Makapalikdo so Itsura

“AGNAPANMATALKAN so itsura,” inkuan na dramatistan Irish a si Richard Sheridan. Saya so tua no nipaakar ed saray kiew ontan met ed totoo.

Sakey ya agew ed kaunoran na Marso ed taon 33 K.P., anengneng nen Jesu-Kristo so sakey a kiew ya higos legan a sikato tan saray babangatan so manaakar manlapud Betania a mamaarap ed Jerusalem. Say kiew so mabulong, bangbalet nen inasinggeran et naimanon andian na anggan sakey a bunga. Kanian inkuan nen Jesus: “Angapo’y too’n mangan na bungam a manlapu ed sika natan ya anga ed anga.”​—Marcos 11:12-14.

Akin ya insamba nen Jesus iman a kiew anta, singa ipapaliwawa nen Marcos et “aliwa’n sikato so panaon day higos”? (Marcos 11:13) Bueno, sano say kiew ya higos so walaan na bulobulong, gendagendat a saman so masakbay a manbunga. Nikadkaduma para’d kiew ya higos a walaan na bulobulong diad saman a panaon na taon. Balet lapud ta awalaan na saray bulong, makanepegan ya ilalaon nen Jesus a makaromog na bunga. (Nengnengen so retrato ed tagey.) Say katuaan a say kiew so mamapawala labat na bulobulong et mankabaliksan a saman so agmanbunga. Say itsura to so makapalikdo. Lapud saray kiew a manbubunga so buibuisan, say sakey a kiew ya anggapoy bunga so pabelat ed panagbilay tan kaukolan a napupo.

Inusar nen Jesus itan ya agmanbungan kiew ya higos pian iyilustra so sakey a makanan leksion nipaakar ed pananisia. Diad ontumbok ya agew, saray babangatan to so nikelawan ed impakanengneng a saray bulong so amagaan la. Insalaysay nen Jesus: “Manisia kayo ed Dios. . . . Amin a bengabengatla ya pikasi yo tan kerewen yo, sisiaen yo ya awaten yo, et wala ra naani ed sikayo.” (Marcos 11:22-24) Niarum ni ed impangiyilustra ed pankaukolan a panpikasin walaay pananisia, say amagaan a kiew ya higos so malinew ya angipanengneng ed no anto so nagawa ed sakey a nasyon a kulang na pananisia.

Pigaran bulan sakbay ya agawa iya, say Judion nasyon so inyaliling nen Jesus ed sakey a kiew ya higos ya agnanbunga ed loob na taloran taon tan nepeg a pupoen no mansiansian agmanbunga. (Lucas 13:6-9) Diad pangisasamba ed kiew ya higos apatiran agew lambengat sakbay na ipatey to, impanengneng nen Jesus no panon a say Judion nasyon so ag-amawala na saray bungan makanepegan na panagbabawi tan sirin nilinya para’d kadederal. Anggaman saman a nasyon​—singa say kiew ya higos—​diad palaway et singa masalumpapak, say asingger ya inengneng et mamaneknek ed kakulangan na pananisia a nansumpal ed impangitalirak ed say Mesias.​—Lucas 3:8, 9.

Diad Sermon ed Palandey, si Jesus so amasakbay sumpa’d “aliwa’n tuan profetas” tan inkuanto: “Napatnagan yo ra lapu’d saray bunga ra. Makaborbor ta’ray totoo na uvas ed saray espino, odino higos ed saray sabitan. Ontan met ya amin a maong ya kiew a mangiter na maong a bunga; sa balet so aderal a kiew mangiter na aliwan maong a bunga. Say maong a kiew agnayari’n manbunga na mauges a bunga, et agmet nayarian na aderal a kiew so manbunga na maong ya bunga. Balang kiew ya agmanbunga na maong a bunga sikato so nabatang tan ibontok ed apuy. Kanian diad saray bunga ra so nibiig yo ra.” (Mateo 7:15-20) Sarayan salita nen Jesus tan say salaysay nipaakar ed nisamban kiew ya higos so malinew a mangipapanengneng a kaukolan tayon bantayan so espiritualidad tayo, ta saray relihyoson itsura so makapalikdo met.