Tobonbalon Ariripen ed Panaon na Biblia

IBABAGA na Biblia a dakel iran maabig a totoon walad kalangweran a manlingkor ed Dios a seryoson tuloy tan abendisyonan a maong diad panggawa ed satan. Balanglan sikatayo so ugaw odino matatken tan obanan, mangitarok irayan maabig ya alimbawa ed Biblia na baleg a panamaseseg.

Si Jose so manedad na 17 lambengat sanen sikato so inlako ed inkaaripen ed Ehipto. Diman, arawi a manlapud pamilya to tan agnanegneng na saramay mankabat ed sikato, pinaneknekan nen Jose so katooran to. Sanen sinali na asawa nen Potipar a pasooten si Jose, inkuanto: “Panon so pakayarik a manggawa ed sayan baleg a kaugsan tan mankasalanan a sumpa ed Dios?” Anggan ed arap na makapanyarin Paraon, say sankabiskegan ya ari ed panaon to, angala si Jose na pankanawnawa a mangidayew ed Dios diad impangipatalos ed saray kugip nen Paraon. Sikatoy abendisyonan a maong. Sikato so inusar na Dios a mangiliktar ed nampara iran Ehipcios tan pamilya to a manlapud ipapatey nisesengeg ed eras tan pian itarok to so ama ton, si Jacob, tan kaabungan to ed Ehipto.​—Genesis 37:2; 39:7-9; 41:15, 16, 32.

Si Moises tan Arum Iran Matoor a Kalangweran

Inala na marikit nen Paraon si Moises bilang dili ton anak, ingen say ina tan ama nen Moises so akapambangat ed sikato nipaakar ed tuan Dios. Ibabaga na Biblia a sanen binmaleg, si Moises “inkaindan ton natawag ya anak na marikit nen Paraon, pipilien a nabalaw ed totoo na Dios imbes a nawalaan na temporaryon liket ed kasalanan.” Inusar na Dios si Moises a mangipaway ed totoo to ed Ehipto, pian awaten so Ganggan ed Sinai, tan mansulat ed manunan kabiangan na Biblia. Antokaman so edad yo, kasin babayoboan yo so determinasyon a manlingkor ed Dios unong a ginawa nen Moises?​—Hebreos 11:23-29; Exodo 2:1-10.

Ibabaga na saray Kasulatan ed sikatayo a “saray ankekelag” et tinmalineng a kaibaray arum na nasyon sanen binasa so Ganggan na Dios ed Israel. (Deuteronomio 31:10-13) “Amin a walaan na pakatalos ya ontalineng” so nanalagey “a manlapud kabkabuasan ya anggad pegley na agew” pian ondengel ed say Ganggan ed agew nen Nehemias. (Nehemias 8:1-8) Anggaman agnatalosan na saray ugugaw ya amin, makaapresya ra a sikaray mangaro, mandayew, tan ontolok ed si Jehova a Dios. Antokaman so edad yo, kasin tinmalineng kayo ed saray kombensyon tan asamblea no iner a say Salita na Dios so nisalaysay? Kasin naaralan yo so kaimportantian na itotolok ed sikato, a singa ginawa na saramay tobonbalon Israelitas?

Si David, Josias, tan Jeremias

Pinili na Dios si David, say sankayogtanan ed waloran sanaagi, para ed nikaduman serbisyo tan inkuan ed sikato: “Nalmoan ko si David ya anak nen Jesse, sakey a lakin amaliket ed pusok, a manggawa ed amin a bengabengatlan kaliktan ko.” Sikatoy pinili na Dios a magmaliw a “sakey a pastol” ed saray totoo to, tan ginawa nen David iman a lingkor, legan a papaneknekan to so aro ed si Jehova ed dakerakel a taon. Sikatoy nansulat na masulok nen 70 Salmos tan nagmaliw ya ateng nen Jesu-Kristo. Balanglad ugaw odino matatken, kasin apresyaen yoray dalan na Dios, tan gagawaen yo ta iray bengabengatlan kaliktan to, unong a ginawa nen David?​—Gawa 13:22; Salmo 78:70, 71; 1 Samuel 16:10, 11; Lucas 3:23, 31.

Nagmaliw ya ari si Josias sanen sikato so manedad na walora lambengat. Sanen ngalngalin 15, “legan a sikato ni so sakey ya ugaw, ginapoan ton mananap ed Dios nen David ya ateng to.” Sakbay a sikato so 20, ginapoan nen Josias so kampanya a sumpad palson panagdayew. Diad saginonor, pina-apiger to so templo, tan impawil to so dalisay a panagdayew ed dalin. Nabasa tayo: “Amin ya agew to ag-ira inmarawi a manlapud itotombok ed si Jehova a Dios na saray atateng da.” Amin tayo so agnayarin magmaliw ya ari a singa si Josias, ingen makapanlingkor tayo ed Dios tan onalagey a mabiskeg a sumpad palson panagdayew, antokaman so edad tayo.​—2 Awaran 34:3, 8, 33.

Imbaga na makapanyarin amin a Dios ed si Jeremias a: “Sakbay a titibukulen ta ka ed eges naamtaan ta ka la, tan arapen a nianak ka a manlapud eges pinasantos ta ka la. Ginawa ta kan propeta ed saray nasyones.” Sinuppiat nen Jeremias a sikatoy ugaw ni a magmaliw a sakey a propeta: “Saman la inkuan ko, O Soberanon Katawan a Jehova! Nia agko tuan kabat no panon so pansalitak, lapud ugawak ni.” Inyebat nen Jehova: “Agmo salitaen ya, ‘ugawak ni.’ Ingen ta dia ed amin ed saraman a pangibakian ko ed sika, sika so nepeg ya onla; tan ed amin a pangigangganan ko ed sika; sika so nepeg a mansalita.” Ginawa itan nen Jeremias diad masulok ya 40 taon, tan anggan sanen labay to so untonda, agto nayaryan so ontunda. Say salita na Dios so “apaneknekan a singa sakey ya apuy ya akapotan ed pukepukel [to].” Sikato so kaukolan a mansalita! Antokaman so edad yo, kasin sikayo so mamabayobo ed nengneng na pananisia a wala ed si Jeremias, onyalibansa a manlingkor ed Dios a singa ginawa to?​—Jeremias 1:4-8; 20:9.

Si Daniel, Jesus, tan Timoteo

Agyo ta nadngelan si Daniel? Sikatoy nayarin kulang a 20 sanen sikatoy intagar a kaibay arum “iran ananak” bilang kaotibo ed korte na makapanyarin Nabucodonosor, ya ari na Babilonia. Anggaman walad kalangweran si Daniel, sikato so determinadon ontolok ed Dios. Inkaindan nen Daniel tan saray kaiba to a dutakan so inkasikara ed taganon nayarin onsumlang ed Ganggan na Dios odino adutakan ed panamegley na paganon seremonya. Diad masulok a 80 taon, si Daniel so agbalot manduwaruwa, nansiansia ed katooran to ya anggad punton italirak ya ontundan manpikasi ed Dios, anggaman mansumpal iya ed pangibantak ed sikato ed saray leon. Kasin ipasen yo so panaglingkor ed Dios tan saray pikakasi yo ya ontan lan kaseryoso? Nepeg.​—Daniel 1:3, 4, 8; 6:10, 16, 22.

Nen mantaon a 12, nalmoan si Jesus a manyodyorong ed limog na saray relihyoson managbangat ed templo na Jerusalem, “ontatalineng tan ontetepet ed sikara. Ingen amin iramay ontatalineng ed si [tobonbalon Jesus] so nantultuloy a kinmelaw ed pakatalos to tan ed saray ebat to.” Kasin makapainters ed sikayo so sakey a Makasulatan a singbatan na saray mamasiken ed templo unong ya agawa to ed si Jesus? Kasin onkelaw iray arum ed pakatalos yo tan ed saray ebat yo? Natan, dakel iray tobonbalon Tastasi a manaaral, ontatalineng a maalwar, tan mibibiang ed Kristiano iran pantitipon a walaan na Makasulatan a kakabatan a manorprisa ed saray mamatatken.​—Lucas 2:42, 46, 47.

Singa kayo ta si Timoteo, ya unong ya ugaw ni et abangatan na “masanton sulsulat”? Sanen sikato so sakey a tobonbalon laki, si Timoteo “so maabig ya inreport na saray agagi” diad duaran kongregasyon. Pinili nen apostol Pablo si Timoteo a kaiba ton manbaroy, ya agmagmaliw a sakey a kargador labat, ingen pian tulongan si Pablo diad panagbangat ed arum. Kasin napili kayo ed ontan iran pribelihyo? Kasin say kimey yo “so maabig so inkareport to,” aliwa lambengat ed dilin kongregasyon yo balet ontan ed saray arum?​—2 Timoteo 3:15; Gawa 16:1-4.

Anton Nengneng na Arapen So Labay Yo?

Kasin posible ed saray tobonbalon totoo natan ya ontan lan matoor a singa si Jose, Moises, David, tan arum ni? On, nayari. Tua, dakel iran kalangweran so interesado lambengat ed pakawala na sakey a maabig a panaon. Ingen saray arum so manguusar ed panaon da a sikakabat, a kakabatey Dios tan linawa to para ed sikara. Sumpalen na saraya so propesiya na Biblia a: “Saray totoom iyapay da so inkasikaran sibubulos ed agew na militar a puersam. . . . Walaan ka na ulop na tobonbalon lalaki a singa linaew.”​—Salmo 110:3.

Mangipanengneng iratan a maabig a tobonbalon totoo na pikakabat ed katatkenan da, lapud natulongan ira na Dios ya ontalona ed kaplesan a bilay a singa met itdan ira na maglorian arapen ed onsasabin balon mundo. (1 Timoteo 4:8) Panon, anggaman, a bayoboan na sakey a modernon tobonbalo’y pananisia a singa saramay tobonbalon abitla ed Biblia? No labay yon kabaten, imbitaan mi kayo a basaen so artikulon “Maliket Iran Tobonbalo ed Serbisyo nen Jehova,” ya onggapo ed pahina 19 na sayan magasin.

[Saray litrato ed pahina 5]

Say tobonbalon Moises so ag-asagyat ed kayamanan na Ehipto

Tobonbalon si David so amaliket ed puso nen Jehova

[Saray litrato ed pahina 6]

Anggaman liknaen nen Jeremias a sikato so “ugaw ni,” sitetepel ton nanpulong ed sakey ya agkabat a mensahe

Diad manedad na 12, sinorpresa nen Jesus iray mamatatken to ed pakatalos to ed Salita na Dios

[Litrato ed pahina 7]

Diad Israel anggan saray ankekelag so tinmalineng sanen say Ganggan na Dios so binasa. Kasin ontan kayo?