Tepetepet Manlapud Managbasa

Diad Hebreos 11:26, kasin si Moises so atukoy bilang “Cristo” odino imbes sikato so sakey a tipo nen Jesu-Kristo?

Sanen sisingbaten so pananisia nen Moises, si apostol Pablo so angisulat a si Moises et “pinabli to a balbaleg a kayamanan so kamormora ed Cristo nen saray kayamanan na Egipto: ta wala ya inyan to so mata to ed katumangan.” (Hebreos 11:26) Si Pablo so singa manutukoy ed si Moises bilang “Cristo,” odino alanaan, ed arum a pantalos.

Bidbiren, diad nanduruman pamaakaran a si Moises so angiletneg na padron para’d isasabi na Mesias. Anggaman si Moises a mismo so sakey a propeta, impasakbay to so isabi na babaleg a propeta a ‘singa sikato.’ Alikna na dakel a Judio a si Kristo so ‘Say Propeta,’ a pinekderan na saray patumbok to. (Deuteronomio 18:15-19; Juan 1:21; 5:46; 6:14; 7:40; Gawa 3:22, 23; 7:37) Si Moises met so manamegley na Ganggan na sipanan, balet inawat nen Jesus so ‘sakey a lalon ekselentin mapublikon panaglingkor’ bilang “manamegley ed sakey a sipan a magmaong . . . a sipasipan,” say maglorian balon sipanan. (Hebreos 8:6; 9:15; 12:24; Galacia 3:19; 1 Timoteo 2:5) Kanian diad arum a pamaakaran si Moises so nibagan sakey a tipo ed isasabi na Mesias.

Anggaman ontan, satan so ag-ompatnag a magmaliw a manunan kabaliksan na Hebreos 11:26. Anggapo so pakaamtaan a kabat nen Moises iray detalye nipaakar ed Mesias, a sigagalan papablien to so inkiyakar to ed Egipto a parad Mesias odino manangilaman To.

Insuheri na arum a saray salita nen Pablo ed Hebreos 11:26 so walaan na kabaliksan a miulibay ed komento to a saray Kristiano so akasagmak na “saray irap nen Cristo.” (2 Corinto 1:5) Kabat na saray alanaan a Kristiano a si Jesu-Kristo so nanirap tan no sikara so ‘manirap et sikara so niglorian kaiba da’ ed tawen. Balet agkabat nen Moises no anton irap so sagmaken na onsabin Mesias, nisay kabat nen Moises a walay mangatatawen ya ilalo.​—Roma 8:17; Colosas 1:24.

Wala so mas simplen pakatalos ed no panon nen Moises a “pinabli to a balbaleg a kayamanan so kamormora ed Cristo nen saray kayamanan.”

Sanen insulat nen Pablo so “Cristo” diad Hebreos 11:26, inusar to so Gregon salitan Khri·stouʹ, a kabaliksan to’y Hebreon Ma·shiʹach, odino Mesias. Parehon say “Mesias” tan “Cristo” et kabaliksan to’y “alanaan a sakey.” Kanian insulat nen Pablo so nipaakar ed si Moises a ‘pinabli to so kamormora ed alanaan a sakey.’ Kasin si Moises a mismo so natawag ya “alanaan a sakey”?

On. Diad saray panaon na Biblia say sakey a too so nayarin naturo diad sakey a nikadkaduman betang diad panamegley na panlana na larak ed ulo. “Diad saman si Samuel inala to so poronggo na larak, et sikato so inkalbo to ed tapew na olo [nen Saul].” “Diad saman si Samuel inala to so saklor na larak, tan sikato so nilanaan to [David] dia ed pegley na saray agagi to: et say Espiritu nen Jehova linma a sankamakapanyarian ed David.” (1 Samuel 10:1; 16:13; ipareng so Exodo 30:25, 30; Levitico 8:12; 2 Samuel 22:51; Salmo 133:2.) Ingen, arum, a singa si propeta Eliseo tan say ari na Siria a si Hazael, so asalita bilang “alanaan” anggaman anggapo so paneknek a sikara so alanaan na literal a larak. (1 Arari 19:15, 16; Salmo 105:14, 15; Isaias 45:1) Sirin, say sinansakey so nayarin “alanaan a sakey” diad inpakapili odino nikadkaduman tinuro.

Diad sayan pantalos si Moises mismo so alanaan a sakey na Dios, tan impatalos ni ingen na arum a Biblia bilang “Nilanaan na Dios” odino “say Alanaan a Sakey” diad Hebreos 11:26. Si Moises so tinuro bilang manangilaman nen Jehova tan say sakey a mangipangulo ed Israel ya ompaway ed Egipto. (Exodo 3:2-12, 15-17) Anggaman si Moises so binmaleg ed utel na kayamanan tan gloria na Ehipto, pinabli ton nagkalalo so inkaturo to, a satan so inawat tan sinumpal to. Matukotukoy, nayarian nen Pablo ya isulat a si Moises et “pinabli to a balbaleg a kayamanan so kamormora ed Cristo nen saray kayamanan na Egipto.”