Kasin Nepeg Yo A Panisiaan So Trinidad?

Kasin Nepeg Yo a Panisiaan?

1, 2. Antoran obserbasyon so nagawaan nipaakar ed Trinidad?

SIKAYO ta so manisia ed Trinidad? Karaklan a totoo ed Kakristianoan so manisia. Diad tua, satan so sankaimportantian a doktrina na saray iglesia ed loob na dakel iran siglo.

² Lapud saya, nayarin isipen yon anggapo la so isusuppiat ed satan. Balet ta wala, tan agano ni anggan saray mismon taga-suporta to so amarngat ed suppiatan.

3. Akin a nepeg tayon interesado ed teman Trinidad diad sayan agew tayo?

³ Akin ya aliwan magenap so basta pagpagarot ya interes ed sayan tema? Lapud inkuan a mismo nen Jesus: “Saya so maandon bilay: say pangamta ed sika, say saksakey a tuan Dios, tan saman so imbakim salanti si Jesu-Kristo.” Kanian say interon arapen tayo so nibased pangamta tayo ed tuan kipapasen na Dios, tan kabaliksan na satan so pangigapon kabaten so lamot na suppiatan ed Trinidad. Sirin, akin ya ag-usisaen so saya ed inkasikayon-dili?​—Juan 17:3, Katolikon Jerusalem Bible (JB).

4. Diad antikey, anto so bangat a Trinidad?

⁴ Nanduruma so onkukurang a pananisia ed Trinidad. Balet diad inkalapagan say bangat a Trinidad so mangibabagan say Dios so walaan na taloran persona, Ama, Anak, tan Espiritu Santo; ingen, sikara so saksakey a Dios. Ibabaga na Doktrina a say talora so namparpara, makapanyarin-amin, tan agpinalsa, sipor lan wala ed inka-Dios.

5. Anto so ibabaga na saramay agmangawat ed doktrina?

⁵ Anggaman kuan, ibabaga na saray arum a say doktrinan Trinidad so palso, a say Makapanyarin-amin a Dios so saksakey bilang sakey a biig, maando tan makapanyarin-amin. Ibabaga ran sakbay a nagmaliw a too, si Jesus so singa saray angheles, sakey a biig ya espiritun persona a pinalsa na Dios, sirin sikatoy walaan na gapoan. Ibabangat da a si Jesus so ag-anggan kapigan mipara ed Makapanyarin-amin a Dios ed anggan anton pantalos; sikatoy lawas uuleyan na Dios nanlapulad gapo ya anggad natan. Panisiaan da met a say espiritu santo so aliwan sakey a persona noagta sikatoy espiritu na Dios, say aktibon puersa to.

6. Panon so impaneskribe na saray (a) managsuporta (b) kritiko ed gapoan na bangat a Trinidad?

⁶ Unong ed saray managsuporta na Trinidad, satan so niletneg aliwa lambengat a diad relihyoson tradisyon noagta ontan met diad Biblia. Unong ed saray kritiko na doktrina satan so aliwan bangat na Biblia, tan sakey a babasaen ed awaran so mismon angiyabawag: “Say gapoan na [Trinidad] so sigpot a pagano.”​—The Paganism in Our Christianity.

7. Antoray arum a pansumpalan (a) no say Trinidad so tua? (b) no satan so palso?

⁷ No tua so Trinidad, panleglemew ed si Jesus so pangibagan sikatoy ag-anggan mipara ed Dios a bilang kabiangan na inka-Dios. Balet no say Trinidad so palso, panleglemew ed Makapanyarin-amin a Dios so panawag ed siopaman a mipara ed sikato, tan lalon makapkapoy so panawag ed si Maria ya “Ina na Dios.” No say Trinidad so palso, agpanangigalang ed Dios so pangikuan, a singa nikurit ed libron Catholicism: “No [saray totoo] so agmamasiansia ed sayan pananisia a sigpot tan andi tilol, andi duaruwan [sikaray] natawtaw ed andi-anggaan. Tan saya so Pananisia na Katoliko: Dadayewen mi so saksakey a Dios ed Trinidad.”

8. Anto so nausisa ed saray pigaran onggendan ya artikulo?

⁸ Kanian, walaray maabig a rason, no akin a nepeg yon amtaen so katuaan nipaakar ed Trinidad. Balet sakbay ya usisaen so gapoan tan say pepekderan ton katuaan, makatulong so espisipikon panguker ed sayan doktrina. Anto ta a peteg so Trinidad? Panon so pangipapaliwawa na saray taga-suporta to?