Tabako tan say Klero

MASULOK a 115 taon lay apalabas, say medikal doktor a si John Cowan so nansulat na sakey a libron apauloan na The Use of Tobacco vs. Purity, Chastity and Sound Health. Nisesengeg ed nanaaralan nipaakar ed makapuy iran epekto na tabako diad agano niran taon, saray obserbasyon to ed panangusar na saray klero ed satan so malinew ya inengneng ed arapen tan matukoy ed siopaman a manaanap a manlingkor ed Dios natan. Diad kapitulo 4, a mangibinsabinsa ed moral ya epekto na panangusar na tabako, inkuan nen Dr. Cowan:

“No say panangusar na tabako so mauges ed pisikal​—unong a malinlinew a nipanengneng​—satan so mauges met ed moral; ta say pisiolohikon (paraan na ikukurang na laman na too odino ayep) ganggan ya ‘antokaman a mamakapuy odino mamaalipanes ed laman so mamakapuy met ed nervous system, tan diad panamegley to et say utek, insan say kanonotan.’ Say kanonotan na too​—saray iisipen to, saray balikas to, saray gawa to, so iimpluensyaan na paraan ed panguusar to odino pangaabuso to ed pisikal ya indengan to. Say tabako diad mismon ngaran to tan saray pililimog to so marutak, tan no agiimanoen so epekto na satan say agnabayuboan na kanonotan to so malinis, puro, maptek, moral iran liknaan tan kiwakiwas. Isipen pa ed kanonotan yo, no saratan a bengatla bilbilang​—a si Kristo legan a manbibilay na uliran a panagbilay To diad dalin​—so mangibabangat tan mamupulong na inkamaralus, inkalimgas, panangaro tan panangiter et nansigarilyo, nansungap tan nangagal na tabako. Agta say mismon pannonot ed satan so agpanamagalang ed kasantosan? Ingen ta saray ministro​—papatumbok, saray managpulong, tan saray manangiparungtal na saray ganggan tan doktrina To​— so manudutak ed saray laman da tan manitilol ed kakamarerwa ra diad panamegley na marutak, makasamal a dika. Kasin saratan a totoo, odino papatumbok da so makapangitonton na singa-Kriston kabibilay​—atagey a moral a kabibilay? Diad padesir ko, andi.

“Salien yo pa, no nayarian yo a nonoten so nipaakar ed sakey a masiban too, sakey a nailuam ed alak, odino sakey a manangusar-na-tabako, a nisisiglaot ed kasantosan na puso? Wala so bengatlan agnatural, makapadimla, makapasanok ed saray bengatlan mitunosan ed sarayan ideya. Unong a say kalkaliktan na laman tan palaway iran pakalikna so onkakapuy, ontan met ed akindalem a too, say moral ya indengan, so onpalalo. Say puron espiritu so ag to nayarin manayam ed marutak ya ayaman. Wala so gendagendat a pitukoyan na materyal ed espiritual a bengabengatla, ta pian saray kalidad na sakey so mangipatnag ed ugali na sananey. Sakey a propesor na relihyon tan aripen na tabako . . . Nayarin aksobien to, ed amin ya inkaprangka tan inkasimoon, a say panangusar na tabako so sakey a perhuwisyon kustombre, mauges ed moral; ingen nayarin naromog to a wala so tendensya ed inkasikato a say ganggan na saray membro to, so artipisyal a mamawala, a managyat ed sikato na panpilalek a mantultuloy ed panangamil, tan sayan artipisyal a ganggan so nayarin mabibiskeg nen say impantekep na gendagendat a katunongan tan konsiensia to. Agta say panangusar-na-tabako so malinew ya isusumlang ed sakey ed saray ganggan na Dios ya inpasen ed organismo na laman tayo? Agta say pakalukso na siopaman ed saray ganggan na Dios et sakey ya isusumlang tan sakey a kasalanan? Tan no say sakey a too et maniiluam a manbilay diad pananumlang ed sakey ed saray ganggan na Dios, agta say pananguman et mainomay tan natural parad pananumlang na arum niran ganggan? Tan kaunoran, panon a nakunsidera so siopaman a managbangat ed moral, no diad dilin kondukta et irerekomenda to ed kapara toran pinalsa so bilay na mantultultuloy a pananumlang ed saray ganggan na inkatoo to?”