Report na Saray Manangiyabawag ed Panarian
Pinasimbalo Da So Kabibilay Da
ANGGAPOY duaruwan nanenengneng yoran mitotongtong ed arum diad saray lansangan, ondadalaw ed kabkaabungan, odino onaatendi ed saray Kristianon miting diad saray Kingdom Hall da. Tutukoyen mi so nipaakar ed masimpit iran tobonbalon Tasi nen Jehova. Nayarin nibaga yon sikaray Tastasi lapud binangatan ira na atateng da a magmaliw ya ontan, satan so kipapasen na dakel ed sikara. Diad biek a dapag, walaray arum ed sarayan kalangweran a walaan na duman nanlapuan tan say datin kabibilay da so sigpot ya agmipara ed bilay ya ipapakurang da natan. Diad tua, saramay nipanengneng ed ontumbok a pahina so datin akilimog ed saray grupo no iner a say krimen tan panangabuso ed druga so inagew-agew a nagagawa. Anto so nanggawa ed sikaran ontanlan sigpot ya amasimbalo ed kabibilay da? Bisitaen tayo pa so sakey a baley diad Norway tan mikabat ed pigaran kalangweran a manggagaway ontan a panamasimbalo.
Say Pundasyon Para’d Panamasimbalo
Sanen duaran Tasi so akapikabat ed si Annette diad pankabkaabungan a kimey, sikato so 19. “Mabetbet a nibaga’d siak ya agbalot mitotongtong ed saray Tasi nen Jehova, balet siak so maupapet tan inimbitaan koran onloob,” anonotan to. Sikato so manangusar na druga nanlapulad sikato so 11 tan alanor ed pigaran panagsegep tan panagtakew na saray kotse.
Anagyat ed sikato so maong a balita na Panarian. Sikato so nagkalautlan apaseseg ed ilalo diad kioli, unong ta inatey lay ina to sanen sikatoy manedad na limara. Kanian inawat to so sakey a libren panagaral na Biblia tan ginmapon onatendi ed saray miting diad Kingdom Hall. Impanabang toy nanaaralan to’d nobyo to tan diad arum. Say reaksyon? Agda labay so napilanlanor ed pangagamil na tuan panagdayew tan inakusa [day] Annette a nasusogsugan. Anggaman kuan, arum ed saramay manunan sumusumpa so diad saginonor et ginmapon manaral na Biblia.
Bilang sakey ya alimbawa, alaen pa si Espen, sakey a malangwer a lakin 20. Nadngelan to so nipaakar ed maong a balita na Panarian manlapud nobyo nen Annette tan tampol a labay [toy] paiyaralan na Biblia. Anggaman ontan, sikato so nanalagar na dusan kipisok ed apatiran bulan, unong ta sikato so alanor ed panagpuslit na saray druga tan, singa si Annette, diad pigaran panagsegep. Sikato met so manangusar na tabako, marihuana, tan arum niran druga. Natan, anto so makapanggawa ed sakey a toon alanor ed saratan a bengatlan malabay ya onggapon manaral na Biblia? Amoria nen Espen so agmakabaliksan tan kulang na gagalan kabibilay to. Isalaysay to: “Siak so asagyat ed saray sipan na Biblia ed sakey ya arapen ya angiter ed siak na gagala ed bilay. Kanian ginapoan koy manaral ta pian usisaen no kasin tua so nibaga’d siak.
Labay na Arum ya Aralen so Biblia
Diad sayan panaon, sakey a kalangweran a laki ed parehon sirkulo na saray kalangweran so akadngel na maong a balita, tan ginapoan to met so panaral tan iyatendi ed saray miting. Insan, sakey a panagaral so nigapo ed sananey ni ed sarayan tobonbalo, tan ginapoan to so iyaatendi ed saray miting. Diad saginonor, sananey nin kalangweran a laki so akiaral na Biblia ed kakaaro to tan inmaligwas ed espiritual. Insan sananey nin tobonbalo ed parehon grupo so asagyat ed positibon panamasimbalon gagawaen na kakaaro to, tan diad antikey a panaon et labay to so manaral na Biblia.
Si Gilbert, sakey a malangwer a musikero ed parehon grupo, so ginmapo natan a manaral na Biblia. Saray ateng to so namparan inatey ed kanser, kanian sikato so aligliwa ed ilalo ed kioli diad Biblia. (Juan 5:28, 29) Sikato met so anguusar na marihuana tan walaan na mauges a kabibilay, tan awalaan na ambisyon a magmaliw a rock star. Anggaman ontan, diad ilalabas na panaon, sikato so nanggawa na maabig ya aligwas ed espiritual tan ag-abayag et diniside to so magmaliw a sakey a Tasi parad si Jehova. Kaunoran, say lakin yugtan nen Espen so ginmapon manusisa ed Biblia tan milimog ed saray Tasi.
Say Katuaan ed Biblia so Mamapasimbalo ed Saray Panagbilay
Sakey a baleg a panamasimbalo so agawa ed sarayan kalangweran a datin akulastay so panangawes [da], a walaan na asabog a buek, tan alanor ed saray druga, panagtakew, tan arum niran krimen. Si Annette so sakey a maabig a manangipalapag na Panarian tan manlilingkor lan payunir ed ngalngalin sakey taon. Si Espen tan Gilbert so manlilingkor bilang auxiliary payunir, tan sikara met so ministeryal ya ariripen. Sikaran dua so angasawa ed loob na Kristianon kongregasyon. Apatira ni ed datin grupo so maseseg met a manangiyabawag na Panarian!
Komusta so apat-bulan a sentensya nen Espen? Lapud saray pananguman a ginawa to’d kabibilay to, say sentensya to so asalatan na 80 oras na panagkimey ed komunidad. Walay paknaan ed pulis tan arum ni, inusar to irayan oras a mankimey ed lokal a Kingdom Hall na saray Tasi nen Jehova. Saray pulis so aliketan a tuloy ed sayan uksoyan.
On, dakel nin arum a kalangweran ed sankamundoan so nalalanor ed krimen. Balet say katuaan na Salita na Dios so mangeebat ed importante iran tepet da tan sakey a seguradon ilalo parad arapen. Kanian, aliwa laran kriminal odino manangusar na druga, tan ag-ira akulastay ed panangawes da. Walan apasimbalo ed kabibilay da, sikara so eksakton singa ed totoon asaglawi ed tagey—malangwer, masimpit, tan aktibon Tastasi nen Jehova. Labay dan ipakabat ed arum so magnayon iran solusyon na Biblia ed saray problema na dakerakel a kalangweran natan.—Nengnengen so 1 Corinto 6:9-11.
[Litrato ed pahina 8]
Espen, Annette, tan Gilbert