“Singa Omoang a Leon”
KASIN manisia kayo a si Satanas so wala? Natan, dakel so agmanisia. Ompatnag a momoriaen da itan a sisiaen bilang “agsientipiko.” Anggano nensaman ed 1911, inkuan na Encyclopœdia Britannica: “Say siensia so mangisasalaysay na ontanlan dakel a kurang na liwang tan ed akindalem a bilay na too ya agla panisiaan a wala so Satanikon ahensya.” Ikakatunongan na saray teologo a si Satanas so sakey lambengat a simbolo, sakey a mito. Kuan na The World Book Encyclopedia: “Ipapasen na dakel a modernon teologo so Diablo a sakey a simbolo na pakayari mauges, na sankaugsan iran kalidad ed inkanatural na too.”
Anggaman kuan, antoray katuaan? No sisiaen yo so Biblia, kaukolan yon sisiaen a si Satanas so peteg. Si Jesus so aglambengat anisia a sikato so wala balet tinawag to a “manuley na mundo.” (Juan 14:30, NW) Tinawag nen apostol Pablo si Satanas a “say dios na sayan sistema na bengabengatla.” (2 Corinto 4:4, NW) Tan inkuan na masiken lan apostol Juan: “Say sankamundoan mandokdokol ed kaugsan.”—1 Juan 5:19.
No sumlangen yo si Juan, nonoten so agano nin awaran. Kunsideraen iray iskuwad ed pamatey tan panamairap na saray gobierno. Tandaan iray bakal tan palanit a panagpatey ya anengneng na kailalakan tayo. Tan komusta met so maruksa iran krimen ya agawan paulo ed saray dyaryo tayo—saray turobos a panagpatey, panagpasoot, tan mantutumbokan a pateyan, say seksual a panangabuso ed ugugaw, pian bitlaen labat so pigara? Kasin wala ni so arum noagta si Satanas so dios na sayan mundo?
Impasakbay nen kristianon apostol Pedro: “Manbantay kayo; ta say kabusol yo, say diablo, wala ed kaliberliber yo ya singa omoang a leon a mananap na buagen to.” (1 Pedro 5:8) No sakey a leon so inbulos ed barangay yo, kasin pansisingbatan yo no kasin satan so wala odino anggapo? Odino kasin sikayo so ombatik pian onamot?
Napaseguroan tayo a wala si Satanas. Sikato so andian na panangasi tan maruksa, tan sikatoy mas mabiskeg nen say sikatayo. Kanian ombatik parad salimbeng ed Samay mas mabiskeg ni. “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.” (Uliran 18:10) Pasalimbengan ed si Jehova a Dios, tan amtaen a diad asingger et nibulos so katooan manlapud impluensya na satan a mauges, si Satanas. Agaylan magayagan pakainawaan itan!—Apocalipsis 20:1-3.