Apocalipsis—Asingger la so Engranden Kapantokan To!
Katuloyan na Kapitulo 14
Onaniweng So Dayew nen Jehova
Pasingawey 2—Apocalipsis 4:1–5:14
Tema: Makapakelkelaw a nagagawa ed arap na trono na panangukom na Dios
Panaon na kasumpalan: Sayan pasingawey so mangidadatak ed saray ebenton nagagawa nanlapulad 1914 ya anggad anggaan na Milenyo tan diad labas to, sano kada pinalsa a wala ed tawen tan ed dalin so mangidayew ed si Jehova.—Apocalipsis 5:13
23. Anto so insimbolo na katuaan a saray apatiran mabilay a pinalsa so “napno na saray mata,” tan anto so idadanet na impakawalaan da na taloran paris a payak?
23 Intultuloy nen Juan so salaysay to: “Tan no nipaakar ed apatiran mabilay a pinalsa, balang sakey ed sikara so walaan na apatiran payak; manliberliber tan diad leksab et sikara so napno na mata. Tan andian ira na painawa ed agew tan labi legan ya ibabaga ra; ‘Santo, santo, santo si Jehova a Dios, say Makapanyarin-amin, a sikato so wala nensaman tan wala natan tan saman so onsabi.’” (Apocalipsis 4:8) Sayan inkagnap ed saray mata so mangisusuhiri ed kumpleto tan arawi-pakanengneng a pasingawey. Saray apatiran mabilay a pinalsa so mangaagamil ed saya ya andi-tunda, unong ta agda nakaukolan so iyugip. Aaligen da so Sakey a diad sikato et nisulat: “No nipaakar ed si Jehova, saray mata to so manliliber ed amin a dalin pian ipanengneng so biskeg to a nisesengeg ed saraman so say puso ra et nagnap ed sikato.” (2 Awaran 16:9) Lapud walaan na baleg a bilang na saray mata, saray kerubin so makanengneng ed amin a pasen. Anggapo so makaliktar ed imano ra. Sirin sikara so akinlongan a maong a manlingkor ed Dios ed kimey na pangukom to. Diad sikato et nibaga: “Saray mata nen Jehova so wala ed amin a pasen, a manbabantay ed saray mauges tan saray maong.” (Uliran 15:3) Tan walaan na taloran paris a payak—say bilang a talora so nausar ed Biblia diad pangidanet—saray kerubin so makagalaw a tekep na singa kirmat a siglat diad pangiyabawag ed saray panangukom nen Jehova tan sumpalen da ra.
24. Panon so pandadayew na saray kerubin ed si Jehova, tan diad anton kabaliksan?
24 Ontalineng! Melodya, makapaligsay kamarerwa, so kanta na panagdayew ya isasaklang na saray kerubin ed si Jehova: “Santo, santo, santo si Jehova a Dios, say Makapanyarin-amin, a wala nensaman tan wala natan tan saman so onsabi.” Lamet, say inkatalora so mangipapanengneng na biskeg. Saray kerubin so mabiskeg a mamepekder ed kasantosan nen Jehova a Dios. Sikato so Subol tan say ultimon Estandarte na kasantosan. Sikato met so “Ari ed andi-anggaan,” naynay a “say Alpa tan say Omega, say ununa tan say unor, say gapo tan say sampot.” (1 Timoteo 1:17; Apocalipsis 22:13) Saray kerubin so andian na painawan panaon legan ya iyaabawag da so andi-kaparan kalidad nen Jehova ed arap na amin a pinalsa.
25. Panoy pankakasakey na saray mabilay a pinalsa tan saray 24 mamatatken diad panangidayew ed si Jehova?
25 Say tawen na katawenan so mangipapaknol ed saray dayew nen Jehova! Mantultuloy so salaysay nen Juan: “Tan kapiganman a saray mabilay a pinalsa so mangiyapay na gloria tan dayew tan pisasalamat ed samay sakey ya akayurong ed trono, say sakey a manbibilay ed ando lan ando, saray duamplo-tan-apat a mamatatken so ondakmomo ed arap na samay Sakey ya akayurong ed trono tan mandayew ed samay sakey a manbilay na ando lan ando, tan ibuntok daray balanget da ed arap na trono, a kuan da: ‘Sika so manepeg, Jehova, a Dios mi, a mangawat na gloria tan say dayew tan say pakayari, lapud pinalsam so amin a bengatla, tan lapud linawam et sikara so linmesa tan apalsa.’” (Apocalipsis 4:9-11) Diad amin a Kasulatan, saya so sakey ed saray sanka-engrandian a panangiyabawag na panagdayew ed si Jehova, say Dios tayo tan Soberanon Katawan!
26. Akin a saray 24 mamatatken so angibuntok na saray balanget da ed arap nen Jehova?
26 Saray 24 a mamataken so walaan na parehon kipapasen na nonot ya impatnag nen Jesus, imbuntok da ni ingen iray balanget da ed arap nen Jehova. Arawi ed kanonotan da so pangalangon ed inkasikara diad arapan na Dios. Sipapaabeban binidbir dan say mogmon gagala na inkaari ra et say pangitarok na dayew tan gloria ed sikato, a singa naynay a ginawa nen Jesus. (Filipos 2:5, 6, 9-11) Situtulok, bibidbiren da so dilin inkaabeba ra tan ipatua ran say pananguley da so mandepende ed inkasoberano nen Jehova. Sirin, sikara so wala ed impapuson pitutunosan ed saray kerubin tan ed amin a matoor a pinalsan mangiter na dayew tan gloria ed Dios ya amalsa ed amin a bengatla.—Salmo 150:1-6.
27, 28. (a) Panon a say salaysay nen Juan ed sayan pasingawey so mangapekta ed sikatayo? (b) Antoran tepet so onlesa no nipaakar ed ontumbok a nanengneng tan narengel nen Juan?
27 Siopa so makapansiansian agnagalaw diad pamasa ed salaysay nen Juan ed sayan pasingawey? Sikato so sankarakpan, engrande! Balet anto so nepeg a nengneng na kapetegan? Say mismon karlangan nen Jehova so nepeg a mamaliing ed siopaman a walaan na manamablin puson mibiang ed apatiran mabilay a pinalsa tan saray 24 mamasiken diad pangidadayew ed Sikato, namparan diad pikakasi tan diad mapublikon panangiyabawag ed ngaran To. Saya so Dios ya apribilihyoan na saray Kristiano a pagmaliwan a tastasi natan. (Isaias 43:10) Nonoten a say pasingawey nen Juan so onaplika ed agew nen Jesus, a ditan so kawalaan tayo natan. “Saray pitoran espiritu” so lawas akaparaan a mangigiya tan mamabiskeg ed sikatayo. (Galacia 5:16-18) Say Salita na Dios so wala natan ya ontulong ed sikatayon magmaliw a masanto diad panlingkor ed sakey a masanton Dios. (1 Pedro 1:14-16) Segurado, sikatayo so maliket a mamasan maksil ed saray salita na sayan propesiya. (Apocalipsis 1:3) Agaylan kasagyatan so iter da diad pagmaliw a matoor ed si Jehova tan ag-abuloyan so mundon mangamper ed sikatayo a manlapud aktibon panangikanta ed saray dayew to!—1 Juan 2:15-17.
28 Anggad sayan bekta, deneskribe nen Juan so anengneng to sanen sikato so naimbitaan ya onasingger ed panamegley na saman a puertan alukasan ed tawen. Lalon matalona, imbalita ton si Jehova, ed amin a karakpan na karlangan To tan dignidad, so manyudyurong ed mangatatawen a trono To. Sikato so niliktub na sankabiskegan ed amin ya organisasyon—marlang ed karlangan to tan inkaari. Say madibinon Korte so walaan na sesyon. (Daniel 7:9, 10, 18) Say intablado so niletneg para ed nikadkaduman nagawa. Anto ’tan, tan panon so pangapekta to ed sikatayo natan? Bantayan tayo legan a nilukas so eksena!