Kasin Nepeg Yo A Panisiaan So Trinidad?
Panon so Inkipaliwawa na Trinidad?
1. Panon so panguker na Iglesya Katolika ed Trinidad?
IBABAGA na Iglesia Katoliko Romano: “Say Trinidad so terminon mangipapakabat ed sankaimportantian a doktrina na Kristianon relihyon . . . Kanian, unong ed saray salita ed Kredon Atanacio: ‘say Ama so Dios, say Anak so Dios, tan say Espiritu Santo so Dios, tan ingen aliwan taloran Dios noagta sakey a Dios.’ Diad sayan Trinidad . . . sarayan persona so namparan-maando tan namparpara: amin so agpinalsa tan makapanyarin-amin.”—The Catholic Encyclopedia.
2, 3. Panon so panguker na arum iran kaslakan ya iglesia ed doktrina?
2 Ngalngalin amin iran iglesia ed Kakristianoan so mipakna. Alimbawa, tinawag met na Griegon Iglesia na Ortodoks so Trinidad a “say basiyan na doktrina na Inkakristiano,” a kuanto ni: “Saray Kristiano et saramay angawat ed si Jesus a bilang Dios.” Diad libron Our Orthodox Christian Faith, inyabawag na parehon iglesia: “Say Dios so talora-ed-sakey . . . Say Ama so sigpot a Dios. Say Anak so sigpot a Dios. Say Espiritu Santo so sigpot a Dios.”
3 Kanian, say Trinidad so impasen a “sakey a Dios ed taloran Persona.” Binidbir a kada sakey so andian na gapoan, sipor lan wala. Binidbir a kada sakey so makapanyarin-amin, ag-atagey so sakey ed sananey nisay abeba ed sananey.
4. Panon so ikiwas na dakel ed saray paliwawa na Trinidad?
4 Mairap ta a talosan so ontan a katunongan? Nalmoan na dakel iran masimoon a mananisia a satan so makawetwet, sumlang ed gendat a katunongan, duman tuloy ed naeksperiensia da la. Itepet da, panon a say Ama so Dios, si Jesus so Dios, tan say espiritu santo so Dios, ingen aliwan taloran Dios noagta saksakey a Dios?
“Agnatebek na Katunongan na Too”
5-7. Anto so ibabaga na saray nanduruman sengegan nipaakar ed doktrina na Trinidad?
5 Kasmak so sayan inkagotgot. Ibabaga na The Encyclopedia Americana a say doktrinan Trinidad so impasen ya “agnatebek na katunongan na too.”
6 Ontan met so panmoria na dakel a mananisia ed Trinidad. Inkuan nen Monsenyor Eugene Clark: “Say Dios so sakey, tan say Dios so talora. Lapud anggapo so kapara na saya ed inkapalsa, agtayo natalosan itan, noagta basta panisiaan tayo. Inkuan nen Kardinal John O’Connor: “Amta mi a saya so abalbaleg a misteryo, ya agnayarin salien a talosan.” Tan si Papa Juan Pablo II so nansalita nipaakar ed “agnatalosan a misteryo na Dios a Trinidad.”
7 Kanian, ikuan na A Dictionary of Religious Knowledge: “Saray Trinitaryon mismo so agmakapampapakna ed inkasikara nipaakar ed no anton peteg so doktrina, tan no panon so suston pangipaliwawa.”
8, 9. Anto so ibabaga na sakey a Katolikon encyclopedia nipaakar ed saray estudyante na seminaryo tan saray propesor da, tan panon yon sukayan so katuaan na saratan a komento?
8 Sirin, natalosan tayo no akin a say New Catholic Encyclopedia so nanggawa na onian obserbasyon: “Pigpigara so managbangat na Trinitaryon teolohya ed saray seminaryo na Romanon Katoliko ya agnasisigen-sigen ed tepet a: ‘Panon so pangibangat na sakey ed Trinidad?’ Tan no say tepet so mangipatnag na inkawetwet ed biang na saray estudyante, nagkalalon saya so mangipatnag na mipadparan inkawetwet ed biang na saray propesor da.”
9 Nasukayan so katuaan na satan ya obserbasyon diad iyakar ed sakey a librarya tan usisaen iray libron manusuporta ed Trinidad. Agnabilang iran pahina so nisulat diad panasalin pangipaliwawa ed saya. Ingen, kayari na pipuligesgesan ed makawetwet a masoliwet iran termino tan paliwawa ed teolohya, onalis iray manangusisa a siansian ag-apenek.
10. Anto so ibabaga na sakey a parin Jesuita nipaakar ed Trinidad?
10 Nipaakar ed saya, nankomento si Jesuitan Joseph Bracken ed libro ton What Are They Saying About the Trinity?: “Saray paparin nairapan ya akaaral . . . na Trinidad ed impanseminaryo ra so gendat a manduaruwan mangipaamtad satan ed saray totoo ra manlapud pulpita, anggan ed Simba na Trinidad. . . . Akin a banalen iray totoo ed bengatlan diad kaunoran et agda met lamlamang natalosan?” Inkuanto met: “Say Trinidad so sakey a pamaakaran na pormal a pananisia, balet ta daiset odino andian na [epekto] ed agew-agew a Kristianon panagbilay tan panagdayew.” Ingen, saya so “sankaimportantian a doktrina” na saray iglesia!
11. Antoran makanan obserbasyon so ginawa na sakey a teologon Katoliko?
11 Imbaga nen teologon Hans Küng ed libro ton Christianity and the World Religions a say Trinidad so sakey a sengegan no akin a sinmaew iray iglesia a managyat ed saray aliwan-Kristianon totoo. Inkuanto: “Anggan saray di-aral a Muslim so nanairapan a mantalos, a singa met saray Judios so sinmaew a manebek, ed ideya na Trinidad. . . . Saray panangibiig a ginawa na doktrina na Trinidad ed baetan na sakey a Dios tan taloran persona so agmakapenek ed saray Muslim tan, imbes a naliwawaan et nawewetwet ed saray teolohikon termino ya inaon manlapud Siryako, Griego, tan Latin. Parad saray Muslim saya so galawgalaw labat ed salita. . . . Akin a labayen ni na siopaman a laokan na antokaman a kaisipan ed inkasaksakey tan inkadumaruma na Dios no satan so mamakilot lambengat odino mamaandi-kana ed satan ya inkasaksakey tan inkadumaruma?”
“Aliwan Dios na Gotgotan”
12. Panon so pangipaliwawa na arum ed gapoan na Trinidad?
12 Panon so inggapo na ontan a makawetwet a doktrina? Ibabaga na The Catholic Encyclopedia: “Sayan makapakelaw a tuloy a bangat so tanda lambengat na Madibinon puyan.” Inkuan na saray Katolikon eskolar a si Karl Rahner tan Herbert Vorgrimler ed Theological Dictionary da: “Say Trinidad so sakey a misteryo . . . diad mapeget a pantalos. . . , agnakabatan no agnipuyan, tan anggan nipuyan la et siansian sigpot ya agnatalosan.”
13, 14. Say pangibagan say Trinidad so nanlapu ed madibinon puyan so mamalesa na anton manunan problema?
13 Anggaman kuan, amalesa iya na baleg a problema ed pangibabagan saya so peteg a madibinon inpuyan lapud say Trinidad so makawetwet a misteryo. Akin? Lapud say madibinon puyan a mismo so agmangiyabuloy na ontan a panmoria ed Dios: “Say Dios so aliwan Dios na gotgotan.”—1 Corinto 14:33, Revised Standard Version (RS).
14 Diad panmoria ed satan, manggawa ta so Dios na sakey a makawetwet a doktrina parad inkasikato a sikatoy agbalot anggan nipaliwawa na saray eskolar a Hebreo, Griego, tan Latin?
15. Kasin nakaukolan ni a saray totoo so magmaliw a teologo ‘pian amtaen so Dios tan say anak to’?
15 Nagkalalo ni, kaukolan ta ni a saray totoo so magmaliw a teologo ‘pian nakabatan da so saksakey a tuan Dios tan si Jesu-Kristo ya imbaki to’? (Juan 17:3, JB) No ontan so kipapasen, akin a pigpigaran tuloy ed saray edukadon Judion papangulo na relihyon so angawat ed si Jesus bilang Mesias? Imbes, saray matoor a babangatan to so mauyamon domaralus, managsigay, managsingil na buis, kainaan-na-abung. Ontanlan petepeteg ed sarayan ordinaryon totoo so imbangat nen Jesus ed sikara nipaakar ed Dios a satan so ayarian dan imbangat ed saray arum tan sikaray akaparaan ni ingen ya ompatey nipaakar ed pananisia ra.—Mateo 15:1-9; 21:23-32, 43; 23:13-36; Juan 7:45-49; Gawa 4:13.