Apocalipsis​—Asingger la so Engranden Kapantokan To!

Kapitulo 15

“Siopa So Manepeg a Manlukas ed Lukot?”

1. Anto so agawa natan ed pasingawey nen Juan?

Sankarakpan! Makapasagyat! Ontan so makapaliing a pasingawey ed trono nen Jehova diad letnegan to ed utel na saray silewan ya apuy, saray kerubin, saray 24 a mamatatken, tan say dayat a salming. Balet Juan, anto so ontumbok a nanengneng mo? Iyapasakey nen Juan ed mismon sentro na sayan mangatatawen ya eksena, ya ibabaga to ed sikatayo: “Tan anengneng ko ed kawanan a lima na samay Sakey ya akayurong ed trono so sakey a lukot ya asulatan ed loob tan dia ed pigar, atatakan a malet na pitoran tatak. Tan anengneng ko so sakey a mabiskeg ya anghel a mangiyaabawag ed maksil a boses: ‘Siopa so manepeg a manlukas ed lukot tan mangukbar na saray tatak to?’ Balet anggapo diad tawen nisay diad tapew na dalin nisay diad leksab na dalin so sakey a makayarin manlukas ed lukot odino onnengneng ed sikato. Tan siak so nannangis na baleg lapud anggapo so sakey ya aromog a manepeg a manlukas ed lukot odino onnengneng ed sikato.”​—Apocalipsis 5:1-4.

2, 3. (a) Akin a si Juan so magunaet a say sakey so naromog a manlukas ed lukot, balet anto so impatnag ya ilalo ed satan? (b) Nipaakar ed anto so magunaet ya aalagden na saray alanaan a totoo na Dios ed panaon tayo?

² Si Jehova a mismo, Soberanon Katawan na amin a palsa, so mangegna ed satan a lukot. Satan so talagan napno na saray makanan impormasyon, lapud walaan na sulat ed arap tan diad beneg. Say inkamausisa tayo so asagyat. Anto so karga na lukot? Nanonotan tayo so imbitasyon nen Jehova ed si Juan: “Segep ka dia, tan ipanengneng ko ed sika iray bengatlan nagawa.” (Apocalipsis 4:1) Dingan na maaniweng a pantatalaran, onnengneng itayo ed arapen diad pakaaral ed saratan a bengatla. Balet nia, say lukot so akaputan a malet, atatakan na pitoran tatak!

³ Kasin naromog na mabiskeg ya anghel so sakey a manepeg a manlukas ed lukot? Unong ed Kingdom Interlinear, say lukot so wala ed “kawanan a lima” nen Jehova. Isusuhiri na saya a bebembenan to ed lukas a dakulap. Balet ompatnag ya anggapo so sakey ed tawen odino diad dalin a manepeg a mangawat tan manlukas ed satan a lukot. Anggapo anggan diad leksab na dalin, anggan diad limog na saray matoor ya ariripen na Dios ya inatey la, so kualipikado ed sayan atagey a galang. Agpankelawan a si Juan so anengneng ya agonigon! Anganko ta agto lamlamang naaralan “iray bengatlan nagawa.” Diad agew tayo, met, saray alanaan a totoo na Dios so magunaet a nanalagar ed si Jehova a mangibaki na liwawa tan katuaan to ed Apocalipsis. Saya so gawaen ton progresibo diad aturon panaon ed kasumpalan na propesiya, ta pian iwanwan to so totoo to diad dalan na “engranden kilalaban.”​—Salmo 43:3, 5.

Say Sakey a Manepeg

4. (a) Siopa so nalmon manepeg a manlukas ed lukot tan saray tatak to? (b) Ed anton tumang tan pribilihyo so pibibiangan natan na Juan a klase tan saray kakaiba ra?

⁴ On, wala so sakey a makayarin manlukas ed lukot! Insalaysay nen Juan: “Balet sakey ed saray mamatatken so angikuan ed siak: ‘Agka onnanangis. Nia! Say Leon a nanlapud tribu nen Juda, say lamut nen David, so analo ta pian lukasan to so lukot tan saray pitoran tatak to.’” (Apocalipsis 5:5) Sirin, Juan, pamagam iratan a lua! Say Juan a klase tan saray matoor a kakaiba ra natan so nansungdo met ed saray pigamplon taon na mabibiskeg a subok legan ya aalagden dan siaanos so pakaliwawaan. Agaylan makaligliwan tumang so wala ed sikatayo natan diad impakatalos ed pasingawey, tan agaylan pribilihyo so pibiang ed kasumpalan to diad pangiyabawag ed mensahe to ed saray arum!

5. (a) Anton propesiya so asalita nipaakar ed Juda, tan iner so panuleyan na saray kapolian nen Juda? (b) Siopa si Shilo?

⁵ Ah, “say Leon a nanlapud tribu nen Juda”! Si Juan so mikabisado ed propesiyan inyabawag nen Jacob, ateng na rasan Judio, nipaakar ed komapat ya ilalak to, si Juda: “Sakey a kilaw na leon so Juda. Manlapu ed tapang, anako, sika so peteg ya ontatdang. Sikato so dinmumurom, inyunat to so inkasikato a singa sakey a leon tan, singa sakey a leon, siopa so naliing ed sikato? Say setro so ag-onarawi a manlapud Juda, nisay say tayukor na managganggan a manlapud baetan na saray sali to, ya anggad say Shilo so onsabi; tan diad sikato et say katutulok na saray totoo so kayarian to.” (Genesis 49:9, 10) Say maarin linya na totoo na Dios so sinengeg a nanlapud Juda. Onggapo ed si David, amin na saray ararin nanuley ed Jerusalem ya anggad impaneral na saray taga Babilonia ed saman a syudad et kapolian nen Juda. Balet anggapo ed sikara so Shilo ya impropesiya nen Jacob. Say Shilo et kabaliksan to so “Sikato So [Akankanepegan].” Mapropetiko, sayan ngaran so mangituturo ed si Jesus, say sakey a permanentin akankayarian ed Davidikon Panarian natan.​—Ezequiel 21:25-27; Lucas 1:32, 33; Apocalipsis 19:16.

6. Diad anton dalan a si Jesus so “sakey a sanga” nen Jesse tan ontan met a “say lamut nen David”?

⁶ Abidbir a tampol nen Juan so impanukoy ed “lamut nen David.” Say nisipan a Mesias so mapropetikon atawag a “sakey a sanga ed sengeg nen Jesse [ama nen Arin David] . . . sakey a simit” tan “say lamut nen Jesse a manalagey bilang sakey a tanda ed totoo.” (Isaias 11:1, 10) Si Jesus so sakey a sanga nen Jesse, unong ya inyanak ed maarin linya nen David, ilalak nen Jesse. Nagkalalo ni, bilang sakey a lamut nen Jesse, sikato so Sakey a pansimitan lamet na Davidikon dinastya, a mangiter ed sikato na bilay tan sustento ed ando lan ando.​—2 Samuel 7:16.

7. Anto so manggawa ed si Jesus a manepeg a mangala ed lukot a manlapud lima na samay Sakey ya akayurong ed trono?

⁷ Mapatnag a si Jesus so sakey a, bilang sakey ya ayadyarin too, nanlingkor ed si Jehova ed katooran tan diad leksab na makapaot-ot iran subok. Inter to so kumpleton ebat ed angat nen Satanas. (Uliran 27:11) Sirin, nayarian ton ibaga so singa imbaga to ed samay labi sakbay na masakripisyon impatey to, “tinalok so mundo.” (Juan 16:33) Nisengeg ed sayan rason, inmatalek nen Jehova ed sayan apaolin Jesus so “amin a pakauley . . . ed tawen tan diad dalin.” Sikato lambengat ed amin ya ariripen na Dios so kualipikadon mangawat ed lukot, diad gagalan pangipakabat ed makabaliksan a mensahe to.​—Mateo 28:18.

8. (a) No nipaakar ed Panarian, anto so mangipanengneng ed inkamanepeg nen Jesus? (b) Akin a matukoy a sakey ed saray 24 a mamatatken so mangiparungtal ed si Juan ed personan manepeg a manlukas ed lukot?

⁸ Matukotukoy, peteg, a lukasan nen Jesus so lukot. Nanlapulad 1914 et sikato so nitrono bilang ari ed Mesianikon Panarian na Dios, tan satan a lukot so mangipaparungtal na malaem nipaakar ed Panarian tan no anto so gawaen to. Si Jesus so sitotoor a nantasi ed katuaan na Panarian legan a sikato so wadia ed dalin. (Juan 18:36, 37) Imbangat toray patumbok ton mangipikasi ed isabi na Panarian. (Mateo 6:9, 10) Inggapo to so panangipulong ed maong a balita na Panarian diad gapo na Kristianon panaon tan impropesiya to so kapantokan na satan a kimey na panagpulong legan na panaon na anggaan. (Mateo 4:23; Marcos 13:10) Matukotukoy met a sakey ed saray 24 a mamatatken so mangiparungtal ed si Juan a si Jesus so sakey a manlukas ed saray tatak. Akin? Lapud sarayan mamatatken so akayurong ed trono tan abalangetan, unong ta sikara so kaiban mananawir nen Kristo ed Panarian to.​—Roma 8:17; Apocalipsis 4:4.

‘Say Kordero a Pinatey’

9. Imbes a sakey a leon, anto so anengneng nen Juan a manalalagey “ed pegley na trono,” tan panon so impaneskribe to ed satan?

⁹ Si Juan so onnengneng ed sayan “Leon a nanlapud tribu nen Juda.” Balet agaylan makapakelkelaw! Sakey a kumpleton nikaduman simbolikon pigura so pinmatnag: “Tan anengneng kon manalalagey ed pegley na trono tan ed apatiran mabilay a pinalsa tan diad pegley na mamatatken sakey a kordero a singano pinatey, a walaan na pitoran saklor tan pitoran mata, a saray mata to et kabaliksan to so pitoran espiritu na Dios a nibaki ed interon dalin.”​—Apocalipsis 5:6.

10. Siopa so “kordero” ya anengneng nen Juan, tan akin a say termino so matukotukoy?

¹⁰ Diad mismon ed sentro, ed diking na trono, ed loob na saray sirkulon pinorma na apatiran mabilay a pinalsa tan saray 24 a mamatatken, wala so sakey a kordero! Andi-duaruwan tampol ya abidbir nen Juan iyan kordero ed “Leon a nanlapud tribu nen Juda” tan “say lamut nen David.” Kabat to a, masulok lan 60 taon ed asasakbay, si Juan a Managbautismo so angiparungtal ed si Jesus ed saray onnenengneng a Judios a bilang “say Kordero na Dios a mangekal ed kasalanan na mundo!” (Juan 1:29) Legan na bilay to ed dalin, si Jesus so nansiansian agminantsaan na mundo​—singa sakey ya andi-matik a kordero​—ta pian nayarian ton iyapay so andi-tilol a bilay to bilang sakey a bagat a para ed katooan.​—1 Corinto 5:7; Hebreos 7:26.

11. Akin ya aliwan agmagalang so pangirepresenta ed si niglorian Jesus bilang “sakey a kordero a singano pinatey”?

¹¹ Kasin singa panagmelmelag odino agpanangigalang so pangirepresenta ed niglorian Jesus a bilang “sakey a kordero a singano pinatey”? Andin balot! Say katuaan a si Jesus so nansiansian matoor ya anggad patey so manunan inkatalo nen Satanas tan baleg ya impanalo nen Jehova a Dios. Say impangirepresenta ed si Jesus ed onian nengneng so mabitar a mangiretrato ed impanalo to ed mundo nen Satanas tan sakey a panonot ed aralem a panangaro nen Jehova tan si Jesus para ed katooan. (Juan 3:16; 15:13; ipareng so Colosas 2:15.) Sirin si Jesus so inturo a bilang nisipan a Bini, a matalonan kualipikadon manlukas ed lukot.​—Genesis 3:15.

12. Anto so ireretrato na saray pitoran saklor na Kordero?

¹² Anto ni so mangarum na apresasyon tayo ed sayan “kordero”? Sikato so walaan na pitoran saklor. Saray saklor ed Biblia so mabetbet a sakey a simbolo na pakayari odino autoridad, tan say pitora so mangipanengneng na inkagnap. (Ipareng so 1 Samuel 2:1, 10; Salmo 112:9; 148:14.) Sirin, say pitoran saklor na Kordero so mangirepresenta ed inkagnap na pakayari ya inmatalek nen Jehova ed si Jesus. Sikato so “atagey a tuloy nen saray gobierno tan pakauley tan pakayari tan inkakatawan tan amin a ngaran a ningaran, aliwa lambengat ed sayan sistema na bengabengatla, noagta ontan met ed onsabi.” (Efeso 1:20-23; 1 Pedro 3:22) Si Jesus so nagkalautlan angagamil na pakayari, ginogobiernon pakayari, nanlapulad 1914 sanen sikato so introno nen Jehova bilang mangatatawen ya Ari.​—Salmo 2:6.

13. (a) Anto so ireretrato na saray pitoran mata na Kordero? (b) Anto so ituloy a gawaen na Kordero?

¹³ Nagkalalo ni, si Jesus so napno ed inkagnap diad masanton espiritu, a singa inretrato na pitoran mata na Kordero, a “kabaliksan to so pitoran espiritu na Dios.” Si Jesus so sakey a paralanan a diad panamegley to et say inkagnap na aktibon puersa nen Jehova so onagus ed saray mangaraldalin ya ariripen to. (Tito 3:6) Mapatnag, diad sayan parehon espiritu a nanenengneng to manlapud tawen no anto so nagagawa dia ed dalin. Singa si Ama to, si Jesus so walaan na ayadyarin pakatebek. Anggapo so nalegyas ed imano to. (Ipareng so Salmo 11:4; Zacarias 4:10.) Malinlinew, sayan Anak​—say manamemben na katooran a nantalo ed mundo; say Leon ed tribu nen Juda; say lamut nen David; say sakey ya angisaklang na bilay to a para ed katooan; say sakey a walaan na nagnap ya autoridad, nagnap ed masanton espiritu, tan ayadyarin pakatebek a manlapud si Jehova​—on, sayan sakey so matalonan manepeg a mangala ed lukot a manlapud lima nen Jehova. Kasin sikato so masuyat a mangawat ed sayan komisyon na serbisyo ed matalunggaring ya organisasyon nen Jehova? Andi! Imbes, “sikato so linma tan tampol ya inala to [say lukot] a nanlapud kawanan a lima na samay Sakey ya akayurong ed trono.” (Apocalipsis 5:7) Agaylan maabig ya ehemplo na mabulos a katutulok!

Saray Kanta na Panagdayew

14. (a) Panoy ikiwas na saray apatiran mabilay a pinalsa tan saray 24 a mamatatken diad pangala nen Jesus ed lukot? (b) Panon a say impormasyon ya inawat nen Juan nipaakar ed 24 a mamatatken so mamekder ed pakabidbiran tan posisyon da?

¹⁴ Panon so ikiwas na saraman so arum a wala ed arap na trono nen Jehova? “Tan sanen inala to so lukot, saray apatiran mabilay a pinalsa tan saray duamplo-tan-apat a mamatatken so dinmakmomo ed arap na Kordero, a balang sakey so walaan na arpa tan binmalitok iran yaong a napno na insenso, tan say insenso et kabaliksan to so pikakasi na saray sasantos.” (Apocalipsis 5:8) Singa saray apatiran kerubin a mabilay a pinalsa ed arap na trono na Dios, saray 24 a mamatatken so ondakmomo ed si Jesus diad panamidbir ed autoridad to. Balet sarayan mamatatken so mogmon walaan na saray arpa tan saray yaong na insenso.a Tan sikara lambengat so mankakanta natan na sakey a balon kanta. (Apocalipsis 5:9) Sirin kapadpara ra so 144,000 a santo na “Israel na Dios,” a mangaawit met ed saray arpa tan mangakanta na sakey a balon kanta. (Galacia 6:16; Colosas 1:12; Apocalipsis 7:3-8; 14:1-4) Nagkalalo ni, saray 24 a mamatatken so nipanengneng a manusumpal na mangatatawen, sinasaserdoten kimey, ya inretrato na saramay saserdote ed kadaanan ya Israel a nampool na insenso ed si Jehova diad tabernakulo​—sakey a trabahon anampot ed dalin sanen inekal na Dios so Mosaikon Ganggan, ya impasak to ed panamairapan a kiew nen Jesus. (Colosas 2:14) Anton konklusyon so naagwat tayo a manlapud amin na saya? A dia et anengneng iray alanaan a mananalo ed ultimon kimey da bilang ‘saserdote na Dios tan ed Kristo, a manuuley bilang arari a kaiba to ed sanlibon taon.’​—Apocalipsis 20:6.

15. (a) Diad Israel, siopa lambengat so apribilihyoan ya onloob ed Sankasantosan na tabernakulo? (b) Akin a sakey a pamaakaran na bilay o patey para ed atagey a saserdote so pampool na insenso sakbay ya onloob ed Sankasantosan?

¹⁵ Diad kadaanan ya Israel, say iloob ed Sankasantosan ed arap na simbolikon kiwawala nen Jehova so nigeter ed atagey a saserdote. Para ed sikato, say pangawit ed insenso so sakey a pamaakaran na bilay-o-patey. Inkuan na ganggan nen Jehova: “Si [Aaron] so nepeg a mangala ed egnaan na apuy a napno na saray mandarlang a ngalab na apuy a manlapud altar diad arap nen Jehova, tan diad saray dakulap na lima to et napno na pinon ambalingit ya insenso, tan nepeg ton iloob ed kurtina. Nepeg met ya ikarga to so insenso ed tapew na apuy ed arap nen Jehova, tan say lurem na insenso so nepeg a nibilkag ed sakbong na Kaban, a wala ed tapew na Pantasi, ta pian sikato komon so ag-ompatey.” (Levitico 16:12, 13) Imposibli ed atagey a saserdote so iloob a matalona ed Sankasantosan likud no sikato so manpool na insenso.

16. (a) Diad Kristianon sistema na bengabengatla, siopa so onloob ed antitipikon Sankasantosan? (b) Akin a saray alanaan a Kristianos so nakaukolan a ‘manpool na insenso’?

¹⁶ Diad Kristianon sistema na bengabengatla et aliwa lambengat a say antitipikon Atagey a Saserdote, si Jesu-Kristo, noagta ontan met ed balang sakey na 144,000 a katambayan-a-saserdote so diad kaunoran et makaloob ed antitipikon Sankasantosan, say pasen na kiwawala nen Jehova ed tawen. (Hebreos 10:19-23) Say iloob ed sayan Sankasantosan so imposibli ed sarayan saserdote, a singa inrepresenta dia na 24 a mamatatken, likud no sikara so ‘manpool na insenso,’ salanti, naynay a mangiyapay na saray pikakasi tan pikekerew ed si Jehova.​—Hebreos 5:7; Judas 20, 21; ipareng so Salmo 141:2.

Sakey a Balon Kanta

17. (a) Anton balon kanta so kakantaen na 24 a mamatatken? (b) Panon a say balikas a “balon kanta” so gendagendat a nausar ed Biblia?

¹⁷ Sakey a melodikon kanta so ontanol natan. Satan so kinanta na saray saserdoten kakaiba to, saray 24 a mamatatken parad Kordero: “Tan kantaen da so balon kanta, a kuanda: ‘Sika so manepeg a mangala ed lukot tan manlukas ed saray tatak to, lapud sika so pinatey tan diad dalam et sinaliw moray totoo a para ed Dios a nanlapud amin a tribu tan pansasalita tan totoo tan nasyon.’” (Apocalipsis 5:9) Say balikas a “balon kanta” so nausar ed pigaran danay diad Biblia tan mabetbet a tutukoyen to so panangidayew ed si Jehova ed bengatlan makapanyarin gawa na panangiliktar. (Salmo 96:1; 98:1; 144:9) Sirin, say kanta so balo lapud say managkanta so makayarin mangiyabawag natan na kaaruman iran makapakelaw a gawa nen Jehova tan mangibalikas na apasimbalon apresasyon ed maglorian ngaran To.

18. Diad anto so pangidadayew na 24 a mamatatken ed si Jesus ed balon kanta ra?

¹⁸ Dia, anggaman kuan, saray 24 a mamatatken so mangakanta na sakey a balon kanta ed arap nen Jesus imbes a dia ed arap nen Jehova. Balet say prinsipyo so pareho. Dadayewen da si Jesus nisesengeg ed saray balon bengatla a, singa say Anak na Dios, ginawa to a nisesengeg ed sikara. Diad panamegley na dala to, sikato so amegley ed balon sipanan tan sirin ginawa ton posibli so pamawala na sakey a balon nasyon bilang nikabkabiig a kayarian nen Jehova. (Roma 2:28, 29; 1 Corinto 11:25; Hebreos 7:18-25) Saray membro na sayan balon espiritual a nasyon so nanlapu ed dakel iran silalaman a nasyones, balet sikara so impankakasakey nen Jesus ed sakey a kongregasyon bilang sakey a nasyon.​—Isaias 26:2; 1 Pedro 2:9, 10.

19. (a) Anton bendisyon so sinmaew a namoria na silalaman ya Israel nisesengeg ed agda katooran? (b) Anton bendisyon so panggagayagaan na balon nasyon nen Jehova?

¹⁹ Sanen tinibukel nen Jehova so Israelitas ed sakey a nasyon diad saray agew nen Moises, sikato so nanggawa na sakey a sipanan ed sikara tan insipan ton no sikara so mansiansian matoor ed satan a sipanan, sikara so magmaliw a sakey a panarian na saray saserdote ed arap to. (Exodo 19:5, 6) Saray Israelita so aliwan matoor tan agbalot akasagmak na impakanengneng ed saman a sipan. Diad biek a dapag, say balon nasyon, a tinibukel na birtud na balon sipanan a pinegleyan nen Jesus, so nansiansian matoor. Saray membro to sirin so manuley ed dalin bilang arari tan ontan met a manserbi bilang saserdote, a tulongan daray maptek-impanpuson totoo ed limog na katooan a mipulangan ed si Jehova. (Colosas 1:20) Sikato so singa pangibabalikas na satan a balon kanta: “Tan sikara so ginawam a sakey a panarian tan saserdote ed Dios tayo, tan sikara so manuley bilang arari ed dalin.” (Apocalipsis 5:10) Agaylan gayaga na saray 24 a mamatatken diad pangakanta ed sayan balon kanta na panagdayew ed niglorian Jesus!

(Ituloy ed ontumbok a paway.)

[Paimano ed leksab]