Akin a Manseryoso ed Relihyon?

“AGMANBILAY so too ed tinapay lambengat.” (Mateo 4:4, The New English Bible) Sarayan maparanay-ya-inaon iran balikas so mangipatnag ed atooan a pankaukolan ya alingwanan na dakel natan. Ipapatnag da a walaan tayo na sakey ya espiritual a betang ya inkagawa a mankakaukolan na pakapenek. Sikato itan no akin a say sakey a mansasalita ed saraman a balikas, si Jesu-Kristo, so angikuan met: “Agaylan abendito iraman so mankabat ed pankaukolan da ed Dios.”​—Mateo 5:3, NEB.

Say relihyon lambengat so makapano ed sikatayo ed “pankaukolan ed Dios.” Say relihyon lambengat so makaebat ed manuna iran tepet tayo nipaakar ed lapuan, gagala, tan kabaliksay bilay. Tan say relihyon lambengat so makapangiter na peteg a kabaliksan tan gagala ed bilay tayo. Balet ag-anggan dinan a relihyon labat so makapanggawa ed sayan amin. Imbaga nen Jesus ed sakey a Samaritanan bii: “Saray tuan managdayew so mandayew ed Ama a tekep na espiritu tan katuaan.” (Juan 4:23) Say pandayew ‘a tekep na katuaan’ et mankabaliksan na mas ni nen panumbok ed abayaglan-niugali iran tradisyon tan ritual. Saraya so maparanay a mangiter na melag nen say sakey a temporaryon liknaan na kaabigan ed saray patumbok, legan a nititilak ira a naerasan ed espiritual.

Alimbawa, si Edwin O. Reischauer, datin ambasador na E.U. ed Hapon, naimano to: “Say Shinto tan Budista diad kaslakan a totoo so pamaakaran lambengat na kustombre tan naugalian nen say makabaliksan iran sisisiaen.” Ipasen ya ontan, dakel a totoon Hapon so kontento a nawalaan ed sayan dalan. Balet sakey a tugyop na “balo iran relihyon” ed Hapon so mangiretrato na ombabaleg a kadidismaya ed tradisyonal a relihyon.

Say “balo iran relihyon” so ompatnag a niteen so nonot ed karismatikon papangulo​—aliwan ed Dios. Dakel ed sarayan relihyoson papangulo so mangibabaga a walan naitdan na madibinon inkapuyan. Balet saray doktrina ra so kaslakan a laok na Budista, Shinto, tan arum a sisisiaen​—a tekep na baleg a pangyarum na pilosopya na manangiletneg. Maparanay a say pansagyat da et sipan na magmaong a panagbilay tan pangibabagan walaan na mistiko odino saray pakayari ed panagtambal. Balet kasin saray ontan a relihyon so mangiter na ebidensya a sikaray mangibabangat ed saray patumbok da a mandayew a “tekep na espiritu tan katuaan”? Dagdaiset. Sakey ed pigaran bengatla, saray relihyoson kulto so ompasen a wadia natan tan onlabas nabuas. Saray singa-moda a nengneng so mangiter na melag a katunongan ed panseryoso ed saratan.

Sakey a Relihyon a Seryosoen

Anggaman ontan, wala so sakey a relihyon, a wala lan abayag nen dinanman ya arum a porma na panagdayew. Relihyon a nibangat ed Masanton Biblia. Say Biblia so ginmapon nisulat ed apalabas lan 35 siglo, tan pigara ed ‘saray awaran’ so nipreserba ed manunaan iran kapitulon petsa to ed abenegan a masulok nen sanlibon taon ya akadkauna.a Mankarga na sankadaanan iran rekord a wala ed lapuan na relihyon. Satan lambengat so sakey a rason a mangiter ed relihyon na Biblia na seryoson panangonsidera.

Ikuan na The Encyclopedia Americana nipaakar ed Biblia: “Say inpormasyon to ‘so walan nilaknab ed mundo.’ Amoria la natan a bilang totontonen tan relihyoson kayamanan a say daakan a maong a bangat iran sipan to et lalon makana legan a say ilalo ed sibilisasyon na mundo so ondaraak.” Balet no say sakey a libro so peteg a napanisiaan a giya ed tuan relihyon, agta ilaloan yo a walaan na sankalaknaban a sirkulasyon, a naabot na amin a manaanap ed katuaan?

Ontan so kipapasen na Biblia. Satan so nipatalos ed 1,928 iran lenguahe, ed intero odino kabiangan, tan satan so sankalaknaban a nibunog a libro ed awaran. Niarum ni, satan so apaneknekan a maawaran tan sientipikon duga. Say arkeologo tan awaran so mamaneknek ed inkasusto na inkasumpal na saray propesiya ed Biblia. Satan so bulos a manlapud amin a porma ed espiritismo tan mistisismo tan okulto. Amin na saya et mitunosan ed mismon ibabaga na Biblia a satan et madibinon apuyanan.b​—2 Timoteo 3:16.

“Saray Bunga” na Tuan Relihyon

Balet agta tua a dakel a relihyon so mangibabaga ya ontotombok ed Biblia? Tan agta say inkaapag-apag, panbubusolan, tan pankuwankuwanan so mapatnag ed limog na dakel a mangibabagan Kristiano ira? On, balet aliwan saya so katunongan ya ag-ikuenta so Biblia. Si Jesu-Kristo a mismo so angipanengneng a kaslakan na saramay manaagamil ed Inkakristiano et ikaindan na Dios. (Nengnengen so Mateo 7:13, 14, 21-23.) Panon, sirin, a nabidbir na sakey iramay manaagamil na tuan relihyon ya ibangat na Biblia? Inmebat si Jesus: “Napatnagan yora lapud saray bunga ra. Makaborbor ta iray totoo na ubas ed saray espino odino higos ed saray sabitan, kasin ontan? Ontan met ya amin a maong a kiew mangiter na maong a bunga, sa balet so aderal a kiew mangiter na aliwan maong a bunga. Peteg, sirin, diad saray bunga ra nibiig yora.”​—Mateo 7:16, 17, 20.

On, say tuan relihyon so nepeg a magmaliw a mabiskeg a puersa parad maabig, a mamawala na makabenipisyon epekto ed limog na saray managdayew. Alaen, ya alimbawa, si Akinori, sakey a lakin Hapon, ed dili iran salita to, “nagmaliw a personipikasyon na sakey a panlalaslasan ya espiritu.” Sikatoy matalonan tuloy ya akadampot ed saray kalat to ed pangraduar a manlapud manunan unibersidad tan mananap na sakey a trabaho ed sakey a bantog a kompanya. Agto manlikna na antokaman a katunongan a mangyan na relihyon ed bilay to. ‘Say relihyon so parad makapuy a mankaukolan na suporta ed bilay,’ so isipen to.

Amin a bengatla so onlalabas a maong ya anggad, bilang pansumpalan na panaburido tan inkakesaw, sikatoy sinmabi ed sakey a graben sakit. Say tenger to so apikewet, tan say baba to so “andian na liknaan” ed kawigin takeb to. Dakel a “kakaaro” ed kompanya nen Akinori so apaneknekan a nagmaliw a melag a ligliwa ed panaon na irap to. (Ipareng so Uliran 17:17.) Kanian sikato sa nalner ed aralem ya abot na panag-inum tan nanisip ingen ed pamoltot na bilay to.

Anggaman ontan, diad dugan panaon, say asawa nen Akinori so ginmapon akiaral na Biblia dingan na saray Tasi nen Jehova. Sakey ya agew ed kurang na pantotongtongan, imbaga to ed sikato so kasulatan ed Galacia 6:7, a nabasan: “Antokaman ya intanem na sakey a too, saya lanlamang so anien to.” Atikna ed sarayan salita, si Akinori so akiulop ed sikato ed panagaral, tan amasimbalo ed sikatoy naaralan to ed panmoria to ed kabaliksan na bilay. Unong a say panmoria nen Akinori so linmiwawa, say mamaarum-aburidon kairapan to so ginmapon naandi! Unong ya ipanengneng na sakey a salita ed Biblia: “Say mareen a puso sikato so bilay na laman.” (Uliran 14:30) On, say tuan relihyon so mamawala na maabig a bunga!

Si Toshiro so sananey a Hapon a laki ya asabin anengneng to no panon a say tuan relihyon et magmaliw a sakey a puersa ed kaabigan. Anggaman sikatoy manisia a wala so kablian ed panagamil na relihyon, anggapoy ginawa ton balot ed satan. Saray interes to so nipuntirya ed pankayaryan na dili ton abung. Anggaman ontan, say impakagamor na ontan a kalat et ag-angitarok na pakapenek ya iilaloan to. Niarum ni, unong a sikatoy onnengneng ed kalibeliber na panagtrabahowan to, naimano toray kaslakan ya agamil na ag-inkamatuwa tan say mauges a personal a relasyon so nanresulta manlapud saratan. Adismaya si Toshiro ed anengneng to.

Sakey ya agew say asawa ton bii so angimbita ed sakey a matatken manlapud lokal a kongregasyon na saray Tasi nen Jehova ya ondalaw ed sikato. Si Toshiro so tamtampol ya akatebek a saman a matatken so duma a manlapud saray katrabahowan to. Say rason? Say matatken so masimoon a tuloy a manaagamil ed saray prinsipyo na Biblia ed bilay to. Alagyat ed saya, inawat nen Toshiro so imbitasyon ed panagaral na Biblia tan ginapoan ton ginawa so relihyon na Biblia a dalan na panagbilay to.

Sikami met so mangimbita ed sikayon mangamta ed saray Tasi nen Jehova. “Saray bunga” ra so mamaneknek a sikaray mandadayew “a tekep na espiritu tan katuaan.” Sikaray manggunaet a mankimey iray bangat na Biblia ed bilay da. Tan bilang sinansakey et arawi ra ed inkayadyari, bilang sakey a grupo sikaray mangidemostra no panon a mabiskeg so espiritual a puersa parad kaabigan na tuan relihyon.

Nilibo ed limog na Tastasi so datin agmaliket ed dalan na panagbilay da. Balet diad panamegley na pangaplika na saray prinsipyo na Biblia, dakel ed sikara so walan akapanggawa na makapasagyat a panamasimbalo. Diad pamayubo no antoy tatawagen na Biblia a “bunga na espiritu,” salanti, saray kalidad, na aro, gayaga, deen, andukey-a-panagtepel, panangasi, kaabigan, pananisia, tayadno, tan dangka, sikaray akaromog ed tombok na personal a liket.​—Galacia 5:22, 23.

Andi-geter a Gungguna a Manlapud Panagamil na Tuan Relihyon

Anggaman ontan, say tuan relihyon, so manepeg a manggawa na nagkalalo nen say pamasimbalo ed saray personalidad odino mamawas ed personal iran problema. Say englobo iran problema a singa polusyon, say takot ed nuklear a bakal, tan panangusar ed kaliberliber so manigensigen ed pakaderal na marakep a planeta tayo. Saray ekonomikon problema so mangamper ed liket tan kabunigasan na nilaksalaksa. Anggapoy relihyon a seryosoen ya anggad satan et mangitarok na pigaran ilalo ed panresolbe ed sarayan englobon problema.

Say relihyon ed Biblia so mangitarok na ontan ya ilalo. Isisipan na Dios so isasabi na sakey a matunong a balon mundo ed silong na mangatatawen a gobierno, odino “panarian.” (Mateo 6:9, 10; 2 Pedro 3:13; Apocalipsis 21:3, 4) Sayan Panarian so makatambal-ya-amin ed amin a sakisakit na katooan. Tan no nipaakar ed inkapermanenti na ontan a sankadalinan iran gungguna, mamaseguro so Biblia ed sikatayo: “Say mundo so onlalabas tan saray penel to, balet siopaman a manggawa na linawa na Dios so mansiansia lawas.” On, say andi-anggaan a bilay ed liket so ilalo na balang tuan Kristiano! (1 Juan 2:17) Balet saraman lambengat so nanseryoso ya angagamil na tuan relihyon so nagunggunaan a manlapud sayan onsasabin Panarian. Sikami sirin so mamaseseg ed sikayon onggapo ed sakey a seryoson panagaral ed Biblia.c (Juan 17:3) Unong ya onggapo kayon mangiyabuloy ed liwawa na Salita na Dios ya onsinag ed bilay yo, naeksperiensia yo so baleg a gayaga unong a say ‘pankaukolan parad Dios’ so napano, a kundang-ed-kundang. Peteg, say andi-geter iran bendisyon so nakayaryan yo lapud inala yo so relihyon​—say tuan relihyon–​a seryoson tuloy.

[Saray paimano ed leksab]

[Litrato ed pahina 5]

Say inkawala na Biblia ed ngalngali 1,900 iran lenguahe so mitunosan ed ibabaga to a madibinon apuyanan

[Litrato ed pahina 7]

Say relihyon ed Biblia so mamenben na ilalo na saray kipapasen na kareenan ed sankamundoan ed silong na mangatatawen a gobierno