Say Biblia—Kasin Salita na Dios Odino Too?
Kapitulo 13
“Say Salita na Dios so Mabilay”
Diad apalabas a kapitulo, anengneng tayo a say konseho na Biblia so ontulong ed sikatayon manresolbi ed saray problema tan ompaliis ed saray lingo. Say agmanganggan kakabatan na konseho na Biblia so mabiskeg ya ebidensya na inkapuyanan. Ikuan na Biblia a mismo: “Amin a Kasulatan so impuyan na Dios tan makagungguna ed panangibangat, panamaat, panametek ed saray bengatla, panagdisiplina ed inkatunong.” (2 Timoteo 3:16) Ingen mas ni so gawaen na Biblia nen say pangiter lambengat ed sikatayo na makabat a simbawa. Bilang Salita na Dios, peteg ya umanen toray totoo.
1-3. (a) Panon so pangidanet na Biblia ed pankaukolan na saray pananguman ed personalidad? (b) Anton eksperiensia so mangipanengneng ed pakayari na Biblian manguman ed saray personalidad?
1 Peteg kasin nauman na Biblia iray totoo? On, salatan to ni ingen so personalidad da. Kunsideraen iyan konseho a nikurit ed Biblia: “Nepeg yon ipulisay so daan a personalidad a datin kurang na kagagawa yo a sikato so aderal unong ed manamalikdo iran pilalek; noagta . . . napasimbalo kayo komon ed espiritu na kalakal yo, tan nepeg yon isulong so balon personalidad ya apalsa unong ed linawa na Dios diad tuan inkatunong tan katooran.”—Efeso 4:22-24.
2 Peteg kasin posible so pangisulong na sakey a balon personalidad? On, talagan posible! Diad tua, say pagmaliw a Kristiano so no maminsan et lalanoren to so sigpot a dramatiko iran pananguman ed personalidad. (1 Corinto 6:9-11) Alimbawa, sakey a tobonbalon laki ed Abalaten ya Amerika so naulila ed edad a siam taon. Binmaleg ya andian na giya na ateng, abayuboan to so alablabas iran problema ed personalidad. Isasalaysay to: “Sanen mantaon ak na 18, siak so sigpot lan nailuam ed saray druga tan abayag a nipisok lapud panagtakew pian suportaan so bisyo.” Anggaman ontan, say panginaen to so sakey ed saray Tasi nen Jehova, tan diad kaunoran et akatulong ed sikato.
3 Isasalaysay to: “Inggapo nen panginaen kon iyaral ed siak so Biblia, tan kayari pitoran bulan et nakal ko so bisyon panagdruga.” Sikato met so sinmian ed apalabas iran kalimog to tan akikaaro ed limog na saray Tasi nen Jehova. Intuloy to: “Sarayan balon kalimog, tekep na maparanay a panagaral ko na Biblia, so amaaligwas ed siak a diad kaunoran et indedikak so bilay kon manlingkor ed Dios.” On, sayan datin nailuam ed druga tan matakew so nagmaliw a sakey ya aktibon Kristiano, tan sayan sigpot a pananguman so agawa ed panamegley na pakayari na Biblia. On, unong ya ikuan nen apostol Pablo, “Say Salita na Dios so mabilay tan mabiskeg.”—Hebreos 4:12.
Nauman ed Panamegley na Pikakabat
4, 5. Unong ed Colosas 3:8-10, anto so nakaukolan pian nabayuboan so balon personalidad?
4 Panon na Biblian umanen so totoo? Say ebat so nanengneng ed sayan bersikulo na Biblia: “Ipulisay yon amin so saraya, sanok, ingongot, kaugsan, inkalabir, mabanday a panagsalita na sangi yo. Agkayo mantitilaan. Iwaklit yo so daan a personalidad a pati saray ag-agamil to, tan kawesan yo so inkasikayo na balon personalidad, ya apasimbalo ed panamegley na suston pikakabat unong ed olibay na Samay amalsa ed atan.”—Colosas 3:8-10.
5 Imanoen so makanan betang a gagawaen na suston pikakabat ed Biblia. Ipapaliwawa na Biblia no dinan iran kalidad so kaukolan tayon ipulisay tan dinan so nepeg tayon bayuboan. Diad inkasikato, say ontan a pikakabat so walaan na mabiskeg ya epekto, unong ya aromog na sakey a tobonbalon laki ed mamaabalaten a Europa. Sikato so walaan na peteg a problema: mapayunget. Legan ya ombabaleg, sikato so mabetbet a makapitulot, tan bilang pangipanggetan to na sanok to, sikato so nanaral na boksing; ingen ta siansian agto nabanlongan so inkapaweg to. Sanen walad armi, sikato so niiyan ed gulo diad impamugbog ed kapara ton sundalo. Kayari intaynan to ed armi, sikato so angasawa ingen ta kakabilen to so asawa to. Diad sakey a sangsangan ed pamilya, kinabil to ni ingen so dilin ama to, a nipalupbob ed dalin. Talagan maisasanok, paweg a tobonbalon laki!
6, 7. Panon a say suston pikakabat ed Biblia so tinmulong ed sakey tobonbalon laki ed abalaten a Europa pian umanen so personalidad to?
6 Anggaman kuan, diad kaunoran naaralan to so Biblia ed saray Tasi nen Jehova tan akadngel na saray konsehon singa say onggendan: “Agyo ibabales so mauges ed mauges ed siopaman. . . . No nayari, diad anggaan na nayarian yo, mikareenan kayo ed amin a totoo. Agyo ibabales so inkasikayo, inararo, noagta ikdan na pasen so sanok.” (Roma 12:17-19) Saya so akatulong ed sikaton manmoria ya agaylan mauges a kaleteyan so inkapaweg to. Tinainan to so boksing, ya amoria ton agmitunosan itan ed mareen a Kristianon personalidad. Ingen ta sikaton siansia so walaan na peteg a pipupuligesgesan ed inkapaweg to.
7 Anggaman ontan, say idaraak na pikakabat to ed saray prinsipyo na Biblia so akatulong ed sikato. Saya so nanlinis na konsiensia to, ya analona ed inkapaweg to. Aminsan, sanen onaaligwas la ed panagaral na Biblia, sakey ya estranghero so asanokan tan angayew ed sikato. Alikna na tobonbalon laki ya ondalang lamet so sanok to. Ingen, alikna to so sananey a puersa: say kababaingan; tan saya so angamper ed sikaton onsanok. Imbes ya “ibales so mauges ed mauges,” pinokpokan to so espiritu to. Natan, sikato la so apasimbalon too, a walaan na balon personalidad, salamat ed suston pikakabat ed Biblia.
Say Pikabat ed Dios
8. (a) Diad siopa olibay so akagawaan na balon personalidad? (b) Say suston pikakabat a manmoldi ed balon personalidad et nepeg ya isakup to so pikakabat ed siopa?
8 Tua, amta na dakel a totoo so dugan bengatlan gawaen, ingen ta onsuko ra ed saray kaleteyan na laman. Malinew, say pakawalaan lambengat na suston pikakabat ed duga tan aliwa so agmagenap. Walay sananey nin bengatlan tinmulong ya anguman ed saray duaran indibidual ya adeskribe ed tagey. Anto itan? Inkuan na bersikulon atukoy ed inmuna: “Kawesan yo so inkasikayo na balon personalidad, ya apasimbalo ed panamegley na suston pikakabat unong ed olibay na Samay amalsa ed atan.” (Colosas 3:10) Imanoen ya, unong a si Adan so gendat ya agawa ed olibay na Dios, say balon personalidad so agawa met ed olibay na Dios. (Genesis 1:26) Kanian, say suston pikakabat a tinmulong ed sarayan duaran tobonbalon lalaki et isakup to so pikakabat ed Dios. Saya so mangipanonot ed sikatayo ed saray balikas nen Jesus: “Saya et kabaliksan to so andi-anggaan a bilay, say pangala ra na suston pikakabat ed sika, say saksakey a tuan Dios, tan samay imbakim, si Jesu-Kristo.”—Juan 17:3.
9. Panon a say pikakabat ed Dios so ontulong ed sikatayon manguman ed personalidad tayo?
9 Panon a say pikakabat ed Dios so ontulong ed sikatayon manguman ed personalidad tayo? Iikdan to itayo na motibon manggawa na ontan. Sanen akabatan tayo so Dios diad impanaral na Biblia, naaralan tayoray madibinon kalidades to tan naimano so panangaron impanengneng to ed sikatayo. Saya so mangitonton ed sikatayon mangaro met ed sikato. (1 Juan 4:19) Insan, naunor tayo so inkuan nen Jesus a sankaunaan tan sankabalgan a ganggan: “Nepeg mon arowen si Jehova a Dios mo ed interon pusom tan ed interon kamarerwam tan ed interon kanonotan mo.” (Mateo 22:37) Say pangaro ed Dios so manggawa ed sikatayon malabay a mangikawes ed balon personalidad a mamaliket ed sikato. Gawaen to itayon mankaliktan a magmaliw a singa sikato, anggaman mairap so pipupuligesgesan ed panggawa na ontan.
Nilamot Iran Kaleteyan
10, 11. Panon a say suston pikakabat so tinmulong ed sakey a tobonbalon bii ed Amianen ya Amerika a gapoan ya umanen so personalidad to?
10 Diad arum iran kipapasen, atan so peteg a pipupuligesgesan. Sakey a tobonbalon bii ed Amianen ya Amerika so akipuligesgesan a tuloy pian manguman. Sikato so biktima na panangabuso ed saray ugugaw, binmaleg ed magulon pamilya tan diad kaunoran et nailuam ed saray druga. Lapud saray druga so mabli, kanian sikato so nanbalangkantis pian nalegpet to so bisyo. Sinabat tan tinakewan to met iramay turista kanian diad kaunoran et mas dakel a panaon so impanayam to ed saray prisoan tan bilyaran nen say diad abung.
11 Sanen sikatoy asagapolan na saray Tasi nen Jehova, sikato so—kayari pigaran impanpaekal—nagmaliw ya ina na ilihetimon ugaw. Anggaman ontan, apaknaan to so nadngel to ed Biblia tan ginapoan ton aralen itan. Ag-abayag et nanggunaetan ton ipaalagey so siglaotan ed Dios tan nanggawa na saray pananguman ed bilay to.
12, 13. Deskribien no panon a say suston pikakabat, bektaman a nitanem, so onkiwas bilang sakey a puersa ed pananguman.
12 Ingen, sikato so niiyan ed malet a pipupuligesgesan, lapud nilamot so daan a personalidad. Aminsan, sinenti to so masimoon a simbawa, tinmundan manaral na Biblia, tan pinmawil lamet ed marutak iran dalan to. Balet ta agto nalingwanan so katuaan ed Biblia a nitanem ed sikato, tan aksobien to: “Naulit-ulit a siak so agpandeenen na konsiensiak, tan saray balikas ed 2 Pedro 2:22 so onlesa ed kanonotan ko: ‘Pinawil na aso so dilin uta to tan say kapanames a kaong so nantiblak lamet.’”
13 Diad kaunoran, sayan pikakabat so amayubo ed sikaton manggawa na sananey nin impasyan sagpot. Ikuanto: “Ginapoan kon lukasan so puerta ed si Jehova tan mabetbet ya onkerew na tulong.” Natan, say balon personalidad so lalon nitanem a masekder, anggaman sikato so siansian mipuligesgesan a tuloy. Aminsan, lapud kaleteyan, sikato so nikarunyas lamet ed panagbuanges tan imoralidad. Ingen, natan impanengneng na kiwas to a sikato so peteg ya anguman. Dinimla to so inkasikato tan kuanto: “Talagan nanpikasi tan nanaral ak na malaem.” Diad kaunoran, say salita na Dios so tinmalona ed bilay to a sikato so nagmaliw a sakey ya aktibon Kristiano, mangikukurang na malinis, nagalgalang a panagbilay. Diad pigaran taon la natan, sikato so sigpot a duma ed datin inabuso, nailuam-ed-druga, maatap ya indibidual.
Totoon Pinasimbalo na Salita na Dios
14, 15. (a) Anton puersan nanlapud Dios so onkikiwas diad panamegley na Biblia? (b) Antoray arum a pakabidbiran ed saray tuan Kristianos natan?
14 Say pakayarin intarok na Biblia ed bilay na saray mauyamon indibidual so mangipanengneng ya aliwa lambengat itan a kimey na too. Bilang impuyan a Salita na Dios, sakey iyan paralanan ya aagosan na espiritu na Dios. Say parehon espiritu a nanggawan posible ed saray milagro nen Jesus so ontulong ed sikatayo natan a manalona ed mauges iran kalidad tan mamayubo ed Kristianon personalidad. On, saray manunan kalidad a nepeg a bayuboan na saray Kristianos—aro, liket, deen, kasungdoan, kaabigan, kamaongan, pananisia, tayadno, tan dangka—so atawag ed Biblia a “say bunga na espiritu.”—Galacia 5:22, 23.
15 Natan, sayan espiritu so onkikiwas aliwa lambengat ed pigaran indibidual noagta ed nilaksan “imbangat nen Jehova” tan mangagayaga ed ‘daakan a kareenan’ manlapud Sikato. (Isaias 54:13) Siopa iraya? Inter nen Jesus so sakey a paraan a pakabidbiran ed sikara, inkuanto: “Diad saya nakabatan na amin a sikayoray babangatan ko, no wala so aro ed limog yon dili.” (Juan 13:35) Say Kristianon aro so sakey a bunga na espiritu tan makanan kabiangan na Kristianon balon personalidad. Kasin wala so siopaman a grupo na totoon mangipapanengneng na aro ed paraan ya inkuan nen Jesus?
16, 17. Mangaon na arum iran komento ed peryodiko a mangipabidbir ed saramay “imbangat nen Jehova” tan mangagayaga ed ‘daakan a kareenan.’
16 Bueno, talinengen so sayan inaon ed sakey ya insulat ed New Haven Register, sakey a peryodiko ed Amianen ya Amerika: “Balanglan sikayo so bubusolen odino mansyudot [asanokan], a singa siak, lapud pangukumberti ra, nepeg yo met a dayewen so inkadedikado ra, say kaabigan da, say matalonan ehemplo ra ed kiwas tan mabunigas a panagbilay.” Sayan grupo met so tutukoyen na peryodikon Aleman a Münchner Merkur sanen inkuanto: “Sikara so sankamatuaan tan sankasakbayan a managbayar na buwis ed Republika Pederal na [Aleman]. Say katutulok da ed saray ganggan so nanengneng ed paraan na panagmaneho ra tan ontan met ed saray estadistika ed krimen.
17 Siopa so tutukoyen na sayan duaran peryodiko? Say parehon grupo ya asingbat ed Herald na Buenos Aires, Argentina. Inkuan na sayan peryodiko: “Saray Tasi nen Jehova so apaneknekan ed interon panaon a makukuli, maulimek, aliwan madarak tan matakot ed Dios, saray nengneng na mibabaley a mabitar a kakaukolanen na nasyon.” Sakey a sosyolohikon impanaral ed Zambia a nipalapag ed American Ethnologist so anukoy ed parehon grupo. Ikuanto: “Saray Tasi nen Jehova so manasagmak na babaleg ya aligwas diad panamasiansia na maligen a panamaley nen say saray membro na arum iran denominasyon.”
18, 19. Panon so inkadeskribe na saray Tasi nen Jehova ed Italya tan Abalaten ya Aprika?
18 Sasalitaen met na peryodikon La Stampa ed Italya iray Tasi nen Jehova sanen inkuanto: “Sikara so sankatooran a mibabaley a kaliktanen na siopaman: agda papaliisan iray buwis odino onsumlang ed agkumbiniente iran ganggan parad dilin pankaabigan da. Saray ehemplon prinsipyo diad panangaro ed kaparan too, agpangawat ed pakayari, andi-karawalan tan personal ya inkamatua so kabiangan na ‘inagew-agew’ a panagbilay da (a diad kaslakan a Kristianos et parad ‘Simban totontonen’ maabig lambengat a dengelen diad saray pulpito).”
19 Sakey a propesor na unibersidad ed Abalaten ya Aprika ya akasagmak na panangibiig ed silong na saray ganggan ed rasa na atan a bansa so anukoy ed saray Tasi nen Jehova a “sakey a baley ya abangatan ed atagey iran estandarte na Biblia pian magmaliw a peteg a ‘color-blind’ (andian na panangiduma ed kolor).” Diad impangipaliwawa ed saya, inyarum to: “Sikara so totoon say nenengnengen da ed arum et say akindalem, aliwa lambengat a say kolor na baog da. Tugyopen natan na saray Tasi nen Jehova so alenleneg a tuan impanaagi ed katooan.”
20. Akin a nikadkaduma iray Tasi nen Jehova?
20 Ipapanengneng na sarayan komento a wala so ulopan na totoon sigpot-puson angawat ed Biblia tan diad limog da et onkikiwas so espiritu na Dios. Agaylan makanan imanoen a sarayan parehon totoo a tinukoy tayon akauna so manguunor ed ganggan nen Jesus ya ipulong so maong a balita na Panarian ed interon mundo. (Mateo 24:14) Akin a saray Tasi nen Jehova so matalona ed sarayan pamaakaran? Diad dakel iran paraan sikara so agmiduma ed arum a totoo. Sikara so walaan met na silalaman iran kaleteyan, saray namparan ekonomikon problema, tan namparan manuna iran pankaukolan. Ingen bilang sakey a grupo, inaro ra so Dios, inaral dan sisisimoon so Biblia, tan inabuloyan dan onepekto ed saray bilay da.
21. Anto so paneknekan na kiwawala na saray Tasi nen Jehova ed sayan napno-na-gulan mundo natan?
21 Nilaksalaksan Tastasi nen Jehova so naromog ed masulok a 200 daldalin. Isakup da so totoo ed amin a rasa, pansasalita, tan ed onkukurang a sosyal a talindeg. Ingen sikaray nankakasakey, mareen, internasyonal a sanaagi. Sikaray maong a mibabaley ed anggan inerman a panaayaman da, balet ununa tan sankaimportantian, sikara so uuleyan na Panarian na Dios, tan amin da so aktibon tuloy diad pangibabaga ed maong a balita na atan a Panarian ed arum. Peteg a makatantanda a diad sayan naapag, napno-na-gula a mundo, et niwala ni so sakey a grupo salanti saray Tasi nen Jehova. Say inkiwala ra so makapanyarin ebidensya a say espiritu na Dios so siansian aktibo ed limog na katooan. Tan paneknek itan a say Biblia so peteg a “mabilay tan mangisekar na pakayari.”