Apocalipsis—Asingger la so Engranden Kapantokan To!
Kapitulo 3
9. (a) Singa si Juan, anton awawey so impanengneng na Juan a klase? (b) Panon so impangipanengneng nen Juan na dalan ed sikatayo diad pagmaliw a maliket?
9 Si Juan so matoor diad panangitarok na pantasi ed mensahe ya inter ed sikato na Dios diad panamegley nen Jesu-Kristo. Dineskribe to ed detalye so “amin a bengabengatlan anengneng to.” Say Juan a klase so magunaet a nananap na panangiwanwan manlapud Dios tan si Jesu-Kristo ta pian natalosan so propesiyan nagnap tan ipakabat iray maabig a punto to ed saray totoo na Dios. Para ed kagunggunaan na alanaan a kongregasyon (tan ontan met ed internasyonal a baleg ya ulop ya ipreserba na Dios a mabilay ed baleg a kairapan), insulat nen Juan: “Maliket iman so mamasan maksil tan saraman so ondengel ed saray salita na sayan propesiya, tan saraman so manumpal ed saray bengatlan nisulat ditan; lapud say aturon panaon so asingger la.”—Apocalipsis 1:3.
10. Anto so nepeg a gawaen tayo nipaakar ed Apocalipsis pian nagamoran so liket?
10 Sika so nagunggunaan na abalbaleg diad pamasa ed Apocalipsis tan nagkalalo ni diad panumpal ed saray bengatlan nisulat ditan. Impaliwawa nen Juan diad sakey ed saray sulat to: “Saya so kabaliksan na aro na Dios, a sumpalen tayoray ganggan to; tan ingen saray ganggan to so aliwan makapabelat, lapud amin a bengatlan nianak a nanlapud Dios so manalo ed mundo. Tan saya so pananalo ya analo ed mundo, say pananisia tayo.” (1 Juan 5:3, 4) Makapagmaliw kan supremon maliket diad pamaalagey na ontan a pananisia!
11. (a) Akin a maganat so panumpal tayo ed saray salita na propesiya? (b) Anton panaon so talagan maatatap a manasingger?
11 Maganat so panumpal tayo ed saray salita na propesiya, “lapud say aturon panaon so asingger la.” Say aturon panaon para ed anto? Para ed kasumpalan na saray propesiya na Apocalipsis, a pati saray panangukom na Dios. Say panaon so asingger la ed pangidapo na Dios tan si Jesu-Kristo na pinal a panangukom ed sankamundoan a sistema nen Satanas. Sanen si Jesus so wadia ed dalin, imbaga to a say Ama to lambengat so mikabat ed “atan ya agew odino oras.” Onnenengneng ed arapen diad saray gonigon a dinmaak diad dalin nanlapulad Guerra Mundial I a manpatuloy, inkuan met nen Jesus: “Sayan kapolian so aglan balot napaso ya anggad kagawa na amin na sarayan bengatla.” Sirin say aturon panaon ed pangidapo na panangigeter manlapud Dios so talagan maatatap a manasingger. (Marcos 13:8, 30-32) A singa ibaga na Habacuc 2:3: “Say pasingawey so dia ni ed aturon panaon, tan mantultuloy a mansiglat ed anggaan, tan agmantila. Nisay manabala, mantultuloy a talaranan itan; lapud andi saew ya onsabi. Agmanbayag.” Say kilalaban tayo ed panamegley na baleg a kairapan so mandepende diad panumpal tayo ed mapropetikon Salita na Dios.—Mateo 24:20-22.