“Say Asawa na Inkaugaw Mo”

“SAY pikakalugoran so ngalngalin singa inagew-agew lan nagagawa.” Ontan so ikuan na dakel iran onsiano, unong ed Los Angeles Times. Kasin atan a balikas so mamakelaw ed sikayo? Ingen, kinalkula na saykayatristan si Frank Pittman a ngalngalin 50 porsiento ed asawan lalaki tan manlapud 30 porsiento ya anggad 40 porsiento ed asawan bibii so nagmaliw ya agmatoor. No tua itan, ngalngalin kapaldua ed amin a totoon walaan na asawa so mikakalugoran!

Kasin kabaliksan na atan a say imoralidad et susto? Andin balot! Say ikakayat na ag-inkatoor so agmanggawad atan a susto​—a singa met say imbaleg na krimen ed lansangan so agmanggawan susto a takewan so sakey. Say imoralidad so makapasakit. Alimbawa, say katooan natan so papairapen na laganap a mapeligron makaalis iran sakit ed sekso ya amin et magmainomay komon a kontrolen no saray totoo so manbilay a malinis ed moral. Say managpatey a sakit ya AIDS so agla komon binmaleg a singa ontan no saray totoo so aliwan malukak ed saray seksual a bilay da.

Sakey ni, anggan say sankasopistikadoan tan “aliwawaan” so manlikna na makapasinagem ya ot-ot sano saray kapareha da so agmatoor. Say sakey a kiwas na ag-inkatoor so mamalesa na saray sugat a mabayag a tuloy ya onabig.

Anggaman kuan, say sankaimportantian a punto et say panleglemew ed saray samba ed panamaley so graben agpanagrespeto ed Dios, lapud sikato so Autor na panamaley. Ikuan na Biblia: “Narayew komon so panangasawa ed amin na ganagana.” Sikatayo met so apasakbayan: “Ukomen na Dios iray managlawan tan managkalugoran.”​—Hebreos 13:4.

Sirin, imanoen na makabat a totoo so apuyanan a balikas: “Manliket ka ed asawa na inkaugaw mo.” (Uliran 5:18) Anapen da so inkakontento tan liket ed kaasawaan da. Diad panggawa na ontan babantayan da so pisikal tan emosyonal a bunigas da, tan sankaimportantian, itatarok da so galang ed engranden Autor na panamaley, si Jehova a Dios.