“Pananap na Pakainawaan ed Saray Kamarerwa Yo”
“Dago kayo ed siak, amin yon nasasagpotan tan nabebelatan, . . . tan makaromog kayo na pakainawaan ed saray kamarerwa yo. Ta say pakok so mapangasi tan say awit ko so anlemew.”—MATEO 11:28-30.
1, 2. Anto so kipapasen na atooan a pamilya ed saray siglo, tan panon a saya so miduma ed saman so orihinal a gagala na Dios?
“AMTA tayo ya amin a palsa so mantutultuloy a maningel tan manpapautot ya anggad natan.” Ontan so insulat na sakey a laki ed saray kakaaro ed Roma diad apalabas laran siglos. (Roma 8:22) Diad saray taon nanlapulad saman, say paningel tan pampapautot na atooan a pamilya bilang intero so pinmalalo. Say panagbusol, kairapan, krimen, tan eras so mamapatey ed amin a pasen. Say pikelkel a sistema na ekonomya so mamapaskar ed saray nilaksalaksa a naandian na trabaho tan anggan napapataynan ed saray kaabungan da, tan saray satanikon impluensya so manederal ed sagpot diad pamabaleg ed saray anak ed dalan a nepeg dan laen.
2 Balet anganko ta say sankabalgan a trahedyan nagawa et sano say sakit, beblay, odino inkatatken so mamakapuy ed saray totoo ed biskeg dan manamsam ed dignidad da legan a sikara so onkupas ed saray baley ed datin inkasikara. Say teriblen ot-ot tan panirap, mabetbet a mantultuloy ed pigaran simba, bulabulan, tan no maminsan et taotaon, so mamautot ed saray puso tan mamaagus ed saray ilog na lua. Agaylan makapaermen a komentaryo ed bilay! Nipaakar ed kurang na too, imbaga na sakey a makabat ya ari nensaman: “Amin na saray agew na bilay to so mansumpal ya ot-ot tan gonigon.” (Eclesiates 2:23; 4:1) Peteg a say bilay natan so aliwan unong ed orihinal a ginagala na Dios!—Genesis 2:8, 9.
3. Anton ilalo so amalsaan na Dios ed too, tan panon a satan so peles a namomoria ed limitadon kalaknab?
3 Pinalsa nen Jehova a Dios so too ya ayadyari, tekep na pakayarin peteg a manggayaga ed bilay. (Deuteronomio 32:4, 5) Isipen pa lambengat so liket diad pakananam ed marakep a tagano, pakalinawa ed malinis a dagem, odino pakanengneng ed agaylan santing ya iseselek na agew! “Anengneng ko so kimey ya inter na Dios ed saray anak na totoo a gawaen,” so kuan na parehon makabat ya ari nensaman. “Amin a bengatla so ginawa ton marakep ed dilin panaon to. . . . Akabatan ko ya anggapo so bengatlan magmaong ed sikara nen say panliket tan panggawa na maong kaleganan na bilay na sakey; tan ontan met a kada too so nepeg a mangan tan peteg ya oninum tan makanengneng na maong ed amin ya impasyan kimey to. Satan so langkap na Dios.”—Eclesiastes 3:10-13.
4. (a) A singa indemostra na saray eksperiensia nen Jesus, anto so maermen a kipapasen na dakel a tuloy natan? (b) Anton makapaligsay-puson imbitasyon so innatnat nen Jesus, tan antoran tepet so palesaen na saya?
4 Ingen, agaylan pigpigara so makayarin manggayaga ed maabig iran bengatla a ginagala na Dios ed sikatayo! Sikakabat si Jesu-Kristo ed makapasinagem, pakaskasin kipapasen na katooan. “Saray baleg ya ulop so inmasingger ed sikato,” kuan na Biblia, “ya intarok daray totoon piley, pukol, bulag, umel, tan dakel niran arum, tan sikara so inggaton da ed saray salian to.” Agaylan inabagey nen Jesus so ontan iran pakaskasin totoo! (Mateo 9:36; 15:30) Diad sakey ya inkagawa, ninatnat to so makapaligsay-puson imbitasyon: “Dago kayo ed siak, amin yon nasasagpotan tan nabebelatan, tan painawaen takayo. Alaen yo so pakok tan manaral kayo ed siak, lapud siak so mauyamo tan mapaabeba ed puso, tan makaromog kayo na pakainawaan ed saray kamarerwa yo.” (Mateo 11:28, 29) Segurado, saraya so makapaligay-ilalon salsalita! Balet anton pakainawaan so totongtongen nen Jesus? Tan panon so pakaromog tayo ed satan?
Say Katuaan a Makapainawa
5. Panon so impangituro nen Jesus na dalan ed tuan kawayangan tan pakainawaan ed kamarerwa tayo?
5 Sanen si Jesus so inmatendi ed Piesta na Tabernakulo ed ngalngalin anem bulan sakbay na impatey to, inturo to so dalan ed pagmaliw a bulos tan sirin mangawat na tuan pakainawaan. Mansasalita ed saraman so angiteen na pananisia ed sikato, inkuanto: “No sikayo so mansiansia ed salitak, sikayo so peteg a babangatan ko, tan naamtaan yo so katuaan, tan say katuaan so mangibulos ed sikayo.” (Juan 8:31, 32) Anton katuaan so totongtongen nen Jesus? Manlapud anto a sikatayo so ibulos to? Diad anton dalan a saray dumerengel to so ariripen?
6. (a) Anton isusuppiat so pinalesa na saray relihyoson sumusumpa, tan akin? (b) Diad anton dalan a sikatayon amin so ariripen?
6 Si Jesus so binara na saray relihyoson sumusumpa, a kuan da: “Sikami so kapolian nen Abraham tan agkamin balot nagmaliw ya ariripen ed siopaman. Panon ya ibagam, ‘Sikayo so magmaliw a bulos’?” Saraman a Judion sumusumpa so mankinon ed tawir da. Anggaman say nasyon so mabetbet a nisilong ed pananguley na arum a bansa, agnilabay na saray Judios so katawag na ariripen. Balet impanengneng nen Jesus ed no anton dalan a sikara so ariripen, kuanto: “Tuan peteg ya ibagak ed sikayo, Balang sakey a managgawa na kasalanan so sakey ya aripen na kasalanan.” On, amin na saray dumerengel to so ‘managgawa na kasalanan,’ a singa ed amin tayo natan. Saya so lapud amin tayo so akatawir na kasalanan a manlapud orihinal ya atateng. Balet insipan nen Jesus: “No sikayo so ibulos na Anak, sikayo a peteg so bulos.”—Juan 8:33-36; Roma 5:12.
7. Panon so nayarin pakamoria ed tuan kawayangan, tan anto so katuaan a mangibulos ed sikatayo?
7 Say tuan kawayangan so namoria lambengat sirin diad panamegley na Anak na Dios, si Jesu-Kristo, ya angiter ed ayadyarin atooan a bilay to bilang sakey a dondon bagat. Sikatoyan bagat so mangibulos ed sikatayo a manlapud makapatey a kasalanan tan gawaen ton posible ed sikatayo so panaggayaga ed andi-anggaan a bilay diad ayadyarin bunigas tan liket diad matunong a balon mundo na Dios. (Juan 3:16; 1 Juan 4:10) Sirin, say katuaan a mangibulos ed sikatayo et say katuaan nipaakar ed si Jesu-Kristo tan say betang to diad kasumpalan na saray gagala na Dios. Say Panarian, dingan nen Kristo bilang Ari, so manumpal ed linawa na Dios a para ed dalin tan si Jesus so nantultuloy ya angitarok na pantasi nipaakar ed sayan katuaan.—Juan 18:37.
No Panon a Say Katuaan So Makapainawa
8. Panon so kiilustra na dalan na pangitarya na katuaan ed pakainawaan?
8 Say dalan a say katuaan so mangiter na pakainawaan so nayarin iyilustra na sakey a biin nibaga ed sikato a sikato so walaan na maples ya onkakamayat a porma na kanser. Say pakabelatan ed ontan a pikakabat so mamasinagem ed sikato legan ya imanoen so ot-ot, makadesyang iran pansumpalan. Saginonor, anggaman kuan, sikato so nankonsulta ed sananey a doktor tan dinmalan ed malaknab nin inkausisa. Sanen saray resulta na impangusisa so mangiparungtal a balanglan say inmunan impanrekonisi so lingo odino sikato so makapakelaw ya onaabig, naisip yo so makapakelaw a liknaan na pakainawaan a naeksperiensia to. Agaylan makapainawa ed kamarerwa to!
9. Panon so impangiter nen Jesus na pakainawaan diad impangibangat ed totoo na katuaan?
9 Miulibay, sanen si Jesus so linma ed dalin, saray totoo so nabebelatan diad maapan sistema na tradisyon ed saman ya agew. Diad saray eskribas tan Pariseos so responsable, inkuan nen Jesus: “Sikara so mamerber na ambebelat ya awit tan saratan so impasakbat da ed abala na saray totoo, balet ta sikaran mismo so agmalabay a galawen ed tamuro ra.” (Mateo 23:4; Marcos 7:2-5) Agaylan saman so pakainawaan sanen intarya nen Jesus ed totoo so katuaan ya angibulos ed sikara a manlapud ontan iran manangaripen a tradisyon! (Mateo 15:1-9) Aliwan duma natan.
10. Anton manamaandi-na-gayaga ran awit so sasakbaten na dakel, tan panon so nayarin liknaan na sakey a too sano saraya so naekal bilang pansumpalan na impakaaral to na katuaan?
10 Anganko ta sakey kayo, lapud ambelat ya aawiten ed saray palson relihyoson bangabangat, so nambilay diad takot ed panagmak na irap ed impiernon-apuy odino ed purgatoryo kayari na ipatey. Odino sano inatey so sakey ya inad-aro, nayarin sikayo so napaermen sano imbaga ed sikayo na klero a say Dios so angala ed inararo yon anak lapud nakaukolan To so sananey ya anghel—a singano say Dios et nakaukolan to so anak yo nen say pankaukolan yo. No maminsan et ibabaga met na saray klero ed totoon manasagmak na bengatlan beblay a saya kono so sakey ya ayew a nanlapud Dios. Agta peteg a makapainawa so pakaaral ed saray katuaan na Biblia a mamalemew ed too ed ontan a pakabelatan ed saray relihyoson katilaan? Agaylan liknaan na pakainawa so itarok na saya!—Eclesiastes 9:5, 10; Ezequiel 18:4; Juan 9:2, 3.
11. (a) Anto so sakey a sankabalgan a pakabelatan, tan panon so nayarin kaekal na satan? (b) Anton pakainawaan so intarok nen Jesus ed saray makasalanan sanen sikato so wadia ed dalin?
11 Sakey ed saray sankabalgan a pakabelatan ya awiten et say gonigon nisesengeg ed saray kasalanan ya agawaan tayo. Pakainawaan so pakaamta a lapud merito na dondon bagat nen Kristo, sarayan kasalanan so nayarin napunas. ‘Say dala nen Jesus so manlinis ed sikatayo manlapud amin a kasalanan,’ so ipapaseguro na Biblia ed sikatayo. (1 Juan 1:7) Anggaman antoran teriblen bengatla a nayarin agawaan tayo, no sikatayo so peteg a nagbabawi tan pinetek tayoray dalan tayo, napanggayagaan tayo so makarepreskon inawa ed sakey a malinis a konsiensia tan say paseguro ya agla nonoten na Dios iray kasalanan tayo. (Salmo 103:8-14; 1 Corinto 6:9-11; Hebreos 10:21, 22) Agaylan pakainawaan so intarok nen Kristo ed saraman so nabebelatan ed kasalanan, a singa saray balangkantis tan saray managsingil na buis a singa si Zakeo! Sikara so niligliwa nen Jesus diad saray katuaan na Biblia legan a sikato so akipangan ed sikara.—Lucas 5:27-32; 7:36-50; 19:1-10.
12. (a) Diad saray totoon wala ed anton makapagonigon iran kipapasen so angitarokan nen Jesus na pakainawaan? (b) Nen inmunan siglo, diad siopa so angidemostraan nen Jesus ed makapakelaw a dalan a sikato so “dalan tan say katuaan tan say bilay”?
12 Dakel nin arum a totoo so manasakbat ed makapabelat ya awit na sakit tan beblay, mabiskeg a gonigon, tan say abalbaleg ya ermen ya onsabi diad ipatey na sakey ya inad-aro. Si Jesus, anggaman kuan, so angitarok na pakainawaan ed amin na saray ontan a “nasasagpotan tan nabebeblatan.” (Mateo 4:24; 11:28, 29) Pinaabig to so sakey a biin agtinmalona diad impananap na tulong a manlapud saray doktores ed loob na 18 taon. Tinambal met nen Jesus so sakey a lakin mansasakit ed loob na 38 taon tan sananey ya inyanak a bulag. Kasin naisip yo so impakainawaan da sanen sikara so tinambal nen Jesus? (Lucas 13:10-17; Juan 5:5-9; 9:1-7) Say katuaan ya amin na saraman so dinmago ed si Jesus ed pananisia so dinmago ed subol na katuaan, puron pakainawaan, tan bilay. Diad samay balon angawat lamet ed alenleneg ya anak ton laki a manlapud patey tan saray atateng a say inatey ya anak dan biin manedad na 12-taon so pinmawil ed sikara a mabilay, peteg a pinaneknekan nen Jesus ed makapakelkelaw a dalan a sikato so “dalan tan say katuaan tan say bilay.”—Juan 14:6; 17:3; Lucas 7:11-17; 8:49-56.
13. Diad siopa so imbangat nen Jesus ed sikatayo ya asinggeran ed tulong, tan anto so nagawa sano sayan simbawa so iyaplika tayo?
13 Anggapoy duaruwan walaray panaon a sikayo so nidunget ed saray problema a babaleg nen say nayarian yon piarapan a personal. Sikatayo so imbangat nen Jesus ya onapireng ed si Jehova ya onkerew na tulong, unong a singa ginawa to. (Lucas 22:41-44; Hebreos 5:7) Sano sikatayo so maparanay ya onasingger ed Dios diad pikakasi, nalikna tayoray liknaan na salmista ya angisulat: “Bendito si Jehova, ya inagew-agew a manasakbat ed awit tayo, say tuan Dios na kilalaban tayo.” (Salmo 55:22; 68:19) On, say pikabat ed katuaan so peteg a mangitarok na pakainawaan. Sikatayo so iyasingger ton maapit ed si Jehova tan tulongan to itayon mangapresya a diad tulong to et posibli so pakaarap ed anggan saray sankairapan a kipapasen ed bilay a matalona.
Nainawaan diad Ilalo ed Panarian
14. Anto so amabiskeg ed si Jesus diad saray subsubok to, tan anto so makana pian sikatayo so makaromog na pakainawaan ed saray kamarerwa tayo?
14 Pian makaromog na tuan pakainawaan ed saray kamarerwa tayo, nepeg a nawalaan itayo na mabiskeg ya ilalo. Satan so ilalon amabiskeg ed si Jesus. Ibabaga na Biblia: “Lapud gayagan niiyan ed arap to et sinungdoan to so panamairapan a kiew, a minudmora to so baing, tan nanyurong ed nikawanan ed trono na Dios.” (Hebreos 12:2) Say magayagan ilalo ya amabiskeg ed si Jesus et say panamasantos ed ngaran nen Ama to diad panamegley na panamemben na katooran, tan ontan met ed impamaneknek ton makana diad panuley bilang Ari ed Panarian na Dios. Say pamasiansian malinew diad pakanengneng ed ilalo tayo, balanglan sakey a kaiban-manuley nen Kristo ed tawen odino bilang sakey ed saray uuleyan to a manbilay ed Paraison dalin, so mamabiskeg met ed sikatayo diad serbisyo ed Dios. Peteg, satan ya ilalo so makanakana diad pakaromog na pakainawaan ed saray kamarerwa tayo.—Roma 12:12.
15. Antoray arapen tayo ed bilay no anggapo so ilalo ed Panarian?
15 Isipen iray arapen tayo ed bilay ya anggapo so ilalo ed Panarian. Say tipikon natnat na bilay so 70 lambengat odino nayarin 80 taon. Tan saratan ya agew so onlabas a maples, a singa ibaga ed sikayo na siopaman ya ontatatken! On, say Biblia so simamatuan mangibabaga ed bilay: “Sikato so maples ya onlabas, tan sikatayo so ontekkiab ed arawi.” (Salmo 90:10) Ingen, labay tayon saray agew tayo so mantultuloy. Labay tayo so manbilay. Wala so daakan a gawaen tan panggayagaan.
16. Pian makaromog na pakainawaan ed saray kamarerwa tayo, anto so nakaukolan tayon gawaen?
16 Agaylan makanakana, sirin, a sikatayo so ondago ed pananisia ed si “Kristo Jesus, ya ilalo tayo”! (1 Timoteo 1:1) A singa inkuanto: “Saya so linawa nen Amak, a siopaman a makanengneng ed Anak tan mangagamil na pananisia ed sikato so nawalaan na andi-anggaan a bilay.” (Juan 6:40, 51) Kasin satan so sisisiaen tayo? Pian makaromog na pakainawaan ed saray kamarerwa tayo, sigpot a nakaukolan tayo. Agtayo nagawaan no satan so anggapo. Peteg, nepeg ya isulong tayo “a bilang takuko so ilalo ed kilalaban.” (1 Tesalonica 5:8; ipareng so Hebreos 6:19.) Satan ya ilalo so nepeg a manbantay ed kanonotan tayo, kaisipan tayo. Tano andi, sikatayo so nabelatan ed saray awit tan gonigon a sikatayo so onsuko tan nabalang ed andi-anggaan a bilay. Ta pian napanggayagaan so pakainawaan ed kamarerwa yo, sirin, seguroen a pantultuloyen yon mabiskeg so ilalo yo ed Panarian.
Pakainawaan a Manlapud Panaggawa ed Kimey na Dios
17. (a) Pian nagungguna so pakainawaan, anto so nakaukolan, tan akin a saya so aliwan alablabas ed sikatayo? (b) Anto so lalanoren na pangawat ed pako nen Kristo?
17 Balet pian nagegemtan so pakainawaan, nagkalalo ni so nakaukolan nen say basta iyasingger ed si Jesus. Inyarum to: “Alaen yo so pakok [odino, “Onsilong ed pakok”] tan manaral kayo ed siak, lapud siak so mauyamo tan mapaabeba ed puso tan makaromog kayo na pakainawaan ed saray kamarerwa yo. Ta say pakok so mapangasi tan say awit ko so anlemew.” (Mateo 11:29, 30, New World Translation Reference Bible, paimanod-leksab) Say panakbat ed sakey a pako et tutukoyen to so kimey. Balet imanoen ya agkekerewen nen Jesus ed sikatayo so pangipasakbat na pako ed inkasikatayo tan gawaen so amin a kimey a bukbukor. Sikatayo so onsilong ed pako to. Diad sayan kipapasen, say pangawat ed pako ya iyoopresi nen Jesus et lalanoren to so panaggawa na dedikasyon ed Dios, a saya so isimbolo ed panamegley na bautismo ed danum tan insan sakbaten so responsabilidad ed pagmaliw a babangatan nen Kristo. Balet panon a say ontan a pako na inkadisipulo so mangitarok na pakainawaan?
18. (a) Akin a say pangawat ed pako nen Krsito so mangitarok na pakainawaan? (b) Panon a say kimey a panagpulong so mangitarok na gayaga tan pakainawaan?
18 Say pangawat ed pako nen Jesus so mangitarok na pakainawaan lapud si Jesus so mauyamo tan mapaabeba ed puso. Lapud sikato so aliwan agmakatunongan, makarepresko so pikimey ed sikato ed leksab na parehon pako. Saray limitasyon tayo tan kaleteyan so konsideraen to. A singa inkuanto, “say pakok so mapangasi.” Tua, say pako na inkadisipulo et lalanoren to so kimey, Say parehon kimey na panagpulong tan panagbangat a ginawa nen Jesus tan satan so angipasalan to ed saray inmunan patumbok to. (Mateo 28:19, 20; Gawa 1:8) Ingen, agaylan makarepreskon kimey so pangibaga ed arum nipaakar ed maaron Dios tayo, Anak to, tan say Panarian! Agaylan makarepresko so pangibaga ed saray totoo no panon a nayarian da so manbilay na ando lan ando ed Paraiso! Tan sano sikara so onkiwas ed manangiter-bilay a mensahe na Panarian tan miulop ed sikatayo diad panaglingkor ed si Jehova a Dios, agaylan baleg so gayaga tayo!—1 Timoteo 4:16.
19. Akin a say simbawa na katulangan-a-laki nen Moises so makanakana ed saray matatatken na kongregasyon natan?
19 Diad agano niran taon, nilaksalaksa so kinmamang ed organisasyon nen Jehova a mankaukolan na tulong diad pangawat ed pako nen Kristo, tan saya so mamarakel na aawiten a kimey na saray manangiyabawag ed Panarian tan saraman so mangipapastol ed sikara. Para ed ontan ya espiritual a managpastol, sakey a simbawa ya inawat nen propeta Moises a manlapud katulangan-ton-laki so makanakana. Sayan simbawa so inter to ed si Moises: “Aliwan maabig so nengneng na gagawaen mo. Sika a peteg so onkapuy, namparan sika tan sayan katooan a wala ed sika, lapud sayan kimey so abalbaleg a tuloy ya awit ed sika. Satan so agmo nayarian a gawaen ed inkasika.” Kanian sinimbawa to si Moises a mamili na arum iran makayarin lalaki a misakbatan ed kimey na panagpastol ed totoo. Say impanumbok ed sayan simbawa so nansumpal a maaligwas. (Exodo 18:17-27) Natan, say mantultuloy a panangipasal so mamawala na dakel iran makayarin lalaki, “langkap ed lalaki,” a makayarin mibiang diad panangipastol ed pulok ta pian saray mamatatken ed kongregasyon so ag-onkapuy.—Efeso 4:8, 16.
20. Anto so kakaukolan nen Jesu-Kristo tan si Ama to ed sikatayo?
20 Angaman binilin nen Kristo iray patumbok to a mangisekar na inkasikaran mabiskeg, nisay sikato nisay Ama to so mankakaukolan na anggan siopa ed sikatayo a manggawa na alablabas nen samay makatunongan. Aminsan, sanen binalaw na arum si Maria ya agi nen Lazaro diad saray sagpot to nisesengeg ed si Jesus, sikara so binaat to, a kuanto: “Paulian yon bukor. . . . Ginawa to so nayarian to.” (Marcos 14:6-8; Lucas 13:24) Tan satan lambengat so nailaloan ed sikatayo—say panggawa ed nayarian tayo. Say ontan a Kristianon kimey so aliwan sakey a pakapabelatan noagta pakainawaan. Akin? Lapud satan so mangitarok na tuan kapenek natan tan say seguradon ilalo ed andi-anggaan iran gungguna ed arapen.
21. (a) Anto so anlemew ya awit nen Kristo, tan anto so mabetbet a manggawan mairap ed kimey na panagpulong? (b) Anto so nepeg a mabiskeg a desisyon tayo, tan tekep na anton maseguron ilalo?
21 Tua, imanoen nen Satanas a sikatayo so napasegsegang, anggan singa say asagmak na kapakoan tayo, si Jesu-Kristo. (Juan 15:20; 2 Timoteo 3:12) Balet nonoten ya aliwan say anlemew ya awit nen Kristo so makapabelat. Imbes, say isusumpa nen Satanas tan saray ahentes to so mabetbet a manggawa ed kimey tayo a mairap. Say awit nen Kristo so manutugyop lambengat na pambilay a tukoy ed nakakaukolan na Dios, tan saraya so aliwan makapabelat. (1 Juan 5:3) Komon ta sikatayo, sirin, so mantultuloy a mansiansia ed silong na pako nen Jesu-Kristo a kaiba to, ya isekar tayo so inkasikatayo diad kimey na panagpulong tan panagbangat, unong a singa ginawa to. Diad panggawa na ontan et sikatayo so, a singa insipan to, ‘makaromog na pakainawaan na saray kamarerwa tayo.’
Panon So Iyebat Yo?
◻ Unong ed Roma 8:22, anto so kipapasen na katooan?
◻ Diad antoran dalan a say pikakabat ed katuaan so mangitarok na pakainawaan?
◻ Akin a say ilalo ed Panarian so makarepreskon tuloy?
◻ Anto so pako nen Jesus, tan akin a satan so mapangasi?
◻ Say panakbat ed anton awit so mangitarok ed sikatayo na pakainawaan?