“Say Pakayari a Labas Nen Say Gendat”

PANON karakel na kairapan so nasungdoan na sakey a Kristiano? Natan, saray Kristianos ed interon mundo so nidudunget ed kairapan, kabubuyak na pamilya, emosyonal a gonigon, sakit, bakabakal, tan panamasegsegang. Kasin makatunongan a sikaray ilaloan a mamasiansia na katooran anggaman ed amin na saya? Ontan so inkuan nen apostol Pablo. Insulat to: “Diad amin a bengatla walaan ak na biskeg diad birtud na samay mamabiskeg ed siak.”​—Filipos 4:13.

Impanengneng na awaran a say pakayarin manlapud si Jehova so peteg a magenap parad amin a bengatla. Alimbawa, legan na uley na Nazi ed Alemanya, saray Tasi nen Jehova so anagmak na maruksan panamasegsegang. Kasin nansungdo ra? Ibabaga na libron Les Bibelforscher et le nazisme (The Bible Students and Nazism): “Anggaman ed amin a panaglewet, panamagyaw, tan panagsebel, anggaman ed inkipabpabaing ed publiko, inkipangaw tan inkipukok ed saray kampo na panangipangawan, agbalot inabuloyan na saray Estudyante na Biblia [Tastasi nen Jehova] so inkasikaran ‘nauman so panag-isip.’”

Diad saray kampo na panangipangawan, saray Tasi so abidbir diad panamegley na melag a triangulon purpura ed saray aysing da tan sikaray angipaarapan na nikadkaduman panamairap. Kasin saya so amakapuy ed sikara? Inkuan na Sikolohistan si Bruno Bettelheim a sikaray “aglambengat angipanengneng na nikabkabiig a katagyan ed dignidad na too tan walewaleng ed moral, noagta mabitar ya asalimbengan sumpad parehon eksperiensia ed kampo ya ag-abayag et aneral ed totoon impasen kon mismo tan saray sikoanalitikon kakaarok a matoor a tuloy.”

On, walaan ira na ‘biskeg ed amin a bengatla.’ Akin? lapud nanmatalek ira ed si Jehova. Inkuan nen Pablo: “Walaan itayo na sayan kayamanan ed saray bason pitek, pian say pakayari a labas nen say gendat so kien na Dios ya agmanlapud inkasikatayo.” (2 Corinto 4:7) No nasagmak yo so makasubok a situasyon, manmatalek ed tulong nen Jehova. Diad kapabiskeg ed itatarya ton pakayari a labas nen say gendat, nayarian yo so mansungdo.​—Lucas 11:13.