Jehova tan gulaen so kagula to. Nepeg tayo so ontakot a manggawa na antokaman a mamaermen ed si Jehova. “Lapud takot ed Jehova say sakey so onarawi ed mauges.”—Uliran 16:6.
14. Panon so impangitarya nen Jesus ed sikatayo na pangaligan?
14 Intilak nen Jesus so pangaligan pian nepeg tayon tumboken a maapit iray bakat to. “Sanen naayew, sikatoy agbinmales ya angayew. Sanen maniirap, sikatoy agnaningongot, noagta inmatalek to so inkasikato ed samay sakey a mangukom ed inkatunong.” (1 Pedro 2:21-23) Diad takot ed si Jehova, nayarian tayo met a sungdoan iray panagbalaw, panagmodmora, panamasegsegang, ya ipaarap nen Satanas ed sikatayo.
15. Akin a nepeg tayon takotan si Jehova imbes a saramay mamatey na laman?
15 Diad Mateo 10:28, insimbawa nen Jesus: “Agyo takotan iramay mamatey na laman balet agda nayarian a pateyen so kamarerwa; takotan yo ingen imay makayarin mamatey na kamarerwa tan laman ed Gehenna.” Anggaman say sakey ya ontatakot ed si Jehova so pateyen na kabusol, say basig na patey so temporaryo lambengat. (Oseas 13:14) Diad kikioli, nayarian na atan a sakey ya ibaga: “Patey, iner so kawalaan na impanalom? Patey, iner so kawalaan na otot mo?”—1 Corinto 15:55.
16. Panon nen Jesus ya impanengneng so takot ed si Jehova tan impangigloria ed sikato?
16 Intarya nen Jesus a mismo so malinew ya ehemplo parad amin a manangaro ed inkatunong nen Jehova tan manggula ed mauges. Say takot to ed si Jehova so nipatnag ed unor iran balikas to ed saray babangatan to, a naromog ed Juan 16:33: “Sarayan bengatla so inkuan ko ed sikayo a diad panamegley ko et nawalaan kayo na kareenan. Dia ed mundo walaan kayo na kairapan, balet manpakpel! Tinalok so mundo.” Intuloy na salaysay nen Juan: “Sinalita nen Jesus irayan bengatla, tan, intangay toray mata to ed tawen, inkuanto: ‘Ama, say oras onsabi; igloriam so anak mo, pian say anak igloria toka . . . Impakabat ko so ngaran mo ed saray totoo ya inter mo ed siak manlapud mundo.’”—Juan 17:1-6.
Takotan si Jehova tan Sikato so Dayewen
17. Diad antoran dalan a naalig tayo so ehemplo nen Jesus?
17 Kasin naalig tayo natan so makpel ya ehemplo nen Jesus? Peteg a nagawaan tayo diad takot ed si Jehova! Impakabat nen Jesus ed sikatayo so matalonggaring a ngaran tan kalidades nen Jehova. Diad itakot ed si Jehova bilang Soberanon Katawan tayo, sikato so itatandoro tayo ed labas na amin a dirios, a pati say bugkalot, mistikon Trinidad na Kakristianoan. Nilingkoran nen Jesus si Jehova a tekep na mabunigas a takot, ya ag-inmabuloy a napelag ed patit na takot ed ompatey a too. “Diad saraman ya agew a sikato so silalaman angibagat si Kristo na saray pikakasi tan pikekerew a tekep na mabiskeg a tagleey tan saray lua, ed samay Sakey a makapangilaban ed sikato ed patey, tan sikato so paborablen tinalineng lapud maridios a takot to.” Singa si Jesus, takotan tayo met si Jehova unong a mantultuloy itayon manaral na katutulok ed saray bengatlan itepel tayo—tekep lawas na andi-anggaan a kilalaban bilang kalat tayo.—Hebreos 5:7-9.
18. Panon tayon nisaklang so sagradon lingkor ed si Jehova a tekep na maridios a takot?
18 Diad saginonor a sulat to ed saray Hebreon Kristianos, pinaseseg nen Pablo iray alanaan a Kristianos: “Lapud nanenengneng tayo so pangawat ed panarian ya agnatenyeg, mantultuloy itayo komon a nawalaan na agkanepegan a panangasi, a diad panamegley to mangisaklang itayo na sagradon serbisyo ed Dios tekep na maridios a takot tan galang.” Natan, mibibiang so “baleg ya ulop” ed atan a sagradon lingkor. Tan anto so tugyopen na saya? Kayari impaningbat ed agkanepegan a panangasi nen Jehova diad impangitarya to na dondon na Anak To, si Jesu-Kristo, ibabaga nen Pablo: “Diad panamegley to lawas mangiyapay itayo na bagat na panangidayew ed Dios, salanti, say bunga na saray bibil a mapublikon mangiyabawag ed ngaran to.” (Hebreos 12:28; 13:12, 15) Diad panamabli ed agkanepegan a panangasi nen Jehova, nepeg a kaliktan tayon ideboto so amin a posiblen oras ed sagradon lingkor to. Bilang matoor iran kakaiba na nakdaan ya alanaan a Kristianos, say baleg ya ulop natan so manusumpal ed baleg a kabiangan na atan a panaglingkor. Saraya so mangawat na kilalaban ed Dios tan Kristo, unong a sikaray piguratibon akaalagey ed arap na trono na Dios, “a mangisasaklang ed sikato na sagradon lingkor ed agew tan labi.”—Apocalipsis 7:9, 10, 15.
Igloria si Jehova ed Ando lan Ando
19, 20. Anton duaran nengneng na takot so ompatnag ed “agew nen Jehova”?
19 Maples ya onsasabi so maglorian agew na kialangon nen Jehova! “‘Nia! say agew onsabi a mamool a singa apuy na palbaan, tan amin a mapangta tan managgaway karelmengan so singa dayami. Tan say agew ya onsabi poolan tora naani,’ kuan nen Jehova na saray ejercito.” Atan a makadesyang a panaon et “say baleg tan makapataktakot ya agew nen Jehova.” (Malaquias 4:1, 5) “Manalagnaw” itan ed kapusoan na marelmeng, tan sikaray “agbalot makaliktar.”—Jeremias 8:15; 1 Tesalonica 5:3.
20 Anggaman ontan, saray totoo nen Jehova so abayuboan na duman nengneng na takot. Say anghel ya angipiaan na “andi-anggaan a maong a balita” so angiganggan ed sikara ed maksil a boses, ya angikuan: “Takotan so Dios tan iter ed sikato so gloria, lapud say oras na panangukom to so sinmabi la.” (Apocalipsis 14:6, 7) Diad atan a panangukom et ontalindeg itayo ed kagalangan unong a say mansastit a petang na Armagedon so mamool ed mundo nen Satanas. Komon ta say mabunigas a takot ed si Jehova so agnabural a nisulat ed kapusoan tayo. Komon ta mapabor a naromog tayo so inkasikatayo ed limog na ‘saray nilaban a tinmawag ed ngaran nen Jehova’!—Joel 2:31, 32; Roma 10:13.
21. Say takot ed si Jehova so mangitonton ed antoran bendisyon?
21 Ontumbok so makapakelaw iran bendisyon, tekep na “taotaon na bilay” ya onnatnat ed andi-anggaan! (Uliran 9:11; Salmo 37:9-11, 29) Sirin, balanglan say ilalo tayo et say panawir na Panarian o manlingkor ed silong to diad dalin, komon ta mantultuloy itayo natan a mangisaklang na sagradon lingkor a tekep na takot tan galang. Itultuloy tayon igloria so masanton ngaran to. Tan anton maabig a pansumpalan? Say ando lan andon pisasalamat diad impangipapuso tayo ed makabat a simbawa a lawas takotan si Jehova!
Panon so Pangebat Yo?
◻ Anto so kabaliksan na “takot ed si Jehova”?
◻ Panon a say takot ed Dios so angungguna ed kadaanan a totoo to?
◻ Anton pangaligan ed maridios a takot so intilak nen Jesus ed sikatayo?
◻ Panon tayon napansiansia so katooran tayo diad takot ed si Jehova?
[Litrato ed pahina 8]
Diad libro na Apocalipsis, saray agagi nen Jesus so nanengneng a mankakanta ed “kanta nen Moises,” sakey a kantan panangidayew ed si Jehova
[Litrato ed pahina 10]
Analo so armada nen Jehosapat lapud takot ed si Jehova
[Litrato ed pahina 13]
Saray taon na bilay ya onnatnat ed andi-anggaan so tumang ed saramay ontakot ed si Jehova