Totoon Walad Kalangweran a Manlilingkor ed Dios

KASIN naromog yon nikaduma a mangiter na panaon iray maabig a totoon walad kalangweran, ya anggapoy bayar, ya onla ed abung yo a mitongtong nipaakar ed Dios? Kasin makasorpresa itan, diad sayan panaon ya ondaraak ya andian a pananisia, a miulop iratan ya ananak ed saray ateng da ed pitongtong ed saray arum nipaakar ed makapakelaw iran sipan na Biblia ed sakey a maliket ya arapen?a

Diad kaslakan ed 60,000-tan-dakel iran kongregasyon na saray Tasi nen Jehova ed interon dalin, naromog yoray dakel a totoon walad kalangnweran. Ag-ira onla ed sinimban eskuelaan a Simba odino klase na katekismo. Imbes, agunggunaan irayan totoon walad kalangweran a manlapu tan anggad pibiang ed saray pantitipon ed kongregasyon. Nayarin mangiyopresi iray ugugaw ni na simple iran komento. Mibiang ed Teokratikon Eskuelaan na Ministeryo iray sakbay ed kalangweran. Mangusar iray dakel a tobonbalo ed saray bakasyon ed eskuelaan diad itulong ed saray kakaabay a manaral nipaakar ed Dios tan makapakelaw iran sipan to ed arapen.

Aliwan peteg a balo so sayan balita nipaakar ed satan a kimey na kalangweran. Ibabaga na Biblia so nipaakar ed saray matoor ya ugugaw a lalaki tan bibii, ontan met ed saray tobonbalo tan ankelag iran ugugaw, ya angipanengneng na saray nikaduman alimbawa ed panaglingkor ed Dios.

Nipasakbay ed libron Salmos na Biblia a sakey “ya ulop na ugugaw a lalaki,” so makarepresko a singa “linaew,” diad maridios a panaglingkor. Sinalita to met iray “ugugaw a lalaki” tan “birhen” a mandadayew ed ngaran na Dios. (Salmo 110:3; 148:12, 13) Anganko, walaray arum a totoon walad kalangweran so kabiangan na saraman sanen inkalbo na Dios so masanton espiritu a nanlapud tawen ed saray mananisia nen Pentecostes 33 K.P. Diad saman ya agew ngalngali 3,000 so anayakup na say Salita tan abautismoan. Inkuan nen apostol Pablo a sayan makapakelaw ya agawa so kasumpalan na propesiya nen Joel: “Saray anak yon lalaki tan bibii so manpropesiya tan saray balolaki yo so makanengneng na pasingawey tan saray mamasiken so mankugip na saray kugip.”​—Gawa 2:4-8, 16, 17, 41.

Arum iran alimbawa na totoo ed Biblia a nanlingkor ed Jehova a Dios ed kalangweran da et ilaktip di Samuel, si matunong ya Arin David, say bantog iran propeta ed Biblia a si Jeremias tan Daniel, ontan met si matoor a Timoteo. Mankarga iyan paway na taloran artikulo nipaaakar ed pigara ed sarayan alimbawa ed Biblia. Nanengneng yo ed saray artikulo no akin a saray kalangweran, ontan met ed saray totoon matatken, a seryoson manlingkor ed Dios tan akin a mangusar ira na agaylan dakel a panaon ed itulong ed saray kakaabay da a manggawa na pareho.

[Paimano ed leksab]