Sankagloboan a panangipalapag ed Maong a Balita
MANUULEY so Panarian na Dios! Saya so sankaabigan a balita. Satan no akin a nen 1989 et masulok a 3,500,000 Tastasi nen Jehova ed sankamundoan so entusiastikon mangiyaabawag ed “maong a balita” ya impropesiya nen Jesus tan “saray maliket a balita” ya inyabawag na anghel ed pasingawey nen Juan. (Mateo 24:14; Apocalipsis 14:6) A singa imbaga nen apostol Pablo: “Diad amin a dalin et say tanol da so pinmaway, tan saray balikas da ed saray kasampotan na panaayaman a dalin.” (Roma 10:18) Tan saray sinansakey ed amin a nasyon tan tribu tan pansasalita tan totoo so maliket a kinmiwas ed tawag da ya “ontakot ed Dios tan iter ed sikato so gloria.”—Apocalipsis 14:7.
Anggapo La So Paseguro ed Bilay
Sakey ya ontan et sakey a laki ed Inglatera a nambilay ed panduaruwaan a bilay. Si Ken so sakey a managlako na paseguro, tan sanen sikato so dinmalaw ed sakey a pamilya na sakey ed saray Tasi nen Jehova, sikato so tinepetan da: “Kasin labay mo so manbilay ed sakey a mundon agnakaukolan so paseguro ed bilay?” Anto so labay dan ibaga? Ya unong ed Biblia, diad silong na Panarian na Dios et dakel iran bengatla a manggawa ed bilay a panduaruwaan natan, a pati say sakit tan patey, so naandi la.
Kasin say ontan a bengatla so posibli? On, satan so insipan na Dios a mismo. Alimbawa, ibabaga na Biblia: “Say Dios a mismo so wala ed sikara [katooan]. Tan punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so linmabas la.” (Apocalipsis 21:3, 4) Anto so mangitarok na ontan a pananguman? Panarian na Dios. Unong ed Salita na Dios, saya so magano lan “manmekmek tan mamaandi ed amin na sarayan [modernon-agew a mapulitikan] panpanarian, tan sikaton mismo so ontalindeg ed panaon ya andi-geter.”—Daniel 2:44.
Saray Kasulatan a singa saraya so intarok na saray Tasi nen Jehova ed imano na saray nilasus minilyon a totoo kaleganan na sankagloboan a kampanya na panagpulong da. Dakel, singa si Ken, so akamoria a saya so aliwa lambengat a kunkunwarin panag-isip. Say ebidensya so sigpot. Sarayan madibinon sipasipan so napanmatalkan tan magano lan nasumpal.
Nauman a Datak na Totontonen
Saraman so ontalineng ed saray Tasi nen Jehova legan ya iyaaniweng da so magayagan panangiyabawag na anghel so makamoria a say itatakot ed Dios tan panangiter ed sikato na gloria so manasaglawi na mas nagkalalo nen say basta panisia ed saray sipan na Biblia. Umanen to so interon indengan da tan painawaen to so dakel iran kasinageman ed bilay.
Si Rafael tan say asawa to so akaromog ed saya a tua. Sikara so nanayam ed Argentina, tan sanen sikara so nanasawa ed masulok lan 40 taon ya apalabas, ginawa ran manunan kalat da ed bilay so pankimey na impasya tan mantipon a para ed maligen ya arapen. Anggaman kuan, 21 taon ed saginonor, say walan nipanengneng da lambengat ed impasyan kimey da et sakey a melag ya ayaman a mankaukolan na mabetbet a panag-apiger. Agda alikna so kaligenan a mas nagkalalo nen say sanen sikara so inmunan nanasawa.
Insan nadngel da so maong a balita ed saray Tasi nen Jehova tan naaralan da so magmaong a nengneng na kayamanan tan magmaong a nengneng na kaligenan. Si Jesus, diad Sermon to ed Palandey, so angibaga ed saya sanen inkuanto: “Tundaan yo so mantipon ed inkasikayo na kayamanan ed dalin, ya upoten na saray bukbok tan lati, tan looban tan takewen na saray matatakew. Imbes, mantipon kayo na saray kayamanan ed tawen, ya agderalen na saray bukbok tan lati, tan aglooban tan takewen na saray matatakew.”—Mateo 6:19, 20.
Manwarin sikatayo so ag-ibabangat na Biblia ya agmagmaliw ya aliwan praktikal no nipaakar ed materyal a kayamanan, sikatayo so papasesegen ton agmangiteen na ilalo ed saratan a bengatla. (Eclesiastes 7:12) Imbes, nepeg tayon kimeyan so pakagamor ed saray espiritual a kayamanan diad panamegley na panaral ed Biblia, pangamta ed linawa na Dios, tan say panggawa ed satan a linawa so manunan bengatla ed saray bilay tayo. (Mateo 6:33) Si Rafael tan say asawa to so ginmapon nantipon ed sayan espiritual a kayamanan, tan nalikna ra la natan a sikara so tuan mayaman, aliwan lapud pinansyal a kipapasen, noagta lapud relasyon da ed Dios. (Apocalipsis 3:17, 18) Say mensahe na Panarian na Dios so sankamaongan a balita ed sikara.
Pinaelet a Panamaley
Say maong a balita so walaan na peteg a pakayarin manggawa na maong. Alimbawa, si John, a manaayam ed Inglatera, so aliwan interesado ed Biblia, balet ta interesado so asawa to tan saray anak to. Kanian ginapoan da so inmatendi ed saray miting na saray Tasi nen Jehova bangta si John so akiinuman ed saray kakaaro to. Bilang nansumpalan, sikato so nipaglet ed alablabas a panag-inum, panagsigarilyo, tan, saginonor, diad imoralidad. Kaunoran, tinaynanan to so asawa to pian miamong ed sananey a bii.
Ginmapo so kurang na pandiborsyo. Balet si John so asurprisan makanengneng ed asawa to—ya akaaral ed Kristianon kondukta a manlapud panaaral to ed maong a balita—siansian makonsidera ed sikato. Agnatalosan nen John no akin. Taloran simba sakbay a say diborsyo so pinal, say Kristianon kondukta na asawa nen John so awalaan na epekto. Imbalikas to so peteg a kaermenan to ed kondukta to, tan say oksuyan na diborsyo so pinater. Si John natan so ninmengneng ed maong a balita tan inaral to so Biblia ed saray Tasi nen Jehova. Natan et sikato met so sakey a Kristiano tan, kaiba to so asawa to, a mangibabaga ed arum na maong a balita na Panarian.
Diad sarayan agew na nagegeban totontonen na pamilya, nakaukolan na dakel so tulong ya iyopresi na niletneg-ed-Biblian maong a balita. Sakey ed saray Tasi nen Jehova ed Peru so akapiyurongan na sakey a kolonel na sundalo legan na sakey a biahe na eroplano. Sikara so nantongtong tan say kolonel so ginmapon mangibesngaw ed saray gonigon na pamilya to, a pati say katuaan a say asawa to so naadik ed druga tan dawitdawit lan sikato so ontaynan pian miamong ed sakey a lakin medyo ug-ugaw. Mataktikan impanengneng na Tasi ed sikato a say Biblia so mangiter na maong, mabiskeg a simbawa ed saray pamaakaran na pamilya tan sikato so atulongan a personal a manresolbi ed saray dilin problema na pamilya to.—Efeso 5:21–6:4.
Akisalamatan na kolonel so Tasi diad saray makaligliwan salita to tan nansuskribe ed saray magasin a Watchtower tan Awake! ta pian napalaknab to so pikakabat to ed maong a balita. Insan, sanen say Tasi so ontaynan la ed eroplano, sakey a walad kalangweran a sanasawa so nangganat ya angabut ed sikato tan kinerew da so mitongtong ed sikato. “Sikami so akayurong ed arapan mo,” kuanda, “tan nadngel mi so impitongtong mo ed samay laki. Labay mi so mansuskribe ed saratan met a magasin.” Sikara met so nanlabay a makaaral ed maong a balita a mamaaligwas ed bilay.
Nauman a Bilay
Nagkalalo ni, say niletneg-ed-Biblian maong a balita so mamasimbalo ed saray totoo. A singa imbaga nen apostol Pablo: “Say salita na Dios so mabilay tan mangisekar na biskeg.” (Hebreos 4:12) Saya so tua ed kipapasen na sakey a lakin walad kalangweran ed Macedonia, Gresya. Sikato so nikelawan a makaaral ya, unong ed Biblia, say ngaran na Dios et Jehova. Sirin kinerew to ed sakey a kaaro ya iyasingger to ed saray Tasi nen Jehova a tampol. Duaran diskusyon so niyuksoy ed saray Tasi, a kada sakey so nandukey na ngalngalin apatiran oras. Say lakin walad kalangweran so ginmapo ed maparanay a panagaral ed Biblia, say inmuna et nansumpal ya anggad alas dos na palbangon!
Manlapud saman ya inmunan impanaral, say lakin walad kalangweran so maples ya angitukoy na bilay to ed saray estandarte na Biblia. Sikato so inmatendi ed saray miting diad panagdayew a kaiba iray Tasi nen Jehova tan sinmabin angaron tuloy ed Manamalsa. Tan diad ontan et sikato so binendisyonan nen Jehova. Diad inmunan simban impanaral to ed Biblia, sikato la so nampakatli. Diad komaduan simba, tinundaan to la so onla ed saray inuman tan disco a mananap na saray makapasagyat a kakaiba. Diad komatlon simba, imbasura to la so unor a sigarilyo to. Kayari na impanaral to ed komaduan bulan, sikato so ginmapon akiulop ed saray Tasi nen Jehova diad pangibaga ed arum na maong a balita na Panarian. On, sikato so maliket a saray Tasi nen Jehova so angitarok na maong a balita diad pasen to ed dalin.
Say Maong a Balita ed Prisowan
Anggan saray rehas na prisowan so agmakasbel ed maong a balita. Diad Espanya et sakey a lakin walad kalangweran a manngaran na Jose so manseserbi na andukey a sentensya ed prisowan lapud armadon panagtakew tan arum iran kriminal a gawa. Anggaman kuan, saray Tasi nen Jehova so akayarin mangibaga ed sikato ed maong a balita, tan say mensahe na Biblia so sigpot ya amasimbalo ed indengan to. Si Jehova so ‘angiter na biskeg’ ed sikato.—Filipos 4:13.
Inkuan nen Jose a nayarin usaren to so nakekeraan ed bilay to ed sayan sistema na bengabengatla diad loob na saray rehas lapud datin kondukta to. Balet sikato so abautismoan tan sikato la natan so sakey a Kristiano. Say asawa to so suportadon mabiskeg ed sikato, tan sasalien na asawa ton iter ed walad kalangweran ya anak dan laki so Kristianon kapabaleg. Ambegya, si Jose so mangipapanabang ed maong a balita ed saray kapara ton priso, totoon mairap a sabien na saraman so manaayam ed paway na saray bakor na prisowan. Natan et say kaiba to ed selda so abautismoan met lan sakey a Kristiano.
Saraya lambengat so pigaran ehemplo a mangipanengneng ed resulta na sankagloboan a kampanya na panagpulong na saray Tasi nen Jehova. Tua, say maong a balita ya inyabawag na agnanengneng ya anghel so inyaniweng na saray Tasi nen Jehova “a bilang maliket a balita ed saraman so manaayam ed dalin, tan diad amin a nasyon tan tribu tan pansasalita tan totoo.”
Satan so sankaabigan a balita, tan satan so mogmon ilalo na katooan. Pasesegen mi kayon mangimano ed satan. Singa si Ken tan John ed Inglatera, singa si Rafael tan say asawa to ed Argentina, singa si Jose ed Espanya, tan singa saray nilibulibo nin arum, mikasakey itayo ed anghel diad pamaseseg ed amin ya “ontakot ed Dios tan iter ed sikato so gloria, lapud say oras na panangukom to so sinmabi, tan sirin dayewen so Sakey a nanggawa ed tawen tan dalin tan dayat tan saray subol na danum.”—Apocalipsis 14:7.